Mgbe ndị Izrel abụọ gara inyopụta otú Jeriko dị, ha banyere n’ụlọ otu nwaanyị aha ya bụ Rehab. Eze Jeriko chọpụtara na ha gara n’ụlọ Rehab, ya eziga ndị agha ya ebe ahụ. Rehab zoro mmadụ abụọ ahụ n’uko ụlọ ya ma gwa ndị agha ahụ ka ha gaa chọọ ha ebe ọzọ. Ọ gwara ndị nnyopụta ahụ, sị: ‘M ga-enyere unu aka n’ihi na m ma na Jehova nọnyeere unu, amakwa m na unu ga-emeri obodo a. Biko, kwenụ m nkwa na unu ga-echebe ndị ezinụlọ anyị.’

Ndị nnyopụta ahụ gwara Rehab, sị: ‘Anyị na-ekwe gị nkwa na e nweghị ihe ga-eme onye ọ bụla nọ n’ụlọ gị.’ Ha sịkwara ya: ‘Kee ụdọ na-acha uhie uhie na windo gị. Ọ bụrụ na i kee ya, e nweghị ihe ga-eme ndị ezinụlọ unu.’

Rehab kegidere ụdọ na windo ya, ndị nnyopụta ahụ esi na ya rịtuo. Ha gara zoo n’ugwu ruo abalị atọ tupu ha alaghachikwuru Joshụa. Ndị Izrel mechara gafee Osimiri Jọdan ma jikere ka ha weghara Jeriko. Jeriko bụ obodo mbụ ha meriri. Jehova gwara ha ka ha gbaa obodo ahụ gburugburu otu ugboro n’ụbọchị ruo abalị isii. N’ụbọchị nke asaa, ha gbara obodo ahụ gburugburu ugboro asaa. Mgbe ha gbachara ya, ndị nchụàjà fụrụ opi ha, ndị agha tiri mkpu, tisie ya ike, mgbidi obodo ahụ adakasịa. Ma, ụlọ Rehab adaghị n’agbanyeghị na ọ dị ná mgbidi ahụ. E nweghị ihe mere Rehab na ezinụlọ ha n’ihi na ọ tụkwasịrị Jehova obi.

Akụkọ ihe mere Jeriko bịara gazuo n’obodo ndị ọzọ dị na Kenan. Ndị eze obodo ndị a kpebiri na ha ga-ejikọ aka lụso ndị Izrel agha. Ma ndị Gibiọn kpebiri na ha ga-eme ihe dị iche. Ha yi nkịrịka uwe gakwuru Joshụa ma sị: ‘Anyị si n’obodo dị anya bịa. Anyị anụla banyere Jehova na ihe niile o meere unu n’Ijipt nakwa na Moab. Kwenụ anyị nkwa na unu agaghị alụso anyị agha, anyị ga-abụ ndị ohu unu.’

Joshụa kwetara ihe ha kwuru ma kweta na ha agaghị alụso ha agha. Mgbe ụbọchị atọ gachara, ọ chọpụtara na ha esighị n’obodo dị anya bịa. Ha si Kenan. Joshụa jụrụ ndị Gibiọn, sị: ‘Gịnị mere unu ji ghaara anyị ụgha?’ Ha gwara ya, sị: ‘Ụjọ tụrụ anyị. Anyị ma na Jehova Chineke unu na-alụrụ unu agha. Biko, unu egbula anyị.’ Joshụa egbughị ha otú o kwere ha ná nkwa.

Obere oge, ndị eze ise na-achị ndị Kenan na ndị agha ha kpebiri ịlụso ndị Gibiọn agha. Mgbe Joshụa na ndị agha ya nụrụ ya, ha si n’abalị gagide ije chi abọọ ka ha nwee ike ịzọpụta ndị Gibiọn. Ha na ndị Kenan malitere ịlụ agha n’isi ụtụtụ ahụ. Ndị Kenan malitere ịgba ọsọ. Jehova mere ka akụ́ mmiri ígwé dagbuo ha ebe ọ bụla ha gbagara. Joshụa gwaziri Jehova ka o mee ka anyanwụ kwụrụ otu ebe. Gịnị mere o ji gwa Jehova ka o mee otú ahụ ebe ọ bụ na ụdị ihe a emetụbeghị? Ọ bụ n’ihi na Joshụa tụkwasịrị Jehova obi. Anyanwụ adaghị n’ụbọchị ahụ niile ruo mgbe ndị Izrel meriri ndị eze Kenan na ndị agha ha.