Ndị Nkwusa Alaeze Na-akọ
“Rụọ Ọrụ nke Onye Na-ezisa Ozi Ọma”
GỊNỊ ka ọ pụtara ịbụ onye na-ezisa ozi ọma? Okwu ahụ bụ nsụgharị nke okwu Grik bụ́ eu·ag·ge·li·stesʹ, nke e jikọtara n’ụzọ chiri anya ya na okwu bụ́ eu·ag·geʹli·on, nke pụtara “ozi ọma.” N’ihi ya, onye na-ezisa ozi ọma bụ onye na-eme nkwusa, ma ọ bụ onye na-eje ozi, nke ozi ọma.
Ezi ndị Kraịst nile bụ ndị na-ezisa ozi ọma n’ihi na ha na-akpọsa ozi ọma banyere Alaeze Chineke. N’ụzọ kwesịrị ekwesị, Pọl onyeozi dụrụ Timoti ọdụ ka ọ “rụọ ọrụ nke onye na-ezisa ozi ọma.” Timoti ga-eji ọrụ a kpọrọ ihe. Pọl gbara ya ume ‘inwe anya udo n’ihe nile’ nakwa ka o ‘jezuo ozi ya.’—2 Timoti 4:5.
Dị ka ndị na-ezisa ozi ọma anyị onwe anyị kwa na-eji ozi anyị akpọrọ ihe ma “na-enwe anya udo,” ma ọ bụ na-amụrụ anya ikerịta ozi ọma ahụ n’ohere ọ bụla. Ọtụtụ ndị esiwo otú a bịa mara Jehova na nkwa ya nile mgbe Ndịàmà Jehova zutesịrị ha n’ịgba àmà mberede. Nke a bụ ihe mere Seymore, otu nwoke na Barbados.
Seymore bụ onye nkụzi ụlọ akwụkwọ ọha na eze. Charles, bụ́ onye nkụzi nwa oge n’otu ụlọ akwụkwọ ahụ bụrụkwa otu onye n’ime Ndịàmà Jehova, bụ onye na-ezisa ozi ọma nke mụ anya. Ọ bụ onye ozi oge nile, ma ọ bụ onye ọsụ ụzọ, ọ na-ejikwa ohere nile dapụtaranụ esoro ndị ọzọ ekerịta ozi ọma ahụ. Ọ bụ site n’ịgba àmà mberede nke Charles ka Seymore nụrụ ozi Alaeze ahụ na nke mbụ ya.
N’oge na-adịghị anya Seymore kpebikwara isoro ọtụtụ mmadụ ruo n’ókè o kwere mee kerịta eziokwu Bible. Ya mere ọ malitere iso ndị mmadụ na-enwe mkparịta ụka mberede n’ụlọ ọrụ ya, karịsịa ụmụ akwụkwọ ya. Ọ bụ ezie na n’ala ụfọdụ a gaghị akụzi okpukpe n’ụlọ akwụkwọ ọha na eze, e kenyere nwoke a ọrụ ịkụzi ụkpụrụ omume ọma na nke okpukpe. Ma ugbu a ihe ọmụma ọhụrụ nke Bible ndị o nwetara anọchiela anya echiche ndị mbụ Seymore nwere n’okwu ndị a. N’oge ezumike ehihie, ọ na-agwa ụmụ akwụkwọ ya okwu banyere nkwa Chineke maka ụwa ọhụrụ na olileanya nke ndụ ebighị ebi.
Olee otú ụmụaka ahụ si meghachi omume? Ọtụtụ gosipụtara ezi mmasị n’ozi ọma nke Alaeze Jehova. Ka oge na-aga, Seymore malitere iduziri ụmụ akwụkwọ ya 13 ọmụmụ Bible. Mmasị ha nwere buru ibu nke na ha mere ndokwa ịmụ Bible ugboro abụọ n’otu izu. N’ikpeazụ ihe ka ọtụtụ n’ime ha malitere ịbịa nzukọ ndị Kraịst n’Ụlọ Nzukọ Alaeze Ndịàmà Jehova dị n’ógbè ahụ. Ka ọ dị ugbu a, itoolu n’ime ha aghọọla Ndịàmà Jehova raara onwe ha nye e mere baptism. Banyere Seymore, ọ na-ejezu ozi ya ugbu a site n’ije ozi dị ka onye ọsụ ụzọ oge nile na okenye n’otu n’ime ọgbakọ Ndịàmà Jehova dị na Barbados.
Nke a bụ nanị otu ihe atụ nke otú Ndịàmà Jehova n’ụwa nile si ‘arụ ọrụ nke ndị na-ezisa ozi ọma,’ n’otu ụzọ site n’ikere òkè n’ịgba àmà mberede. Ha na-agbaso okwu ndụmọdụ Bible a na-achọta ná Ndị Kọlọsi 4:5, 6, nke na-asị: “Na-ejegharịnụ n’amamihe n’ebe ndị nọ n’èzí nọ, na-azụchapụrụ onwe unu oge a nile. Ka okwu unu dị n’amara mgbe nile, ihe e ji nnu mee ka ọ dị ụtọ, ka unu wee mata otú unu na-aghaghị ịza mmadụ nile ọ bụla.”