N’oge ochie, njem okporo ụzọ na-egbu oge, na-agwụkwa ike. Ọ ga-abụkwa na ọ na-adị oké ọnụ karịa iji ụgbọ mmiri eme njem. Ma, ọ bụ naanị ụkwụ ka e nwere ike iji gaa ọtụtụ ebe.
Onye ji ụkwụ nwere ike ịga naanị ihe dị ka kilomita iri atọ n’ụbọchị. Anwụ, mmiri ozuzo, okpomọkụ, na oyi ga-emekwa ka njem ya ghara ịdịchara ya mfe. O nwekwara ike ịdaba n’aka ndị ohi. Pọl onyeozi kwuru gbasara ebe dị iche iche ọ gara, sị: “Ka m na-aga, e nwere oge ndị m hụsiri anya ma n’osimiri, ma n’aka ndị ohi.”—2 Kọr. 11:26.
E nwere ọtụtụ okporo ụzọ a rụrụ nke ọma n’Alaeze Ukwu Rom. N’okporo ụzọ ndị ahụ, e nwere ụlọ ndị njem a rụrụ n’ebe dị iche iche. Ọ ga-ewe onye njem otu ụbọchị iji ụkwụ si n’otu garuo n’ọzọ. N’agbata ụlọ ndị ahụ, e nwere ebe onye njem nwere ike ịzụrụ ihe ndị dị ya mkpa. Ndị na-ede akwụkwọ n’oge ahụ kwuru na ụlọ ndị njem na ebe ndị ahụ a na-azụrụ ihe anaghị adị ọcha, ndị mmadụ na-akarị akarị na ha, àkpịrị́ na-ejukwa na ha. A na-ele ebe ndị ahụ anya ọjọọ n’ihi na ndị ọjọọ na-anọkarị na ha. Ndị nwe ụlọ ndị ijem na-ezukarị ndị njem ohi, ha na-akpọnyekwa ha ndị akwụna, narakwa ha ego maka ya.
O doro anya na Ndị Kraịst na-agbalị ike ha niile izere ụdị ebe ndị ahụ. Ma ọ bụrụ na ha na-aga n’ebe ha na-enweghị ikwu na ibe, o yiri ka hà na-abanye n’ebe ndị ahụ.