Kịnyaa La ọ-ka Ju Igu Oriri Nyang Bala IJihova Ọngịrị

Ẹ-ẹpwụ nya ịBayịbụụ ọjẹ́jẹ ọlẹ wuu, à jẹ́ ang lụmẹ-lụmẹ u-uhye nya iJihova. Ang ịlẹ ká jẹ́ du ká la ọháha ẹ-ẹga nyamwụ yẹẹyẹẹ, ọhẹka à dọmwụ hu ịlọng jwoo ụ-ụbwọ bala o-hu enyi Ohe lẹ. Kori ká tị họ ịnyị lẹka, ọhẹka à wẹẹ kụ irya nyọka họ ịnyị lụka o-kpii ị-ịlahị. Ma á ka hwabwọ la ọ-tụ́ ju iJihova chwẹẹ ụka ká hu enyi Ohe ka. À ka jẹ́-ẹ kịnyaa la ọ-tụ́ jwoo chwẹẹ gboyi myị́ oyi. Ụgbẹyị oyina tị́?

1. Ịyẹ tị́ du ká ka kịnyaa la o-ju igu oriri nyang bala iJihova ọngịrị?

Ahị ka họ ụkụrwọ yẹẹyẹẹ nyọka ju igu oriri nyahị bala iJihova ọngịrị. Ịyẹ tị́ du? “Chajị ká ịngịngịhyẹ ọkịla á ka jẹ́-ẹ mwụụhị rụ” hyoo ka. (Ala iHiburu 2:1) Ịyẹ à tị́ ka dahị ụbwọ nyọka kịnyaa la ọ-gbịgba ha iJihova giri-giri? Ahị ka kịnyaa la ẹrụ ọnyịịla ọ-kpa pyẹ la ila ọchịchị bala ọ-mwahị nya agbẹyị ịkịla ịlẹ kahị ka jẹ́-ẹ gbịgba ha iJihova gụ ọọwa. (Wa Ala iFilipayị 3:16.) Ọ-ka gbịgba ha iJihova à há gụ wuu ọ-ọhịhị ẹẹ!—Eje Ọnyịịla 84:10.

2. Ang ịkịla iyina a tị́ ka kịnyaa la ọhọhọ?

Nanana nyori ịBayịbụụ ọjẹ́jẹ ọlẹ wẹẹ ka cheju lẹ, ọhịhị nyang ahụ lala Ọngịnyị nya ịKịrayịsị ka kịnyaa. ỊBayịbụụ ya nyori ahị nyị baba nyọka “hu ọhịhị onyeewe nya Ohe Oluhye dakụrụ.” (Ala Efesọsị 4:23, 24) Jaabwọ ká wẹẹ kịnyaa la ọ-jẹ́ Omyi Ẹla nya Ohe bala ọ-ka ọjịra-jịra, à ka jẹ́ ang inyeewe-inyeewe u-uhye nya Ohe Oluhye bala abwẹla nyamwụ. Mwahị nya agbẹyị ịlẹ á ka jẹ́-ẹ gbịla abwẹla nyamwụ ẹ-ẹpwụ nya ọhịhị nyang. Kịnyaa la ọ-ka nwụ ọhịhị nyang họ chajị ká ẹla nyang ka kpụ iJihova ịpyọ.

3. Ányị iJihova à tị́ ka jẹ́-ẹ dang ụbwọ nyọka tụ́ jwoo chwẹẹ?

ỊBayịbụụ yẹkẹẹ: “Ohe Oluhye . . . ka họ kanụ ka godayị giri-giri la ọngịrị kpọng-kpọng ụ-ụgbẹyị nya ọmyịmyị ọlala nyanụ.” (1 iPita 5:10) Ahị wuu kaa la ọmayẹ nyọka họ ang ịtịpyọ. Ma iJihova ya ang ịlẹ kahị baba hahị nyọka kụrụ ịmayẹ ịịwa. (Eje Ọnyịịla 139:23, 24) Ọ myị ọnụ nyọka ya imyi ọ-kpa họ ang bala ọngịrị ọlẹ ká baba hang nyọka jẹ́-ẹ gbịgba họọ giri-giri.—Wa Ala iFilipayị 2:13.

JẸ́ GỤ ỌỌWA

4. Kịnyaa la o-ya ẹla ta iJihova bala o-ke ụrụ wo lọọ

Abwọ ọrịrị bala ịBayịbụụ ọjẹ́jẹ dang ụbwọ nyọka ri oligu nya iJihova. Ányị ang ịwẹ ọhọhọ à tị́ ka jẹ́-ẹ tụng jwoo chwẹẹ gụ ọọwa?

Wa Eje Ọnyịịla 62:8, kanụ ya ẹla u-uhye nya ịtọ ẹla ọlẹ:

• Nyọka ju igu oriri nyang bala iJihova ọngịrị, ịyẹ a tị́ ka jẹ́-ẹ nwụhọ chajị ká abwọ ọrịrị nyang ka há gụ ọọwa?

Wa Eje Ọnyịịla 1:2, kanụ ya ẹla u-uhye nya ịtọ ẹla ọlẹ:

• Nyọka ju igu oriri nyang bala iJihova ọngịrị, ịyẹ a tị́ ka họ nyọka yé apyobwuna bwu ịBayịbụụ ọjẹ́jẹ nyang gụ ọọwa?

