Otú Okpukpe Ụgha Si Emechu Chineke Ihu

Ọ bụrụ na Chineke bụ ịhụnanya, gịnị mere ọtụtụ okpukpe, ndị na-ekwu na ha na-anọchite anya ya ji akpa àgwà ọjọọ dị iche iche? Ihe ọ pụtara bụ na okpukpe ndị ahụ bụ okpukpe ụgha. Ha na-ete aha ya unyi. Olee otú ha si na-ete aha ya unyi? Olee otú obi dị Chineke gbasara ya? Gịnịkwa ka ọ ga-eme gbasara ya?

1. Olee otú okpukpe ụgha si eji ihe ọ na-akụzi emechu Chineke ihu?

Okpukpe ụgha ejirila “eziokwu nke Chineke gbanwere okwu ụgha.” (Ndị Rom 1:​25) Dị ka ihe atụ, ọtụtụ okpukpe anaghị akụziri ndị òtù ha ihe bụ́ aha Chineke. Ma, Baịbụl kwuru na anyị ga na-akpọ Chineke aha ya. (Ndị Rom 10:​13, 14) Ọ na-abụ ihe ọjọọ mee mmadụ, ụfọdụ ndị isi okpukpe asị na ọ bụ uche Chineke. Ma, ihe a ha na-ekwu bụ ụgha chara acha. Ọ bụghị Chineke na-akpata ihe ọjọọ. (Gụọ Jems 1:13.) Ma, ihe a na-abụghị eziokwu okpukpe dị iche iche na-akụzi emeela ka ọtụtụ ndị na-agbara Chineke ọsọ.

2. Olee otú àgwà ndị okpukpe ụgha na-akpa si emechu Chineke ihu?

Otú ndị okpukpe ụgha si emeso ndị mmadụ ihe dị iche n’otú Jehova si emeso ha. Baịbụl kwuru na mmehie ndị okpukpe na-eme “karịrị akarị.” (Mkpughe 18:5) Kemgbe ọtụtụ narị afọ, okpukpe ụgha na-etinye aka na ndọrọ ndọrọ ọchịchị, na-akwado agha dị iche iche a na-alụ n’ụwa. Ha akpatakwala ọnwụ ọtụtụ ndị mmadụ ma ọ bụkwanụ kwado ka e gbuo ha. Ụfọdụ ndị isi okpukpe na-anakwa ndị okpukpe ha ụtụ ka ha were ya na-ebi ndụ okomoko. Ihe ndị a niile na-egosi na ha amaghị Chineke nakwa na ha anaghị anọchite anya ya.​—Gụọ 1 Jọn 4:8.

3. Olee otú ihe okpukpe ugha na-eme na-adị Chineke?

Ọ bụrụ na ihe ndị okpukpe ụgha na-eme na-ewe gị iwe, oleezi otú i chere obi ga-adị Jehova? Chineke hụrụ ndị mmadụ n’anya, ma, àgwà ndị isi okpukpe, ndị na-emechu ya ihu, na-emegbukwa ndị okpukpe ha, na-ewute ya. O kwuru na a ga-ebibi okpukpe ụgha nakwa na “a gaghịzi ahụ ya ọzọ.” (Mkpughe 18:21) N’oge na-adịghị anya, Chineke ga-ebibi okpukpe ụgha niile kpamkpam.​—Mkpughe 18:8.

MỤTAKWUO IHE

4. Chineke anaghị anabata okpukpe niile

Ọtụtụ ndị na-ekwu na okpukpe dị iche iche dị ka ọtụtụ ụzọ e si agakwuru Chineke. Ma, ihe a ha na-ekwu ọ̀ bụ eziokwu? Gụọnụ Matiu 7:​13, 14. Unu gụchaa ya, unu eleba anya n’ajụjụ a:

• Gịnị ka Baịbụl kwuru gbasara okporo ụzọ na-eduba ná ndụ?

Kpọnyenụ VIDIO a. Unu lechaa ya, unu eleba anya n’ajụjụ a:

VIDIO: Vidio si na vidio bụ́ Chineke Ọ̀ Na-anabata Otú Ọ Bụla Ndị Mmadụ Si Efe Ya? (3:​22)

• Baịbụl ò kwuru na Chineke na-anabata ọtụtụ okpukpe?

