Lọt na nwanne nna ya aha ya bụ Ebreham biri na Kenan. Ha mechara nwee ọtụtụ anụmanụ nke na ebe ha bi abachaghị ha niile. Ebreham gwara Lọt, sị: ‘Mụ na gị agaghịzi ebi otu ebe. Biko, họrọ ebe ị ga-ebi, ị gaa n’aka ekpe, m ga-aga n’aka nri.’ Ihe a Ebreham kwuru gosiri na ọ naghị achọ ihe ga-abara naanị ya uru. Ọ́ bụghị eziokwu?

Lọt hụrụ ebe mara mma n’ala ahụ. Ọ dị nso n’obodo a na-akpọ Sọdọm. Mmiri na ahịhịa ndụ juru ebe ahụ. N’ihi ya, ọ họọrọ ebe ahụ ma kpọrọ ezinụlọ ya gaa biri na ya.

Ndị Sọdọm na ndị obodo dị ya nso bụ́ Gọmọra bụ ndị ọjọọ. Ha na-eme ihe jọgburu onwe ya nke na Jehova kpebiri na ya ga-ebibi obodo ha. Ma, Chineke achọghị ibibi Lọt na ndị ezinụlọ ya. N’ihi ya, o zipụrụ ndị mmụọ ozi abụọ ka ha gaa gwa ha okwu. Ha gwara ha, sị: ‘Meenụ ọsọ ọsọ. Sinụ n’obodo a gbapụ. Jehova na-aga ibibi ya.’

Lọt ahapụghị Sọdọm ozugbo. Ọ nọ na-egbu oge. N’ihi ya, ndị mmụọ ozi ahụ jidere ya na nwunye ya na ụmụ ya nwaanyị abụọ n’aka ma kpọpụ ha n’obodo ahụ. Ndị mmụọ ozi ahụ gwara ha, sị: ‘Gbaanụ ọsọ! Gbalaganụ maka ndụ unu. Unu elekwala anya n’azụ. Unu ga-anwụ ma unu lee anya n’azụ.’

Mgbe ha ruru n’obodo a na-akpọ Zoa, Jehova mere ka sọlfọ na ọkụ si n’eluigwe zoo na Sọdọm na Gọmọra. Jehova bibiri obodo abụọ a kpamkpam. Mgbe nwunye Lọt nupụụrụ Jehova isi ma lee anya n’azụ, ọ ghọrọ ogidi nnu. Ma o nweghị ihe mere Lọt na ụmụ ya abụọ maka na ha rubeere Jehova isi. Ọ ga-abụ na obi jọrọ ha ezigbo njọ na nwunye Lọt nupụụrụ Jehova isi. Ma, obi tọrọ Lọt na ụmụ ya ụtọ na ha rubeere Jehova isi.

Ebreham kụziiri nwa ya Aịzik ka ọ hụ Jehova n’anya ma tụkwasị Jehova obi na ọ ga-emezu ihe ndị o kwuru. Ma, mgbe Aịzik dị ihe dị ka afọ iri abụọ na ise, Jehova gwara Ebreham ka o mee ihe ga-esiri mmadụ ike ime. Gịnị bụ ihe ahụ?

Chineke gwara Ebreham, sị: ‘Biko, were nwa gị nwoke, nwa ị mụrụ naanị ya, chụọrọ m àjà n’ugwu dị na Moraya.’ Ebreham amaghị ihe mere Jehova ji gwa ya mee ihe a. Ma, o mere ihe Jehova gwara ya.

N’isi ụtụtụ echi ya, Ebreham kpọọrọ Aịzik na mmadụ abụọ na-ejere ya ozi gawa Moraya. Mgbe ha gara ije abalị atọ, ha nọ n’ebe dị anya lelie anya hụ ugwu ahụ. Ebreham gwara ndị na-ejere ya ozi ka ha chere ka ya na Aịzik gaa chụọrọ Jehova àjà. Ebreham boro Aịzik nkụ, yanwa ewere mma. Mgbe ha na-aga, Aịzik jụrụ nna ya, sị: ‘Oleekwanụ atụrụ a ga-eji chụọ àjà?’ Ebreham gwara ya, sị: ‘Nwa m, Jehova ga-eweta ya.’

Mgbe ha mechara ruo n’ugwu ahụ, ha rụrụ ebe ịchụàjà. Ebreham kere Aịzik agbụ n’ụkwụ, keekwa ya n’aka ma kukwasị ya n’elu ebe ịchụàjà ahụ.

Ebreham weere mma, matịzie aka ka o gbuo nwa ya. Ma mmụọ ozi Jehova si n’eluigwe kpọọ ya òkù, sị: ‘Ebreham! Emerụla nwa ahụ ahụ́, n’ihi na amatala m ugbu a na i nwere okwukwe na Chineke ebe ị na-ajụghị iji nwa gị chụọ àjà.’ Ebreham lere anya n’ihu ya hụ ebule nke mpi ya konyere n’osisi. O mere ngwa ngwa tọọ agbụ ahụ o kere Aịzik ma werezie ebule ahụ chụọrọ Chineke àjà.

Jehova malitere ụbọchị ahụ kpọwa Ebreham enyi ya. Ị̀ ma ihe kpatara ya? Ọ bụ n’ihi na Ebreham mere ihe niile Jehova gwara ya mee, ma mgbe ọ na-aghọtaghị ihe mere Jehova ji gwa ya mee ha.

Jehova kweghachiri Ebreham nkwa o kweburu ya, sị: ‘M ga-agọzi gị, m ga-emekwa ka ụmụ gị dị ọtụtụ.’ Ihe a o kwuru pụtara na Jehova ga-esi n’ezinụlọ Ebreham gọzie ndị niile na-eme ihe ọ na-achọ.