Ịtọ Ẹla Bwu Ẹga nya Angị Wa Apwụ Nyahị

Ụka oyina ẹrụ ọnyịịla ọ-kpa pyẹ à tị́ ka cheju?

IJisọsị yẹkẹẹ: “Ị ka kpa ẹrụ ọnyịịla chajị nya ịpyị-adịrahụ nya Ohe Oluhye ọlẹ kaka ya pyẹ ẹ-ẹga myị́ ẹga nya odehe ọlẹ wuu. Chajị kọ ka ri ang nya ibeenu ha alepwoja myị́ epwoja wuu ene ká ọmyịmyị nya odehe ọlẹ ka pwụ eji.” (Mat. 24:14) Omyi ẹla nya iGiriki ọlẹ kị yẹda ka ri “ọmyịmyị” ọgba ọwẹ, tụ́ ọla ọgba 6 bala 13, ri teʹlos. Ọ wẹẹ ya ẹla rụ́ ocheju ohyẹẹkpẹ-ẹkpẹ nya odehe nya Olegu Onyobyi ọlẹ lụka nya ẹwụ nya Amagedọn. (Ọwụ. 16:14, 16) Lẹ, ẹlẹwẹ mẹjẹ nyori ahị ka kịnyaa la ọ-kpa ẹrụ ọnyịịla pyẹ gbee pwụ ụka ọlẹ kọ ka hi pyịnyẹng ká Amagedọn ka pweeji. Ọwẹ ri ọnwụhọ u-uhye nya ẹla ọlẹ kahị jẹ́ lụka ọkẹkpẹ.

Ene-ene, ahị kaa ya nyori ahị ka hwabwọ la ọ-kpa ẹrụ ọnyịịla pyẹ ụka ká akama ọtụka okpelego á ka dọmwụ bwula ayịreji ọtata nya ịBabịlọn Ọtụka. (Ọwụ. 17:3, 5, 15, 16) Ahị kaa myị ịnyịnyị nyori ụka ọwẹ ka ri ang-ẹjẹẹ nya ocheju nya ‘ẹka nya ọnahị nya iJihova.’ (Ayị. 61:2) Ahị myị́myị́ kaa kụ irya nyori angịlẹ kem kị ka be bwu akama ọtụka okpelego ọwẹ ka ri angịlẹ kị kaa gbịgba ha iJihova la ọmyịmyị ene nya ụka ọwẹ lẹ. Ahị chụ ẹlẹwẹ kaka pwoku ẹla nya ala iJuu ịlẹ kị chịda lụka nya ayịreji ọtata nya iJerusalẹm la ẹka nya 607 B.C.E. Ị chị ala iJuu ịịwa ịna nya ọchịda ene nya ụka ọwẹ lẹ chajị ị gbịgba ha iJihova bala ọ-ba ang onyobyi ẹtẹ. (Isik. 5:11; 9:4) Ọ-chụ pwokwita ọwẹ á tị myọnụ ju ẹla ọlẹ ká iJisọsị ya ụ-ụpwụ nya ịMatiyu 24:14 ka. Ụwa mẹjẹ nyori ọ chịkpẹẹ ká angịnyị ka la iwe nyọka ya ẹrụ ọnyịịla myị ene nya ocheju ohyẹẹkpẹ-ẹkpẹ lụka nya Amagedọn wẹẹ.

Chajị nyọlẹ ká ẹla ọlụpwụ nya ịMatiyu 24:14 lahị gbagbịla gụ olene wẹẹ, ahị baba nyọka nwụ irya nyahị họ ịnyịnyị u-uhye nya ẹla ọlụpwụ nya Ọwụrụụ-wụrụ 16:21, ọlẹ kọ ya ẹla rụ ekpawẹ ịtụka-ịtụka. Ọ-kụ ẹhị yẹ ẹlẹwẹ rige-rige gụ ọọwa họ kahị jẹ́ nyori ụpwụ ịgọgọ imiiye ịwẹ wẹẹ ya ẹla ka ẹga okpokpo. Ụ-ụgbẹyị oyina tị́? Ọwẹwẹ nya ẹlẹwẹ kpụnịrọ abwọlẹ ká angịnyị kaa họ ẹ-ẹga nya ẹrụ ọnyịịla nya Ịpyị-Adịrahụ. Ẹla nya Ịpyị-Adịrahụ ọwẹ ri oja ọnyịịla lala “ida ochoru kwọkwọ nya ọhịhị” ẹ-ẹga nya “angị juwa jẹdịyẹ bwu ụgbẹyị nya ọchịda nya Ohe Oluhye.” Ma ẹ-ẹga nya aluji nya Ohe Oluhye tị lẹ, o ri oja ọtịpyọ lala ‘oru ọtịpyọ nya igu.’ (2 Kọr. 2:15, 16) Ẹrụ ọnyịịla nya Ịpyị-Adịrahụ waa ẹjẹ chajị ọ mẹjẹ gede-gede nyori odehe ọlẹ kọ háa lụmẹ wẹẹ nyị ri odehe nya Olegu Onyobyi ọlẹ kọ myị̀ la ọkwọ, kọ tị ja ka tayịreji lụka o-kpii.—Jọn. 7:7; 1 Jọn. 2:17; 5:19.

