Ndị Na-eto Eto—Olee Otú Unu Ga-esi Akwadebe Maka Ime Baptizim?

1, 2. (a) Kọwaa ihe mere baptizim ji bụrụ ihe dị ezigbo mkpa. (b) Gịnị kwesịrị ido mmadụ anya tupu o mee baptizim?

Ị̀ BỤ onye na-eto eto ga-achọ ime baptizim? Ọ bụrụ na ị chọrọ ime baptizim, e nweghị ihe ùgwù ị ga-eji tụnyere ya. Dị ka anyị kwuru n’isiokwu bu nke a ụzọ, baptizim abụghị ihe e ji egwu egwu. Ọ bụ ihe na-egosi ndị ọzọ na i nyefeela Jehova onwe gị. Ọ pụtara na i kwere ya nkwa na ị ga-efe ya ruo mgbe ebighị ebi nakwa na ime uche ya ga-abụ ihe kacha mkpa ná ndụ gị. Ebe ọ bụ na nkwa a abụghị ihe e ji egwu egwu, i kwesịrị ime baptizim naanị mgbe i toruru ime ya, mgbe i ji aka gị kpebie ya, nakwa mgbe ị ghọtara ihe mmadụ inyefe Chineke onwe ya pụtara.

² Ma, i nwere ike ịna-eche na i rubeghị ime baptizim. Ma ọ bụkwanụ gị echee na i ruola, ma nne na nna gị asị gị chere ka afọ ndụ gị gbagotekwuo ma ọ bụkwanụ ka ị matakwuo ihe. Gịnị ka i kwesịrị ime? Ike agwụla gị. Kama, jiri oge ahụ na-agbakwu mbọ ka i wee ruo eru ime baptizim n’oge na-adịghị anya. Ugbu a, ka anyị tụlee ebe atọ i nwere ike ikpebi imekwu nke ọma na ha iji nyere gị aka iru eru ime baptizim. Ha bụ: (1) ihe i kweere, (2) àgwà gị, na (3) igosi Chineke na obi dị gị ụtọ.

IHE I KWEERE

3, 4. Gịnị ka ndị na-eto eto ga-amụta n’aka Timoti?

³ Chegodị otú ị ga-esi aza ajụjụ ndị a: Gịnị mere m ji kwere na Chineke dị? Gịnị mere obi ji sie m ike na Baịbụl si n’aka Chineke? Gịnị mere m ji erubere iwu Chineke isi kama ịna-ebi ndụ otú ndị ụwa si ebi? Ajụjụ ndị a ga-enyere gị aka ime ihe Pọl onyeozi kwuru. Ọ sịrị: “Chọpụta n’onwe unu ihe bụ́ uche Chineke, nke ziri ezi na nke dị ya mma, nke zukwara okè.” (Ndị Rom 12:2) Gịnị ka i ji kwesị ime otú ahụ?

⁴ Ihe Timoti mere nwere ike inyere gị aka. Ọ ma Akwụkwọ Nsọ nke ọma n’ihi na nne ya na nne nne ya kụziiri ya ihe dị n’Akwụkwọ Nsọ. Ma, Pọl gwara Timoti, sị: “Nọgide n’ihe ndị ị mụtara, ndị e mekwara ka i kwere.” (2 Timoti 3:14, 15) Ihe ‘e mere ka i kwere’ pụtara obi isi mmadụ ike na ihe a gwara ya bụ eziokwu. N’ihi ya, obi siri Timoti ike na ihe dị n’Akwụkwọ Nsọ bụ eziokwu. Ihe mere o ji kwere abụghị n’ihi na nne ya na nne nne ya gwara ya kweta, kama ọ bụ n’ihi na o chebaara ihe ọ mụtara echiche, obi esie ya ike na ọ bụ eziokwu.—Gụọ Ndị Rom 12:1.

5, 6. Olee ihe mere i ji kwesị ịna-eji ‘ike iche echiche’ gị ekpebi ihe ị na-eme mgbe ị ka na-eto eto?

