IJihova Họ Kahị Jẹ́ Myị̀myị̀ Nyori Ọ ka Yẹ Odehe la ỊParadayịsị

1. Ẹlịyẹ ọlọmwụ Ayịsaya à tị́ ya je ala Isirẹlụ aanamwụ?

ỌLỌMWỤ Ayịsaya wụrụ iJihova nya “Ohe Oluhye ọngọ chịla o-hu ọkịlẹtụ ha.” Omyi ẹla ọlẹ kị yẹda kaka ri “chịla o-hu ọkịlẹtụ ha” ri “amẹn.” (Ayị. 65:16) Etu nya “amẹn” ri “kọ lịnyị mẹ,” lee “ịịwẹ ịnyị.” Ụka kị kpa “amẹn” ya ẹla rụ iJihova lee iJisọsị ẹ-ẹpwụ nya ịBayịbụụ, ọ kaa họ kahị ka jẹ́ myị̀myị̀ nyori ẹla ọọwa ri ịnyịlẹhị. Lẹ, ẹla ọlẹ ká Ayịsaya wẹẹ byi ala Isirẹlụ aanamwụ la gede-gede nyori: Ẹla ọlẹ ká iJihova á ya neeji kaa ju ọ-dahịhile ụka wuu. Ẹlịlẹhị ri, iJihova kaa họ ọnụ ọmyịmyị nyamwụ ọnyị myị́ ọnyị jịra.

2. Ịyẹ tị́ du kahị ka jẹ́-ẹ dahịhile ẹla ọlẹ ká iJihova myọnụ gbe ijuhu nyahị? Ịtọ ẹla iyina ahị tị́ ka kụ ẹhị yẹ?

² Ahị ká jẹ́-ẹ dahịhile ọnụ ọmyịmyị nya iJihova u-uhye nya ijuju nyahị ịnyịnyị? Lala ẹka 800 nyọlẹ ká ụka nya Ayịsaya kam kpá, ọlẹrụ ịPọlụ ya ang odudu ká ọnụ ọmyịmyị nya Ohe kaa ju ọ-dahịhile ụka myị́ ụka. ỊPọlụ ya nyori ‘Ohe ri Ọngọ kaa me ọnọọkịla ka.’ (Hib. 6:18) Jaabwọ ká okoji nya ugboji á ka jẹ́-ẹ nwụ ugbe nya uju ka, iJihova, kọ ri Ẹmwụ nya ẹlịlẹhị á ka jẹ́-ẹ me ọnọọkịla kaka ịnyịnyị. Lẹ, ahị ka jẹ́-ẹ dahịhile ẹla myị́ ẹla ká iJihova á ya, tụ́ ẹla ịlẹ kọ myọnụ hahị gbe ijuju. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ịtọ ẹla ịlẹ: Ịyẹ iJihova à tị́ myọnụ hahị gbe ijuju? Ịyẹ iJihova à tị́ họ chajị kahị ka jẹ́ myị̀myị̀ nyori ọnụ ọmyịmyị nyamwụ ka họ jịra?

ỊYẸ IJIHOVA À TỊ́ MYỌNỤ?

3. (a) Ọnụ ọmyịmyị oyina à tị́ kaa há anchẹ nya Ohe yẹẹyẹẹ? (Ọwụrụụ-wụrụ 21:3, 4) (b) Ányị angịhyẹ à tị́ kaa ya ụka kahị ya ẹla u-uhye nya ọnụ ọmyịmyị ọọwa jaa?

³ Ọnụ ọmyịmyị ọlẹ kahị wẹẹ ka kụ ẹhị yẹ ri ọlẹ kọ kaa há anchẹ nya Ohe yẹẹyẹẹ chị odehe ọnụ wuu. (Wa Ọwụrụụ-wụrụ 21:3, 4.) IJihova myọnụ nyori ụka nyị wẹẹ wẹ ká “igu ogbugbu ọhẹ-lọhẹ á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ, ọ ka ji kaka ịnyịnyị.” Iru nyahị kaa kpa ẹla ọnyịịla ọlẹ ká ụpwụ ịgọgọ ọwẹ ya rụ ọhịhị ọla ịParadayịsị ya ẹla nya Ohe je angịkịla. Ányị angịnyị à tị́ kaa họ ụka kahị ya ẹla u-uhye nya ọnụ ọmyịmyị ọwẹ jaa? Ị ka ya myị́ nyori, “Ẹlẹwẹ há kpoye nyọka ri ẹlịlẹhị.”

