Mosis biri na Midian afọ iri anọ. Ọ lụrụ nwaanyị, mụọkwa ụmụ. Otu ụbọchị, mgbe ọ nọ na-elekọta atụrụ ya n’ebe dị nso n’Ugwu Saịnaị, ọ hụrụ ihe dị ịtụnanya. Ọkụ nọ na-enwu n’otu osisi ogwu, ma o repịaghị osisi ogwu ahụ. Mgbe Mosis gara nso ka ọ mara ihe na-emenụ, olu si n’osisi ogwu ahụ kpọọ ya òkù, sị: ‘Mosis! Abịakwula nso ebe a. Yipụ akpụkpọ ụkwụ gị n’ihi na ebe i guzo bụ ala dị nsọ.’ Ọ bụ Jehova si n’ọnụ otu mmụọ ozi na-agwa Mosis okwu.

Ụjọ tụwara Mosis, ya ekpuchie ihu ya. Olu ahụ gwara ya, sị: ‘Ahụla m ahụhụ ndị Izrel na-ata. M ga-anapụta ha n’aka ndị Ijipt ma kpọba ha n’ala mara mma. Ọ bụ gị ga-akpọpụta ndị m n’Ijipt.’ Í cheghị na ihe a juru Mosis anya?

Mosis kwuru, sị: ‘Olee ihe m ga-agwa ndị Izrel ma ha jụọ m onye zitere m?’ Chineke gwara Mosis, sị: ‘Gwa ha na Jehova, bụ́ Chineke Ebreham, Chineke Aịzik, na Chineke Jekọb zitere gị.’ Mosis gwaziri Jehova, sị: ‘Ọ bụrụkwanụ na ha egeghị m ntị?’ Jehova gwara Mosis ihe ọ ga-eme ka ha mata na ọ bụ yanwa zitere ya. Jehova gwara ya ka ọ tụpụ mkpara ya n’ala. Mgbe ọ tụpụrụ ya n’ala, ọ ghọrọ agwọ. Mgbe Mosis jidere agwọ ahụ n’ọdụ, ọ ghọrọ mkpara ọzọ. Jehova sịrị ya: ‘I mee ihe a, ha ga-amata na ọ bụ m zitere gị.’

Mosis kwuru, sị: ‘Amaghị m okwu ekwu.’ Jehova gwara ya, sị: ‘M ga-agwa gị ihe ị ga-ekwu, m ga-ezitekwara gị nwanne gị Erọn ka o nyere gị aka.’ Ihe ndị a Jehova gwara Mosis mere ka ọ ghọta na ọ nọnyeere ya. N’ihi ya, ọ kpọọrọ nwunye ya na ụmụ ya laghachi Ijipt.

Mgbe ndị Izrel na-agba ohu n’Ijipt, a manyere ha ịrụ ọrụ ike. Jehova zigara Mosis na Erọn ka ha gaa gwa Fero, sị: ‘Hapụ ndị m ka ha gaa fee m n’ala ịkpa.’ Mpako mere ka Fero jiri olu ike gwa ha, sị: ‘Agaghị m eme ihe Jehova kwuru, agakwanụghị m ahapụ ndị Izrel ka ha laa.’ Fero maliteziri ịmanye ha ka ha rụsiwekwuo ọrụ ike. Jehova ga-eme Fero ihe. Ị̀ ma otú ọ ga-esi eme ya? Ọ tara ndị Ijipt Ahụhụ Iri. Jehova gwara Mosis, sị: ‘Fero achọghị ige m ntị. N’ụtụtụ, ọ ga-aga n’Osimiri Naịl. Gaa gwa ya na ebe ọ bụ na ọ hapụghị ndị m ka ha laa, Osimiri Naịl ga-aghọ ọbara.’ Mosis gakwuuru Fero otú Jehova gwara ya. Fero hụrụ ka Erọn kụrụ mkpara ya n’Osimiri Naịl. Osimiri ahụ ghọrọ ọbara ma malite isi ísì, azụ̀ ndị dị na ya nwụkwara. E nweghịzi ike inweta mmiri ọṅụṅụ n’osimiri ahụ. Ma, Fero ekweghị ahapụ ndị Izrel ka ha laa.

Mgbe abalị asaa gachara, Jehova zigara Mosis ọzọ ka ọ gaa zie Fero, sị: ‘Ọ bụrụ na ị hapụghị ndị m ka ha laa, m ga-eme ka mbàrá ju ebe niile n’Ijipt.’ Erọn weliri mkpara ya elu, mbàrá amalite iju ebe niile n’Ijipt. Ha banyere n’ụlọ ndị mmadụ, n’àkwà ha, nakwa n’efere ha. Ha jukwara ebe niile. Fero gwara Mosis ka ọ rịọ Jehova ka o mee ka ahụhụ a kwụsị. Fero kwere nkwa na ọ ga-ahapụ ndị Izrel ka ha laa. N’ihi ya, Jehova mere ka mbàrá ndị ahụ nwụchaa, ndị Ijipt ekpokọta ha n’ikpo n’ikpo. Ala ahụ maliteziri isi ísì. Ma, Fero jụkwara ịhapụ ụmụ Izrel ka ha laa.

Jehova gwaziri Mosis, sị: ‘Erọn ga-akụ mkpara ya n’ala, ájá ga-aghọkwa anwụnta ma ọ bụ ụmụ ahụhụ ndị na-ata ata n’Ijipt.’ Ozugbo Erọn mere ihe a, anwụnta eju ebe niile. Ụfọdụ ndị Ijipt gwara Fero, sị: ‘Ahụhụ a si n’aka Chineke.’ Ma, Fero ka jụrụ ịhapụ ndị Izrel ka ha laa.