ANG ỌJẸ́JẸ 30
Juwa Nwà Kịlahị ẹ-Ẹpwụ nya Ọháha Ọlala
‘Juwa nwa kịlahị-ịlahị ẹ-ẹpwụ nya ang myị́ ang bwula ọháha ọlala.’—EFE. 4:15.
EJE 2 IJihova À Ri Ẹnyị Nyang Lẹ
ẸHỊ NYA ẸLAa
1. Ẹlịlẹhị iyina a tị́ jẹ́ ụka ka wẹẹ dọmwụ nya ịBayịbụụ ọjẹ́jẹ?
À KPỊTỊYA nya ụka ọlẹ ka wẹẹ jẹ́ ịBayịbụụ? Ọ ka lang ẹbyẹbyị nyọlẹ ka jẹ́ nyori Ohe nyị la ẹnyị myị́. À tị ka la ịlọng ịnyịnyị myị́, chajị nyọlẹ ka jẹ́ nyori iJihova nyị́ ka yẹ angịnyị akama o-obwila ka. Ọ tị kpụng ịpyọ ịnyịnyị nyọlẹ ká la ahị ọdahile nyọka yẹ aanahị ịlẹ kị gbu myịmyị wẹẹ bala ọ-ka hịhị lawụlẹ ị-ịParadayịsị ám̀ odehe.
2. Datị hi ẹlịlẹhị ịlẹpwụ nya ịBayịbụụ ịlẹ ká jẹ́, agbẹyị ịkịla iyina a tị́ nwa kịlahị? (Ala Efesọsị 5:1, 2)
2 Jaabwọ ká wẹẹ jẹ́ Omyi Ẹla nya Ohe gụ olene, ọháha ọlẹ ká la ẹ-ẹga nya iJihova kaa nwà kịlahị. Ọháha ọọwa gung gbịla nyọka kpa ẹla ịịwa họ ụkụrwọ. À tị jẹ́ cheje nya ẹla pwoku itiwe nya ehile ịla ịBayịbụụ. À nwụ irya ọkụkụ bala abwẹla nyang họ chajị a tịtọ nyọka họ ẹla kpụ Ohe ịpyọ. Jaabwọ ká ọnyị tị kaa gbịla adịda ọ-la ọháha, à wẹẹ gbịla Adang olepwoohe ịnyịnyị.—Wa Ala Efesọsị 5:1, 2.
3. Ịtọ ẹla iyina ahị tị́ ka tọ ịlọhị myị́?
3 Ahị ka tọ ịlọhị wo myị́ nyori: ‘Ọháha nyam ẹ-ẹga nya iJihova la ọngịrị gụ ụka ọlẹ kam dọmwụ nya ịBayịbụụ ọjẹ́jẹ? Nyọlẹ kam hu enyi Ohe kpá, m̀ kaa họ ẹla lala iJihova gụ ọọwa bwula ọ-mẹ ọháha jẹ ẹ-ẹga nya aanahị alẹng bala anyang?’ Kori ká ‘ọháha ọlẹ ká la ene-ene’ á lala o-ri nyị ja nyiri, ọkịlẹtụ a kpụng enyi ka. Ọ lịnyị ẹ-ẹga nya angịnyị nya ịKịrayịsị ịlụka onyogo ịnyịnyị ụka ọhẹ lẹ. Ahị ọdahile á gụ iJisọsị myị́ u-uhye nyaa ka, ahị ọdahile á tị ka gwọọ myị́ u-uhye nyahị ka ịnyịnyị. (Ọwụ. 2:4, 7) Ọ jẹ́ nyori ahị nyị ka jẹ́-ẹ la ụma nya ọháha ọlẹ kahị la ụka kahị dọmwụ nya ẹlịlẹhị ọjẹ́jẹ wẹẹ.
4. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
4 Ang ọjẹ́jẹ ọlẹ ka ya ẹla u-uhye nya abwọlẹ kahị ka nwà kịlahị ẹ-ẹpwụ nya ọháha ọlẹ kahị la ẹ-ẹga nya iJihova bala angịkịla. Ahị tị ka ya ẹla u-uhye nya ang ịnyịịla ịlẹ kahị ka yé kori ká ọháha ọlẹ kahị la ẹ-ẹga nya iJihova bala aanahị á kịnyaa la ọnwanwa.