4. (a) Ụka ká iJihova myọnụ nyọka kpa ịParadayịsị warị, ẹlịyẹ ọ tị́ jẹ́ nyị ka họ lụka nyahị? (b) Datị hi ẹla ọlẹ ká iJihova myọnụ, ang ọkịla oyina ọ tị́ họ?

⁴ Ẹlịlẹhị ri, ụka ká iJihova ya olegu ịgọgọ ha ọlẹrụ ịJọn kọ ka da ọnụ ọmyịmyị u-uhye nya ọhịhị ọla ịParadayịsị ju, Ọ jẹ́ nyori ahị alẹ nyị ka ya ẹla ọọwa je angịkịla ụka kahị ka kpa ẹrụ ọnyịịla nya Ịpyị-Adịrahụ pyẹ. IJihova jẹ́ nyori “ang inyeewe” ịhyẹ ịlẹ kọ wẹẹ myọnụ nyị ka la angịhyẹ ujwo la ọ-ka ye myị. (Ayị. 42:9; 60:2; 2 Kọr. 4:3, 4) Lẹ ányị ahị tị́ ka họ ká angị lịnyị, bala ahị la ịlọhị, ka jẹ́ myị̀myị̀ nyori ahị ọwawa ịla ụpwụ nya Ọwụrụụ-wụrụ 21:3, 4 ka họ jịra ịlẹhị? IJihova ya ang-ẹjẹẹ ịkpọnchị hahị nyọka jẹ́ myị̀myị̀ nyori ọ ka họ ọnụ ọmyịmyị nyamwụ ịwẹ jịra. Ịyẹ à tị́ ri ang-ẹjẹẹ ị-ịwa?

IJIHOVA HỌ KAHỊ JẸ́ MYỊ̀MYỊ̀ NYORI ỌNỤ ỌMYỊMYỊ NYAMWỤ KA HỌ JỊRA

5. Ịgba nya ịBayịbụụ iyina à tị́ họ kahị ka dahịhile ọnụ ọmyịmyị nya Ohe? Ányị ị tị ya?

⁵ Ahị yẹ ang odudu ọlẹ kahị ka jẹ́-ẹ dahịhile ọnụ ọmyịmyị nya iJihova u-uhye nya ịParadayịsị ẹ-ẹpwụ nya ịgba ịlẹ kị tụ ọnụ ọmyịmyị ọwẹ da wẹẹ. Ụwa yẹkẹẹ: “Ọngọlẹ kọ hụhụ u-uhye nya ẹchị adịrahụ ọọwa a yẹkẹẹ, ‘Anụ yẹ mẹ! M jam họ ang myị́ ang wuu onyeewe ugbẹnyị lẹ!’ Ọ myịmyị yẹkẹẹ, ‘ỊJọn, da ala ịlẹ ju ụ-ụpwụ mẹ. Chajị, ị ri ala ịchịla o-hu ọkịlẹtụ ha bala o-ri ẹla nya ịlẹhị.’ Ọngọlẹ kọ hụhụ u-uhye nya ẹchị adịrahụ ọọwa myịmyị byim yẹkẹẹ, ‘Egbahị go ugbẹnyị lẹ! Am a ri ‘Alụfa’ bala ‘Ọmẹga’ lẹ.”—Ọwụ. 21:5, 6.

6. Ịyẹ tị́ du ká ẹla ọla ụpwụ nya Ọwụrụụ-wụrụ 21:5, 6 ju ahị ọdahile nyahị ọngịrị u-uhye nya ọnụ ọmyịmyị nya Ohe?

