Inwe Ekele Maka Ebere Chineke
1 Tupu Pọl onyeozi aghọọ Onye Kraịst, o ji ike guzogide mgbasa nke Iso Ụzọ Kraịst. Otú ọ dị, ebe ọ bụ na o mere ya n’amaghị ihe, e meere ya ebere. Jehova gosiri Pọl obiọma na-erughịrị ya, o nyekwara ya ọrụ ime nkwusa. Pọl ji ọrụ ahụ kpọrọ ihe. (Ọrụ 26:9-18; 1 Tim. 1:12-14) Ekele Pọl nwere maka ebere Jehova meere ya kpaliri ya itinye onwe ya n’ijezu ozi ya.—2 Kọr. 12:15.
2 Dị ka ebere Chineke si dị, e nyewokwa anyị onwe anyị ozi anyị ga-eje. (2 Kọr. 4:1) Dị ka Pọl, anyị pụrụ igosipụta ekele anyị nwere maka ebere e meere anyị site n’itinyesi mgbalị ike n’inyere ndị ọzọ aka inwe ọganihu n’ụzọ ime mmụọ. Otu ụzọ anyị pụrụ isi mee ya bụ site n’ịmalite nakwa n’iduzi ọmụmụ Bible.
3 Ịmalite Ọmụmụ Bible: Otu ụzọ isi malite ọmụmụ Bible bụ site n’iguzobe ụzọ magazin. Ka anyị na-eleta ndị nọ n’ụzọ magazin anyị ugboro ugboro, anyị na-amata nchegbu ndị ha na-enwe nke ọma. Ka oge na-aga, otu isiokwu dị n’ime magazin ndị ahụ pụrụ ịbụ ihe ga-eduga n’ịmalite ọmụmụ Bible na broshuọ Na-achọ. Ná nleta ndị ga-esochi, ọ pụrụ ikwe mee ịnọgide na-enwe nkwurịta okwu na broshuọ Na-achọ mgbe ọ bụla anyị wegaara onye nwe ụlọ magazin.
4 Mgbalị E Ji Ekpere Mee Dị Mkpa: Ekpere na mgbalị siri ike ga-eme ka ọrụ nkwusa anyị ka mma. Otu nwanna nwanyị bụ́ onye ọsụ ụzọ nke nwere otu ọmụmụ Bible kpekuru Jehova ekpere ka ọ gọzie ya inwetakwu ndị ọzọ ọ ga na-eduziri ọmụmụ Bible. O mekwara ihe kwekọrọ n’ekpere ya. O chebaara ozi ya echiche ma chọpụta na mgbe ọ na-eme nletaghachi, ọ dịghị agwa ndị mmadụ ka ya duziere ha ọmụmụ Bible. Ọ malitere ime otú ahụ, n’oge na-adịghịkwa anya, o nwetara mmadụ abụọ ọzọ ọ na-eduziri ọmụmụ Bible.
5 Lee ihe ùgwù ọ bụụrụ anyị ikere òkè n’ime ka a mara “ozi ọma nke obiọma ahụ na-erughịrị mmadụ nke Chineke”! (Ọrụ 20:24) Ka ekele anyị nwere maka ebere Chineke kpalie anyị ịdị uchu n’inyere ndị ọzọ aka irite uru n’obiọma Jehova nke na-erughịrị mmadụ.