ANG ỌJẸ́JẸ 31
‘Anụ Godayị Kpakpakpa, Anụ Pyị Giri-giri Ka’
“Anụ anyadam ị-hám há ẹ-ẹpwụ nya ịKịrayịsị, anụ́-ụ juwa godayị kpakpakpa ẹ-ẹpwụ nya ọmyịmyị ọlala nyanụ mẹ. Anụ juwa pyị giri-giri kpong-kpong ka.”—1 KỌR. 15:58.
EJE 122 Be Steadfast, Immovable!
ẸHỊ NYA ẸLAa
1-2. Ụ-ụgbẹyị oyina ọngịnyị nya ịKịrayịsị à tị́ lala ube oluhye ọtụka-ọtụka ọhẹ? (1 Ala ịKọrịntị 15:58)
LA ẸKA nya 1978, ị nwụ ube oluhye ọtụka-ọtụka ọhẹ ịị Tokyo, Japan. Angịnyị kaa kụ irya kori ká ube ọwẹ á ka kịnyaa la o-godayị rịrị ụ-ụwa myị́ chajị ọpyị ọ-hụ́ jigi-jigi kaa họ lụmẹ e-epweji ọọwa. Ẹlịyẹ angị me ube ọwẹ à tị́ họ chajị kọ ka godayị myị́ lụka nya ọpyị ọ-hụ́ jigi-jigi? Ị moo la ọngịrị kpọng-kpọng bala ụ-ụgbẹyị ọlẹ kọ ka jẹ́-ẹ nwụ rịrị ịnyịnyị chajị ká ọpyị ọ-hụ́ jigi-jigi ka tụ́rọọ myị́ ka. Angịnyị nya ịKịrayịsị lala ube ọwẹ. Ụ-ụgbẹyị oyina tị́?
2 Ọ ri opyii ká ọngịnyị nya ịKịrayịsị ka la irya ọkpakpa ẹ-ẹga nya o-godayị giri-giri bala ọ-nwụlanọ nyọka nwụhọ. Ọ baba kọ ka godayị giri-giri bala o-cheje lọngịrị-ọngịrị nyọka ju ihi nya ehile bala ọmẹjẹ nya iJihova ụka wuu. (Wa 1 Ala ịKọrịntị 15:58.) Ọ kaa ‘me irya ju angịkịla’ lee ọ-nwụlanọ nyọka ju ihi la ọ-tụ ẹta kẹkpẹ ka. Ọ́ tị ba ọọwa kem ka, ọ baba nyọka ‘la wụlẹlẹ’ lee ọ-nwụlanọ nyọka nwụhọ ụka kọ chịkpẹẹ lee o-pwoku nyọka họ ịnyị. (Jem. 3:17) Ọngịnyị nya ịKịrayịsị ọlẹ kọ la irya ọkpakpa, á ri ọngọlẹ ká ẹla nyamwụ kaa lujwo lụmẹ lee ọngọ yẹhị da ẹla bwee kpoye ka. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ abwọlẹ kahị ka bwu pyị giri-giri ka. Ahị ka myịmyị-ị̀ yẹ agbẹyị ịrụ ịlẹ ká Olegu Onyobyi kaa kpa maga nyọka bịrị eje ọchịchị nyahị bala abwọlẹ kahị ka bwu kụrwọọ myị́.
ÁNYỊ AHỊ TỊ́ KA BWU GODAYỊ GIRI-GIRI?
3. Ehile iyina iJihova à tị́ da ụ-ụpwụ nya Ụkụrwọ nya Alẹrụ 15:28, 29?
3 IJihova à ri Ọngọ la Ọngịrị Gụgụ Wuu nyọka da ehile lẹ, ọ tị kaa họ ká ehile nyamwụ ka chịkpẹẹ ha angịnyị la ọ-ka ba jẹ. (Ayị. 33:22) Ọ-chụ pwokwita, angị kpẹhị rịrị ogu ịla oyi ọhọhẹ gu ẹnyị nya agbẹyị ịta ịlẹ ká angịnyị nya ịKịrayịsị ka bwu godayị giri-giri pyii: (1) bwula o-cheji ba hi ịgba ọgbagba ha ihye ijiga bala ọ-gbịgba ha iJihova kem, (2) bwula o-ju ihi nya ehile ọlẹ ká iJihova da nyori ịwọ la ịgọgọ, bala (3) bwula o-ju ihi nya ehile ọla ịBayịbụụ nyọka cheji ba hi ụya ọhọhọ. (Wa Ụkụrwọ nya Alẹrụ 15:28, 29.) Ányị angịnyị nya ịKịrayịsị alẹ à tị́ ka bwu godayị giri-giri ẹ-ẹga nya ang ịta ịlẹ kị gu ẹnyị kpangga wẹ?