NWÀ KỊLAHỊ Ẹ-ẸPWỤ NYA ỌHÁHA ỌLẸ KÁ LA Ẹ-ẸGA NYA IJIHOVA
5-6. Akama iyina ọlẹrụ ịPọlụ à tị́ yẹ ẹ-ẹpwụ nya ẹrụ ọnyịịla ọ-kpa pyẹ nyamwụ? Ịyẹ à tị́ gwoo gbịla nyọka kịnyaa la ọ-gbịgba ha iJihova?
5 Ọlẹrụ ịPọlu chị ọkẹkẹnị nyọlẹ kọ ri ọngọ kaa gbịgba ha iJihova, ma ụ-ụka wuu ang a kaa chịkpẹẹ họọ ka. ỊPọlụ kaa kpehe ka ẹga ọlụrụ-lụrụ, ẹdịyẹ ọlịnyị á tị ka chịkpẹẹ lụmẹ lụka ọlanyị ka. Ẹ-ẹpwụ nya anyị ọkaka nyamwụ ịịwa, ụka ọhẹ juwa “ká enyi ịtụka-ịtụka kaa myị [yọọ] dada” bala ọ-yẹ akama ụ-ụbwọ nya “angị nu angịnyị ang la agbụrụ.” Ụka lụmẹ-lụmẹ tị juwa ká aluji nyamwụ nyoo enyiri. (2 Kọr. 11:23-27) Ụ-ụka wuu aanamwụ ịla ọjịra-jịra à ka mẹjẹ nyori ụkụrwọ ọlẹ kọ wẹẹ họ chajị nyaa nyị myaa lẹhị ka.—2 Kọr. 10:10; Filip. 4:15.
6 Ịyẹ à tị́ da ịPọlụ ụbwọ nyọka kịnyaa la ọ-gbịgba ha iJihova? ỊPọlụ jẹ́ ang yẹẹyẹẹ u-uhye nya abwụma ịlẹ ká iJihova la bwu ẹpwụ nya Ụpwụ Ịgọgọ bala ọ-jẹ́ ang bwu ẹpwụ nya ọhịhị nya ịlọmwụ ịnyịnyị. ỊPọlụ wẹ ka jẹ́ nyori ọwa nyị há iJihova yẹẹyẹẹ. (Rom. 8:38, 39; Efe. 2:4, 5) Ọọwa dudu ká iJihova họ́ọ yẹẹyẹẹ ịnyịnyị. ỊPọlụ mẹ ọháha ọlẹ kọ la ẹ-ẹga nya iJihova jẹ “bwula ẹrụ ọmyịmyị ha angị ịgọgọ nya Ohe Oluhye.”—Hib. 6:10.
7. Ụgbẹyị oyina ahị tị́ ka jẹ́-ẹ nwà kịlahị ẹ-ẹpwụ nya ọháha ọlẹ kahị la ẹ-ẹga nya iJihova?
7 Ahị ka jẹ́-ẹ nwà ẹ-ẹpwụ nya ọháha ọlẹ kahị la ẹ-ẹga nya Ohe bwula Omyi Ẹla nyamwụ ọjẹ́jẹ. Jaabwọ ka wẹẹ wa ịBayịbụụ, maga ka jẹ́ ẹla ọlẹ ká ọgba ọnyọnyọọnyị mẹjẹ́ng u-uhye nya iJihova. Tọ ịlọng wo yẹkẹẹ: ‘Ányị ọgba ọwẹ à tị́ mẹjẹ nyori iJihova la ọháha ẹ-ẹga nyam? Ányị ọwẹ a tị́ ka gum gbịla nyọka la ọháha ẹ-ẹga nya iJihova?’
8. Ányị abwọ ọrịrị à tị́ ka dahị ụbwọ nwà kịlahị ẹ-ẹpwụ nya ọháha nyahị ẹ-ẹga nya Ohe?
