Mẹjẹ bwula abwẹla nyang nyori à ri ọngọ jẹ́-ẹ yẹ ẹla ẹkpẹ imiiye. A ka jẹ́-ẹ tọ ịlọng wo yẹkẹẹ: “Angịnyị kaa yẹm lala ọngọ kaa yẹ ẹla ẹkpẹ imiiye bala ọ-kaa ye angịkịla myị? Lee ị tị́ kaa yẹm lala ọngọ ya ọnụ rịrị ẹla, lee ọngọ la egbeju ọngịrị? M̀ kaa ke ụrụ wo la angịkịla bala ọ-myị ju ẹla ọla irya nyaa ụka ká ọọwa á pwoku?’ Abwọlẹ kahị kaa yẹ ẹla ẹkpẹ imiiye kaka ba ka mẹjẹ jaabwọ kahị wẹẹ gbịla iJihova bala iJisọsị kaka ba. Ahị baba nyọka yẹ ẹla ẹkpẹ imiiye ụka ká iwe-ahụrụ nyahị á yẹda. Ọyẹda ọlịnyị ka ju ọmwụ nya akama ọlẹ kahị yẹ ahị me ka myị́. Ọ-chụ pwokwita, ẹdụrụ ọnyọọngịrị ọhẹ ka jụhị lụka ọ-kpịraka myị́. Lee okpoko o-ji nwà ka bala igomenti ọ-yẹda lụka ọkpahị ju ka, ka du ká ọhịhị ka lujwo hahị kpoye-kpoye myị́. (Ọngọ. 9:11) Ọ dọmwụ kaa lujwo hahị ụka ọhẹ kori ká ogu nya iJihova á yẹ ụkụrwọ ọlẹ kahị kaa họ ene-ene da. Ahị ka jẹ́-ẹ yẹ ba iwe-ahụrụ onyeewe myị́ bwula o-hu ẹta-ẹdịyẹ ine ịlẹ: (1) myị nyori iwe-ahụrụ nyang yẹda lẹ, (2) yẹhị rịrị ka ijuju, (3) ya irya nọ u-uhye nya ang ịnyịịla ịla ọhịhị nyang, bala (4) họ ang ha angịkịla. w23.07 21-22 ¶7-8

Ọlọmwụ ịDanẹlụ ri onjwo ụka ká ala ịBabịlọn woo kpa rụ ka epweji nyaa lụrụ-lụrụ hi iJerusalẹm. Ma nanana nyori ịDanẹlụ ri onjwo, ẹla nyamwụ kpụ alegbeju ịla ịBabịlọn ịpyọ. Ị yẹ nyori nyị há-ụhị bala o-ri nyị bwu ugbiyegu ọlẹ kọ la ihi. (1 Sam. 16:7) Lẹ, ala ịBabịlọn mẹ ang jọ́ọ nyọka họ ụkụrwọ ẹ-ẹpwa nya adịrahụ. (Dan. 1:3, 4, 6) ỊDanẹlụ há iJihova yẹẹyẹẹ ọọlajị nya ụma nya ọngịnyị ọlẹ ká okolobya ọwẹ chụ nyọka ri. Ụka ọlẹ ká iJihova dọmwụ ya ẹla ọnyịịla nya ịDanẹlụ lala iNuwa bala iJobu lẹ, ịDanẹlụ ka gu ẹka lala 20 wẹẹ ịnyị. Lẹ iJihova yẹ ịDanẹlụ lala ọlabwẹla ọnyịịla jaabwọ kọ yẹ iNuwa bala iJobu, kị ri angị gbịgba họọ ẹ-ẹpwụ nya ẹka lụmẹ-lụmẹ lẹ. (Ọmwụ. 5:32; 6:9, 10; Job. 42:16, 17; Isi. 14:14) IJihova tị kịnyaa la ọ-la ọháha ẹ-ẹga nya ịDanẹlụ ẹ-ẹpwụ nya ọhịhị oludiyo bala ọkpịpyọ-kpịpyọ nyamwụ ọlẹ kọ hị.—Dan. 10:11, 19. w23.08 2 ¶1-2

Ụka ká tịtọ nyọka ra ẹpwa ọhẹ, ọ la gede-gede nyori ọ ka háng ká ka jẹ́ ẹla myị́ ẹla oluhye nya ẹpwa ọlẹ ká wẹẹ tịtọ nyọka ra la ịlọng. Ahị ka jẹ́-ẹ họ ẹla ụma ọlịnyị ụka kahị ja wa ịBayịbụụ bala ọ-jẹ́ ang bwu ụwa. Kori ká wọọ la agaga, ang ịmanyị-ịmanyị ịlẹ kị ri “ẹla ịdọmwụ nya ọgbanyẹ-ọgbanyẹ ẹ-ẹpwụ nya ẹla nya Ohe Oluhye,” a ka jẹ́ kem lẹ. (Hib. 5:12) Ma jaabwọ ká ka ju ka ẹpwụ nya ube nyọka wụlọọ yẹ yẹẹyẹẹ, à baba nyọka wụla ịBayịbụụ yẹ rige-rige ịnyịnyị. Ụgbẹyị ọnyịịla ọhẹ ọlẹ ká ka jẹ́-ẹ jẹ́ ịBayịbụụ ri ọ-ka yẹ abwọlẹ ká apa ịdatị-datị nya ẹla ọlụwa da ori wu awụlẹ. Maga ká jẹ́ etu nya ẹlịlẹhị ịlẹ ká myị la yẹẹyẹẹ bala ọ-ka jẹ́ ang odudu ká myị laa ịnyịnyị. Kori kahị ka jẹ́ ẹla ọla Ụpwụ Ịgọgọ aalẹ, o ri o-pyii kahị ka jẹ́ ẹlịlẹhị ikpori-kpori ịlụwa. Ọlẹrụ ịPọlụ ju Angịnyị nya ịKịrayịsị ịkịla ọhụ nyị jẹ́ Omyi Ẹla nya Ohe yẹẹyẹẹ nyọka “jẹ́ jaabwọ ká ẹpwụ ojuju bala udiyo ọlala bala uhye ọlala bala okpori-kpori ọlala” nya ẹlịlẹhị ọlụwa la ka ba. Ọọwa ị ka jẹ́-ẹ da “itiwe bala ụtẹ” yeji ẹ-ẹpwụ nya ọmyịmyị nyaa ka ịlahị-ịlahị lẹ. (Efe. 3:14-19) Ahị baba nyọka họ ịnyị ịnyịnyị. w23.10 18 ¶1-3