4. Ányị ahị tị́ ka bwu gbịgba ha iJihova kem? (Ọwụrụụ-wụrụ 4:11)
4 Ahị kaa cheji ba hi ịgba ọgbagba ha ihye ijiga bala ọgbịgba ha iJihova kem. IJihova da ala Isirẹlụ ehile nyọka gbịgba họọ kem. (Ehile. 5:6-10) Ụka ká Olegu Onyobyi tị ma iJisọsị yẹ, ọ ya gbagbịla nyori iJihova kem ahị nya-à ka gbịgba ha pyii lẹ. (Mat. 4:8-10) Lẹ, áhị kaa gbịgba ha ikpeku ka. Áhị tị kaa gbịgba ha angịnyị ehe ka ịnyịnyị. Ọ-chụ pwokwita, áhị ka kpa alegbeju nya ịgba ọgbagba, alupe lee angị da olo, angị họ ifim lee angị mweje ịlẹ ká ẹnyị nyaa rụ ohi lala o-ri nyị ri Ohe ka. Ahị ji oye nya iJihova bala ọ-kaa gbịgba họọ kem, ọwa ọngọlẹ kọ “họ ang myị́ ang wuu.”—Wa Ọwụrụụ-wụrụ 4:11.
5. Ịyẹ tị́ du kahị kaa ju ihi nya ehile nya iJihova ẹ-ẹga nya ọ-chị ịgọgọ ju ọhịhị bala ịwọ?
5 Ahị kaa ju ihi nya ehile nya iJihova ẹ-ẹga nya ọ-chị ịgọgọ ju ọhịhị bala ịwọ. Ịyẹ tị́ du? Chajị iJihova ya nyori ịwọ nyị ku ọmwakpa nya ọhịhị ọlẹ kọ ri āhị ọnyịịla-ọnyịịla bwu ẹga nyamwụ. (Liv. 17:14) Ụka nya ọgbanyẹ ọlẹ ká iJihova ya ẹga da ha angịnyị nyọka ri iyo, ọ daa ehile nyori nyị ri ịwọ nyamwụ ka. (Ọmwụ. 9:4) Ọ myịmyị ya ẹla rụ́ ehile ọwẹ ụka kọ ya Ehile nya iMosisi ha ala Isirẹlụ. (Liv. 17:10) Ọ tị ya irya ha angị kpẹhị rịrị ogu ịla oyi ọhọhẹ nyọka mẹjẹ Angịnyị nya ịKịrayịsị nyori nyị ‘kpa ịwọ ọhẹ-lọhẹ ka ọnụ ka’ ịnyịnyị. (Ụkụr. 15:28, 29) Ahị kaa ju ihi nya ehile ọwẹ la ọ-tụ ẹta kẹkpẹ ka ụka kahị ja ka cheje u-uhye nya ụma nya utoji ọlẹ kị ka họhị.b
6. Ịyẹ ahị tị́ ka họ chajị kahị ka ju ihi nya ehile nya iJihova nyọka cheji ba hi ụya ọhọhọ?
6 Ahị kaa ju ihi nya ehile nya iJihova rige-rige ẹ-ẹga nyọka cheji ba hi ụya ọhọhọ. (Hib. 13:4) Ọlẹrụ ịPọlụ juhi ọhụ nyọka “nwụ irya” nya imyi nya ang nya ugbinyịrọ nyahị. Ọọwa ri, ahị ka họ ang ọlẹ kahị ka jụ́ họ la ọngịrị nyahị wuu myị́ nyọka ku irya ịtịpyọ rụ hi ịlọhị. Ahị ka cheji ba hi ọ-ka yẹ ang lee ọ-họ ịngịngịhyẹ ọlẹ kọ ka kpahị ka ju ka ẹpwụ nya ụya ọhọhọ. (Kol. 3:5; Job. 31:1) Ụka ká ọmayẹ nyọka họ ang ọtịpyọ á wẹ chịhị ọgụ, ahị ka pwa irya lee abwẹla ọlẹ kọ ka bịrị igu oriri nyahị bala iJihova ahyaahị.