⁶ Ịyẹ tị́ du ká ẹlẹwẹ ju ahị ọ-daihle nyahị ọngịrị u-uhye nya ọnụ ọmyịmyị nya Ohe? Ụpwụ nya Revelation Climax chabwọ nya ẹla ịla ịgba ịwẹ yẹkẹẹ: “Ọ lala o-ri iJihova la ịlọmwụ wẹẹ ya ụbwọ ju ụpwụ ẹ-ẹpwụ ha angị la ọmyịmyị nyọka jẹ́ myị̀myị̀ nyori ahị ọwawa ịlẹ kọ myọnụ gbe ijuju ka họ jịra ịlẹhị.”b Ẹla ọlẹ ká Ohe myọnụ juwa ụ-ụpwụ nya Ọwụrụụ-wụrụ 21:3, 4. Ma, ẹ-ẹpwụ nya ọgba 5 bala 6, ahị yẹ ká iJihova ya ụbwọ ju ụpwụ ẹ-ẹpwụ nyọka mẹjẹ nyori ọnụ ọmyịmyị ịwẹ ri ẹlịlẹhị. Ahị kụ ẹhị yẹ omyi ẹla ịlẹ ká iJihova kpa ya ẹla du kahị ka dahịhilọọ wẹẹ.

7. Owo à tị́ ya ẹla jene ọ-ọgba 5? Ịyẹ tị́ du ká ẹla ọọwa la kpọnchị?

⁷ Ọgba 5 dọmwụ bwula o-yẹkẹẹ: “Ọngọlẹ kọ hụhụ u-uhye nya ẹchị adịrahụ ọọwa a yẹkẹẹ.” (Ọwụ. 21:5) Ẹlẹwẹ la kpọnchị chajị ọ ri ọhẹ lẹpwụ nya ụka ịta ọlẹ ká iJihova ya ẹla a-arụrụ kị da ju ụ-ụpwụ nya Ọwụrụụ-wụrụ. Aalegu-ẹrụ lee iJisọsị à họ kahị jẹ́ ẹlẹwẹ myị̀myị̀ ka, ma iJihova la ịlọmwụ à họ ịnyị lẹ! Ọwẹ du kahị ka jẹ́-ẹ dahịhile ẹla ọ-ba ọwẹ ba. Ịyẹ tị́ du kọ lịnyị? Chajị iJihova á kaa “me ọnọọkịla kpong-kpong ka.” (Tay. 1:2) Lẹ ẹla ọlẹ kahị wa ụ-ụpwụ nya Ọwụrụụ-wụrụ 21:5, 6 ka họ jịra ịlẹhị.

“ANỤ YẸ MẸ! M JAM HỌ ANG MYỊ́ ANG WUU ONYEEWE UGBẸNYỊ LẸ!”

8. Ẹlịyẹ iJihova à tị́ ya nyọka mẹjẹ nyori ọnu ọmyịmyị nyamwụ ka họ jịra pyii? (Ayịsaya 46:10)

⁸ Ahị kụ ẹhị yẹ omyi ẹla ọlẹ kọ ri “Yẹ mẹ!” ugbẹnyị wẹẹ. (Ọwụ. 21:5) Ị kpa omyi ẹla nya iGiriki ọlẹ kị yẹda kaka ri “yẹ mẹ” ya ẹla mwụba-mwụba ụ-ụpwụ nya Ọwụrụụ-wụrụ. Ụpwụ ọhẹ ya nyori nyị kaa kpa omyi ẹla ọwẹ ya ẹla “chajị ká ọngọ wẹẹ wa ụpwụ ọọwa ka ya ụrụ reeji nya ẹla ọlẹ kọ wẹẹ ka tọọ da.” Ẹlịyẹ Ohe à tị́ ya ba ọọwa ba? Ọ yẹkẹẹ: “M jam họ ang myị́ ang wuu onyeewe ugbẹnyị lẹ!” Ịlẹhị lẹ, ẹla ọlẹ ká iJihova ka họ ị-ịlahị ọ wẹẹ ya ẹla rụ lẹ, ma a-ahị nyamwụ lẹ ọnụ ọmyịmyị ọwẹ ka jẹ́-ẹ họ jịra pyii lẹ du kọ wẹẹ ya ẹla rwaa lala o-ri nyị dọmwụ họ jịra ene-ene lẹ.—Wa Ayịsaya 46:10.