⁵ Gịnwa kwanụ? O nwere ike ịbụ na o teela ị mụtara eziokwu Baịbụl. Ọ bụrụ otú ahụ, kpebie na ị ga-echebara ihe mere iji kwere ihe ndị ahụ echiche. Ọ ga-enyere gị aka ime ka okwukwe gị sikwuo ike. Ọ ga-emekwa ka ị ghara ịna-eme mkpebi ndị na-adịghị mma n’ihi ndị ọgbọ gị, n’ihi ihe i chere n’obi gị, ma ọ bụ n’ihi otú ndị ụwa si eche echiche.

⁶ Ọ bụrụ na ị na-eji ‘ike iche echiche’ gị ekpebi ihe ndị ị na-eme mgbe ị ka na-eto eto, ị ga-enwe ike ịza ajụjụ ndị ọgbọ gị ga-ajụ gị, dị ka: ‘Olee otú i si mara na Chineke dị? Ọ bụrụ na Chineke hụrụ anyị n’anya, gịnị mere o ji ekwe ka ihe ọjọọ na-eme? Olee otú o si bụrụ na Chineke enweghị mmalite?’ Ọ bụrụ na i ruola ime baptizim, ajụjụ ndị ahụ agaghị eme ka i nwewe obi abụọ, kama ha ga-eme ka ị mụkwuo Baịbụl.

7-9. Kọwaa otú ihe e ji amụ Baịbụl dị na jw.org/ig isiokwu ya bụ “Gịnị Ka Baịbụl Na-akụzi?” ga-esi nyere gị aka ka obi sie gị ike na ihe i kweere bụ eziokwu.

⁷ Ịmụchi Baịbụl anya ga-enyere gị aka ịza ajụjụ ndị mmadụ nwere ike ịjụ gị. Ọ ga-emekwa ka ị ghara ịna-enwe obi abụọ ma mee ka obi sie gị ike n’ihe ndị i kweere. (Ọrụ Ndịozi 17:11) Anyị nwere ọtụtụ akwụkwọ ndị ga-enyere gị aka. Ọtụtụ ndị achọpụtala na ọ bara uru ịmụ akwụkwọ anyị ndị kọwara ihe ndị Chineke kere na otú o si kee ha. Isiokwu bụ́ “Gịnị Ka Baịbụl Na-akụzi?” na-agba na jw.org/ig na-abara ọtụtụ ndị na-eto eto uru. Ị ga-ahụ ya ma ị pịa ebe e dere IHE BAỊBỤL NA-AKỤZI, pịa NDỊ NA-ETO ETO. E dere nke ọ bụla n’ime ha otú ọ ga-esi nyere gị aka ka obi sikwuo gị ike banyere ihe ndị i kweere.

⁸ Ebe ị na-amụ Baịbụl, o nwere ike ịbụ na ị matala azịza ajụjụ ụfọdụ ndị a tụlere n’ebe ahụ. Ma, obi ò siri gị ike na azịza ndị ahụ bụ eziokwu? Ihe ndị ahụ e ji amụ ihe ga-enyere gị aka ichebara amaokwu Baịbụl dị iche iche echiche, nyekwara gị aka ide ihe mere i ji kwere ihe ndị i kweere. Ọ ga-enyeziri gị aka ịmata otú ị ga-esi akọwara ya ndị ọzọ. Ọ bụrụ na i nwere ike ịna-aga n’ebe ihe ahụ e ji amụ Baịbụl bụ́ “Gịnị Ka Baịbụl Na-akụzi?” dị na jw.org/ig, jiri ya na-amụ ihe ka o nyere gị aka ka okwukwe gị sikwuo ike.

⁹ O kwesịrị ido gị anya na ihe Baịbụl na-akụzi bụ eziokwu. Ime otú ahụ ga-enyere gị aka ịkwadebe maka baptizim. Otu nwanna nwaanyị na-erubeghị afọ iri abụọ kwuru, sị: “Tupu m kpebie ime baptizim, m mụrụ Baịbụl, chọpụta na Ndịàmà Jehova na-akụzi ihe dị́ na Baịbụl. Obi na-esikwu m ike kwa ụbọchị na ihe a m kweere bụ eziokwu.”

