Ajụjụ Ndị Na-agụ Akwụkwọ Anyị Na-ajụ

Gịnị bụ baptizim n’ọnọdụ ndị nwụrụ anwụ?

Mgbe Pọl onyeozi na-ede banyere mbilite n’ọnwụ gaa n’eluigwe, o dere otu ihe na-akpali nnọọ mmasị. Na Bible Nsọ nke Union Version, anyị na-agụ, sị: “A sị na ọ dịghị otú a, gịnị ka ha ga-eme, bụ́ ndị a na-eme baptizim n’ọnọdụ ndị nwụrụ anwụ? Ọ bụrụ na e meghị ka ndị nwụrụ anwụ si n’ọnwụ bilie ma ọlị, ọ̀ bụkwa gịnị mere a na-eme ha baptizim n’ọnọdụ ha?” Baịbụlụ Nsọ nke International Bible Society sikwa otú a sụgharịa akụkụ ihe odide a: “Ọ̀ bara uru ime ndị mmadụ baptizim n’aha ndị nwụrụ anwụ? Gịnị mere e ji mee ha baptizim ma ọ bụrụ na ha enweghị olileanya na ndị nwụrụ anwụ ga-emesị bilie dị ndụ ọzọ?”—1 Ndị Kọrint 15:29.

Pọl ọ̀ na-atụ aro n’ebe a ka e mee ndị dị ndụ baptizim n’aha ndị nwụrụ mgbe a na-emebeghị ha baptizim? Ọ pụrụ iyi otú ahụ dị ka nsụgharị ndị a na ụfọdụ ndị ọzọ nke Bible na-egosi. Otú ọ dị, inyochakwu Akwụkwọ Nsọ na asụsụ Grik mbụ Pọl ji mee ihe na-enye echiche ọzọ. Ihe Pọl bu n’uche bụ na e mere Ndị Kraịst e tere mmanụ baptizim, ma ọ bụ mikpuo ha ná mmiri, ịgbaso ụzọ ndụ nke ga-eduga ha n’ịnwụ dị ka ndị na-eguzosi ike n’ezi ihe, dị ka Kraịst nwụrụ. Mgbe e mesịrị, a ga-akpọlite ha ịghọ ndị mmụọ dị ka ya.

Akwụkwọ Nsọ na-akwado nkọwa a. N’akwụkwọ ozi Pọl degaara ndị Rom, ọ sịrị: “Ùnu amaghị na anyị nile ndị e mere baptizim baa na Kraịst Jizọs bụ ndị e mere baptizim baa n’ọnwụ ya?” (Ndị Rom 6:3) N’akwụkwọ ozi o degaara ndị Filipaị, Pọl kwuru banyere ya onwe ya, na-asị: “Ikere òkè n’ahụhụ [Kraịst], na-enyefe onwe m n’aka ọnwụ yiri nke ya, iji hụ ma o nwere ụzọ m ga-esi nweta mbilite n’ọnwụ bu ụzọ site ná ndị nwụrụ anwụ.” (Ndị Filipaị 3:10, 11) Pọl na-akọwa na ndụ nke ụmụazụ Kraịst e tere mmanụ na-agụnye ụzọ ndụ nke iguzosi ike n’ezi ihe n’okpuru ule, iche ọnwụ ihu kwa ụbọchị, na imesị nwụọ dị ka ndị na-eguzosi ike n’ezi ihe, nke mbilite n’ọnwụ gaa n’eluigwe ga-esochi.

O kwesịrị ịrịba ama na akụkụ Akwụkwọ Nsọ ndị a na ndị ọzọ bụ́ ndị kpọtụrụ ọnwụ uche kpọmkwem mgbe ha na-ekwu banyere ndị e mere baptizim na-ezo aka n’ebe ndị dị ndụ e meworo baptizim nọ ọ bụghị ndị nwụworo anwụ. Pọl gwakwara Ndị Kraịst ibe ya e tere mmanụ, sị: “E likọrọ unu na ya na baptizim ya, sitekwa n’iso ya na-enwe mmekọrịta, a kpọlitekọkwara unu site n’okwukwe unu nwere n’ịrụ ọrụ nke Chineke, onye si ná ndị nwụrụ anwụ kpọlite ya.”—Ndị Kọlọsi 2:12.

Mbuụzọ Grik bụ́ hy·perʹ nke a sụgharịrị ịbụ “n’ọnọdụ” ma ọ bụ “n’aha” n’ọtụtụ nsụgharị Bible na 1 Ndị Kọrint 15:29 pụkwara ịpụta “ka ha wee ghọọ.” N’ihi ya, n’ikwekọ n’akụkụ ndị ọzọ nke Bible, Nsụgharị Ụwa Ọhụrụ nke Akwụkwọ Nsọ Grik nke Ndị Kraịst sụgharịrị amaokwu a n’ụzọ ziri ezi, sị: “Gịnị ka ha ga-eme bụ́ ndị a na-eme baptizim ka ha wee ghọọ ndị nwụrụ anwụ? Ọ bụrụ na a gajeghị ịkpọlite ndị nwụrụ anwụ ma ọlị, n’ihi gịnị ka a na-emekwa ha baptizim ha wee ghọọ ndị dị otú ahụ?”