IJihova Ya Ọngịrị Ha ỊSamsịn

Iru nya ala Isirẹlụ tịrẹkpẹ kaka gbịgba ha ihye ijiga myịmyị, ọọwa du ká iJihova ya iwe da ká ala iFilisitiya la ọngịrị u-uhye nya ẹpwụma nyaa. Ma ala Isirẹlụ ịhyẹ ji kị la ọháha ẹ-ẹga nya iJihova. Ọngọhẹ lẹpwụ nya angịlịnyị ri ịManowa. Ọwa bala ahụ nyamwụ á ma ọnyị ọhẹ-lọhẹ ka. IJihova du olegu-ẹrụ ọhẹ kaka tọ ahụ nya ịManowa ẹnẹhẹ. Olegu-ẹrụ ọọwa byoo yẹkẹẹ: ‘À ka ma ọnyị ọlẹng. Ọ ka chị ala Isirẹlụ da bwu ụbwọ nya ala iFilisitiya. Ọ ka ri ịNasịrayịtị.’ À jẹ́ angịlẹ kị ri ịNasịrayịtị? Ị ri angịlẹ kị ri anchẹ nya iJihova ụ-ụgbẹyị ọdatị. Angị ri ịNasịrayịtị á kaa pwọ inyi nyaa ka.

Nyọlẹ kọ nọ chẹẹ, ịManowa ma ọnyị ọlẹng, ọ jwoo ẹnyị nya ịSamsịn. Ụka ká ịSamsịn nwà, iJihova họ ọ la ọngịrị ọtụka-ọtụka. Ọ jẹ́ kpa ụbwọ-ụbwọ nwụ ugẹbẹ. Ụka ọhẹ ji ká ịSamsịn ụbwọọmwụ nwụ angịnyị angị 30 nya iFilisitiya. Ọ wụ́ ala iFilisitiya ẹjẹ chajị nya ọọwa, du kị kaa mwahị nya agbẹyị ịlẹ kị ka bwu nwọọ. Alodu nya ẹnẹhẹ ká ịSamsịn wẹẹ nune e-epweji nya ịGasa, ị wẹ ka kụ ogirigba nya epweji ọọwa juwa dayị kị ka nwụ ịSamsịn ụka ká ahị á pyẹ. Ma lụka ká epwodu gu ene, ịSamsịn chahị une, ọ ka ẹga nya ogirigba nya epweji lẹ, ọ hụlọọ hi ugulọ lẹlẹ. Ọ hwoo nọ ụmwụchwọ, lẹ ọ kpa rụ ka uhye nya ọgbọdọ ọhẹ ba ịHebịrọn ba lẹlẹ!

Ụka ọkịla, ala iFilisitiya kaka tọ iDilayịla oligu ọnyang nya ịSamsịn, lẹ ị byoo yẹkẹẹ: ‘Ahị ka nwụng okpoko ọtụka-ọtụka kori ká maga ká jẹ́ jaabwọ ká ịSamsịn bwu la ọngịrị ọtụka ọwẹ. Ahị tịtọ kahị ka woo ju agba.’ IDilayịla tịtọ kọ ka la okpoko ọwẹ, ọọwa ọ myị lẹlẹ. Ụka nya ọgbanyẹ, ịSamsịn pwà la ọ-ka ya ang odudu kọ la ọngịrị pwụ́ ọlịịwẹ joo. Ma ọ yẹ rịrị ịSamsịn gbee kọọ ya ẹla ịbaa u-uhye nya ọngịrị nyamwụ joo. Ọ byoo yẹkẹẹ: ‘Ị́ pwọm inyi ẹnẹnẹhẹ lẹka chajị m̀ ri ịNasịrayịtị. Kori kị pwọm inyi lẹ aalẹ, ọngịrị nyam à ka myị́ lẹlẹ.’ ỊSamsịn á jẹ́ họ nyọlẹ kọ ya ẹlẹwẹ ka, lee ịnyị tị́ ka?

IDilayịla kaka ya je ala iFilisitiya i-ijata yẹkẹẹ: ‘M̀ jẹ́ ẹla ịbaa nyamwụ lẹ!’ Ọ pịrị ịSamsịn nune a-ata nyamwụ lẹ, ọ wụrụ ọngọhẹ kaka pwọọ inyi lẹlẹ. IDilayịla be ẹkọ yẹkẹẹ: ‘ỊSamsịn, ala iFilisitiya pweeji lẹ!’ ỊSamsịn chahị, ma ọngịrị nyamwụ tị rụ hyoo lẹ. Ala iFilisitiya woo, ị gbọọ egbahị, lẹ ị kpọọ kaka ju agba lẹlẹ.

Ẹnẹhẹ, ụnọ ịmanyị tị́ nya ala iFilisitiya tụ́ guru u-ube ọgbịgba ha ojiga nyaa ọlẹ kị wụrụ nya ịDagọn, juwa chị chakọ gboo yẹkẹẹ: ‘Ohe nyahị ya ịSamsịn juhi ụ-ụbwọ lẹ! Anụ kpọọ kpehe, kọ warị ka kọ ayịlọ hahị wẹẹ!’ Ị yọọ dayị rịrị apewa nya ịtachị imiiye nya ube lẹ, ị juwa kpọọ họ lẹlẹ. ỊSamsịn be ẹkọ gboo yẹkẹẹ: ‘IJihova ee, chuchuu ya ọngịrị ham ụka ookpokpo myịmyị mẹẹ.’ Ụka ọwẹ wẹẹ, inyi nya ịSamsịn nwà gbọng myịmyị lẹ. Ọ gu ịtachị nya ube nya ojiga nyaa ọọwa gbaa la ọngịrị nyamwụ wuu. Ọọwa ube ọwẹ lẹpwụ-lẹpwụ à tụrụ kaka nwụ angịlẹ kị juwa wuu, tụ́ ịSamsịn lẹlẹ.