N’ABALỊ iri na anọ n’ọnwa Eprel afọ 1989, n’oge m na-eduzi ọmụmụ ihe na Maụmere, dị́ n’Agwaetiti Flọris, ndị uwe ojii batara ebe ahụ n’ike ma nwụchie mụ na ụmụnna atọ ọzọ.

Ndị na-eche anyị nche n’ụlọ mkpọrọ mere ihe niile ha nwere ike ime ka anyị kelee ọkọlọtọ. Mgbe anyị jụrụ, ha kụrụ anyị ihe ma gbaa anyị ụkwụ. Ha kpọpụtakwara anyị n’oké anwụ ruo abalị ise. O ruo n’abalị, anyị na-edina n’ala simenti n’obere ọnụ ụlọ mkpọrọ anyị nọ na ya. Nke a mere ka ezigbo oyi na-atụ anyị. Ike na-agwụcha anyị, ahụ́ na-afụkwa anyị ụfụ n’ihi ahụ́ e merụsịrị anyị. Anyị bịakwara ruo unyi. Onye na-elekọta ụlọ mkpọrọ ahụ gwara anyị ugboro ugboro ka anyị mee ihe Akwụkwọ Nsọ na-akwadoghị. Ma, anyị gwara ya, sị, “Ruokwa mgbe anyị ga-anwụ, anyị agaghị ekele ọkọlọtọ.” Obi dị anyị ụtọ ‘ịta ahụhụ n’ihi ezi omume’ otú ahụ ọ dị Ndị Kraịst oge mbụ.—1 Pita 3:14.

N’ABALỊ iri na itoolu n’ọnwa Jenụwarị afọ 1999, nghọtahie ndị Alakụba na Ndị Kraịst nwere bịaziri ghọọ tigbuo zọgbuo. Isi n’ụlọ m gaa n’ebe ọ malitere dị kilomita atọ. Ọ bụghịkwa obere nsogbu.a

Mgbe m kpọpụchara ndị ezinụlọ m, m kpọrọ ndị nkwusa ndị ọzọ n’ekwentị ka m mara otú ha mere. M gwara ha etinyela aka n’ọgba aghara ahụ nakwa ka ha ghara ịga ebe e nwere ọgba aghara. Mgbe e mechara, ndị okenye gakwuuru ụmụnna anyị gbaa ha ume ka okwukwe ha sikwuo ike, gwakwa ha ka ha na-ezukọta obere obere enwe ọmụmụ ihe.

Alaka ụlọ ọrụ gwara anyị kpọpụ nwanna ọ bụla bi n’ebe ndị a na-enwe ọgba aghara ahụ. Anyị gwakwara ụmụnna anyị ndị bi n’ebe ndị ahụ ka ha kwapụ. Ma, e nwere otu nwanna na-ekweghị akwapụ. Ọgba aghara ahụ mechakwara taa isi ya. Ma, ọkọ akọghị nwanna ọ bụla mere ihe alaka ụlọ ọrụ kwuru.