ÀGWÀ GỊ

10. Gịnị mere a ga-eji tụọ anya na Onye Kraịst mere baptizim ga na-akpa àgwà gosiri na o nwere okwukwe?

¹⁰ Baịbụl kwuru, sị: “Ọ bụrụ na okwukwe enweghị ọrụ, ọ nwụrụ anwụ.” (Jems 2:17) Ọ bụrụ na obi siri gị ike na ihe i kweere bụ eziokwu, otú ị ga-esi na-akpa àgwà ga-egosi ya. Ị ga-egosi na i nwere ihe Baịbụl kpọrọ “àgwà dị nsọ na omume ịsọpụrụ Chineke.”—Gụọ 2 Pita 3:11.

11. Kọwaa ihe “àgwà dị nsọ” pụtara.

¹¹ Gịnị bụ “àgwà dị nsọ”? Ọ bụrụ na àgwà mmadụ dị nsọ, ọ pụtara na onye ahụ anaghị eme omume rụrụ arụ. Dị ka ihe atụ, chegodị banyere ihe ndị mere n’ọnwa isii gara aga. Mgbe ọnwụnwa bịaara gị ka i mee ihe na-adịghị mma, ì chere echiche nke ọma banyere ihe dị mma na ihe na-adịghị mma? (Ndị Hibru 5:14) Ì nwere ike icheta oge ndị i meriri ọnwụnwa bịaara gị ma ọ bụ ghara ime ihe na-adịghị mma ndị ọgbọ gị chọrọ ka i mee? È ji gị ama atụ n’ụlọ akwụkwọ unu? Ị̀ na-eme ihe Jehova chọrọ ka ị̀ na-achọ ime ka ụmụ akwụkwọ ibe gị ka ha wee ghara ịchị gị ọchị? (1 Pita 4:3, 4) N’eziokwu, e nweghị onye zuru okè. Mgbe ụfọdụ, izi ndị ọzọ ozi ọma nwedịrị ike ịna-esiri ndị ferela Jehova ọtụtụ afọ ike ma ọ bụ na-eme ha ihere. Ma, onye nyeferela Jehova onwe ya agaghị na-eme ihere na ya bụ Onyeàmà Jehova. Ọ ga na-akpakwa àgwà ọma.

12. Olee ihe ụfọdụ bụ́ “omume ịsọpụrụ Chineke”? Oleekwa otú anyị kwesịrị isi na-ele ha anya?

¹² Gịnị bụ “omume ịsọpụrụ Chineke”? Ọ bụ ihe dị́ iche iche anyị na-eme n’ọgbakọ, dị ka ịga ọmụmụ ihe na ịga ozi ọma. Ma, ihe ụfọdụ anyị na-eme ndị ọzọ na-anaghị ahụ, dị ka ikpe ekpere na ịmụ Baịbụl n’onwe anyị sokwa n’omume ịsọpụrụ Chineke. Onye nyeferela Jehova onwe ya agaghị na-eche na ihe ndị a bụ ibu arọ. Kama, ọ ga-adị onye ahụ otú ahụ ọ dị Eze Devid. Ọ sịrị: “Chineke m, ime uche gị na-atọ m ụtọ, iwu gị dịkwa n’ime obi m.”—Abụ Ọma 40:8.

13, 14. Olee ihe ga-enyere gị aka ịna-eme “omume ịsọpụrụ Chineke”? Oleekwa otú o sirila baara ụfọdụ ndị na-eto eto uru?

