À Dahịhile Ụgbẹyị Ọlẹ ká iJihova kaa Bwu Họ Ang?

1-2. (a) Ịyẹ tị́ du kọ kaa la iru nya angịnyị ujwo nyọka dahịhile alegbeju alẹ? (b) Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

Ọ KAA la iru nya angịnyị ujwo nyọka dahịhile alegbeju alẹ. Ị yẹ nyori ehile bala ala igomenti kaa chewu ke angị kpụdụ bala ọ-la ehe, ma ị kaa da alẹbyahị ụbwọ nwà ka. ỊBayịbụụ yẹkẹẹ: “Angịnyị kpa ọngịrị nyaa yẹ angịnyị ehe aanaa ilekpeleji nyaa ụhị.” (Ọngọ. 8:9) Myịmyị, alegbeju nya igba ogbagba ịhyẹ kaa họ ang ịtịpyọ, dudu ká angịhyẹ myị dahịhile Ohe Oluhye kaka. Lẹ, kori kahị ja mẹ ịBayịbụụ jẹ ọngịnyị, ahị baba nyọka dọọ ụbwọ jẹ́ jaabwọ kọ ka bwu la ahị ọdahile ẹ-ẹga nya iJihova bala angị kpẹhị rịrị ịlẹ Kọ chụ.

² Tị wẹẹ, a-angị wẹẹ jẹ́ ịBayịbụụ kem à baba nyọka jẹ́ jaabwọ kị ka bwu dahịhile iJihova bala ogu nyamwụ ka. Kori kahị dọmwụ kaa gbịgba ha iJihova la ẹka lụmẹ-lụmẹ wẹwẹ, áhị ka ya ẹga da ọmyịmyị ọlẹ kahị la u-uhye nyori ụgbẹyị ọlẹ ká iJihova kaa bwu họ ang a kaa há gụgụ wuu lẹ, ka gụụhị byi ẹnẹnẹhẹ ka. Ụka ọhẹ, iwe-ahụrụ ịlẹ kị ka mẹ ahị ọdahile nyahị ẹ-ẹga nya iJihova yẹ ka chịhị ọgụ myị́. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya iwe-ahụrụ ịta ịlẹ kị ka mẹ ọmyịmyị nyahị yẹ myị́: (1) ụka kahị ja wa oja ịhyẹ bwu ịBayịbụụ, (2) ụka kahị ye ẹla ọmẹjẹ bwu ogu nya iJihova, (3) ụka nya akama ịlịlahị.

DAHỊHILE IJIHOVA ỤKA KA JUWA WA ỊBAYỊBỤỤ

3. Ányị oja ịhyẹ bwu ịBayịbụụ à tị́ ka mẹ ahị ọdahile nyahị ẹ-ẹga nya iJihova yẹ myị́?

³ Ụka kahị juwa wa Omyi Ẹla nya Ohe Oluhye, abwọlẹ kọ bwu họ ẹla ẹ-ẹga nya angịhyẹ bala eje ọchịchị nyamwụ ịhyẹ ka lahị ẹbyẹbyị myị́. Ọ-chụ pwokwita, ụ-ụpwụ nya Ọwawa, ahị yẹ ká iJihova cheje nyori nyị nwụ ọla Isirẹlụ ọhẹ kọ mwụ ịwụ la Ẹnụtụrụ Ọhịnyọ Lụkụrwọ. Ụ-ụpwụ nya ịSamwẹlụ oheeye tị lẹ, ahị jẹ́ nyori ẹka lụmẹ-lụmẹ ẹ-ẹkpẹ nya ẹlẹwẹ, iJihova hịnyọhi ha Adịrahụ iDevidi ụka ọlẹ kọ họ ụya bala ọ-nwụ ọngịnyị. (Ọwa. 15:32, 35; 2 Sam. 12:9, 13) Ahị ka kụ irya myị́ nyori, ‘Ịyẹ tị́ du ká iJihova hịnyọhi ha iDevidi kọ nwụ ọngịnyị bala ọ-họ ụya kọ tị ya nyị nwụ ọlẹng ọkịla ọlẹ kọ lala o-ri ọhọbịrị nyamwụ ri ochiche gụ?’ Nyọka wẹ ịtọ ẹla ọwẹ, kụ ẹhị yẹ ang ịta ịlẹ kahị baba nyọka kpa i-irya ụka kahị juwa wa ịBayịbụụ wẹẹ.

