Adam na Iv mụrụ ọtụtụ ụmụ mgbe ha si n’ogige Iden pụta. Nwa mbụ ha bụ́ Ken bụ onye ọrụ ugbo. Nwa ha nke abụọ bụ́ Ebel na-azụ atụrụ.

Otu ụbọchị, Ken na Ebel chụụrụ Jehova àjà. Ị̀ ma ihe àjà bụ? Ọ bụ onyinye pụrụ iche a na-enye Jehova. Jehova nabatara àjà Ebel, ma ọ nabataghị nke Ken. Ihe a mere ka Ken wee ezigbo iwe. Jehova gwara Ken na iwe ọ na-ewe nwere ike ime ka o mee ihe ọjọọ. Ma, Ken egeghị Jehova ntị.

Kama, ọ gwara Ebel, sị: “Ka anyị gaa n’ọhịa.” Mgbe ha nọ naanị ha n’ọhịa, Ken kụgburu ya. Gịnị ka Jehova mere Ken? Ọ tara Ken ahụhụ. Ahụhụ ọ tara ya bụ na ọ chụpụrụ ya n’ụlọ ha, chụga ya ebe dị anya. E kweghị ka Ken laghachi n’ụlọ ha ọzọ.

Gịnị ka anyị ga-amụta n’akụkọ a? Iwe nwere ike wewe anyị ma ihe anaghị aga otú anyị si chọọ. Ọ bụrụ na anyị wewe iwe, ma ọ bụ na ndị ọzọ achọpụta na anyị na-ewe iwe ma gwa anyị kwụsị ya, anyị kwesịrị ịkwụsị ya ozugbo tupu iwe ahụ emee ka anyị mee ihe ọjọọ.

Jehova na-echeta Ebel n’ihi na o mere ihe dị mma, hụkwa ya n’anya. Chineke ga-akpọlite ya n’ọnwụ mgbe ọ ga-eme ka ụwa a bụrụ paradaịs.

Ka oge na-aga, a bịara nwee ọtụtụ mmadụ n’ụwa. Ọtụtụ n’ime ha na-eme ihe ọjọọ. Ụfọdụ ndị mmụọ ozi bi n’eluigwe bidodịrị ime ihe ọjọọ. Ha hapụrụ eluigwe bịa biri n’ụwa. Ị̀ ma ihe mere ha ji bịa biri n’ụwa? Ọ bụ ka ha nwee ike ịghọ mmadụ ma lụrụ ụmụ nwaanyị.

Ndị mmụọ ozi ahụ na ụmụ nwaanyị ahụ mụtara ụmụ. Ụmụ ha toro, sie ezigbo ike ma na-etigbu ndị mmadụ. Ha na-emesi ndị mmadụ ike. Jehova ekweghị ka ha mere ihe ọjọọ ndị ahụ na-aga. N’ihi ya, o kwuru na ya ga-eji iju mmiri bibie ndị na-eme ihe ọjọọ.

Ma, o nwere otu nwoke dị iche. Ọ hụrụ Jehova n’anya. Aha ya bụ Noa. Ya na nwunye ya mụrụ ụmụ atọ. Aha ha bụ Shem, Ham, na Jefet. Ha atọ lụkwara ụmụ nwaanyị. Jehova gwara Noa ka ọ rụọ nnukwu ụgbọ. Ụgbọ a bụ nnukwu igbe nwere ike ise n’elu mmiri. Noa na ezinụlọ ya ga-anọ n’ime ya ka mmiri ahụ ghara igbu ha. Jehova gwakwara Noa ka ọ chịbata ọtụtụ ụmụ anụmanụ n’ime ụgbọ ahụ ka ha ghara ịnwụ.

Noa malitere ịrụ ụgbọ ahụ ozugbo. Ịrụcha ya were ya na ezinụlọ ya ihe dị ka afọ iri ise. Ha rụrụ ya otú Jehova gwara ha rụọ ya. N’oge Noa na-arụ ụgbọ ahụ, ọ nọ na-agwa ndị mmadụ na Jehova ga-eji iju mmiri bibie ụwa. Ma o nweghị onye gere ya ntị.

N’ikpeazụ, oge ruru ka ha banye n’ụgbọ ahụ. Ka anyị hụzie ihe merenụ n’isi nke 6.