7. Ẹlịyẹ ahị tị́ ka cheje nyọka họ? Ịyẹ tị́ du?
7 IJihova tịtọ kahị ka “kpa ọkịlẹtụ [nyahị] wuu” ju ihi nyamwụ. (Rom. 6:17) Ẹla ọlẹ kọọ byihi nyị họ kaa há hahị ụka wuu, áhị tị ka jẹ́-ẹ ya ehile nyamwụ da ka. (Ayị. 48:17, 18; 1 Kọr. 6:9, 10) Ahị kaa maga nyịlẹhị-ịlẹhị nyọka họ ẹla kpụ iJihova ịpyọ bala ọ-la abwẹla ụma nya ịnya ọngọ da eje ọnyịịla ọlẹ kọ yẹkẹẹ: “M̀ chị eje nyọka kpa ehile nyang lẹ, nyọka kpaa pwụ ọbaba nya ọhịhị nyam.” (Eje. 119:112) Ma, Olegu Onyobyi ka maga nyọka họ kọ ka lujwo hahị nyọka godayị giri-giri. Ang iyina ọ tịị kpa họ ụkụrwọ?
ÁNYỊ OLEGU ONYOBYI À TỊ́ KAA MAGA NYỌKA BỊRỊ EJE ỌCHỊCHỊ NYAHỊ?
8. Ányị Olegu Onyobyi à tị́ kaa kpa ọtụpyịpyị ma uya nyọka bịrị eje ọchịchị nyahị?
8 Ọtụpyịpyị. Olegu Onyobyi kaa kpa agbụrụ bala ẹla ọ-kpa yẹ rịrịịhị maga nyọka họ ká eje ọchịchị nyahị ka la dẹwụ-dẹwụ. Ẹla ọlẹ kọ la i-irya ri ọ-ka ‘wuhi ri’ lee ọ-ka bịrị igu oriri nyahị bala iJihova. (1 Pit. 5:8) Ị chị uhi ju Angịnyị nya ịKịrayịsị ịla oyi ọhọhẹ, nyaa enyiri, bala ọ-nwaa ọọlajị nyọlẹ kị cheje nyọka godayị giri-giri. (Ụkụr. 5:27, 28, 40; 7:54-60) Olegu Onyobyi wẹẹ kpa ọtụpyịpyị jahị dahị alẹ wẹẹ. Ahị ka yẹ ẹlẹwẹ gede-gede u-uhye nya abwọlẹ kị wẹẹ kpa aanahị la ụbwọ ọnyọọngịrị ịị Russia bala ẹpwụma ịkịla tụ ọlẹ ká aluji la ịlaa kaa gba mịla aanahị ịnyịnyị.
9. Ya ọ-chụ pwokwita ọlẹ kọ mẹjẹ nyori ahị baba nyọka dụmwọ-dụmwọ ẹ-ẹga nya ọ-pịrị ju la ijẹẹhị wẹẹ.
9 Ọ-pịrị ju la ijẹẹhị. Datị hi ọtụpyịpyị ịlẹ ká Olegu Onyobyi kaa kpa chịhị ọgụ, ọ kaa kpa “ijẹẹhị” jahị dahị ịnyịnyị. (Efe. 6:11) Ahị kụ ẹhị yẹ ang ọlẹ kọ họ ta ọọnahị ọlẹ ká ẹnyị nyamwụ ri Bob lẹẹ wẹẹ. Ị kpọọ ka ube utoji chajị ọ baba kị ka gwoo ịnyịrọ ene. Ọ ya je angị wẹẹ ka họọ utoji nyori abwọ myị abwọ ká iwe-ahụrụ nyọwa nyị la ọngịrị ka ka ba, ọwa nyị ka ye ịwọ ka. Ọngọ họ utoji nya ịnyịrọ o-gu ene ọlụwa myị nyori ọwa nyị ka ju ihi nya eje ọchịchị nyamwụ. Ma, lodu ene nya ẹnẹlẹ kị wẹẹ ka gu Bob ịnyịrọ ene, ọngọ họ utoji nya ịnyịrọ o-gbu ọngịnyị tiri-tiri ọhẹ ju Bob ụga ụka ká alugbiyegu nyamwụ rụ ka ẹpwa kpá. Ọ byi Bob nyori angị họ utoji nyị́ ka ya ịwọ jwoo ka myị́, ma nyị ka baba nyọka ya ọhẹ reeji kori ká ọbaba nyamwụ nyị́ ka ji. Ọ byi Bob ẹlẹwẹ la irya nyori ọ ka ya eje ọchịchị nyamwụ da nyọlẹ ká alugbiyegu nyamwụ ji ọnaabwọ ụka ọwẹ kaka. Ma Bob godayị giri-giri, ọ byoo nyori jaabwọ myị́ abwọ ká iwe-ahụrụ nyọwa nyị ka la, ọwa nyị́ ka ye ịwọ ka.