9. (a) Omyi ẹla ọlẹ kọ ri “họ ang myị́ ang wuu onyeewe” tị́ mẹjẹ nyori iJihova ka họ ang imiiye iyina? (b) Ịyẹ à tị́ ka họ ta “epwoohe” bala “odehe” ịlẹ kị ji lẹẹlẹẹ?

⁹ Ahị kụ ẹhị yẹ omyi ẹla ọkịla ọlẹ kọ ba ọwẹ ba ụ-ụpwụ nya Ọwụrụụ-wụwụ 21:5 wẹẹ. Ẹla ọọwa ri: “Họ ang myị́ ang wuu onyeewe.” Ẹ-ẹpwụ nya egbeju nya ịBayịbụụ ọwẹ, omyi ẹla ọwẹ ya ẹla ru ang imiiye ịlẹ ká iJihova ka họ. Ọhọhẹ, iJihova ka ta odehe onyobyi ọlẹ ayịreji. Oheeye, Ọ ka kpa odehe onyeewe warị. Ụpwụ nya Ọwụrụụ-wụrụ 21:1 yẹkẹẹ: “Epwoohe nya ọgbanyẹ-ọgbanyẹ bala odehe nya ọgbanyẹ byi yịra-yịra wuu lẹ.” “Epwoohe nya ọgbanyẹ-ọgbanyẹ” ri igomenti nya odehe ọlẹ kọ ji ekpeleji nya Ohe Onyobyi bala alegu inyibyi nyamwụ. (Mat. 4:8, 9; 1 Jọn. 5:19) Ụka ká ịBayịbụụ á ya ẹla rụ “odehe,” etu nyamwụ ka ri angịnyị ịlẹ kị jam odehe myị́. (Ọmwụ. 11:1; Eje. 96:1) Lẹ, “odehe nya ọgbanyẹ” ọwẹ ri angịnyị ịtịpyọ ịlẹ kị jam odehe alẹ. IJihova á ka nwụ “epwoohe” bala “odehe” ọlẹ họ, lee ọ-nwụlaa kem ka; ọkọkọ nya ọọwa, ọ ka taa tụ hụrụ gbang-gbang bwula ọ-ya ịkịla ku ọmwakpa nyaa. Ọ ka ya “epwoohe onyeewe bala odehe onyeewe” ku ọmwakpa nya epwoohe bala odehe ịlẹ kị ji lẹẹlẹẹ, ọọwa ri, igomenti onyeewe à ka kpeji u-uhye nya ala abwẹla ịnyịịla lẹlẹ.

10. Ịyẹ iJihova à tị́ ka họ onyeewe?

¹⁰ Ụ-ụpwụ nya Ọwụrụụ-wụrụ 21:5, ahị myịmyị yẹ ang ịlẹ ká iJihova ya ọwa nyị ka họ inyeewe. Kpịtịya nyori iJihova á ya nyori, “M jam họ onyeewe nya ang myị́ ang wuu ugbẹnyị lẹ! ka. Ọkọkọ nya ọọwa, ọ yẹkẹẹ: “M jam họ ang myị́ ang wuu onyeewe ugbẹnyị lẹ!” Lẹ, iJihova ka họ ká odehe bala angịnyị ehe ka lala onyeewe bwula ọ-họ kị ka la kpẹẹkpẹẹ. Jaabwọ ká Ayịsaya ya neeji. Odehe lẹpwụ-lẹpwụ ka há ụhị lala iku nya Idẹn. Ọ tị ka họ ahị ka ri onyeewe bwula ọ-họ ọngọngọọng nyahị uda ịnyịnyị. Angị chị okuku, angị kpụ idu, angị kpịla ka ye uda ọhọhọ, angịlẹ kị dọmwụ gbu lẹ ka tịrẹkpẹ wẹ ọhịhị.—Ayị. 25:8; 35:1-7.

