À Nwụlanọ Nyọka ka Ube-ẹpwụ nya Angị Kaa Kpa Ẹrụ Ọnyịịla Pyẹ?

À ri ọngọlẹ ká gu ẹka 23 kele ka 65, ká tị́ juwa kpa ọhịhị nyang wuu họ ụkụrwọ nya Ohe Oluhye? À la ịnyịrọ ogogo bala ọ-ka jẹ́-ẹ họ ụkụrwọ ẹ-ẹga ọlẹ ka ọ-baba ji? Kori ká ọwẹwẹ nya ịtọ ẹla ịwẹ à ri ee, à kụ irya kori ká ka jẹ́-ẹ ka Ube-ẹpwụ nya Angị Kaa Kpa Ẹrụ Ọnyịịla Pyẹ? Dọmwụ bwu ịkịlasị ọhọhẹ nya ube-ẹpwụ ọwẹ, ụnọ-ụnọ nya ịhụ bala ịrụ, aanahị alẹng bala anyang ịlẹ kị ye ahụ lee ọ-rwọrụ lẹka ka ube-ẹpwụ ọwẹ lẹ. Ma, ahị baba nya aanahị alẹng ịlẹ kị ye ịhụ lẹka. Bịlẹ iJihova nyọka dang ụbwọ chajị ká ka họ ẹla ọlẹ kọ ka kpọọ ịpyọ bala ọ-ka gbịla ọgụ-ẹpẹtẹ nya ọnyị nyamwụ. (Eje 40:8; Mat 20:28; Hib 10:7) Ọọwa lẹ, á ka kụ ẹhị yẹ agbẹyị ịhyẹ ịlẹ ká ka jẹ́-ẹ chụ ụkụrwọ nyang lee ang ịkịla ịlẹ ká kpa ụ-ụbwọ hi chajị ká ka jẹ́-ẹ ka ube-ẹpwụ ọwẹ ẹẹ.

Iwe nya akụrwọ iyina à tị́ wụrụ da ha angịlẹ kị ye ọmẹjẹ bwu ube-ẹpwụ ọwẹ kpá? Ị kaa ya angịhyẹ du ẹrụ ká ẹga ọlẹ kị kaa ya òja ọkịla lee ọ-kpa ẹrụ ọnyịịla pyẹ bwula ọ-dayị ẹ-ẹpwụ nya alụma bala ẹpwarịrị nya epweji ọtụka ẹ-ẹga ká angịnyị lụmẹ. Angịkịla ịlẹ kị họ kpá bwu ube-ẹpwụ ọwẹ, ị kaa họ ụkụrwọ nya ọngọ ku ọmwakpa nya ọngọ kpẹhị rịrị isekut, ọngọ kpẹhị rịrị isekut lee angị kpa ẹrụ ọnyịịla pyẹ ọ-ọpyị ọkịla. Jaabwọ ọlẹ ká wẹẹ kụ irya nya agbẹyị ịhyẹ ịlẹ ká ka jẹ́-ẹ họ ụkụrwọ ha iJihova, ọhẹka á ka la irya ụma nya ọlọmwụ Ayịsaya ọlẹ kọ yẹkẹẹ: “Am lẹẹ lẹ, dum mẹ.”​—Ayị 6:8.

YẸ IFIM ỌLẸ KỌ RI, ANGỊ KPA ẸRỤ ỌNYỊỊLA PYẸ Ọ-ỌPYỊ ỌKỊLA​—ALỤKỤRWỌ JUWA Ẹ-ẸPWỤ NYA ANG-ẸRỤ ỌWỤWỤ LẸ, KANỤ WẸ ỊTỌ ẸLA ILEJI ỊLẸ:

• 

  Ányị ị tịị bwu chụ angị kpa ẹrụ ọnyịịla pyẹ ọ-ọpyị ọkịla?

• 

  Ụkụrwọ ọnyịịla oyina angị kpa ẹrụ ọnyịịla pyẹ ọ-ọpyị ọkịla à tị́ wẹẹ họ?

• 

  Ahị ọwawa iyina à tị́ juwa ẹ-ẹpwụ nya ẹrụ ọnyịịla ọ-kpa pyẹ ọ-ọpyị ọkịla?