10. Ịyẹ tị́ du ká irya ọkụkụ nya angịnyị ehe ka ri ụnya hahị myị? (1 Ala ịKọrịntị 3:19, 20)
10 Irya ọkụkụ nya angịnyị ehe. Kori kahị kaa yẹ ẹla ụ-ụgbẹyị ọlẹ ká angị ji ẹkpẹ da ehile nya iJihova kaa yẹ aalẹ, ahị ịnyịnyị ka dọmwụ nyọka tụụbwọ hi iJihova bala ehile nyamwụ myị́. (Wa 1 Ala ịKọrịntị 3:19, 20.) “Ẹla ọjẹ́jẹ nya alodehe ọlẹ” kaa dudu ká angịnyị kaa ju ihi nya Ohe Oluhye ka. Angịnyị nya ịKịrayịsị ịmanyị-ịmanyị ị-ịPẹẹgamọm bala ịTayatịra ya iwe da abwẹla nya ụya ọhọhọ bala ijiga ịkpụkpụ nya alụwa chị waa. IJisọsị gbilaa ụbwọ ụ-ụrụ yẹẹyẹẹ nya iwe ọlẹ kị ya da ha ụya ọhọhọ ọọjịra-jịra imimiiye ịwẹ. (Ọwụ. 2:14, 20) Alẹ, angịlẹ kị kụ dagaga juhi kaa tị́tọ kahị ka ye irya ịtịpyọ myị. Alugbiyegu nyahị lee angịlẹ kahị jẹ́ ka byihi myị́ nyori ahị nyị ja họ kpoye lẹ, ahị nyị bịrị ehile nya iJihova ịhyẹ mẹ. Ọ-chụ pwokwita, ị ka byihi myị́ nyori nyị́ baba lụmẹ nyọka la abwẹla ocheri-cheri ka, bala o-ri ẹla ọmẹjẹ ịlẹpwụ nya ịBayịbụụ nyị hogo lẹ.
11. Ẹlịyẹ ahị tị́ ka cheji ba hi jaabwọ kahị wẹẹ godayị giri-giri?
11 Ụka ọhẹ, ahị ka kụ irya myị́ nyori ẹla ọlẹ ká iJihova mẹjẹ́ẹhị nyị́ la gede-gede nwà ka. Ahị ka dọmwụ tịtọ nyọka họ “kpoye nya ang ọlẹ kị da ụ-Ụpwụ Ịgọgọ” myị́. (1 Kọr. 4:6) Alegbeju nya ịgba ọgbagba ịlụka nya iJisọsị la abyị nya ẹlẹwẹ. Ị ya nyịlaa ịwa da Ehile nya Ohe u-uhye du kọ kaa lujwo ha angịnyị yẹẹyẹẹ la ọ-kpakpa. (Mat. 23:4) IJihova kaa mẹ ụgbẹyị ọlẹ kọ la gede-gede jéẹhị bwula Omyi Ẹla bala ogu nyamwụ. Áhị la ịngịngịhyẹ ọlẹ kọ ka du kahị ka ya ẹla ọkịla da ẹla ọlẹ kọ mẹjẹ́ẹhị u-uhye ka. (Etu 3:5-7) Chajị nyọọwa lẹ, áhị ka kpoye nya ẹla ọlẹ kị da ẹ-ẹpwụ nya ịBayịbụụ ka, áhị tị ka da aanahị ehile u-uhye nya ẹla ịlẹ ká kị la ọngịrị nyọka chụ ha ịlaa ka ịnyịnyị.
