HỊHỊ LALA ANGỊNYỊ NYA ỊKỊRAYỊSỊ

Chụ Ụya Ọyaya Nyang La Ẹla Ọjẹ́jẹ

Ịyẹ tị́ du kọ́ baba lụmẹ nyọka chụ ụya ọyaya nyahị la ẹla ọjẹ́jẹ? Chajị ẹla ịla ifim ịlẹ káhị kaa yẹ, eje ịlẹ káhị kaa ke ụrụ wo la, ịWẹbsayịtị ịlẹ áhị kaa wụrụ, apwụ ịlẹ áhị kaa wa lee ụma nya ayịlọ ịla ifim ịkịla ịlẹ káhị kaa chụ, à kaa juwa i-irya nyahị lẹ. Lẹ, ụma nya ụya ọyaya ọlẹ káhị chụ kaa gu abwẹla nyahị ịnyịnyị. Ọ tị tolujwo lụmẹ nyori, ụma nya ụya ịyaya ịlẹ kị́ myị odehe ọlẹ alẹ kpọrịkọọ, kaa mẹ ang ịlẹ kị́ ha iJihova ka jẹ. (Eje 11:5; Ga 5:19-21) Ịnyị à dudu ká ịBayịbụụ juhi ọhụ nyori ahị nyị kịnyaa juwa me irya ju ang ịlẹ kị́ ka kpa ogbo ogwogwo kịla iJihova lẹ.—Fil 4:8.

YẸ IFIM ỌLẸ KỌ RI, ỤYA ỌYAYA ỌLÁNYỊ M TỊ́ KA CHỤ? KÁ WẸ ỊTỌ ẸLA ILEJI ỊLẸ:

Ụgbẹyị oyina ụma nya ayịlọ nya Ala iRom ịla oyi onyogo à tị́ bwu me ịlẹ kị́ kaa kọ la oyi nyahị ọlẹ ịnyịnyị?
Ányị ala ọjịra-jịra à tị́ ka bwu da anjwo ikolobya bala ịyẹẹnọ ụbwọ nyọka chụ ụya ọyaya la ẹla ọjẹ́jẹ?
Ányị ẹla ọlụpwụ nya Ala iRom 12:9 à tị́ ka bwu dahị ụbwọ nyọka chụ ụya ọyaya nyahị?
Ụma nya ụya ọyaya iyina à tị́ ri ịlẹ kị́ pwoku o-oye nyang?

ỤYA ỌYAYA NYỊLỌNG LEE ỊNYA ANGỊKỊLA TỊ́?

Ụya ọyaya ịlẹ kị́ lụmẹ gụgụ wuu odehe ọlẹ kaa ju angịnyị ọhụ nyọka yẹ lee ọ-wa ang ịlẹ ká angịkịla kaa họ kem, ọkọkọ nyọka họ lịlaa. Ifim ịlẹ áhị kaa yẹ bala apwụ ịlẹ áhị kaa wa, kaa mẹ ang ịlẹ ká angịkịla họ jẹ́ẹhị kem, ị-ịlẹ káhị họ lịlọhị ka. Ịlẹhị lẹ, ụya ọyaya ịlẹ ká angịkịla họ kaa kpịpyọ. Iru nya angịnyị tị yẹ ịnyịnyị nyori ịlẹ káhị họ lịlọhị nyị ju apyobwuna yẹẹyẹẹ gụ́. Lala ọ-chụ pwokwịta, ọ kaa kpụ angịhyẹ ịpyọ nyọka du ang nya eje lịlaa lee ọ-gba arụrụ nya ang. Olo ọdada, awa ọdada lee ewo ọchịchị tị kaa kpụ angịkịla ịpyọ ịnyịnyị. Ahị maga nyọka “kpa ogbo ogwogwo kịla Ohe Oluhye” ẹ-ẹpwụ nya ụya ọyaya ọnyị myị́ ọnyị ọlẹ káhị chụ.—1Kọ 10:31.