Ujiji Ohuhu nya Ịhọbịrị Igbalẹ-gbalẹ

Uri nya iya ọkịlaa-kịla ọlẹ ká iJisọsị ya ịwọ nyamwụ nwụ kem à du kahị jẹ́-ẹ ye ọhịnyịhi nya ịhobịrị nyahị bwu ẹga nya Ohe lẹ. (Efe. 1:7) Ma, ịBayịbụụ tị ya ẹla rụ “ujiji ohuhu onyudiyo nya Ohe Oluhye ẹ-ẹga nya ịhọbịrị nya angị inyogo ịlẹ kị . . . họ gbalẹ-gbalẹ” ene ká iJisọsị rahị kpehe. (Rom. 3:25) Ányị ọ tị́ la ká iJihova jẹ́ hịnyọhi ịhọbịrị ịlẹ kị jene nya iya ọkịlaa-kịla nya Ọnyị nyamwụ, kọ tị myịmyị ri Ohe ọlẹ kọ kaa họ ẹla kpakpa?

IJihova myọnụ nyori “ọnyị” ọhẹ nyị ka wẹ ka chị angịlẹ kị la ọmyịmyị ẹ-ẹga nya Ohe bala ehe ọchịchị nyamwụ da. Ụka ká Ohe myọnụ nya ẹlẹwẹ lẹ, ọ lala o-ri nyị dọmwụ nwụ uri nya ọ-ra kpehe kpá ene-ene lẹ. (Ọmwụ. 3:15; 22:18) Ohe jẹ́ kpakpa nyori ụka kọ pwụ ụka ọlẹ kọ hu nọ, Ọnyị ọla ookpokpo nyamwụ ka myọnụ nyọka ya ịlọmwụ kịla iya. (Gal. 4:4; Hib. 10:7-10) Ụka ká iJisọsị jam odehe, iJihova ya ọngịrị họọ nyọka jẹ́-ẹ hịnyọhi ịhọbịrị nya angịnyị ene kọọ rahị kpehe. IJisọsị jẹ́ hịnyọhi ịhọbịrị nya angịlẹ kị la ọmyịmyị chajị ọ jẹ́ nyori iya ọlẹ kọ wẹẹ ka kịla ka hịlẹ ịhọbịrị nyaa.—Mat. 9:2-6.