12. Ányị Olegu Onyobyi à tị́ kaa kpa “ijẹẹhị ụhwahị” họ ụkụrwọ?
12 Ẹla ị-hụ angịnyị ahị. Olegu Onyobyi kaa kpa “ijẹẹhị ụhwahị” bala “ẹla ọjẹ́jẹ nya angịnyị ehe ọlẹ ká adịda kaa kpa ya je anyị nyaa erike-erike” họ ụkụrwọ nyọka hụ angịnyị ahị bala ọ-chaa ebwo hi awụlẹ. (Kol. 2:8) Lụka nya oyi ọhọhẹ, ẹla ọmẹjẹ ịịwa kaa kpụnịrọ ẹla ọjẹ́jẹ nya angịnyị ehe, ang ọmẹjẹ nya ala iJuu ịlẹ kị bwu ịBayịbụụ ka, bala ẹla ọlẹ kị kaa mẹjẹ nyori Angịnyị nya ịKịrayịsị nyị ka kpa Ehile nya iMosisi pyii. Ẹla ị-hụ angịnyị ahị à wẹ lẹ, chajị ị kaa gu angịnyị irya daarụ hi iJihova ọngọlẹ kọ kaa ya ẹla ọjẹ́jẹ ọlam-ọlam ha ọngịnyị. Alẹ, Olegu Onyobyi kaa kpa oja i-bwu ọhụ bala intanẹtị ị-kpa joja họ ụkụrwọ nyọka kpa ẹla ị-la ibeenu ka bala oja nya ịnịịkịla ịlẹ kịị bwu ẹga nya alegbeju nya igomenti hụ angịnyị ahị. Oja nya ịnịịkịla ịlịnyị ji lụmẹ-lụmẹ ụka ká ẹdụrụ nya COVID-19 kpehe.c Alibeenu nya iJihova ịlẹ kị kaa ke ụrụ wo ẹla ọmẹjẹ o-bwu ẹga nya ogu nyahị á la uko ọchịchị ụma ọlẹ ká angị ke ụrụ wo la oja ị-hụ angịnyị ahị ịwẹ la ka.—Mat. 24:45.
13. Ịyẹ tị́ du kahị ka ya iwe da ha ang ịlẹ kị ka yéehi uyawu ka?
13 Ang ị-yé ọngịnyị uyawụ. Ahị ka ya irya nyahị wuu nọ u-unye nya “ang ọlẹ kọ chịla-chịla gụgụ wuu” pyii lẹ. (Filip. 1:9, 10) Ang ị-yé ọngịnyị uyawu kaa ye ụka nyahị yẹẹyẹẹ bala o-jihi ahị kpata hi ang ọlẹ kọ ju apyobwuna. Ang ịlẹ kahị kaa họ ẹ-ẹpwụ nya ọhịhị lala ang oriri, ang ọnwanwa, ayịlọ ọkọkọ, bala ụkụrwọ ọlẹ kahị kaa họ, ka yéehi uyawu myị́ kori kahị hwaa nya ang i-ju apyobwuna gụ́gụ wuu ẹ-ẹpwụ nya ọhịhị nyahị. (Luk. 21:34, 35) Da ọọwa u-uhye, ahị kaa wo oja nya ẹla nya upe bala ojigi-jigi olodehe ọlẹ ẹnụ myị́ ẹnụ. Ahị ka maga nyịlẹhị-ịlẹhị chajị ká ẹla ịlịịwẹ ka yeehi uyawu ka. O ri ịnyị ka aalẹ, ahị ka dọmwụ nyọka chẹkpẹ ju oye ọhẹ lee ọkịla ẹ-ẹpwụ nya irya bala ọkịlẹtụ nyahị. Olegu Onyobyi kaa kpa ijẹẹhị ịlịịwẹ wuu họ ụkụrwọ nyọka bịrị eje ọchịchị nyahị nyọka họ ang ọnyịịla. Ahị kụ ẹhị yẹ abwọlẹ kahị ka bwu kụrwọọ bala ọ-ka godayị giri-giri wẹẹ.