4. Ányị ụpwụ nya Ọmwụ Ọdada 18:20, 21 bala Ehile Ọmada 10:17 à tị́ ju ahị ọdahile nyahị ọngịrị ẹ-ẹga nya eje ọchịchị nya iJihova?

⁴ ỊBayịbụụ-ụ́ kaa ya ẹla myị́ ẹla u-uhye nya oja ịlụwa dodehe ụka wuu ka. Ọ-chụ pwokwita, ahị jẹ́ nyori iDevidi yẹda nyịlẹhị-ịlẹhị bwu ang ọtịpyọ ọlẹ kọ họ. (Eje. 51:2-4) Ma ụma nya ọngịnyị ọlányị ọlẹng ọlẹ kọ bịrị ehile nya Ẹnụtụrụ Ọhịnyọ Lụkụrwọ à tị́ ri? Ẹla ọlẹ kọ họ tọọ olujwo? Ọ bịrị ehile nya iJihova ịhyẹ lụka ọ-kẹkpẹ lẹ? Ọ pwa la o-ke ụrụ wo ọna ọdada lee ọ-nyẹẹkpẹ dọọ ụka nya ọgbanyẹ? ỊBayịbụụ-ụ́ ya kpangga ka. Ahị tị ka jẹ́-ẹ jẹ́ myị̀myị̀ nyori: IJihova-á “họ ang ọtịpyọ ka.” (Ehile. 32:4) Eje ọchịchị nyamwụ kaa kpụnịrọ ẹlịlẹhị wuu, ẹ-ẹla ọlẹ ká angịkịla ya ka. Ọ́ọ yẹ oye-oye ka, lee ọ-kpụnịrọ ịngịngịhyẹ ọlẹ kọọ du ká angịnyị ehe-é yẹ ẹla kpakpa ka lẹ ka. (Wa Ọmwụ Ọdada 18:20, 21; Ehile Ọmada 10:17.) Jaabwọ kahị wẹẹ jẹ́ ang u-uhye nya iJihova bala ehile nyamwụ gụ ọọwa, ịnyịnyị ahị ka dahịhile eje ọchịchị nyamwụ gụ ọọwa lẹ. Kori kahị dọmwụ la ịtọ ẹla ịhyẹ u-uhye nya ang ọlẹ kahị wa bwu ịBayịbụụ kahị tị ye ọwẹwẹ nyaa lẹẹlẹẹ ka wẹwẹ, ahị la ẹla ọjẹ́jẹ nwà u-uhye nya Ohe Oluhye nyahị kpụ ahị ka jẹ́ myị̀myị̀ nyori ọ “kaa họ kpẹẹkpẹẹ ẹ-ẹpwụ nya ang myị́ ang kọ họ.”​—Eje. 145:17.

5. Ányị ọ-la kpẹẹkpẹẹ ka a tịị gu eje ọlala nyahị? (Yẹ akpa ọlẹ kọ ri “Ọkpẹẹkpẹẹ Ọlala Ka kaa Pyị Eje ọ-La Kpakpa Nyahị Anyoko.”)

⁵ Áhị jẹ́-ẹ la eje ọkpakpa ụka wuu ka chajị áhị la kpẹẹkpẹẹ ka. Ohe Oluhye họhị la abwụma nyịlọmwụ, lẹ ọ kaa háahị kị ka họ ang ọnyịịla ẹ-ẹga nya angịnyị wuu. (Ọmwụ. 1:26) Ma, nyọlẹ kahị la kpẹẹkpẹẹ ka lẹ, ahị ka jẹ́-ẹ yẹ ẹla ụ-ụgbẹyị ọlẹ kọ la kpakpa ka, ụka kahị dọmwụ me nyori ahị jẹ́ ẹlịlẹhị oluhye nya ẹla ọọwa wuu. Ọ-chụ pwokwita, kpịtịya jaabwọ ká iJona wẹjẹ kaka ba nyọlẹ ká iJihova cheje nyọka yẹ ahyẹẹrwẹrwa nya ala iNineve. (Jon. 3:10–4:1) Tị kụ irya ju ocheju nya eje ọchịchị nya iJihova ọọwa wẹẹ. Ala iNineve gụ angị ụnọ ohu da ụnọ iwo imiiye (120,000) ịlẹ kị yẹda chịda. Ụka ọhyẹẹkpẹ, iJona à baba nyọka nwụ irya nyamwụ rịrị lẹ, i-iJihova ka.

