Na-enwe Ọmịiko
Nsogbu Enweghị Ọmịiko Nwere Ike Ịkpata
Ọ bụrụ na anyị ana-eche naanị otú agbụrụ anyị si dị iche n’agbụrụ ndị ọzọ, o nwere ike ime ka anyị chewe na otú ha dị ma ọ bụ otú ha si eme ihe adịghị mma. O nwekwara ike ime ka anyị chewe na anyị ka ndị ọzọ mma. Ozugbo anyị malitere iche na anyị ka ndị ọzọ mma, ọ ga-eme ka o siere anyị ike ịna-enwere ha ọmịiko. Ọ bụrụ na anyị anaghị enwere ndị ọzọ ọmịiko, o nwere ike igosi na anyị kpọrọ ha asị.
Amaokwu Baịbụl Ga-enyere Gị Aka
“Soronụ ndị na-aṅụrị ọṅụ ṅụrịa ọṅụ; soronụ ndị na-akwa ákwá kwaa ákwá.”—NDỊ ROM 12:15.
Olee ihe amaokwu a na-akụziri anyị? Ọ na-akụziri anyị ka anyị na-enwere ndị ọzọ ọmịiko. Onye na-enwere ndị ọzọ ọmịiko na-agbalị ịghọta otú ihe dịịrị ndị ahụ ma were ya na ọ bụ yanwa ka ihe ahụ na-eme.
Otú Inwere Ndị Ọzọ Ọmịiko Si Enye Aka
Ọ bụrụ na ị na-enwere mmadụ ọmịiko, ọ ga-eme ka ị mata na o nwechaghị ihe dị iche na gị na onye ahụ. Anyị nwere ike ịchọpụta na ha na-eche echiche ka anyị, na-emekwa ihe ka anyị. Inwere ndị ọzọ ọmịiko ga-eme ka anyị chọpụta na mmadụ niile si n’otu mmadụ pụta n’agbanyeghị agbụrụ ha si. Ọ bụrụ na anyị ana-elekwasị anya n’otú anyị na ndị ọzọ si yie, o nwere ike anyị agaghịzi na-ele ha anya ọjọọ.
Inwere ndị ọzọ ọmịiko ga-emekwa ka anyị na-akwanyere ha ùgwù. O nwere otu nwaanyị bụ́ onye Senigal aha ya bụ Anne-Marie. O nwere mgbe ọ na-enweghị ihe o ji otu agbụrụ ọtụtụ ndị na-eleda anya kpọrọ. O kwuru otú inwere ndị ọzọ ọmịiko si nyere ya aka. Ọ sịrị: “Mgbe m hụrụ ụdị ahụhụ ndị si n’agbụrụ ahụ na-ata, m jụrụ onwe m otú ọ ga-adị m ma ọ bụrụ m na-ata ụdị ahụhụ ahụ. N’ihi ya, m chọpụtara na akaghị m ndị agbụrụ ahụ mma. O nweghị ihe ọ bụla m mere m ga-eji kara ha mma.” Ọ bụrụ na anyị agbalịa ghọta nsogbu ndị ọzọ nwere, anyị ga na-enwere ha ọmịiko kama ịna-akatọ ha.
Ihe I Nwere Ike Ime
Ọ bụrụ na e nwere agbụrụ ihe ha na-anaghị amasị gị, gbalịa chọpụta otú gị na ha si yie kama ịna-elekwasị anya n’ebe gị na ha dị iche. Dị ka ihe atụ, chegodị gbasara otú obi na-adị ha ma
Inwere ndị ọzọ ọmịiko ga-eme ka anyị na-ahụ ha ka ndị anyị na ha si n’otu ezinụlọ
ha na ndị ezinụlọ ha na-erikọ nri
ha rụchaa ọrụ n’ụbọchị, ike agwụ ha
ha na ndị enyi ha nọrọ
ha na-egere egwú na-amasị ha
Ihe ọzọ ị ga-eme bụ iche otú obi ga-adị gị ma a sị na ị bụ ha. Jụọ onwe gị, sị:
‘Gịnị ka m ga-eme ma mmadụ mee m ka onye na-abaghị uru?’
‘Olee otú obi ga-adị m ma ndị ọzọ lewe m anya ọjọọ n’ebughị ụzọ mata ụdị onye m bụ?’
‘Ọ bụrụ na m si n’agbụrụ ha, olee otú m ga-achọ ka ndị ọzọ si meso m?’