ÁNYỊ AHỊ TỊ́ KA BWU KỊNYAA LA O-GODAYỊ GIRI-GIRI?
Nyọka jẹ́-ẹ godayị giri-giri, kụ irya u-uhye nya ịlọng ọlẹ ká hu ju iJihova ụ-ụbwọ bala enyi Ohe ohuhu nyang, jẹ́ Omyi Ẹla nya Ohe ká kụ irya jwoo, la ọkịlẹtụ o-godayị giri-giri bala ọ-dahịhile iJihova (Yẹ ọgba 14-18)
14. Ịyẹ à tị́ ka dahị ụbwọ nyọka kịnyaa la ọ-godayị giri-giri ha iJihova?
14 Kụ irya u-uhye nya ang odudu ká hu ịlọng ju iJihova ụ-ụbwọ bala o-hu enyi Ohe. À tịtọ nyọka ji oye nya iJihova à du ka hu ẹta-ẹdịyẹ ịwẹ lẹ. Kụ irya nya ang ọlẹ kọ dang ụbwọ nyọka jẹ́ myị̀myị̀ nyori à yé ẹlịlẹhị lẹ wẹẹ. À wẹ ka jẹ́ iJihova bala ọ-dọmwụ nyọka jwoo ihi bala ọ-la ọháha ẹ-ẹga nya Adang olepwoohe. À la ọmyịmyị du kọ gung gbịla nyọka yẹ irya da. À hwabwọ la ọ-họ ang ịtịpyọ bala ọ-dọmwụ nyọka họ ẹla pwoku irya nya Ohe Oluhye. À la ịlọng nyọlẹ ká jẹ́ nyori Ohe hịnyọhi hang lẹ. (Eje. 32:1, 2) À kaa ka ọjịra-jịra bala ọ-dọmwụ nyọka mẹ ang ịnyịịla ịlẹ ká wẹẹ jẹ́ jẹ angịkịla. Nyọlẹ ká hu ịlọng ju Ohe ụ-ụbwọ bala o-hu enyi Ohe lẹ wẹẹ, à wẹẹ jẹdịyẹ ụ-ụgbẹyị nya ọhịhị lẹ, à tị ka maga yẹẹyẹẹ nyọka kịnyaa la ọ-jẹdịyẹ ụ-ụwa ịnyịnyị.—Mat. 7:13, 14.
15. Ịyẹ tị́ du ká ang ọjẹ́jẹ bala ọ-kụ irya jwoo ju apyobwuna?
15 Jẹ́ Omyi Ẹla nya Ohe ká kụ irya jwoo. Jaabwọ ká okoji jẹ́-ẹ godayị giri-giri kori kọ da atẹ ka ẹpwụ nya ọpyị kpori-kpori, ahị ka jẹ́-ẹ godayị giri-giri ịnyịnyị kori ká ọmyịmyị nyahị á la ọngịrị ẹ-ẹga nya iJihova. Jaabwọ ká okoji wẹẹ nwà, atẹ nyamwụ kaa rụ ka ẹpwụ nya ọpyị kpori-kpori bala ọ-pyẹ maa gụ olene. Ụka kahị jẹ́ Omyi Ẹla nya Ohe kahị me irya jwoo, ahị kaa ju ọmyịmyị nyahị ọngịrị bala ọ-kaa jẹ́ myị̀myị̀ nyori agbẹyị nyamwụ á há gụ wuu lẹ. (Kol. 2:6, 7) Kụ irya u-uhye nya abwọlẹ ká ẹla ọmẹjẹ, bala ewu ọ-chike nyamwụ da anchẹ nyamwụ ụbwọ lụka onyogo. Ọ-chụ pwokwita, Isikẹlụ ke ụrụ kpẹnẹẹ ụka ká olegu-ẹrụ wẹẹ me ube ịgọgọ ọlẹ kọ yẹ a-arụrụ ori kpẹẹkpẹẹ. Ọyị ọyẹyẹ ọọwa ju Isikẹlụ ọngịrị, ọ tị mẹ ang jẹ́ẹhị u-uhye nya abwọlẹ kahị ka bwu kpa ehile nya iJihova u-uhye nya ịgba ọgbagba ocheri-cheri.d (Isi. 40:1-4; 43:10-12) Ahị ịnyịnyị kaa yé apyobwuna kori kahị kpa ụka nyahị jẹ́ ang ikpori-kpori ịla Omyi Ẹla nya Ohe bala ọ-kụ irya jwaa.
