OTÚ NDỊ KRAỊST SI EBI NDỤ

Ihe Ọhụrụ Ga Na-adịzi n’Ọmụmụ Ihe Etiti Izu Anyị

Malite n’ọnwa Jenụwarị afọ 2018, n’ọmụmụ ihe etiti izu anyị, a ga-enwe ihe ụfọdụ si ná Nsụgharị Ụwa Ọhụrụ Bekee nke a na-amụ amụ (nwtsty), anyị ga-eji na-amụ ihe. Ihe ndị ahụ ga-abụ foto, vidio na ihe ndị ọzọ e ji kọwaa amaokwu Baịbụl ụfọdụ. Ọ bụrụgodị na ọ dịbeghị n’asụsụ unu, o doro anya na ihe ndị ahụ ga-abara unu ezigbo uru mgbe unu na-akwadebe ọmụmụ ihe. Anyị nwere olileanya na ihe ọhụrụ a ga-enye aka mee ka unu bịarukwuo nna anyị na-ahụ n’anya bụ́ Jehova nso.

IHE ỤFỌDỤ A KỌWARA

Ihe ndị a kọwara ga-enyere anyị aka ịmatakwu gbasara omenala, asụsụ na otú ebe ndị a kọrọ akụkọ ha n’ebe anyị na-agụ na Baịbụl dị.

Matiu 12:20

Owu oriọna na-achọ ịnyụ anyụ: Ihe e ji amụnye ọkụ n’ụlọ n’oge ochie na-abụkarị ihe ọkụ e ji ụrọ kpụọ agbanyere mmanụ oliv n’ime ya. Ọ bụ ogho e tinyere n’ihe ọkụ ahụ na-amịta mmanụ na-eme ka ọkụ ahụ na-enwu. Okwu Grik bụ́ “owu oriọna na-achọ ịnyụ anyụ” nwere ike ịpụta owu na-akwụ anwụrụ ọkụ n’ihi na ọ nyụchabeghị ma ọ bụkwanụ na ọ nyụọla. Amụma e buru n’Aịzaya 42:3 gosiri otú Jizọs ga-esi metere ndị mmadụ ebere; ọ gaghị emenyụ ọkụ na-achọ ịnyụ anyụ, ya bụ, olileanya ikpeazụ nke ndị a na-emegbu emegbu.

Matiu 26:13

N’ezie: E si n’okwu Hibru bụ́ ämānʹ, nke pụtara “ka ọ dị otú ahụ,” nweta okwu Grik bụ́ ämēnʹ. Jizọs na-ejikarị okwu a ebido okwu ya iji gosi na ihe ọ na-ekwu, nkwa ọ na-ekwe ma ọ bụ amụma ọ na-ebu bụ eziokwu nakwa na e kwesịrị ịtụkwasị ihe ahụ o kwuru obi. E kwuru na otú Jizọs si kwuo “n’ezie” ma ọ bụ amen pụrụ iche na Baịbụl ma ọ bụ n’akwụkwọ okpukpe ndị ọzọ. N’ebe niile o kwuru amen ugboro abụọ (a·menʹ a·menʹ), dị ka ọ dị n’ebe niile n’Oziọma Jọn, a sụgharịrị ya “n’ezie, n’ezie.”—Jọn 1:51.

IHE E JI KỌWAA IHE ỤFỌDỤ NA BAỊBỤL

Ihe dị ebe a bụ foto, ihe ndị e sere ese, vidio na katuun na-enweghị ụda e ji na-akọwakwu ihe ndị dị na Baịbụl.

Betfeji, Ugwu Oliv na Jeruselem

Ihe a bụ obere vidio gosiri ụzọ e si abanye n’ebe ọwụwa anyanwụ Jeruselem. Ụzọ ahụ si n’obodo Baịbụl bụ́ Betfeji nke e chere na ọ bụ ya bụ et-Tọr ugbu a, gawa n’otu n’ime ebe ndị kacha elu n’ugwu Oliv. Betani dị n’ebe Ọwụwa Anyanwụ Betfeji, ná mkpọda ebe ọwụwa anyanwụ nke ugwu Oliv. Mgbe ọ bụla Jizọs gara Jeruselem, ya na ndị na-eso ụzọ na-ehikarị na Betani. Taa, e weere ya na ọ bụ Betani bụ obodo ahụ aha arabik ya bụ el-ʽAzariyeh (El ʽEizariya), nke pụtara “Obodo Lazarọs.” O doro anya na ọ bụ n’ụlọ Mata, Meri na Lazarọs ka Jizọs na-anọ. (Mat. 21:17; Mak 11:11; Luk 21:37; Jọn 11:1) O nwere ike ịbụ na Jizọs na-esikarị n’ụzọ a agafe mgbe ọ bụla o si n’ụlọ ha gawa Jeruselem. N’abalị itoolu n’ọnwa Naịsan afọ 33 O.N.K., mgbe Jizọs gbaara ịnyịnya ibu si n’Ugwu Oliv gawa Jeruselem, o nwekwara ike ịbụ na o si Betfeji, soro ụzọ a gawara Jeruselem.

Ụzọ si Betani gawa Betfeji
Betfeji
Ugwu Oliv
Ndagwurugwu Kidrọn
Ugwu Ụlọ Nsọ

Ntu A Kpọnyere n’Ọkpụkpụ Ikiri Ụkwụ

Ihe a bụ foto ọkpụkpụ ikiri ụkwụ mmadụ a kpọnyere ntu ígwè dị ihe dị ka inch anọ na ọkara n’ogologo. Ọ bụ n’afọ 1968 ka e gwupụtara ọkpụkpụ a, n’ebe ugwu Jeruselem. Ọ ga-abụ n’oge ndị Rom na-achị ka a kpọnyere ntụ n’ọkpụkpụ a. Ọkpụkpụ a na-egosi na ọ ga-abụrịrị na ndị oge ahụ na-eji ntu akpọgide ndị a mara ikpe ọnwụ n’osisi. O nwekwara ike ịbụ ụdị ntu a ka ndị agha Rom ji kpọgide Jizọs n’osisi. A hụrụ ọkpụkpụ a n’otu igbe e ji nkume rụọ. A na-ejikarị igbe nkume a etinye ọkpụkpụ ndị nwụrụ anwụ ma ahụ́ ha rechaa, ọkpụkpụ ha a kpọọkwa nkụ. Ihe a na-egosi na e nwere ike ili onye a kpọgidere n’osisi eli.—Mat. 27:35.