6. Ịyẹ tị́ du ká iJihova baba nyọka wụlẹ eje ọchịchị nyamwụ jehi ka?

⁶ IJihova-á kpa angịnyị ehe uri nya ọdawụlẹ u-uhye nya eje ọchịchị nyamwụ ka. Ịlẹhị lẹ, lụka ọkẹkpẹ iJihova ya ẹga da họ anchẹ nyamwụ nyọka ya jaabwọ ká eje ọchịchị nyamwụ lee ịlẹ kọ wẹẹ ka chị laa i-irya. (Ọmwụ. 18:25; Jon. 4:2, 3) Ụka ọhẹ ịnyịnyị, ọ kaa wụlẹ eje ọchịchị nyamwụ. (Jon. 4:10, 11) Ọọwa á tị ri yẹkẹẹ, iJihova ka ya ang odudu kọ cheje ụ-ụgbẹyị ọhẹ jehi pyii ka. Ọ́ baba nyọka ye ọnụ bwu ẹga nyahị ene kọ ka họ ịngịngịhyẹ lee ụka kọ họ kpá ka, chajị ọwa à họhị lẹ. ​—Ayị. 40:13, 14; 55:9.

DAHỊHILE IJIHOVA ỤKA KA YE ẸLA ỌMẸJẸ

7. Akama oyina ahị tị́ ka la myị́? Ịyẹ tị́ du?

⁷ Ọ la gbagbịla nyori ahị myị bwu ọkịlẹtụ nyahị wuu nyori iJihova kaa họ ẹla ọkpakpa ụka myị ụka. Ahị tị ka la akama ẹ-ẹga nyọka dahịhile angị kpẹhị rịrị ịlẹ kọ chụ myị́. Ahị ka kụ irya myị́ kori ká angị wẹẹ kpịlahị ogu nya iJihova á kaa ba ẹla ọmẹjẹ nya iJihova jẹ ịnyịlẹhị lee kori kị ja kpa irya nyịlaa họ ẹla. Angịhyẹ ka la irya ọlịịwẹ lụka onyogo ịnyịnyị myị́. Kụ ẹhị yẹ ọ-chụ pwokwita ịla ọgba ọhata wẹẹ. Ọngọhẹ bwu ugbiyegu nya ọlẹng ọlẹ kọ bịrị ehile nya Ẹnụtụrụ Ọhịnyọ Lụkụrwọ ka kụ irya myị́ kori ká iMosisi-í wo ẹla bwu ẹga nya iJihova ịnyịlẹhị ene kị wẹẹ nwụ ọọnaa. Oligu nya Uriya ọla iHiiti ọlẹ ká ahụ nyamwụ họ ụya bala iDevidi tị ka ya ịnyịnyị myị́ nyori iDevidi nyị kpa ọngịrị nya adịrahụ oriri nyamwụ chịlọmwụ da bwu igu. Ẹlịlẹhị ri, áhị ka jẹ́-ẹ ya nyori ahị dahịhile iJihova kori kahị dahịhile angịlẹ ká iJihova lịlọmwụ dahịhile kpụ kọ chụ nyọka kpẹhị rịrị ka lẹ ka.

8. Ẹlịyẹ à tị́ me awụlẹ u-uhye nya abwọlẹ ká ọjịra-jịra kaa bwu họ ang alẹ bala ẹla ọlụpwụ nya Ụkụrwọ nya Alẹrụ 16:4, 5?

⁸ IJihova wẹẹ kpa ogu nyamwụ olodehe ụ-ụgbẹyị alẹ bwula “ọnchẹ ọ-chịla o-hu ọkịlẹtụ ha bala ọngọ jẹ ẹla.” (Mat. 24:45) Lala angị kpẹhị rịrị ogu ịla oyi ọhọhẹ, ọnchẹ ọwẹ kaa kpẹhị rịrị angịnyị nya Ohe odehe wuu bala ọ-mẹ ẹla jẹ angịgbahị nya ọjịra-jịra. (Wa Ụkụrwọ nya Alẹrụ 16:4, 5.) Angịgbahị ịwẹ tị kaa mẹ ụgbẹyị ọọwa jẹ ọọjịra-jịra ịnyịnyị. Ahị ka mẹjẹ nyori ahị dahịhile ụgbẹyị ọlẹ ká iJihova kaa bwu họ ang bwula o-ju ihi nya ẹla ọlẹ ká ogu nyamwụ bala angịgbahị nya ọjịra-jịra kaa mẹjẹ́ẹhị.