16. Ányị ọkịlẹtụ o-godayị giri-giri à tị́ chewu ke Bob? (Eje Ọnyịịla 112:7)
16 La ọkịlẹtụ o-godayị giri-giri. Adịrahụ iDevidi mẹjẹ nyori ọ́ ka tụụbwọ hi ọháha ọlẹ kọ la ẹ-ẹga nya iJihova ka nyọlẹ kọ yẹkẹẹ: “Ohe Oluhye ee, . . . ọkịlẹtụ nyam dayị giri-giri!” (Eje. 57:7) Ahị ịnyịnyị ka jẹ́-ẹ la ọkịlẹtụ o-godayị giri-giri bala ọ-dahịhile iJihova yẹẹyẹẹ. (Wa Eje Ọnyịịla 112:7.) Kụ ẹhị yẹ abwọlẹ ká ẹlẹwẹ da Bob ọlẹ kahị ya ẹla nyamwụ lalẹ ene ụbwọ wẹẹ. Ụka kị byoo nyori nyị ka ya ịwọ reeji yẹ nyọka chịkpẹẹ kori kị ka baba nyamwụ, ọ wẹ i-ijata nyori kori ká iwe nyọka ya ịwọ ju ọwa nyị́ ka ji aalẹ, ọwa nyị ka rụ bwu ube-utoji ọwẹ ahyaahị. Bob ya ụka ọkịla yẹkẹẹ: “Ḿ họ atịmẹ u-uhye nya ẹla ọlẹ kam ka ya ka, ḿ tị chuko nya ẹlẹhẹ ka ịnyịnyị.”
Kori kahị la ọmyịmyị ọnyọọngịrị, ahị ka jẹ́-ẹ godayị giri-giri ẹ-ẹpwụ nya akama ọnyị myị́ ọnyị (Yẹ ọgba 17)
17. Ẹlịyẹ ahị tị́ ka jẹ́ bwu oja nya Bob? (Yẹ ifoto ịnyịnyị.)
17 Bob jẹ́ godayị giri myị́ chajị ọ cheje neeji tataata nyọka họ ịnyị ene kọ wẹẹ ka ube-utoji lẹ. Họhẹ-họhẹ, ọ la irya nyọka họ ẹla kpụ iJihova ịpyọ. Oheeye, ọ jẹ́ ang u-uhye nya ẹla ọlẹ ká ịBayịbụụ bala apwụ ị-da ịBayịbụụ wụlẹ nyahị ya u-uhye nya ịgọgọ ọlala nya ọhịhị bala ịwọ. Ọhata, ọ jẹ́ myị̀myị̀ nyori ehile nya iJihova ọ-ba jẹ nyị kaa kpa apyobwuna wẹ ọngịnyị ụka wuu. Ahị ịnyịnyị ka jẹ́-ẹ la ọkịlẹtụ o-godayị giri-giri ẹ-ẹpwụ nya akama ọnyị myị́ ọnyị.
ỊBarakị bala angịnyị nyamwụ wẹẹ ku alẹwụ nya iSisẹra la ugbodu ojuju (Yẹ ọgba 18)
18. Ányị oja nya ịBarakị à tị́ ka dahị ụbwọ nyọka dahịhile iJihova? (Yẹ ifoto ọla ẹbẹ nya ọgbanyẹ.)
