IJihova Dọhụ Pịlẹ Bala IJona

Alepweji nya iNinive ọla Asiriya ri alọkwọ. IJihova byi ọlọmwụ iJona nyị ka iNinive kaka daa ọna nyori nyị yẹ abwẹla nyaa da mẹ. Ma iJona mwọọgịlẹ rụnyẹ rụ ka ẹga ọkịla gwahị gboo. Ọ ju ụgbọ nya enyi ọhẹ ọlẹ kọ juwa jẹ ka iTasisi.

Ụka kị juwa ẹ-ẹpwụ nya enyi wẹẹ jẹ rụ, igbachịwụ ọtụka ọhẹ dọmwụ nyọka da la ọngịrị-ọngịrị. Angị ju ụgbọ nya enyi ọọwa juhi ọtụka-ọtụka. Ị raabwọ ha ihye nyaa bala ọ-taa wo nya ang ọlẹ kọ ju ọmwụ nya ẹlẹwẹ. Ụka ohyẹẹkpẹ lẹ, iJona à byaa yẹkẹẹ: ‘Am à ju ọmwụ nya akama nyahị lẹ. M̀ wẹẹ rụnyẹ rụ hi ụkụrwọ ọlẹ ká iJihova byim nyị họ ịnyị. Anụ hum da ka ẹpwụ nya ihu mẹ, aalẹ igbachịwụ ọwẹ ka kpụba lẹ.’ Angị ju ụgbọ nya enyi ọwẹ á tịtọ nyọka hu iJona da ka ẹpwụ nya Ihu ka, ma ọ byaa nyị họ ịnyị mẹ. Ụka kị họ ịnyị lẹ, igbachịwụ à kpụba lẹlẹ.

IJona me kọ juwa ka gbu lẹ. Jaabwọ kọ juwa kpụ ka ẹpwụ nya enyi myọọ gụ ọwọwa, ịnyịnyị ọ juwa raabwọ ha iJihova lẹ. Ọọwa lẹ, iJihova à du iyenyi ọtụka-ọtụka kele lẹlẹ. Ọkọkọ kọ ka nwụ iJona, ọ woo mile kem. Ẹ-ẹpwụ nya iyenyi ọwẹ, iJona raabwọ ha iJihova, ọ chọọ ehe nyori ọwa nyị ka ‘jwoo ihi ụka myị́ ụka lẹ.’ IJihova chewu ke iJona ẹnụtụrụ ịta chiriri ẹ-ẹpwụ nya iyenyi ọwẹ, ọọwa lẹ, ọ họ iyenyi ọwẹ à kọọ da wẹ ọpyị ọchọrụ lẹlẹ.

Ọlẹ ká iJihova chị iJona da lẹ, ọọwa mẹjẹ nyori ọ́ baba nyọka ka iNinive kaka? Ehe. IJihova byoo myịmyị nyị kele. Ugbẹnyị lẹ, iJona jwoo ihi. Ọ kele kaka byi alọkwọ ịwẹ nyori nyị ‘hi ẹnụtụrụ iwo ine ká iNinive nyị ka tayịreji lẹ.’ Ọọwa lẹ, ẹla ọlẹbyẹbyị ọhẹ à họ lẹlẹ. Ala iNinive ke ụrụ wo ẹla nyamwụ kpụ ị yẹ ọhịhị nyaa da. Adịrahụ nya ala iNinive byi angịnyị nyamwụ yẹkẹẹ: ‘Anụ be ẹkọ wụrụ Ohe Oluhye, kanụ yẹda mẹ. Ọhẹka ọ́ ka tahị ayịreji ka.’ Ụka ká iJihova yẹ nyori ala iNinive nyị yẹda lẹ, ọ́ taa ayịreji kaka.

IJona wụ́ ẹjẹ nyọlẹ ká epweji ọwẹ tayịreji ka. Kụ ẹhị yẹ ẹlẹwẹ wẹẹ: IJihova dọhụ pịlẹ ta iJona bala ọ-yọọ ahyẹẹrwẹrwa, ma iJona ọwa á tị yẹ ala iNinive ahyẹẹrwẹrwa ka. Ọkọkọ nya ọọwa, ọ kpehe kaka hụhụ ụ-ụrụrụ nya okoji nya akwọ ọhẹ jahị da iNinive juwa bwọ ọnụ. Ma ụka ká okoji ọọwa gbu, iJona wụ́ ẹjẹ myịmyị. Lẹ iJihova byoo yẹkẹẹ: ‘À jujwo nya okoji ọwẹ. Lẹ ọ́ chịla kam ka jujwo nya iru nya angịnyị ịlẹ kị kụ iNinive ka? Ị lam ahyẹẹrwẹrwa à du kam chaa da lẹ.’ Ịyẹ tị́ ri etu nya ẹla ọlẹ ká iJihova ya wẹ? Ala iNinive ju apyobwuna gu okoji ụma ọlẹlẹhẹ.