IRutu Bala ỊNawụmi

Lụka ọhẹ ọlẹ ká uhi lụmẹ ọ-ọpyị nya Isirẹlụ, ọnyang ọla Isirẹlụ ọhẹ ká ẹnyị nyamwụ ri ịNawụmi mwụ bala ọrụmwụ bala anyị alẹng nyaa imiiye kaka kụ ọpyị nya iMowabụ. Ọrụ ịNawụmi gbu nyọlẹ kọ nọ chẹẹ. Anyị nyamwụ ye iRutu bala Ọpa, kị ri ala iMowabụ. Ọ tolujwo nyori anyị alẹng nya ịNawụmi ịwẹ gbu ịnyịnyị nyọlẹ kọ nọ chẹẹ.

Ụka ká ịNawụmi wo nyori uhi ọla Isirẹlụ nyị myị́ lẹ, ọ chụ nyọka rụ tịrẹkpẹ ka ẹpwa lẹlẹ. IRutu bala Ọpa hu ang ẹdịyẹ balọọ, ma nyọlẹ kị pwụ́ ụgbẹyị, ịNawụmi byaa yẹkẹẹ: ‘Anụ ri ịhụ ịnyịịla ẹ-ẹga nya anyị nyam, anụ tị jẹ́-ẹ kpahị jum ịnyịnyị. Lẹ m̀ tịtọ kanụ ka rwọrụ myịmyị. Anụ tịrẹkpẹ ka iMowabụ mẹ.’ Anyang ịwẹ wẹ yẹkẹẹ: ‘À háahị! Áhị tịtọ nyọka rụ hing ka.’ ỊNawụmị kịnyaa la ọ-yẹ rịraa kị ka rụ. Ụka ohyẹẹkpẹ lẹ, Ọpa à tịrẹkpẹ lẹlẹ, iRutu ọwa á tị myị tịrẹkpẹ ka. ỊNawụmi byoo yẹkẹẹ: ‘Ọpa laa rụ tịrẹkpẹ kaka ta alẹpwa nyamwụ bala ihye nyamwụ lẹ. Tịrẹkpẹ bọọ, ká rụ ka ẹpwa nya ịnang mẹ.’ Ma iRutu yẹkẹẹ: ‘Ḿ ka rụ hing ka. Angịnyị nyang à ka ri angịnyị nyam ẹẹ, Ohe nyang à tị ka ri Ohe nyam ịnyịnyị lẹlẹ.’ Ányị a tị́ me irya kọ la ịNawụmi nyọlẹ ká iRutu ya ẹlẹwẹ?

IRutu bala ịNawụmi pwụ́ Isirẹlụ ụka kị kaa dọmwụ nya ọ-chị ang-ẹrụ ịlẹ kị wụrụ nya ịbali. Ẹnẹhẹ, iRutu ka ọlụmwọ ọdada ẹ-ẹrụ nya ọlẹng ọlẹ ká ẹnyị nyamwụ ri iBowasị. IBowasị ọọwa ri ọnyị nya iRehabụ. O wo nyori iRutu nyị ri ala iMowabụ, ma nyị tị godayị giri-giri bala ịNawụmi. Ọ byi alụkụrwọ nyamwụ nyị pẹhị ang cheeji gụ olene chajị ká iRutu ka yé da ụmwọ yẹẹyẹẹ kpa rụ.

La obyi nya ẹnẹwẹ, ịNawụmi tọ iRutu wo yẹkẹẹ: ‘Ẹ-ẹrụ nya owo a tị́ da ụmwọ nya ang-ẹrụ alẹ?’ IRutu wẹ yẹkẹẹ: ‘Ẹ-ẹrụ nya ọlẹng ọlẹ kịị wụrụ nya iBowasị ịnyị.’ ỊNawụmi byoo yẹkẹẹ: ‘IBowasị bwu bala ọrụm. Kịnyaa la ọ-ka da ụmwọ ẹ-ẹrụ nyamwụ bala ịyẹẹnọ ịkịla mẹ. Ọngọngọhẹ á ja họng abwẹbwẹhẹ ụ-ụwa ka.’

IRutu kịnyaa la ọ-họ ụkụrwọ ẹ-ẹrụ nya iBowasị gbee ká ụka nya ịbali ọchịchị cheju. IBowasị yẹ nyori iRutu kaa jụ ụkụrwọ họ, ọ tị ri ọnyang ọnyịịla ịnyịnyị. Lụka nyaa, kori ká ọlẹng á gbu la ọ-ma ọnyị ọlẹng ene ka, ọngọhẹ ugbiyegu nyamwụ kaa ye ahụ nyamwụ. Lẹ iBowasị ye iRutu. Ị ma ọnyị ọlẹng ọlẹ kịị wụrụ nya Obẹdị, ọ tị nwà kaka ri adịda ọgbahị nya Adịrahụ iDevidi. Aligu nya ịNawụmi chị ọkẹkẹnị yẹẹyẹẹ. Ị yẹkẹẹ: ‘Họhẹ-họhẹ, iJihova ya iRutu hang, ọlẹ kọ jẹ́-ẹ kpahị jung yẹẹyẹẹ, à tị myịmyị la ọnyị ọtụma ugbẹnyị lẹ. Ogbo a ri ịnya iJihova mẹ.’