¹³ Ihe dị na peeji nke 308 na 309 n’akwụkwọ Ajụjụ Ndị Na-eto Eto Na-ajụ—Azịza Ndị Na-adị Irè, Nke 2, ga-enyere gị aka ikpebi ihe ndị i nwere ike ime. N’ebe ahụ, e nwere ohere ebe ị ga-aza ajụjụ ụfọdụ ndị dị ka: “Ị̀ na-akpọ okwu aha mgbe ị na-ekpe ekpere? Gịnị ka ekpere gị na-egosi banyere ịhụnanya ị hụrụ Jehova?” “Gịnị ka ị na-amụ mgbe ị na-amụ ihe?” “Ị̀ na-aga ozi ọma ọ bụrụgodị na papa gị na mama gị agaghị?” E nwekwara ohere ebe ị ga-ede ebe ị ga-emekwu nke ọma gbasara ekpere, ịmụ ihe na ịga ozi ọma.

¹⁴ Ọtụtụ ndị na-eto eto chọrọ ime baptizim achọpụtala na ihe a dị́ n’akwụkwọ Ndị Na-eto Eto Na-ajụ bara ezigbo uru. Otu nwatakịrị nwaanyị aha ya bụ Tilda sịrị: “O nyeere m aka ikpebi ihe ndị m chọrọ ime. Ozugbo m mechara ha niile, o rughị otu afọ, e mee m baptizim.” Ihe gakwaara nwanna nwoke aha ya bụ Patrick otú ahụ. Ọ sịrị, “Ekpebibuola m ihe ndị m chọrọ ime, ma ide ha ede nyeere m aka ịrụsikwu ọrụ ike iji mee ha.”

15. Kọwaa ihe mere mmadụ inyefe Jehova onwe ya ji kwesị ịbụ ihe onye ahụ ga-eji aka ya eme.

¹⁵ Otu n’ime ajụjụ ndị dị́ n’akwụkwọ ahụ bụ: “Ị̀ ga na-efe Jehova ọ bụrụgodị na papa gị na mama gị nakwa ndị enyi gị akwụsị ife ya?” Ọ bụrụ na mmadụ enyefee Jehova onwe ya, e meekwa ya baptizim, ọ ga-eji aka ya na-eme ka ya na Chineke na-adịkwu ná mma. N’ihi ya, o kwesịghị ịbụ nne na nna gị ma ọ bụ onye ọzọ ga na-echetara gị ime ihe ndị gbasara ofufe Jehova. Àgwà dị nsọ ị na-akpa na omume ịsọpụrụ Chineke ị na-eme ga-egosi na obi siri gị ike na ị mụtala eziokwu, chọọkwa ịna-eme ihe Chineke chọrọ. N’oge na-adịghị anya, ị ga-eru eru ka e mee gị baptizim.

GOSI NA OBI DỊ GỊ ỤTỌ

16, 17. (a) Gịnị kwesịrị ime ka mmadụ kpebie na ya ga-abụ Onye Kraịst? (b) Olee ihe atụ ị ga-eji kọwaa otú obi kwesịrị ịdị anyị banyere ihe mgbapụta ahụ?

¹⁶ Otu nwoke ma Iwu Mozis nke ọma jụrụ Jizọs otu ụbọchị, sị: “Olee iwu kasị ukwuu?” Jizọs zara ya, sị: “Jiri obi gị dum na mkpụrụ obi gị dum na uche gị dum hụ Jehova bụ́ Chineke gị n’anya.” (Matiu 22:35-37) Ihe Jizọs kwuru gosiri na ihe kwesịrị ime ka mmadụ mee baptizim ma bụrụ onye na-eso ụzọ ya bụ ịhụ Jehova n’anya. Otú n’ime ihe ndị kacha mma ga-enyere anyị aka ịhụkwu Jehova n’anya bụ iche echiche nke ọma gbasara onyinye na-enweghị atụ o nyere anyị, nke bụ́, ihe mgbapụta. (Gụọ 2 Ndị Kọrịnt 5:14, 15; 1 Jọn 4:9, 19.) Iche echiche banyere ihe mgbapụta ahụ na uru ọ ga-abara gị ga-eme ka i gosi na obi dị gị ụtọ maka onyinye ahụ pụrụ iche o nyere anyị.