8 Ụgbẹyị ọkịla ọlẹ kahị ka jẹ́-ẹ nwà kịlahị ẹ-ẹpwụ nya ọháha ọlẹ kahị la ẹ-ẹga nya iJihova ri ọ-ka wụrụ ọkịlẹtụ nyahị wuu họọ gbadaa ẹ-ẹpwụ nya abwọ ọrịrị. (Eje. 25:4, 5) IJihova tị ka wẹ abwọ ọrịrị nyahị ịịwa. (1 Jọn. 3:21, 22) Ọọnahị ọnyang ọhẹ bwu Asia ká ẹnyị nyamwụ ri Khanh yẹkẹẹ: “Ene-ene, ọháha nyam ẹ-ẹga nya iJihova kaa kpụnịrọ ang ịlẹ kam jẹ́ kem, ma ụka kam yẹ jaabwọ kọ kaa wẹ abwọ ọrịrị nyam, ọháha nyam la ọngịrị gụ olene. Ọọwa tị dudu kam tịtọ nyọka họ ang ịlẹ kị ka kpọọ ịpyọ.”b
NWÀ KỊLAHỊ Ẹ-ẸPWỤ NYA ỌHÁHA ỌLẸ KÁ LA Ẹ-ẸGA NYA ANGỊKỊLA
9. Ányị iTimoti à tị́ bwu họ mẹjẹ nyori ọ wẹẹ nwà kịlahị ẹ-ẹpwụ nya ọháha ọlala?
9 La ẹka lụmẹ-lụmẹ nyọlẹ ká ịPọlụ ri ọngịnyị nya ịKịrayịsị kpá, ọ gbachị ọnyị okolobya ọhẹ ká ẹnyị nyamwụ ri iTimoti. IJihova há iTimoti yẹẹyẹẹ, ọ tị la ọháha ẹ-ẹga nya angịkịla ịnyịnyị. ỊPọlụ byi ala iFilipayị yẹkẹẹ: “Ḿ la ọngọkịla ọhẹ-lọhẹ ọlẹ kọ la irya ọkpẹẹkpẹẹ bala ila ọchịchị ẹ-ẹga nya ọkpahị junu yẹẹyẹẹ dala iTimoti kaka.” (Filip. 2:20) A-ang ọ-jẹ́ nwụlanọ lee ẹla ọ-jẹ́ ya lụmẹ nya iTimoti ịPọlụ à wẹẹ ya ẹla rụ ẹgẹwẹ ka, ma ọháha ọlẹ kọ la ẹ-ẹga nya aanamwụ alẹng bala anyang à ri ang ọlẹ kọ myị ịPọlụ lẹhị lụmẹ lẹ. Ọọwa dudu ká ọjịra-jịra ịlẹ ká iTimoti ju ụga kaa ya ẹhị rịrị gboo kọ ka mwẹẹkpẹ.—1 Kọr. 4:17.
10. Ányị Anna bala ọrụmwụ à tị́ mẹ ọháha ọlẹ kị la ẹ-ẹga nya aanaa alẹng bala anyang jẹ?
10 Ahị ịnyịnyị a mwahị nya agbẹyị ịlẹ kahị ka jẹ́-ẹ da aanahị alẹng bala anyang ụbwọ. (Hib. 13:16) Ahị kụ ẹhị yẹ oja nya Anna ọlẹ kahị ya ẹla rụ ẹ-ẹpwụ nya ang ọjẹ́jẹ ọlẹ kọ jene nyọlẹ wẹẹ. Ụka ká igbachịwụ ọnyọọngịrị da kpá, ọwa bala ọrụmwụ ju ugbiyegu nya Alibeenu nya ioJihova ịhyẹ ụga. Ị yẹ nyori igbachịwụ ọọwa nyị bịrị abang nyaa. Ọọwa du ká ugbiyegu ọwẹ á la ang ọkụrụ-kụrụ ọlẹ kọ la cheri-cheri kaka. Anna yẹkẹẹ: “Ahị go ang ịkụrụ-kụrụ nyaa kpa ka hụ, ya ila baa, bala ọ-mwaa kẹm-kẹm ene kaahị kpa kịlaa. Ọ lahị lala o-ri ang ochiche ahị họ wẹ lẹ, ma ụbwọ ọdada ọwẹ du kaahị bala ugbiyegu ọwẹ ri aligu yẹẹyẹẹ daalẹ.” Ọháha ọlẹ ká Anna bala ọrụmwụ la à gwaa gbịla du kị jẹ́ da aanahị alẹng bala anyang ịwẹ ụbwọ lẹ.—1 Jọn. 3:17, 18.
