Nyọlẹ ká Adam bala Iivu kpehe hi iku nya Idẹn kpá, ị ma anyị lụmẹ-lụmẹ. IKen kọ ri ọnyị ọhọhẹ nyaa ri ọlẹrụ, Ebẹlụ kọ ọnyị oheeye nyaa tị ri ọngọ kpa ịkpịlọ ri.

Ẹnẹhẹ ji ká iKen bala Ebẹlụ hu ang kiliya ha iJihova. À jẹ́ ang ọlẹ ká iya ọkịlaakịla ri? O ri āhị ọlẹ ká ọngịnyị kaa hu ha Ohe. IJihova chị ọkẹkẹnị ju iya ọkịlaakịla nya Ebẹlụ, ma ọ́ tị chị ọkẹkẹnị ju ịnya ịKen ka. Ọọwa du ká iKen ju agbama ọtụka-ọtụka. IJihova da iKen ọna nyori agbama nyamwụ nyị ka kpọọ kaka họ ang ọtịpyọ myị́. Ma iKen á tị ke ụrụ ka.

Ọkọkọ nya ọọwa, iKen byi Ebẹlụ yẹkẹẹ: “Kẹwẹ kahị bajẹ ka ohwodehe chẹẹ mẹ.” Nyọlẹ ká ọngọngọhẹ á juwa taa kaka lẹ, iKen à ya ang mịla ọnyịnamwụ lẹ, ọ nwọọ lẹlẹ. Ányị iJihova à tị́ ka họ u-uhye nya ẹlẹwẹ? IJihova yẹ iKen akama bwula o-kwoo rụ lụrụ-lụrụ hi alugbiyegu nyamwụ. IKen á ka la iwe nyọka tịrẹkpẹ ẹnẹnẹhẹ kaka.

Ẹlẹhẹ ji kahị ka jẹ́ bwu ụwa? Ahị ka dọmwụ nyọka ju agbama myị́ kori ká ang á jẹ ụ-ụgbẹyị ọlẹ kahị yahị guru ka. Kori kahị yẹ nyori agbama ja nwà ẹ-ẹpwụ nyahị—lee kori ká angịkịla á dahị ọna chajị ị yẹ nyori ahị juwa ju agbama—ahị ka nwụhọ i-ijata, kahị ka ma uya kụrụ irya nyahị ene kọ ka yehi la.

Chajị nyọlẹ ká Ebẹlụ la ọháha ẹ-ẹga nya iJihova kọ tị họ ang ọnyịịla ịnyịnyị, iJihova ka kpịtịya nyamwụ ụka wuu. Ohe ka tịrọọ ẹkpẹ wẹ ọhịhị ụka kọ ka yẹ odehe ọlẹ la ịparadayịsị.

Nyọlẹ kọ nọ chẹẹ, angịnyị lụmẹ ám̀ odehe. Angị họ ang ọtịpyọ lẹpwụ nyaa à ju iru gụ lẹ. Alegụ-ẹrụ ịhyẹ e-epwoohe dọmwụ yẹ ka ri angị tịpyọ ịnyịnyị. Ị rụ hi ẹpwa nyaa ọla epwoohe warị wẹ odehe. À jẹ́ ang odudu kị họ ịnyị? Chajị ụka kị hu ugbinyịrọ nya angịnyị ehe kụrụ lẹ, kị ka jẹ́-ẹ ye anyang.

Alegu-ẹrụ bala anyang ịịwa ma anyị. Anyị nyaa ịịwa nwà ka la ọngịrị ọtụka-ọtụka, ị tị kaa kpa ọngịrị nyaa họ angịnyị ọkwọ. Ị kaa họ angịnyị ang ụjụjwọ. IJihova á ya iwe da ala ịtịpyọ ịwẹ kịnyaa pyịyọọ ka. Lẹ, ọ chụ nyọka ta angị tịpyọ ayịreji la ukpenyi.

Ma ọlẹng ọhẹ tị juwa kọ datị. IJihova họ́ọ. Ẹnyị nyamwụ à ri iNuwa lẹ. O ye ahụ, ọ ma anyị alẹng angị ịta ká ẹnyị nyaa ri, ịChẹm, ịHam, bala ịJafẹtị. Ọngọngọọng nyaa tị ye ahụ ịnyịnyị. IJihova byi iNuwa nyị kọ ụmwụ nya enyi ọtụka-ọtụka ọhẹ, chajị ká ọwa bala ugbiyegu nyamwụ ka chịda lụka nya Ukpenyi ọlẹ kọ wẹẹ ka do. Ụmwụ ọọwa lala akpa ọtụka-ọtụka ọlẹ kọ ka jẹ́-ẹ hu u-uhye nya ugbenyi. IJihova byi iNuwa ịnyịnyị nyị kpa iyo ịdatị-datị wẹ ẹpwụ nya ụmwụ ọwẹ chajị kị ka chịda.

INuwa dọmwụ nyọka kọ ụmwụ ọọwa i-ijata. Ọ kpa iNuwa bala ugbiyegu nyamwụ lala ẹka 50 ene kịị jwọọ kọ kpá. Ị kọ ụmwụ ọọwa jaabwọ ká iJihova byaa nyị họ kpangga. Lụka ọwọwa, iNuwa kaa da angịnyị ọna u-uhye nya Ukpenyi ọlẹ kọ wẹẹ ka do. Ma ọngọngọhẹ á ke ụrụ wo lọọ ka.

Ọọwa lẹ, ụka à họ kị ka rụ ka ẹpwụ nya ụmwụ lẹlẹ. Ahị yẹ ang ọlẹ kọ họ ba ọọwa ba wẹẹ.