“Ị RI ALA ỊCHỊLA O-HU ỌKỊLẸTỤ HA BALA O-RI ẸLA NYA ỊLẸHỊ. . . . EGBAHỊ GO UGBẸNYỊ LẸ!”

11. Ịyẹ iJihova à tị́ byi ịJọn nyị họ? Ịyẹ à tị́ du kọ byọọ ịnyị?

¹¹ Ẹla ọkịla oyina Ohe à tị́ ya du kahị ka jẹ́-ẹ dahịhilọọ? IJihova byi ịJọn yẹkẹẹ: “Da ala ịlẹ ju ụ-ụpwụ mẹ. Chajị, ị ri ala ịchịla o-hu ọkịlẹtụ ha bala o-ri ẹla nya ịlẹhị.” (Ọwụ. 21:5) IJihova á byi ịJọn nyị “da ala” ịịwa ju kem ka. O ya ang odudu kọ ka họ ịnyị joo ịnyịnyị. Ọ yẹkẹẹ: “Chajị, ị ri ala ịchịla o-hu ọkịlẹtụ ha bala o-ri ẹla nya ịlẹhị”—mẹjẹ nyoyri, omyi ẹla nya Ohe ju ọ-dahịhile. Ahị chị ọkẹkẹnị chajị nyọlẹ ká ịJọn ju ihi nya ẹla ọlẹ kị byọọ nyị “da ala” ịwẹ ju. Ọọwa du kahị jẹ́ wẹẹ jẹ́ ang u-uhye nya ịParadayịsị ọlẹ ká Ohe myọnụ bala ọ-ka kụ irya u-uhye nya ahị ọwawa ịnyịịla-ịnyịịla ịlẹ kị wẹẹ godayị gbehi ụ-ụwa.

12. Ịyẹ tị́ du ká iJihova ka jẹ́-ẹ ya nyori: “Egbahị go ugbẹnyị lẹ!”

¹² Ẹlịyẹ Ohe à tị́ ya ba ọọwa ba? “Egbahị go ugbẹnyị lẹ!” (Ọwụ. 21:6) Ugbẹnyị iJihova ya ẹla lala o-ri ang ịlẹ wuu kọ gu ẹnyị u-uhye nya ịParadayịsị ọlẹ kọ myọnụ nyị họ jịra ene-ene lẹ. Ọ tị ka jẹ́-ẹ ya ịnyị ịlẹhị chajị ịngịngịhyẹ á ka jẹ́-ẹ woo kpa la ọ-họ irya nyamwụ jịra kaka. IJihova tị myị́myị́ ya ẹla ọkịla ọlẹ kọ họ kahị jẹ́ myị̀myị̀ nyori ọnụ ọmyịmyị nyamwụ ka họ jịra. Ịyẹ à tị́ ri ẹla ọọwa?

“AM A RI ‘ALỤFA’ BALA ‘ỌMẸGA’ LẸ”

13. Ịyẹ tị́ du ká iJihova ya nyori: “Am a ri ‘Alụfa’ bala ‘Ọmẹga’ lẹ”?

¹³ Jaabwọ kahị ya ene, iJihova la ịlọmwụ ya ẹla ta ịJọn ụka ịta ẹ-ẹpwụ nya ọyị ọyẹyẹ. (Ọwụ. 1:8; 21:5, 6; 22:13) Ẹ-ẹpwụ nya ụka ịta-ịta ịwẹ wuu, iJihova ya ẹla ookpokpo ọhẹ kọ ri: “Am kpakpakpa a ri Alụfa bala Ọmẹga lẹ.” Ẹ-ẹpwụ nya alụfabeti nya òja nya iGiriki, alụfa à ri ọmwụ ọdada lẹ, ọmẹga à tị́ ri ocheju lẹ. Nyọlẹ ká iJihova ya ọwa nya-à ri “alụfa bala ọmẹga” lẹ wẹẹ, ọ wẹẹ ya nyori kori kọ dọmwụ nya ang lẹ aalẹ, ọ ka họ ang ọọwa gbee kọ ka pwụ ocheju jaabwọ kọ chịla lẹ.

