IHE ỌMỤMỤ NKE 8

Jiri Ihe Atụ Na-akụzi Ihe

Matiu 13:34, 35

IHE Ị GA-EME: Jiri ihe atụ ndị dị mfe ga-amasị ndị ị na-agwa okwu mee ka otú i si akụzi ihe kakwuo mma.

Mee ihe atụ ndị dị mfe nghọta. Jiri obere ihe na-akọwa nnukwu ihe, jirikwa ihe ndị dị mfe nghọta na-akọwa ihe ndị siri ike nghọta, otú ahụ Jizọs mere. Ekwula ihe ndị na-adịchaghị mkpa ga-eme ka ihe atụ i mere gbagwojuo ndị na-ege gị ntị anya. Gbalịa hụ na ihe ndị i kwuru n’ihe atụ i mere gbasara ihe ị na-akụzi, ka uche ndị na-ege gị ntị ghara ịpụ n’ihe ị na-ekwu.

Na-eleru anya ala. Na-eleru ihe ndị dị gburugburu gị anya, na-amụ akwụkwọ ndị nzukọ a na-ebipụta, na-egekwa okwu ndị bụ́ aka ochie n’ikụzi ihe. Ka ị na-eme ihe ndị a, na-edetu ihe atụ ndị ga-eme ka otú i si akụzi ihe kakwuo mma. Chekwaa ihe atụ ndị ahụ.
Buru ndị ị na-agwa okwu n’obi. Jiri ihe ndị na-ege gị ntị na-eme na ihe ndị ha ma nke ọma meere ha ihe atụ. Kpachara anya ka ihe atụ ị ga-eme ghara imenye ha ihere ma ọ bụ kpasuo ha iwe.
Kụzie ihe ndị dị mkpa. Ka mkpa gị bụrụ ime ka isi ihe ndị dị n’okwu gị doo anya, ọ bụghị ihe ndị na-adịchaghị mkpa. Gbalịa ka ndị na-ege gị ntị nwee ike icheta ma ihe atụ gị ma ihe i ji ya kụziere ha.