Jaabwọ Á Ka Bwu Dọmwụ nya Ẹla Oyaya La ịTrakị

Bwu Ọya Ọhọhẹ nya ẹka 2018, ugo-ẹkpẹ nya ụpwụ nya Ọhịhị Bala Ụkụrwọ Nyahị Ahị Angịnyị nya ịKịrayịsị, la ị-họ mẹjẹ nya ụgbẹyị ọlẹ áhị ka bwu ya ẹla. Ị kaa juhi ọhụ nyọka ji ahị da ẹla o-ya lawụlẹ bala angịnyị, ọkọkọ nyọka ya apwụ haa kem. Nyọka da angị ya ẹrụ ọnyịịla ụbwọ jaabwọ ọlẹ kị ka bwu họ ịnyị, ifim nya ụgbẹyị ọlẹ áhị ka bwu ya ẹla, kaa mẹjẹ jaabwọ kahị ka dọmwụ nya ẹla oyaya la ịBayịbụụ kem. Ọọwa ri yẹkẹẹ, áhị ka kpa apwụ nyahị họ ụkụrwọ lụka kahị juwa ya ẹla Ohe bwu ẹpwa ka ẹpwa kaka? Ịnyị ọla ka! Ọ-chụ pwokwita, ịtrakị ri ang-abwọ ọnyịịla ọhẹ ọlẹ kahị ka jẹ́-ẹ kpa dọmwụ nya ẹla oyaya. Ahị ka jẹ́-ẹ ba agbẹyị ịlẹ jẹ ụka kahị juwa kpa ịtrakị ọhẹ-lọhẹ họ ụkụrwọ:

1. Tọ ịtọ ẹla ọlịlahị nya ịtrakị ọlẹ ká ọwẹwẹ nyamwụ la ịmanyị-ịmanyị nyọka chụ bwu.

2. Mẹ ọwẹwẹ nya ịBayịbụụ ọlẹ kọ juwa ẹ-ẹpwụ nya ụpwụ ịgọgọ oluhye nya ẹbẹ oheeye jẹ. Kori ká ụka a ji hang, wa ala ịhyẹ ịlẹ kị juwa ẹ-ẹpwụ nya ịtrakị ọọwa, kanụ ya ẹla lawụlẹ u-uhye nyamwụ.

3. Ya ịtrakị ọwẹ ha ayịdẹpwa ọọwa, ka jwoo ọhụ nyọka wa ala ihihi ịlụwa lụka nya ịlọmwụ.

4. Ene ká ka rụ, mẹ ịtọ ẹla ọla ẹga kọ ri, “Kụ Irya Ju Ịtọ Ọlẹ Wẹẹ” jẹ ọngọọwa ká chọọ ehe nyọka mwẹẹkpẹ, kaka ya ẹla u-uhye nya ọwẹwẹ nyamwụ bwu ịBayịbụụ ụka ọkịla.

Ụka ká tịrẹkpẹ, ya ẹla u-uhye nya ọwẹwẹ nya ịtọ ẹla ọọwa, ká ya ịtọ ẹla ọkịla neeji nyọka ya ẹla u-uhye nyamwụ ụka ọkịla. À ka chụ ịtọ ẹla ọhẹ bwu ịwẹbsayịtị nyahị myị lee bwu ẹpwụ nya ụpwụ ọlẹ ki dụbwọ ka ẹ-ẹbẹ ọla ẹkpẹ nya ịtrakị ọọwa. Lụka ọlẹ kọ pwoku, ya ẹla u-uhye nya ụpwụ ọlẹ kọ ri Oja Ọnyịịla o-Bwu Ẹga nya Ohe Oluhye! lee ụpwụ ọ-kpa mẹ ang jẹ ọkịla ọhẹ bwu ẹpwụ nya Ang-abwọ ịlẹ Kahị kaa Kpa Mẹ Ang Jẹ.