14. (a) Ányị iJihova à tị́ bwu ya nyị “Alụfa” ụka ọhẹ lẹ? Ụka oyina ọ tị́ ka ya nyị “Omẹga”? (b) Ẹlịyẹ ụpwụ nya Ọmwụ Ọdada 2:1-3 à tị́ họ kahị jẹ́ myị̀myị̀?

¹⁴ Nyọlẹ ká iJihova họ Adam bala Iivu kpá, Ọ ya ẹla ọlẹ kọ la i-irya u-uhye nya angịnyị bala odehe. ỊBayịbụu yẹkẹẹ: “Ohe Oluhye à wahị kụrwaa byaa yẹkẹẹ, ‘Anụ ma anyị kanụ pyẹ myị ẹga myị ẹga nya odehe ọlẹ wuu mẹ. Kanụ kụrụ odehe ọlẹ wuu . . . mẹ.’” (Ọmwụ. 1:28) Ụka ká iJihova ya irya nyamwụ dodehe họhẹ-họhẹ, ọ lala o-ri ọ ya nyị “Alụfa.” O ya irya nyamwụ dodehe gede-gede yẹkẹẹ: Ụka wẹẹ wẹ ká anyị-ịtụma nya Adam bala Iivu ịlẹ kị ju ihi bala ọ-la kpẹẹkpẹẹ ka myị odehe pwẹẹpwẹẹ bala ọ-yọọ da kaka ri ịparadayịsị. Ụka ká irya nya iJihova á họ jịra ị-ịlahị kpá ịnyị lẹ, ọọwa à ka ri “Ọmẹga” lẹlẹ. Ụka ká iJihova “họ uhye-ọgba bala odehe ọlẹ bala ang myị ang ịlẹpwụ nyaa wuu” kpá, ọ ya ẹla ọlẹ kọ du kahị ka jẹ́ myị̀myị̀ nyori irya nyamwụ ka họ jịra. Ẹla ọọwa juwa ụ-ụpwụ nya Ọmwụ Ọdada 2:1-3. (Wọọ.) IJihova hu ahyẹẹnụ ọharwiye nọ ha ịlọmwụ nya ẹnụ ọla ịgọgọ. Etu nya ọọwa tị́ ri ányị? IJihova họ kahị jẹ́ myị̀myị̀ nyori irya ọlẹ kọ la ẹ-ẹga nya angịnyị ehe bala odehe ọlẹ ka họ jịra pyii lẹ. Ọ ka họ jịra chọnụ-chọnụ la ocheju nya ahyẹẹnụ ọharwiye.

15. Ịyẹ tị́ du ká Olegu Onyobyi ka kụ irya myị́ nyori ọwa nyị hu iJihova abwọ la ọ-họ irya nyamwụ u-uhye nya angịnyị ehe jịra?

¹⁵ Nyọlẹ ká Adam bala Iivu la egbeju ọngịrị, ị wẹ ka ri alịhọbịrị, ị tị ya ọhọbịrị bala igu chịkịla anyị ịtụma nyaa ịnyịnyị. (Rom. 5:12) Ọọwa dudu kọ lala o-ri nyị́ ka jẹ́-ẹ chịkpẹẹ angịnyị ị-kpẹẹkpẹẹ ịlẹ kị ka ju ihi nya iJihova ka myị odehe ọlẹ kaka. Ọ lala o-ri Olegu Onyobyi nyị wu iJihova kpa la ọ-ka ya nyị “Ọmẹga” lẹ. Olegu Onyobyi ka me nyori iJihova nyị́ ka jẹ́-ẹ họ irya nyamwụ jịra myị́ kaka. Ohe ka kụ irya nyọka ta Adam bala Iivu ayịreji, kpụ ọ ka họ ahụ bala ọrụ ị-kpẹẹkpẹẹ ịkịla nyọka họ irya ọlẹ kọ la ẹ-ẹga nya angịnyị ehe jịra myị́. Ma kori kọ họ ịnyị, Olegu Onyobyi ka wụrọọ ọla ọnọọkịla. Ịyẹ à tị́ du? Chajị iJihova byi Adam bala Iivu nyori anyị nyaa nyị ka myị odehe ọlẹ, jaabwọ ká Ọmwụ Ọdada 1:28 ya.