Ányị a tị́ ka bwu yé apyobwuna bwu ịBayịbụụ ọjẹ́jẹ nyang gụ ọọwa? Nyọka yẹ irya ọ-gba kpehe ịhyẹ, yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Nwà Kịlahị-ịlahị ẹ-Ẹpwụ nya ỊBayịbụụ Ọjẹ́jẹ Nyang (5:22)

• Ang iyina lẹpwụ nya irya ọ-gba kpehe ịla ifim ọwẹ a tị́ ka jẹ́-ẹ kpa họ ụkụrwọ?

• Egbeju nya ẹla iyina à tị́ háng á ka jẹ́ ang u-uhye nyaa?

5. Chị ang nya olegu nọ ha ịlọng

Ang ọ-chị nọ ha ịlọng ẹ-ẹpwụ nya ịgba ọgbagba nya iJihova ka dang ụbwọ nyọka tụ́ jwoo chwẹẹ. Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

IFIM: Ụma nya Ọhịhị Ọlẹ kọ Há Gụgụ Wuu (3:31)

• Ẹ-ẹpwụ nya ifim ọwẹ, ányị Cameron à tị́ yé apyobwuna bwula ọ-chị ang nya olegu nọ ha ịlọmwụ?

Ọ-ọng myị́ ọng wuu à ka jẹ́-ẹ mwụ́ rụ ka ọpyị ọkịla kaka kpa ẹrụ ọnyịịla pyẹ ụ-ụwa ka. Ma, à ka jẹ́-ẹ chị ang ịlẹ ká ka wu ọyị myị́ nọ ha ịlọng. Wa Etu 21:5, kanụ kụ ẹhị yẹ ang ịlẹ ká ọngịnyị ka jẹ́-ẹ chị nọ ha ịlọmwụ . . .

• ọọjịra-jịra.

• ẹ-ẹrụ ọnyịịla ọ-kpa pyẹ.

Ányị ẹla ọla ọgba ọwẹ à tị́ ka jẹ́-ẹ dang ụbwọ wu ang ịlẹ ká chị nọ ha ịlọng ọyị?

Ang ịlẹ á ka jẹ́-ẹ chị nọ ha ịlọng

• Ọ-họ ká abwọ oriri nyang ka há gụ ọọwa.

• Ọ-wa ịBayịbụụ bwu ọmwụ ọdada ka cheju.

• Ọ-maga nyọka jẹ́ ọng myị́ ọng wuu ọọjịra-jịra.

• Ọ-dọmwụ nya ịBayịbụụ ọjẹ́jẹ bala ọngịnyị.

• Ọ-chịchịịchị ye ịlahị nya ụgbẹyị lee o-ye ịlahị nya ụgbẹyị kpụrụrụ.

• Kori ká ri ọọnahị ọlẹng, à ka jẹ́-ẹ họ ụkụrwọ jahị da ọ-ka ri ọngọmyẹrụ.

ẸLỊYẸ A TỊ́ JẸ́?

Kịnyaa la ọ-ka ju igu oriri nyang bala iJihova ọngịrị bala ọ-chị ang nya olegu nọ ha ịlọng. Kori ká họ ịnyị, à ka chị ọkẹkẹnị lẹẹlẹẹ bala o-gboyi myị́ oyi!

Ẹlịyẹ A Tị́ Yụbwọ Chị?

• Ịyẹ tị́ du ká ka lahị ọdahile nyori iJihova ka dang ụbwọ nyọka gbịgba họọ pwụ́ ocheju?

• Ányị a tị́ ka bwu ju igu oriri nyang bala iJihova ọngịrị?

• Ányị ang nya olegu ọ-chị nọ ha ịlọng à tị́ ka jẹ́-ẹ dang ụbwọ nyọka tụ́ ju iJihova chwẹẹ?

JẸ́ ANG ỊLẸ DỌỌ U-UHYE

Oyina à tị́ baba ha iJihova gụ, ọ-ka mẹjẹ ụka ookpokpo nyori ahị godayị giri-giri họọ lee ọ-ka gbịgba họọ giri-giri ẹ-ẹpwụ nya ọhịhị nyahị wuu tị́?

Godayị Giri-giri Lala Ebiraham (9:20)

Ọkẹkẹnị nya ọnchẹ nya iJihova ọlẹ kọ dọmwụ godayị kpẹẹkpẹẹ ka gwọọ byi myị́. Yẹ jaabwọ á ka bwu yé ọkẹkẹnị ọọwa tịrẹkpẹ.

Yé Ọkẹkẹnị Tịrẹkpẹ Bwula ỊBayịbụụ Ọjẹ́jẹ Bala Irya ọ-Kụ Jwoo (5:25)

Ányị a tị́ ka bwu chị ang nya olegu nọ ha ịlọng bala ọ-ka waa ọyị?

“Chị Ang nya Olegu Nọ Ha Ịlọng Nyọka Yọgbo Ha Ọngọlẹ kọ Họng” (Ẹpwang ọ-Kụ Gbeji nya ahyẹẹnụ 15 nya Ọya Ọharwiye, 2004)

Ịyẹ tị́ du ká ọ-nwà kịlahị ẹ-ẹpwụ nya ang nya olegu baba? Ányị a tị́ ka bwu ri ọngịnyị ọlịnyị?

“Nwà Kịlahị ẹ-Ẹpwụ nya Ang nya Olegu—‘Ahyẹẹnụ Ọtụka nya IJihova Ju Chwẹẹ Lẹ’” (Ẹpwang ọ-Kụ Gbeji nya ahyẹẹnụ 15 nya Ọya Ọharụ, 2009)