11. (a) Ányị ọ tị́ kaa la angịkịla ụka kahị mẹ ọháha jẹ ẹ-ẹga nyaa? (b) Jaabwọ ká Etu 19:17 ya, ányị iJihova à tị́ kaa họ ụka kahị mẹ ọháha jẹ ẹ-ẹga nya angịkịla?
11 Ụka kahị mẹ ahyẹẹrwẹrwa bala ọháha jẹ ẹ-ẹga nya angịkịla, ị kaa yẹ nyori ahị nyị wẹẹ maga nyọka gbịla iJihova. Ahyẹẹrwẹrwa ọwẹ ka myaa lẹhị gụ abwọlẹ kahị yẹ ahị me myị́. Khanh ọlẹ kahị ya ẹla rụ ene-ene kaa kpịtịya nya angịlẹ kị dọọ ụbwọ. Ọ yẹkẹẹ: “Ẹla nya aanahị anyang ịlẹ kahị bajẹ kpehe nya ẹrụ ọnyịịla ọ-kpa pyẹ myịm lẹhị yẹẹyẹẹ. Ị kaa wẹ ka hum, ị kaa wụrụm ẹpwa kaka ri ang ene kịị hum kpa ka kụ eji ẹ-ẹpwa nyam la okpunyi. M̀ jẹ́ lẹẹlẹẹ nyori ụkụrwọ ochiche ị họ wẹ ka. Ị họ ang ịwẹ wuu ham ẹ-ẹpwụ nya ọháha.” Ọ-ọng myị́ ọng à ka jẹ́-ẹ jing obe ọhọhọ nya ang ịlẹ ká họ haa ká. Khanh ya ẹla u-uhye nya angịlẹ kị dọọ ụbwọ yẹkẹẹ: “Ọ hám kam ka jẹ́-ẹ nwaa uri nya ang ịnyịịla ịlẹ kị họ ham wụụ, ma ḿ tị jẹ́ ẹpwa nyaa ka. Ma iJihova jẹ́, lẹ abwọ ọrịrị nyam ri, ọ ka nwaa uri ham.” Ẹlịlẹhị Khanh à ya wẹ lẹ. IJihova jẹ́ ang ochiche ọnyị myị́ onyị ọlẹ kahị wẹẹ họ nyọka da angịkịla ụbwọ. Ọ yọọ lala iya ọkịlaakịla ọnyịịla lee uri ọlẹ kọ kpahị kọ ka nwụ.—Wa Etu 19:17.
Ụka ká ọngịnyị á ja nwà ẹ-ẹpwụ nya ang nya olegu, ọ kaa mwahị nya agbẹyị ịlẹ kọ ka da angịkịla ụbwọ (Yẹ ọgba 12)
12. Ányị aanahị alẹng à tị́ ka jẹ́-ẹ mẹ ọháha nyaa jẹ ọọjịra-jịra? (Yẹ ifoto ịnyịnyị.)