5. Chineke hụrụ ndị mmadụ n’anya, ma, okpukpe ụgha ahụghị ha n’anya

E nwere ọtụtụ ụzọ okpukpe ụgha si emechu Chineke ihu. Otu n’ime ụzọ jọgburu onwe ya bụna ha na-etinye aka n’ịlụ agha. Unu chọọ ịhụ otu n’ime mgbe ha tinyere aka n’ịlụ agha, kpọnyenụ VIDIO a. Unu lechaa ya, unu eleba anya n’ajụjụ ndị a:

VIDIO: Ihe Ndị Chọọchị Mere Mgbe A Na-alụ Agha Ụwa nke Abụọ (2:​22)

• Gịnị ka ọtụtụ chọọchị mere mgbe a na-alụ Agha Ụwa nke Abụọ?

• Olee otú obi dị gị gbasara ihe ndị ahụ ha mere?

Gụọnụ Jọn 13:​34, 35 na 17:16. Unu gụchaa ha, unu eleba anya n’ajụjụ ndị a:

• Olee otú ọ ga-abụrịrị na obi na-adị Jehova ma ndị okpukpe na-etinye aka n’ịlụ agha?

• Ọ bụ okpukpe ụgha na-akpata ọtụtụ ihe ọjọọ na-eme n’ụwa. Olee ihe ndị ị na-ahụ ndị okpukpe na-eme ndị gosiri na ha ahụghị ndị mmadụ n’anya otú Chineke hụrụ ha?

6. Chineke chọrọ inyere ndị mmadụ aka ka ha si n’okpukpe ụgha pụta

Gụọnụ Mkpughe 18:4.a Unu gụchaa ya, unu eleba anya n’ajụjụ a:

• Olee otú obi dị gị ugbu a ị matara na Chineke chọrọ ịnapụta ndị okpukpe ụgha duhierela?

7. Akwụsịla ịmụ gbasara ezi Chineke

Otú ndị okpukpe ụgha sị akpa àgwà ò kwesịrị ime ka i lewe Chineke anya ọjọọ? Chegodị gbasara nwatakịrị jụrụ ịna-eme ọmarịcha ihe ndị nna ya gwara ya na-eme. Nwatakịrị ahụ mechara si n’ụlọ ha pụọ, ma malite ibi ndụ ọjọọ. Ụdị ndụ ọ na-ebi adịghị nna ya mma. Gịnị mere na ọ dịghị mma mmadụ ikwu na ọ bụ nna ya mere nwatakịrị ahụ ji akpa àgwà ọjọọ?

• Ọ̀ dị mma mmadụ ikwu na ọ bụ Jehova mere ndị okpukpe ụgha ji akpa àgwà ọjọọ dị iche iche ha na-akpa ma ọ bụkwanụ mmadụ iji maka ya kwụsị ịmụ gbasara Jehova?

NCHỊKỌTA

Okpukpe ụgha na-emechu Chineke ihu n’ihi ihe ndị na-abụghị eziokwu ha na-akụziri ndị mmadụ nakwa n’ihi àgwà ọjọọ ha na-akpa. Chineke ga-ebibi okpukpe ụgha.

Ajụjụ ndị e ji echeta ihe a mụrụ

• Olee otú obi dị gị n’ihi ihe dị iche iche na-abụghị eziokwu okpukpe ụgha na-akụzi nakwa n’ihi otú ha si akpa àgwà?

• Olee otú ihe okpukpe ugha na-eme na-adị Jehova?

• Gịnị ka Chineke ga-eme okpukpe ụgha?

IHE Ị GA-ELEBAKWU ANYA

Chọpụta ihe abụọ mere na Chineke anaghị anabata ọtụtụ okpukpe.

“Okpukpe Niile Hà Bụ Otu? Ha Niile Hà Na-enyere Mmadụ Aka Ịmata Onye Chineke Bụ?” (Isiokwu gbara n’Ịntanet)

Gịnị mere Jehova ji chọọ ka anyị na ndị ọzọ na-ezukọ na-efe ya?

“Mmadụ Ò Kwesịrị Inwe Okpukpe Ọ Nọ na Ya?” (Isiokwu gbara n’Ịntanet)

Obi nọ na-ajọ otu ụkọchukwu njọ n’ihi ihe ndị okpukpe ya na-eme. Ma, ihe a emeghị ka ọ ghara ịmụta ihe ndị bụ́ eziokwu gbasara Chineke.

“Ihe Mere Otu Ụkọchukwu Ji Hapụ Chọọchị Ya” (Teta!, Febụwarị 2015)

Kemgbe ụwa, okpukpe na-akụzi ụgha ndị na-eme ka a na-agbara Chineke ọsọ ma na-ele ya anya ka onye ọjọọ. Chọpụta nke bụ́ eziokwu n’ụgha atọ ha na-akụzi.

“Gịnị Mere O Ji Esiri Ụfọdụ Ndị Ike Ịhụ Chineke n’Anya?” (Ụlọ Nche, Nọvemba 1, 2013)