18 Dahịhile iJihova. Kụ irya nya abwọlẹ ká ịBarakị bwu kụrụ nyọlẹ kọ dahịhile ẹla ọmẹjẹ nya iJihova wẹẹ. Nanana nyori ị́ la akụmada lee ọkpachị ọ-ọpyị nyaa ka, iJihova byoo nyị hu ang nya ẹwụ ta iSisẹra, kọ ri olegbeju nya angịdẹwụ nya ala iKenan ịlẹ kị la ang-abwọ nya ẹwụ yẹẹyẹẹ. (Angị. 5:8) Ọlọmwụ iDibora byi ịBarakị nyị hu ang ka ọkpọọ ọhẹ kaka tọ iSisẹra bala ang ịrụnyẹ iloje-oje ị-kpa dẹwụ nyamwụ ịlẹ kị la 900 mẹ. Ịlẹhị lẹ, ọ ka lujwo ha ala Isirẹlụ nyọka dẹwụ ta angịlẹ kị kpa ang ịrụnyẹ ọ-ọkpọọ ọlịnyị, ịBarakị tị ju ihi nya ẹlẹwẹ. Ụka ká alisoja ịwẹ wẹẹ hireji bwu Ọgbọdọ nya ịTabọ, iJihova họ enyi do ọtụka-ọtụka. Ọọwa ang ị-rụnyẹ nya iSisẹra à wụ ta ịwa lẹ, iJihova à ya ọkụrụ-kụrụ ha ịBarakị lẹlẹ. (Angị. 4:1-7, 10, 13-16) Ụ-ụgbẹyị ọlịnyị-ịnyị, iJihova ka ya ọkụrụ-kụrụ hahị kori kahị dahịhilọọ bala ẹla ọlẹ kọ kaa mẹjẹ́ẹhị bwula angịlẹ kị ku ọmwakpa nyamwụ.—Ehile. 31:6.
CHEJE NYỌKA GODAYỊ GIRI-GIRI KỊNYAA
19. Ịyẹ tị́ du ká tịtọ nyọka godayị giri-giri kịnyaa?
19 Ahị ka baba nyọka kịnyaa la ọ-ma uya nyọka jẹ́-ẹ godayị giri-giri jaabwọ kahị wẹẹ hịhị odehe onyobyi ọlẹ. (1 Tim. 6:11, 12; 2 Pit. 3:17) Ahị ya iwe da ká ọtụpyịpyị, ọ-pịrị ju la ijẹẹhị, irya ọkụkụ nya angịnyị ehe, ẹla ị-hụ angịnyị ahị, bala ang ị-yé ọngịnyị uyawụ a pyịịhị giri-giri ka. (Efe. 4:14) Ọkọkọ nyọọwa, ahị kụ kpọọ, kahị godayị giri-giri ẹ-ẹpwụ nya ụkụrwọ ọlẹ kahị wẹẹ họ ha iJihova bala ọ-ju ihi nya ehile nyamwụ mẹ. Ahị tị baba nyọka jẹ́-ẹ kụ ẹhị yẹ ẹla ẹkpẹ imiiye ịnyịnyị. Ẹ-ẹpwụ nya ang ọjẹ́jẹ ọkịla, ahị ka ya ẹla u-uhye nya abwọlẹ ká iJihova bala iJisọsị ri angịlẹ kahị ka jẹ́-ẹ yẹ gbịla gụgụ wuu ẹ-ẹpwụ nya ẹla ọ-yẹ ẹkpẹ imiiye.
EJE 129 Ahị Ka La Ugbodu Ojuju
a Bwu ụka-ụka nya Adam bala Iivu, Olegu Onyobyi kaa maga nyọka họ ká angịnyị ka chụ ang ọlẹ kọ ri ọnyịịla bala ọtịpyọ ha ịlaa. Ọ tịtọ kahị ka la irya ọlịnyị-ịnyị ẹ-ẹga nya ehile nya iJihova bala ẹ-ẹga nya ẹla ịlẹ wuu ká ogu nyamwụ kaa mẹjẹ́ẹhị. Ang ọjẹ́jẹ ọlẹ ka dahị ụbwọ kahị ka nyẹẹkpẹ da ehile nya iJihova jaabwọ ká alabẹkpẹ nya Olegu Onyobyi kaa họ ka. Ọ ka myịmyị-ị̀ dahị ụbwọ kahị ka cheje la ọngịrị-ọngịrị nyọka ju ihi nya iJihova ụka wuu.
b Nyọka jẹ́ gụ ọọwa u-uhye nya abwọlẹ ká Ọngịnyị nya ịKịrayịsị ka bwu chẹkpẹ ju irya nya Ohe ẹ-ẹga nya ẹla nya ịwọ, yẹ ang ọjẹ́jẹ 39 nya ụpwụ ọlẹ kọ ri Chị Ọkẹkẹnị Gboyi Myị́ Oyi!
c Ka jw.org ká yẹ egbeju nya ẹla ọlẹ kọ ri, “Protect Yourself From Misinformation.”