12 Kori ká ri ọọnahị ọlẹng, ányị a tị́ ka jẹ́-ẹ mẹ ọháha jẹ ẹ-ẹga nya angịkịla bala ọ-ka họ ang ịlẹ kị ka daa ụbwọ? Ọọnahị okolobya ọhẹ ká ẹnyị nyamwụ ri Jordan tọ ọngọgbahị nya ọjịra-jịra ọhẹ wo nya abwọlẹ kọ ka jẹ́-ẹ họ gụ ọọwa ẹ-ẹpwụ nya ọjịra-jịra. Ọngọgbahị nya ọjịra-jịra joo obe ọhọhọ nya ẹga ọlẹ kọ jẹ́ họ ene-ene lẹ bala ọ-mẹ abwọlẹ kọ ka jẹ́-ẹ họ gụ ọọwa jọ́ọ. Ọ-chụ pwokwita, o byi Jordan nyị ja wẹ ọjịra-jịra hya bala ọ-ka dọnụ chị angịkịla, wẹ ẹla bala ọ-kpa ẹrụ ọnyịịla pyẹ bala angịkịla ụka wuu. Ụka ka Jordan kpa ẹla ọwẹ họ ụkụrwọ, ọ jẹ́ jaabwọ kọ ka bwu họ ang ụ-ụgbẹyị onyeewe bala ọ-la ọháha ẹ-ẹga nya aanamwụ alẹng bala anyang gụ olene. Jordan wẹ ka jẹ́ nyori ụ-ụka ká ọngịnyị-ị́ ri ọngọmyẹrụ ọ ka dọmwụ nyọka da angịkịla ụbwọ ka; ọkọkọ nyọọwa, ọ kaa kịnyaa la ụbwọ ọdada ọlẹ kọ kaa da ene-ene ịnyị.—1 Tim. 3:8-10, 13.
13. Ányị ọháha à tị́ da ọọnahị ọlẹ kọ ri Christian ụbwọ du kọ jẹ́ wẹ ka ri ọngọgbahị nya ọjịra-jịra myị́myị́?
13 Kori ká ri ọngọmyẹrụ lee ọngọgbahị nya ọjịra-jịra ene-ene tị bẹ? IJihova á deeri nya ụkụrwọ ịlẹ ká họ lụka ọkẹkpẹ bala ọháha ọlẹ kọ gung gbịla nyọka họ ịnyị ka. (1 Kọr. 15:58) Ọ myị́myị́ jẹ́ ọháha ọlẹ ka wẹẹ kịnyaa la ọ-mẹjẹ. Ọ jụ ọọnahị ọlẹ ká ẹnyị nyamwụ ri Christian yẹẹyẹẹ nyọlẹ kị gbọọ hi ọngọgbahị nya ọjịra-jịra o-riri. Ma, ọ yẹkẹẹ: “M̀ chụ nyọka kịnyaa la ọ-gbịgba ha iJihova la ọháha kori kam ri ọngọgbahị nya ọjịra-jịra lee ḿ riri ka wẹwẹ.” Ụka kọ nọ chẹẹ, ị chwọọ nya ọngọgbahị nya ọjịra-jịra myị́myị́. Christian yẹkẹẹ: “M̀ kaa juhi nyọlẹ kị chụm tịrẹkpẹ. Ma m cheje nyori kori ká iJihova bwula ahyẹẹrwẹrwa nyamwụ á ya iwe da ham nyọka ri ọngọgbahị nya ọjịra-jịra myị́myị́ aalẹ, m̀ ka họ ụkụrwọ ọọwa chajị nya ọháha ọlẹ kam la ẹ-ẹga nyamwụ bala aanam alẹng bala anyang.”
14. Ẹlịyẹ a tị́ jẹ́ bwu ẹla ọlẹ ká ọọnahị ọnyang ọhẹ bwu Georgia ya?
14 Anchẹ nya iJihova kaa mẹ ọháha jẹ ẹ-ẹga nya angịnyị aanaa. (Mat. 22:37-39) Ọ-chụ pwokwita, Elena, kọ ri ọọnahị ọnyang bwu Georgia, yẹkẹẹ: “Ụka nya ọgbanyẹ, ọháha ọlẹ kam la ẹ-ẹga nya iJihova kem a kaa gum gbịlaa nyọka kpa ẹrụ ọnyịịla pyẹ lẹ. Ma jaabwọ ká ọháha nyam ẹ-ẹga nya Adam olepwoohe wẹẹ nwà gụ́ ọọwa, ọháha ọlẹ kam la ẹ-ẹga nya angịnyị nwà ịnyịnyị. M̀ kaa kụ irya u-uhye nya ụma nya akama ịlẹ kị wẹẹ chịpwụrụ bwu, bala ẹla ọlẹ kam ka ya kọ ka gwaa o-olegu. Jaabwọ kam wẹẹ kụ irya u-uhye nya angịnyị ụ-ụgbẹyị ọlịịwẹ gụ olene, ọ kaa hám nyọka daa ụbwọ gụ́ ọọwa.”—Rom. 10:13-15.
