N’oge ahụ ọkọchị kọrọ n’Izrel, Jehova gwara Ịlaịja, sị: ‘Gaa Zarefat. Otu nwaanyị di ya nwụrụ nke bi ebe ahụ ga na-enye gị nri.’ Mgbe Ịlaịja ruru n’ọnụ ụzọ ámá obodo ahụ, ọ hụrụ otu nwaanyị di ya nwụrụ ebe ọ na-akpa nkụ. Nwaanyị a dara ogbenye. Ịlaịja rịọrọ ya ka o kunyetụ ya mmiri ka ọ ṅụọ. Mgbe nwaanyị ahụ gawara ikute ya, Ịlaịja gwara ya, sị: ‘Biko, wetakwara m achịcha.’ Ma, nwaanyị ahụ sịrị ya: ‘Enweghị m achịcha m ga-enye gị. Ihe m nwere bụ naanị obere ntụ ọka na obere mmanụ m ga-eji mee obere nri mụ na nwa m nwoke ga-eri.’ Ịlaịja gwara ya, sị: ‘Jehova kwuru na i meere m achịcha, ntụ ọka na mmanụ gị agaghị agwụ ruo mgbe ọzọ mmiri ga-ezo.’

Nwaanyị ahụ lawara gaa meere onye amụma Jehova achịcha. Jehova mezuru ihe o kwuru. Nwaanyị ahụ na nwa ya nwoke nwere ihe ha na-eri n’oge niile ahụ ọkọchị kọrọ. Ntụ ọka ya agwụghị, mmanụ ya agwụghịkwa.

Ma, o nweziri ihe merenụ nke gbawara nwaanyị ahụ obi. Obere nwa ya nwoke ahụ rịawara ọrịa, mechaakwa nwụọ. Ọ rịọwara Ịlaịja ka o nyere ya aka. Ịlaịja kuuru nwa ahụ gbagoo n’ọnụ ụlọ ha dị n’elu ma nyiwe ya n’àkwà. Ọ rịọziri Jehova, sị: ‘Jehova, biko, mee ka nwatakịrị a dịghachi ndụ.’ Ị̀ ma ihe mere ọ ga-eji abụ ihe ịtụnanya ma Jehova kpọlite nwa ahụ n’ọnwụ? Ọ bụ n’ihi na e nwetụbeghị onye e kwuru na a kpọlitere n’ọnwụ tupu mgbe ahụ. Ihe ọzọ bụ na nwaanyị a na nwa ya nwoke abụghịdị ndị Izrel.

Ma, Jehova mere ka nwa ahụ dịghachi ndụ, ya amalitekwa iku ume. Ịlaịja gwara nwaanyị ahụ di ya nwụrụ, sị: “Lekwa nwa gị. Ọ dịla ndụ.” Obi tọrọ nwaanyị ahụ ezigbo ụtọ, ya agwa Ịlaịja, sị: ‘Ị bụ onye nke Chineke n’eziokwu. Ihe m ji mara bụ na ị na-ekwu naanị ihe Jehova gwara gị ka i kwuo.’

E nwere otu ụbọchị Eze Ehab nọ n’obí ya dị na Jezril, si na windo na-ele ubi vaịn otu nwoke aha ya bụ Nebọt. Ehab chọrọ ka ubi vaịn a bụrụ nke ya. Ọ gwara Nebọt ka o resị ya ubi vaịn a. Ma, Nebọt jụrụ. Ọ jụrụ maka na Iwu Jehova kwuru ka ndị Izrel ghara ire ala ezinụlọ ha ketara. Ehab ọ̀ kwanyeere Nebọt ùgwù maka ime ihe Jehova kwuru? Mba. Kama, o were ezigbo iwe nke na ọ gara nọrọ n’ime ụlọ ya, o kweghị apụta èzí, o kweghịkwa eri nri.

Nwunye Ehab bụ nwaanyị ọjọọ. Aha ya bụ Jezibel. Ọ gwara Ehab, sị: ‘Ọ bụ gị bụ eze Izrel. Ị ga-enweta ihe ọ bụla ị chọrọ. M ga-enye gị ala ahụ.’ O degaara ndị okenye obodo Nebọt hà akwụkwọ ozi, sị ha bo Nebọt ebubo na ọ kpọrọ Chineke iyi, ka ha jirikwa nkume tụgbuo ya. Ndị okenye ahụ mere ihe Jezibel gwara ha. Jezibel gwaziri Ehab, sị: ‘Nebọt anwụọla. Ubi vaịn ahụ bụzi nke gị.’

Ọ bụghị naanị Nebọt bụ ezigbo mmadụ Jezibel gburu. O gbukwara ọtụtụ ndị hụrụ Jehova n’anya. Jezibel na-ekpere arụsị. O mekwara ọtụtụ ihe ọjọọ ndị ọzọ. Jehova hụrụ ihe ọjọọ niile Jezibel mere. Olee ihe Jehova ga-eme ya?

Mgbe Ehab nwụrụ, Jehoram nwa ya nwoke ghọrọ eze. Jehova zigara otu nwoke aha ya bụ Jihu ka ọ gaa gbuo Jezibel na ndị ezinụlọ ya.

Jihu gbaara ụgbọ ịnyịnya ya gaa Jezril ebe Jezibel bi. Jehoram gbakwaara ụgbọ ịnyịnya nke ya gawa izute ya. Mgbe ọ hụrụ Jihu, ọ jụrụ ya, sị: “Udo ọ̀ dịkwa?” Jihu gwara ya, sị: ‘Udo agaghị adị ebe ọ bụ na Jezibel nne gị na-eme ihe ọjọọ.’ Jehoram tụgharịrị ụgbọ ịnyịnya ya ka ọ gbalaga. Ma, Jihu gbara ya ụta, ya anwụọ.

Jihu gawaziri n’obí eze ebe Jezibel nọ. Mgbe ọ nụrụ na Jihu na-abịa, o tere uri anya, mezie isi ya, gaa na windo ụlọ elu ya nọrọ na-eche ya. Mgbe Jihu rutere, Jezibel ji ọnụ ọjọọ kelee ya. Jihu weliri olu gwa ndị na-ejere Jezibel ozi, bụ́ ndị guzo Jezibel n’akụkụ, sị: “Tụdatanụ ya!” Ha si na windo kwapụ Jezibel, ya adaa n’ala nwụọ.

Jihu mechara gbuo ụmụ Ehab ndị nwoke dị iri asaa. O mekwara ka ndị Izrel kwụsị ife Bel. Ị̀ hụla na Jehova ma ihe niile ndị mmadụ na-eme, ọ ga-egbukwa ndị na-eme ihe ọjọọ mgbe oge ya ruru?