Ndị Izrel hapụrụ Jehova ọzọ ma malite ife arụsị dị iche iche. Mgbe ndị Amọn lụsoro ndị Izrel agha, chi ndị ahụ ha na-efe enyereghị ha aka. Ndị Izrel tara ahụhụ ọtụtụ afọ. Ha mechara gwa Jehova, sị: ‘Anyị emehiela. Biko, napụta anyị n’aka ndị iro anyị.’ Ndị Izrel bibiri arụsị ha niile, maliteghachi ife Jehova. Jehova achọghị ka ha nọgide na-ata ahụhụ.

Jehova họpụtara otu dike aha ya bụ Jefta ka o duru ndị Izrel gaa lụso ndị Amọn agha. Jefta gwara Jehova, sị: ‘Ọ bụrụ na i mee ka anyị merie n’agha a, m lọta, m ga-enye gị onye mbụ si n’ụlọ m pụta izute m.’ Jehova zara ekpere Jefta ma nyere ya aka ya emerie n’agha ahụ.

Mgbe Jefta lọtara, onye mbụ pụtara izute ya bụ nwa ya nwaanyị. Ọ bụ naanị ya ka ọ mụrụ. Ọ kụụrụ ịgbà, gbara egwú na-apụta izute nna ya. Gịnị ka Jefta ga-emezi? O chetara nkwa o kwere ma sị: ‘Ewoo, ada m! I mewaala m obi. Ekwere m Jehova nkwa. Ka m nwee ike imezu nkwa a, m ga-eziga gị n’ụlọikwuu dị na Shaịlo ka i jewere ya ozi.’ Ma, ọ gwara nna ya, sị: ‘Ọ bụrụ na i kwere Jehova nkwa, mezuo ya. Biko, tupu mụ agaa, nye m ọnwa abụọ ka mụ na ndị enyi m gaa n’ugwu nọọ. Anyị lọta, mụ agawa.’ Ada Jefta ji obi ya niile jeere Chineke ozi n’ụlọikwuu n’oge niile ọ dị ndụ. N’afọ ọ bụla, ndị enyi ya na-aga eleta ya na Shaịlo.

Nnukwu Onye Nchụàjà bụ́ Ịlaị nwere ụmụ nwoke abụọ. Ụmụ ya abụọ a bụ ndị nchụàjà. Ha na-eje ozi n’ụlọikwuu. Aha ha bụ Họfnaị na Finihas. Ha anaghị erubere Jehova isi. Ha na-emesi ndị mmadụ ike. Ọ na-abụ ndị Izrel weta anụ ha ga-eji chụọrọ Jehova àjà, Họfnaị na Finihas na-ewere ebe kacha mma na ha. Ịlaị nụrụ ihe ụmụ ya na-eme, ma ọ gbachiri ha nkịtị. Jehova ọ̀ ga-ekwe ka ihe a nọgide na-eme?

Ọ bụ eziokwu na Họfnaị na Finihas tọgburu Samuel atọgbu, ma o meghị ka ha. Ihe a Samuel mere tọrọ Jehova ụtọ. Otu abalị Samuel na-ehi ụra, ọ nụrụ olu nọ na-akpọ ya. O biliri gakwuru Ịlaị ma gwa ya, sị: ‘Lekwa m.’ Ma Ịlaị sịrị ya: ‘Akpọghị m gị. Gaa dinara ala.’ Samuel gakwara dinara ala. Ọ nụkwara olu ahụ ọzọ. Mgbe Samuel nụrụ olu ahụ nke ugboro atọ ya, Ịlaị matara na ọ bụ Jehova na-akpọ Samuel. Ọ gwara Samuel na ọ bụrụ na ọ nụ olu ahụ ọzọ, ka ọ sị: ‘Jehova, kwuwe. Ohu gị na-ege ntị.’

Samuel gakwara dinara ọzọ. Ọ nụrụ olu ahụ ọzọ. Olu ahụ sịrị: ‘Samuel! Samuel!’ Ọ zara, sị: ‘Kwuwe, ohu gị na-ege ntị.’ Jehova gwara ya, sị: ‘Gwa Ịlaị na m ga-ata ya na ezinụlọ ya ahụhụ. Ọ ma na ụmụ ya na-eme ihe ọjọọ n’ụlọikwuu m, ma ọ gbachiri ha nkịtị.’ N’ụtụtụ echi ya, Samuel meghere ụzọ ụlọikwuu otú o si emebu. Ụjọ tụrụ ya ịgwa nnukwu onye nchụàjà ihe Jehova kwuru. Ma, Ịlaị kpọrọ ya, jụọ ya, sị: ‘Nwa m, gịnị ka Jehova gwara gị? Gwa m ihe niile.’ N’ihi ya, Samuel gwara Ịlaị ihe niile.

Ka Samuel na-eto, Jehova ahapụghị ya. Ọ bịara doo ndị Izrel niile anya na Jehova ahọrọla Samuel ka ọ bụrụ onye amụma na onyeikpe.