IJIHOVA KA WAHỊ KỤRỤ́ỤHỊ ỤKA KAHỊ MẸ ỌHÁHA JẸ Ẹ-ẸGA NYA ANGỊKỊLA
Ọháha ọ-mẹjẹ ụka okpokpo ka kpa ahị ọwawa wẹ iru nya angịnyị angịkịla myị́ (Yẹ ọgba 15-16)
15-16. Jaabwọ kị mẹjẹ i-ifoto wẹ, ahị ọwawa iyina ahị tị́ ka yé ụka kahị mẹ ọháha jẹ ẹ-ẹga nya angịkịla?
15 Ụka kahị mẹ ọháha jẹ ẹ-ẹga nya aanahị, ịịwa ụbwaa a kaa yé apyobwuna ka. Nyọlẹ ká ẹdụrụ nya COVID-19 dọmwụ, ọọnahị ọlẹng ọhẹ ká ẹnyị nyamwụ ri Paolo bala ahụ nyamwụ da iru nya aanahị anyang ịlẹ kị ri angịgbahị lẹ ụbwọ nyọka jẹ́-ẹ kpa ifon nyaa ya ẹla nya Ohe. Ọọnahị ọnyang ọhẹ kọ jẹ́-ẹ kpa ifon nyịlọmwụ họ ụkụrwọ ene-ene ka jẹ́-ẹ họ ịnyị lẹẹlẹẹ lẹ. Ọ jẹ́ kpa ifon nyamwụ wụrụ alugbiyegu nyamwụ wẹ ọ-Họ Kpa Kpịtịya nya Igu nya IJisọsị. Angị iwo ịrwọnyẹ bwu ẹpwụ nya angịlẹ kọ wụrụ jẹ́ juwa ọọjịra-jịra ọwẹ bwula ang-abwọ ịlẹ kị jẹ́-ẹ kpa yẹ awụlẹ bwu ọhụ! Ọọnahị ọnyang ọwẹ bala alugbiyegu nyamwụ wuu yé apyobwuna bwu ụkụrwọ ọlẹ ká Paolo bala ahụ nyamwụ họ. Ọ da ụpwụ du kịla Paolo yẹkẹẹ: “M̀ jing obe ọhọhọ nyọlẹ ká mẹ ang jẹ́ẹhị ahị ikwirichi. Ḿ ka jẹ́-ẹ deeri nya abwọlẹ ká iJihova wẹẹ kpahị juhi bala abwọlẹ ka kaa kpa ụka nyang dahị ụbwọ ẹnẹnẹhẹ kaka.”
16 Oja lala ụma ọlịịwẹ mẹ ẹla ọkpọnchị jẹ Paolo. Ọ kpọọ ịtịya nyori ọháha baba gụ ang ọjẹ́jẹ lee ang ọlẹ kahị ka jụ họ myị́. Ọ kpịtịya yẹkẹẹ: “M̀ kaa họ ụkụrwọ nya ọngọ kpẹhị rịrị isekut ene-ene. Alẹ, aanahị á ka kpịtịya nya ẹla oyaya nyam kaka, ma ị tị kpịtịya nya ang ịlẹ kam họ haa.”