Ahị myị́myị́ yẹ nyori ekpawẹ ịlẹ ká ụpwụ nya Ọwụrụụ-wụrụ 16:21 ya ẹla rụ́ ka “lụmẹ kaka kpoye.” Ọwẹ mẹjẹ nyori lụka nya akama ọtụka okpelego, ụkụrwọ nya ẹrụ ọnyịịla ọ-kpa pyẹ ka la ọngịrị-ọngịrị gụ olene, ọọwa ri ahị ka ya ẹnyị nya iJihova dodehe ụ-ụgbẹyị ọlẹ kahị ya ẹnẹnẹhẹ lẹka. (Isik. 39:7) Ụka kị ka ta ịBabịlọn Ọtụka ayịreji kpá lụka ọwẹ, ọ chịkpẹẹ ká ẹrụ ọnyịịla ka há angịhyẹ jaabwọ ká ida ochoru kwọkwọ kaa há angịnyị? Ọ ka jẹ́-ẹ lịnyị myị́. Ọhẹka, ị ka kpịtịya lee ọ-jẹ́ nyori Alibeenu nya iJihova ya dodehe lụka ọtata nyori ịgba ọgbagba nya ịnịịkịla nyị ka tayịreji, lẹ ị ka yẹ jẹ́ nyori ẹla ọọwa à wẹẹ họ jịra ịnyịlẹhị lẹlẹ.

Ẹlẹwẹ me awụlẹ bala ẹla ọlẹ kọ họ Ijipiti lụka onyogo nyọlẹ ká Ohe kpa akama iwo wẹ uhye nyaa kpá. “Iru nya angịkịla datị-datị” ịlẹ kị ri ala Isirẹlụ ka, báa rụ nyọlẹ ká iJihova “yẹ ijiga nya ala Ijipiti wuu akama” kpá. (Ehe. 12:12, 37, 38) Ọhẹka, angịkịla ịwẹ cheje nyọka ba angịnyị nya iJihova rụ ụka ọlẹ kị yẹ jaabwọ ká ẹla myị́ ẹla ịlẹ ká iMosisi ya wuu u-uhye nya akama iwo ịwẹ họ jịra.

Ọngọngọhẹ ọlẹ kọ ji kpata wẹ ẹga nya iJihova ụka kị ta ịBabịlọn Ọtụka ayịreji kpá, ka la iwe nyọka chẹkpẹ ju aanịna nya ịKịrayịsị ịlẹ kị ka hi jam odehe lụka ọwẹ wẹẹ. (Mat. 25:34-36, 40) Tị wẹẹ, iwe nyọka juwa ẹ-ẹpwụ nya ịkpịlọ ka cheju lụka o-kpii ene nya Amagedọn, kọ ri ụka ọlẹ ká angị ihihi nya angị ka kpeji ta ịKịrayịsị ka rụ ka epwoohe.

Ọnwụhọ onyeewe ọwẹ mẹ ọháha ọtụka bala ahyẹẹrwẹrwa nya iJihova jẹ gede-gede. Nyịlẹhị-ịlẹhị, “Ohe Oluhye ayịdang á tịtọ ká ọngọngọhẹ ka ta ayịreji ẹ-ẹpwụ nya ọhọbịrị ọhọhọ kpong-kpong ka. Ma, ká ọng myị́ ọng wuu ka yẹ irya da ha Ohe Oluhye ịnyị!”—2 Pit. 3:9.