Awụlẹ Oyeye Ri ọ-Yẹju Lawụlẹ o-Gboyi Myị́ Oyi

Awụlẹ oyeye nya Angịnyị nya ịKịrayịsị ọnyị kọ ju okpunyi kaa ya ihi ha iJihova bala ọ-kpa ọkẹkẹnị wẹ ahụ bala ọrụ ịịwa. (Mak 10:9) Nyọka jẹ́-ẹ bọhụ ẹpwụ nya awụlẹ oyeye bala ọ-chị ọkẹkẹnị, Angịnyị nya ịKịrayịsị ka ba ehile nya awụlẹ oyeye ọlẹpwụ nya ịBayịbụụ jẹ pyii ụka kị ka chụ ọngọlẹ kị ka ye lee ọrụ-rwọ.

‘Nwa adam-ọlẹng lee ọ-nwa ọnyang’ ene nyọka jẹdịyẹ nya awụlẹ oyeye. Ọ há gu nyọka kpoye nya ụka nya ọhịhị ọlẹ ká imyi nya ọlẹng lee ọnyang kaa nwụ anjwo la ọngịrị-ọngịrị ene, chajị ụka ọlịnyị ọngịnyị á kaa kụ irya kpakpa ka. (1Kọr 7: 36) Kpa ụka ọlẹ ká ji ụbwọng wẹẹ ju igu oriri nyang bala iJihova ọngịrị bala ọ-ka nwụ́ abwẹla ịnyịịla nya Ọngịnyị nya ịKịrayịsị. Ọọwa ka dang ụbwọ nyọka jẹ́-ẹ kpa awụlẹ oyeye nyang ụ-ụgbẹyị nya okpunyi.

Ene a ka myị ọnụ nyọka ye ọngịnyị lee ọrụ-rwọọ maga nyọka jẹ “ọngịnyị ọlẹpwụ ọkịlẹtụ” lee ọ-jẹ́ abwẹla nyamwụ yẹẹyẹẹ. (1Pit 3:4) Kori ká yẹ ịngịhyẹ ọhẹ ọlẹ kọ háng ka aalẹ, anụ yoo lawụlẹ. Jaabwọ kọ kaa la ẹ-ẹga nya igu oriri nya angịnyị ehe, a baba nyọka kụ irya nya ang ọlẹ á ka họ ha ahụng lee ọrụng gụ ang ọlẹ ká ọwa ka họ hang. (Filip 2:3,4) Kori ká kpa ehile ịlẹpwụ nya ịBayịbụụ họ ụkụrwọ ene a ka rwọ-ọrụ lee o-ye ahụ, ọ-ka chịkpẹẹ nyọka kịnyaa la ọ-kpa họ ụkụrwọ ẹpwụ nya awụlẹ oyeye nyang chajị a ka ye ọkẹkẹnị.

YẸ IFIM ỌLẸ KỌ RI Ọ-NWỤLANỌ NYA AWỤLẸ OYEYE—ỤPA 3: JẸ́ ANG ỌLẸ KỌ JUWA, KANỤ WẸ ỊTỌ ẸLA ILEJI ỊLẸ:

• Ányị igu nya ọọnahị ọnyang ọwẹ bala Shane à tị́ bwu nwà kịnyaa kịlahị?

• Ẹlịyẹ ọ tị́ wẹ ka yẹ ụka kọ jẹ́ Shane gụ ọọwa?

• Ányị adamwụ bala ịnamwụ à tị́ dọọ ụbwọ? Eje ọnyịịla oyina ọọnahị ọnyang ọwẹ à tị́ chị?