17. Owo a tị́ myị́myị́ ka yé apyobwuna ụka kahị mẹ ọháha jẹ?
17 Ụka kahị mẹ ọháha jẹ ẹ-ẹga nya angịkịla, ahị ịnyịnyị kaa yé apyobwuna ụ-ụgbẹyị ọlẹ kahị yẹ ahị me ka. Ọọnahị Jonathan bwu New Zealand, myị ju ẹlẹwẹ. Ẹnụ nya ịSatudee ọhẹ ká ẹnụ chị yẹẹyẹẹ, ọ yẹ ọngọ ye ịlahị nya ụgbẹyị ọhẹ kọ wẹẹ kpa ẹrụ ọnyịịla pyẹ ụbwọọmwụ. Jonathan chụ nyọka họ ụkụrwọ bala ọngọ ye ịlahị nya ụgbẹyị ọwẹ ẹnụ nya ịSatudee ọ-ba ọọwa ba lẹnụ. Ọwa ayịdang á jẹ́ apyobwuna ọlẹ kọ ka yé bwu ahyẹẹrwẹrwa ọlẹ kọ mẹjẹ wẹ ụka ọwẹ lẹka. Jonathan yẹkẹẹ: “Ụka ọwẹ, ẹrụ ọnyịịla ọ-kpa pyẹ á kaa kpụm ịpyọ kpong-kpong ka. Ma jaabwọ kam wẹẹ ke ụrụ wo la agbẹyị ịlẹ ká ọngọ ye ịlahị nya ụgbẹyị ọwẹ kaa bwu mẹ ang jẹ bala abwọlẹ ká angịnyị kaa ke ụrụ lọọ kaka ba, ọọwa ẹrụ ọnyịịla ọ-kpa pyẹ à dọmwụ nyọka kpụm ịpyọ lẹlẹ. Ọọnahị ọlẹng ọwẹ wẹ ka ri oligu nyam, ọ dam ụbwọ nyọka jẹ́ ịpyọ ọkpụkpụ nya ẹrụ ọnyịịla ọ-kpa pyẹ, bala ọ-ka tụ ju iJihova chwẹẹ.”
18. Ịyẹ iJihova à tị́ tịtọ kahị ka họ?
18 IJihova tịtọ kahị ka nwà ẹ-ẹpwụ nya ọháha ọlẹ kahị la ẹ-ẹga nyamwụ bala angịkịla. Jaabwọ kahị jẹ́ wẹ, ahị ka jẹ́-ẹ ju ọháha ọlẹ kahị la ẹ-ẹga nya iJihova ọngịrị bwula Omyi Ẹla nyamwụ ọwawa, ọ-kụ irya jwoo bala ọ-ya ẹla balọọ ụka wuu ẹ-ẹpwụ nya abwọ ọrịrị. Ahị ka jẹ́-ẹ nwà ẹ-ẹpwụ nya ọháha ọlẹ kahị la ẹ-ẹga nya aanahị alẹ bwula ọ-họ ang ịlẹ kị ka daa ụbwọ. Jaabwọ ká ọháha nyahị wẹẹ nwà, ahị ka tụ ju iJihova chwẹẹ gụ olene bala ọ-tụ ju aanahị alẹng bala anyang chwẹẹ. Igu oriri nyahị ọwẹ tị ka kpụhị ịpyọ gboyi myị́ oyi!
EJE 109 Love Intensely From the Heart
a Kori kahị ri ọngọ onyeewe ẹ-ẹpwụ nya ẹlịlẹhị lee ọ la ẹka lụmẹ-lụmẹ kahị kaa gbịgba ha iJihova lẹ, ahị wuu ka jẹ́-ẹ nwa kịlahị. Ang ọjẹ́jẹ ọlẹ ka ya ẹla u-uhye nya ụgbẹyị ọkpọnchị ọlẹ kahị ka jẹ́-ẹ họ ịnyị: bwula ọ-nwa kịnyaa kịlahị ẹpwụ nya ọháha ọlala ẹ-ẹga nya iJihova bala aanahị. Jaabwọ ká wẹẹ kụ irya rige-rige ju ang ọjẹ́jẹ ọlẹ, maga ká yẹ ẹga ọlẹ ka jẹ họ yẹẹyẹẹ lẹ bala abwọlẹ ká ka jẹ́-ẹ họ gụ ọọwa.
b Ị yẹ ẹnyị ịhyẹ da.