Adam Bala Iivu Bịrị Ehile nya Ohe

Ẹnẹhẹ ká Iivu juwa ụbwọọmwụ, ilo ọhẹ ya ẹla balọọ. Ọ tọọ wo yẹkẹẹ: ‘Ohe Oluhye byinu nyị ri ugbe nya okoji ọhẹ-lọhẹ ẹ-ẹrụ ọlẹ ka ịnyịlẹhị?’ Iivu wẹ yẹkẹẹ: ‘Ahị ka ri ugbe nya okoji ọnyị myị́ ọnyị myị́, kẹnẹ-kẹnẹ kaka hi ookpokpo ọhẹ. Kori kahị ri ugbe nya okoji ọọwa aalẹ, ahị ka gbu.’ Ọọwa lẹ, ilo ọwẹ à byoo yẹkẹẹ: ‘Ánụ ja gbu ka. Ẹlịlẹhị dọmwụ ri, kori kanụ ri ugbe nyamwụ aalẹ, anụ ka lala Ohe.’ Ọọwa ri ẹlịlẹhị? Ehe, ọnọọkịla ịnyị. Ma Iivu myị jwoo. Jaabwọ ká Iivu wẹẹ mwụụrụ yẹ ugbe nya okoji ọọwa, ịnyịnyị ọ wẹẹ jwoo ẹ-ẹhị gụ olene lẹ. Ọ hyọọ ri lẹ, ọ hi ha Adam lẹlẹ. Adam jẹ́ nyori ịwa nyị ka gbu kori kịịwa nyị́ bịrị ehile nya Ohe. Ma Adam tị ye ri kpọkpọọkpọ.

Nyọlẹ kọ nọ chẹẹ la ahyẹẹnụ ọwọwa, iJihova ya ẹla ta Adam bala Iivu. Ọ taa wo nya ang odudu ọlẹ kị bịrị ehile nyamwụ. Iivu kpụ ilo abyị, Adam ọwa tị kpụ Iivu abyị. Chajị nyọlẹ ká Adam bala Iivu bịrị ehile nya iJihova, ọ kwaa kpehe hi ẹpwụ nya iku ọọwa. Ọ ya alegu-ẹrụ bala oge olila-ila ọhẹ gbe ọnang nya ụwa chajị kị ka jẹ́-ẹ tịrẹkpẹ ka ẹpwụ nyamwụ ẹnẹnẹhẹ kaka.

IJihova ya nyori ọngọlẹ kọ me ọnọọkịla ju Iivu nyị ka yẹ akama ịnyịnyị. Ilo à ya ẹla ta Iivu ịlẹhị ka. IJihova á họ ilo kị ka jẹ́-ẹ ya ẹla ka. Olegu-ẹrụ ọtịpyọ ọhẹ à kpa ilo ọwẹ ya ẹla lẹ. Ọ kpa ijẹẹhị ọwẹ pịrị Iivu ịnyị. Olegu-ẹrụ ọọwa ịị wụrụ nya Olegu Onyobyi lẹ. Ụ-ụwa ị-ịlahị, iJihova ka ta Olegu Onyobyi ayịreji chajị kọ ka jẹ́-ẹ pịrị angịnyị ju ka ẹpwụ nya ang ọtịpyọ ọhọhọ kaka.