HỊHỊ LALA ANGỊNYỊ NYA ỊKỊRAYỊSỊ

Nwa Kịlahị-ịlahị Ẹ-ẹpwụ Nya Ẹrụ Ọnyịịla Ọ-kpa Pyẹ—ILeta ọ-Dada ụ-Ụgbẹyị Ọnyịịla

ANG ODUDU ỌLẸ KỌ́ BABA: Ụpwụ nya 1 Ala ịKọrịntị ri iLeta ọhẹ ẹ-ẹpwụ nya iLeta iwo kụrụ ine (14) ịlẹ ká ịPọlụ da du kịla angịnyị nya ịKịrayịsị ịkịla nyọka jwaa ọhụ. Ụka ká ọngịnyị-ị́ juwa da iLeta, ọ kaa la ụka yẹẹyẹẹ nyọka kụ irya ju omyi ẹla ọlẹ kọ́ ka da ẹ-ẹpwụ nyamwụ. Ọngọlẹ kị́ tị́ ka ya du ẹrụ ta ka jẹ́-ẹ wọọ gụ ụka ookpokpo myị́ ịnyịnyị. Lẹ, iLeta ọ-dada ri ụgbeyị ọnyịịla ọhẹ ọlẹ káhị ka jẹ́-ẹ kpa ya ẹla nya Ohe ju ala ugbiyegu nyahị bala angịlẹ káhị jẹ́ yẹẹyẹẹ. Ịnyịnyị, ahị ka jẹ́-ẹ ya ẹla nya Ohe ju angịlẹ kahị jẹ́-ẹ yẹ myị́ ka, bwula iLeta ọ-dada. Lala ọ-chụ pwokwịta, ọngọhẹ ka ji kọ ka ke ụrụ yẹẹyẹẹ, ma ọ tị ka lujwo nyọka tọọ ẹ-ẹpwa. Ịnyịnyị, ọ ka lujwo nyọka wu angịhyẹ ọyị o-oye nyahị myị́, chajị ị kụ ẹpwa ẹ-ẹga ká angị-gbeji kaa ji lụmẹ, epweji ịlẹ kị nwụ ang da koko ju, lee ẹpwa ịlẹ kị́ ji ẹga ọlụrụ. Ẹlịyẹ ahị tị ka kpa i-irya, ụka kahị tịtọ nyọka da iLeta ta ọngịnyị, ọgụgụụgụ ọngọlẹ kahị jẹ́ ẹnẹhẹ lẹ ka?

ỊPọlụ ọngọjụgbẹyị nya ịKịrayịsị wẹẹ da iLeta

JAABWỌ ÁHỊ KA BWU HỌ ỊNYỊ:

Ya ẹla ọlẹ kọ́ pwoku nyọka ya, kori ká juwa i-ijata nya ọngọọwa ịnọ. Bwuru ẹnyị nyang ju ọngọọwa bwu ọmwụ ọdada nya iLeta ọọwa, ká myịmyị ya ang odudu ọlẹ ká wẹẹ da ụpwụ ọwẹ. Ịnyịnyị, à ka jẹ́-ẹ tọ ịtọ ẹla ọlẹ ká ọngọọwa ka kụ irya ju bala ọ-dọọ ụbwọ ka ịWẹbsayịtị nyahị. À ka myịmyị jẹ́-ẹ ya joo nyori ahị kaa jẹ́ ịBayịbụụ bala angịnyị ẹ-ẹpwa bala ọ-da egbeju nya ẹla ịhyẹ bwu ụpwụ ọlẹ káhị kaa kpa jẹ́ ang ju iLeta ọọwa ịnyịnyị. À tị ka jẹ́-ẹ ya ụpwụ ọ-kpa wụrụ angịnyị ẹpwa, ịtrakị bala contact card ju ẹ-ẹpwụ nya iLeta ọọwa ịnyịnyị myị́
A ya ẹla lụmẹ ka. Da iLeta nyang kọ la kpii, chajị kọ́ ka chị ọngọọwa aga la ọwawa ka.—Kụ ẹhị yẹ iLeta ọlẹ kị́ da mẹjẹ wẹẹ, ẹ-ẹbẹ 8
Kụ ẹhị yẹ iLeta ọọwa myịmyị ụka ká dọọ kpá, ká nwọọ họ chajị ká ẹla ọlẹpwụ nyamwụ ka la kpẹẹkpẹẹ bala ọchịkpẹẹ la ọwawa. Dọọ ụ-ụgbẹyị ọnyịịla ọlẹ kọ́ ka la kpẹnẹẹ bala o-pwoku ịnyịnyị.