16. Ịyẹ tị́ ka du ká Olegu Onyobyi ka kụ irya myị́ nyori ọ ka jẹ́-ẹ wụrụ iJihova ọngọ họ ọnụ ọmyịmyị nyamwụ jịra ka?

¹⁶ Ang ọkịla oyina Olegu Onyobyi à tị́ ka kụ irya ká Ohe ka chụ nyọka họ myị́? Ọhẹka Olegu Onyobyi ka kụ irya nyori iJihiva nyị ka ya iwe da ká Adam bala Iivu kị ka ma anyị, ma anyị ịịwa á ka jẹ́-ẹ wẹ ka la kpẹẹkpẹẹ ẹnẹnẹhẹ kaka. (Ọngọ. 7:20; Rom. 3:23) Kori kọ lịnyị lẹ, Olegu Onyobyi à ka wụrụ iJihova nyị ọngọ mịleji lẹlẹ. Ịyẹ à tị́ du? Chajị irya ọlẹ ká Ohe la ká anyị nya Adam bala Iivu ka myị odehe ọlẹ ẹ-ẹpwụ nya ọkpẹẹkpẹẹ ọlala á họ jịra myị́ kaka.

17. Ányị iJihova à tị́ họ nyọka myị́ egbeju ọngịrị nya Olegu Onyobyi bala ịnya Adam bala Iivu? Ịyẹ à tị́ ka ri ocheju nya ọọwa? (Yẹ ifoto ịnyịnyị.)

¹⁷ IJihova hu ẹlẹwẹ bwu ụgbẹyị ọlẹ ká Olegu Onyobyi bala Adam bala Iivu á ka jẹ́-ẹ ya ahị me ẹnẹnẹhe ka. (Eje. 92:5) IJihova ya iwe da Adam bala Iivu ma anyị, ọọwa du ká ẹla ọla ọnụ nyamwụ họ jịra. Ọ́ ri ọla ọnọọkịla kaka. Lẹ ọkọkọ ká iJihova ka ri ọngọ mịleji lẹ, ọ mẹjẹ nyori ọ ri ọngọ kụrụ-kụrụ lẹ. Chajị ká ịngịngịhyẹ á ka da irya nyamwụ yi ka lẹ, ọ du “ọnyị” ọlẹ kọ ka chị anyị nya Adam bala Iivu da, ẹrụ warị. (Ọmwụ. 3:15; 22:18) Ọnyị ọọwa ka hu ọhịhị nyamwụ ha chajị nyọka chị angịnyị ehe da. Olegu Onyobyi á ka jẹ́-ẹ ya ahị guru ẹlẹwẹ kpong-kpong ka! Ịyẹ à tị́ du? Chajị Ohe họ ẹlẹwẹ bwula ọháha o-gbu enyi ka. (Mat. 20:28; Jọn. 3:16) Olegu Onyobyi á la abwẹla ọwẹ kpong-kpong ka. O ri ọngọ yẹ ịlọmwụ-ịlọmwụ kem. Lẹ, ịyẹ à tị́ ka họ nyọlẹ ká Ohe nwụla iya ọkịlaa-kịla ọwẹ nọ mẹ? La ocheju nya eji ọkpakpa nya ịKịrayịsị ọla ẹka 1,000, anyị nya Adam bala Iivu ịlẹ kị ju ihi ka kụ ịParadayịsị ẹ-ẹpwụ nya ọkpẹẹkpẹẹ ọlala, jaabwọ ká irya nya iJihova ri bwu ọmwụ ọdada. Lụka ọọwa, iJihova ka ya nyị “Ọmẹga” ọlam-ọlam.