¹⁷ Iji nyere anyị aka ịghọta otú obi kwesịrị ịdị anyị maka ihe mgbapụta ahụ, ka anyị chebagodịrị ihe atụ a echiche. Were ya na mmiri chọrọ iri gị, mmadụ abịa nyere gị aka, gụpụta gị. Ihe ị ga-eme ọ̀ bụ ịlawa chefuo ihe onye ahụ meere gị? Mbanụ. Ị gaghị echefu otú onye ahụ si zọọ gị ndụ. Otú ahụ ka anyị na-ekwesịghị ichefu ihe ọma Jehova na Jizọs meere anyị wee gbapụta anyị. E wezụga ihe a Jehova na Jizọs mere, ndụ anyị agaraghị enwe isi. Ha napụtara anyị n’aka mmehie na ọnwụ. Ọ bụ n’ihi na ha hụrụ anyị n’anya mere anyị ji nwee olileanya inweta ndụ ebighị ebi n’ụwa mgbe ọ ga-aghọ Paradaịs.

18, 19. (a) Gịnị mere na ụjọ ekwesịghị ịtụ gị inyefe Jehova onwe gị? (b) Olee otú ife Jehova si eme ka ndụ gị ka mma?

¹⁸ Obi ọ̀ dị gị ụtọ maka ihe Jehova meere gị? Ọ bụrụ na obi dị gị ụtọ, i kwesịrị inyefe ya onwe gị, e meekwa gị baptizim. Inyefe Chineke onwe gị bụ ikwe ya nkwa na ị ga na-eme uche ya ruo mgbe ebighị ebi. Ikwe ya nkwa a, ò kwesịrị ịna-amapụ gị obi? Mba. Jehova chọrọ ka ihe gaziere gị. Ọ ga-akwụkwa ndị niile na-erubere ya isi ụgwọ. (Ndị Hibru 11:6) Ọ bụrụ na i nyefee Jehova onwe gị ma mee baptizim, ndụ gị agaghị aka njọ kama ọ ga-aka mma. E nwere otu nwanna nwoke dị afọ iri abụọ na anọ e mere baptizim mgbe ọ na-erubeghị afọ iri na atọ. O kwuru, sị: “M gaara aghọtakwu Baịbụl nke ọma ma a sị na m tokwuru tupu e mee m baptizim, ma mkpebi m mere nyefee Jehova onwe m mgbe m dị obere mere ka m ghara ịna-achụ ihe ndị ụwa na-achụ.”

¹⁹ Jehova chọrọ ka ihe gaziere gị. Ma, Setan na-achọ ọdịmma onwe ya naanị. Ọ chọghịdị ịma banyere gị. E nweghị ihe bara uru ọ ga-emere gị ma ị na-eme ihe ọ na-achọ. Olee otú ọ ga-esi enye gị ihe ọ na-enweghị? O nweghị ozi ọma, o nweghịkwa olileanya. Ọ ga-eme ka ihe ghara ịgaziri gị n’ihi na ihe na-echere yanwa bụ mbibi.—Mkpughe 20:10.

20. Gịnị ka onye na-eto eto kwesịrị ime ka o ruo eru inyefe Jehova onwe ya na ime baptizim? (Kwuo ihe dị n’igbe bụ́ “Ihe Ndị Ga-enyere Gị Aka Ịna-emekwu Nke Ọma.”)

²⁰ Inyefe Jehova onwe gị bụ mkpebi kacha mma ị ga-eme. Ị̀ dịla njikere ime ya? Ọ bụrụ na ị dịla njikere, ụjọ atụla gị ikwe Jehova nkwa a. Ma, ọ bụrụ na ọ dị gị ka i rubeghị eru, mee ihe e kwuru n’isiokwu a ka i nwee ike ịna-emekwu nke ọma. Pọl gwara ụmụnna nọ́ na Filipaị ka ha nọgide na-enwe ọganihu. (Ndị Filipaị 3:16) Ọ bụrụ na i mee ihe ndị ahụ, n’oge na-adịghị anya, ị ga-enyefe Jehova onwe gị, e meekwa gị baptizim.