ABWỌLẸ KAHỊ KAA BWU JU AHỊ Ọ-DAHILE NYAHỊ ỌNGỊRỊ Ẹ-ẸGA NYA ỊPARADAYỊSỊ ỌLẸ KÁ IJIHOVA MYỌNỤ

18. Ẹla ịta iyina iJihova à tị́ họ kahị ka jẹ́ myị̀myị̀? (Yẹ akpa ọlẹ kọ ri “Ang Ịta ịlẹ kị Du Kahị ka Dahịhile Ọnụ Ọmyịmyị nya IJihova.”)

¹⁸ Ẹ-ẹpwụ nya ang ọjẹ́jẹ ọlẹ, ahị kụ ẹhị yẹ ang odudu kahị ka jẹ́ myị̀myị̀ nyori odehe ka ri ịparadayịsị wẹẹ. Ẹlịyẹ ahị tị́ ka jẹ́-ẹ byi angịkịla chajị ká ịwa ịnyịnyị ka jẹ́ myị̀myị̀ nyori ọ ka lịnyị ịlẹhị? Ọhọhẹ, iJihova la ịlọmwụ à myọnụ nya ẹlẹwẹ lẹ. Ụpwụ nya Ọwụrụụ-wụrụ yẹkẹẹ: “Ọngọlẹ kọ hụhụ u-uhye nya ẹchị adịrahụ ọọwa a yẹkẹẹ, ‘Anụ yẹ mẹ! M jam họ ang myị́ ang wuu onyeewe ugbẹnyị lẹ!’” Ọ la ẹla ọjẹ́jẹ bala ọngịrị ọlẹ kọ ka kpa họ ọnụ ọmyịmyị nyamwụ jịra, ọ tị nwụlanọ nyọka họ ịnyị ịnyịnyị. Oheeye, ọ-họ jịra nya ọnụ ọmyịmyị nya iJihova la kpakpa gbee kọọ lala o-ri nyị họ ene-ene a-ahị nyamwụ lẹ. Ịnyị à du kọ yẹkẹẹ: “Ị ri ala ịchịla o-hu ọkịlẹtụ ha bala o-ri ẹla nya ịlẹhị. . . . Egbahị go ugbẹnyị lẹ!” Ọhata, ó ri ká iJihova á dọmwụ nya ang lẹ, ọ kaa họọ gbee kọ ka pwụ ocheju ụ-ụgbẹyị ọlẹ kọ chịla lẹ. Ịnyị à du kọ yẹkẹẹ: “Am a ri ‘Alụfa’ bala ‘Ọmẹga’ lẹ.” IJihova ka họ ká Olegu Onyobyi ka jẹ́ nyori o ri ọla ọnọọkịla bala o-ri ọ́ ka jẹ́-ẹ wu iJihova kpa la ọ-họ irya nyamwụ jịra ka.

19. Kori ká angịnyị á da ịwẹẹ ju ịParadayịsị ọlẹ ká iJihova myọnụ, ányị a tị́ ka họ?

¹⁹ Kpịtịya, ụka myị́ ụka ká ya ẹla ọlẹ ká iJihova ya du kahị jẹ́ myị̀myị̀ nyori ọnụ ọmyịmyị nyamwụ ka họ jịra, je angịkịla, à kaa ju ahị ọdahile nya ịlọng ẹ-ẹga nyamwụ ọngịrị gụ́ ọọwa. Lẹ ụka ọkịla ọlẹ ká wa ọnụ ọmyịmyị nya ịParadayịsị ọlẹ kọ wẹẹ warị, jaabwọ ká ụpwụ nya Ọwụrụụ-wụrụ 21:4 ya, ká ọngịnyị á bying nyori, “Ẹlẹwẹ há kpoye nyọka ri ẹlịlẹhị,” ányị a tị́ ka họ? À ka wa ọgba 5 bala 6 bala ọ-da ẹla ọlụwa wụlẹ je ọngọọwa myị́? Mẹjẹ jaabwọ ká iJihova họ kahị jẹ́ myị̀myị̀ nyori ọnụ ọmyịmyị nyamwụ ka họ jịra bwula ọ-ya ụbwọ jwọọ ẹ-ẹpwụ la ịlọmwụ.—Ayị. 65:16.