9. Ụka oyina ọ tị́ ka lahị ujwo nyọka chẹkpẹ ju eje ọchịchị nya angịgbahị nya ọjịra-jịra myị́? Ịyẹ tị́ du kọọ lịnyị?

⁹ Ụka ọhẹ, ọ ka lahị ujwo nyọka chẹkpẹ ju eje ọchịchị nya angịgbahị nya ọjịra-jịra myị́. Ọ-chụ pwokwita, ọnwụhọ ji ọọjịra-jịra lụmẹ-lụmẹ bala isekut la ẹka ịkpangjẹ. Ẹ-ẹga ịhyẹ, angịgbahị byi aanahị nyị ka ọjịra-jịra ọkịla chajị ká ẹga ọhụhụ ịla Ebe nya Ịpyị-Adịrahụ nyahị ka hi chụwa ododu ka. Kori kị byihi nyị yẹjula ọjịra-jịra onyeewe, ọ ka lahị ujwo nyọka rụ hi aligu bala alugbiyegu nyahị myị́. Olegu ịgọgọ à kaa gu enyi nya ọjịra-jịra ọlẹ ká angịgbahị ka ya ọngọngọọng nya aanahị du ka lẹ? Ehe. Ọọwa tị ka du kọ ka lahị ujwo myị́ nyọka ba ẹla ọlẹ kị ya jẹ. Ma iJihova dahịhile angịgbahị nya ọjịra-jịra nyọka cheje nya ẹla ịlịịwẹ, lẹ ahị baba nyọka dahịhilaa ịnyịnyị.b

10. Jaabwọ ká ụpwụ nya Ala iHiburu 13:17 ya, ịyẹ tị́ du kahị ka chẹkpẹ ju angịgbahị nya ọjịra-jịra?

¹⁰ Ịyẹ tị́ du kahị ka chẹkpẹ ju eje ọchịchị nya angịgbahị nya ọjịra-jịra kori kị dọmwụ ri ịlẹ kahị tịtọ ka wẹwẹ? Chajị kori kahị họ ịnyị, ahị ka dụbwọ ká angịnyị nya Ohe Oluhye ka kịnyaa ẹ-ẹpwụ nya okpunyi bala awụlẹ. (Efe. 4:2, 3) Ọjịra-jịra kaa nwà kịlahị ụka ká ọng myị́ ọng á kpịlọmwụ keji ju ihi nya eje ọchịchị nya angịgbahị. (Wa Ala iHiburu 13:17.) Ọgụgụ wuu, ahị ka mẹjẹ iJihova nyori ahị dahịhilọọ bwula o-ju ihi nya angịlẹ kọọwa ayịdang dahịhile nyọka kpẹhị rịrịịhị.​—Ụkụr. 20:28.

11. Ẹlịyẹ à tị́ ka dahị ụbwọ nyọka ju ahị ọdahile nyahị ọngịrị ẹ-ẹga nya ẹla ọlẹ ká angịgbahị nya ọjịra-jịra kaa mẹjẹ́ẹhị?

¹¹ Ahị ka ju ahị ọdahile nyahị ọngịrị ẹ-ẹga nya ẹla ọlẹ ká angịgbahị nya ọjịra-jịra kaa mẹjẹ́ẹhị bwula ọ-kpịtịya nyori ị kaa bịlẹ olegu ịgọgọ ụka kị ja ya ẹla ịlẹ kị gu ọjịra-jịra. Ị myịmyị kaa kụ ẹhị rige-rige yẹ itiwe nya ehile ịla ịBayịbụụ ịlẹ kị gu ẹla ọọwa bala ẹla ọmẹjẹ ịlẹ ká ogu nya iJihova daa u-uhye nyamwụ. Ị tịtọ kị ka họ ẹla kpụ iJihova ịpyọ bwu ọkịlẹtụ nyaa wuu bala ọ-kpahị ju angịnyị nyamwụ ụ-ụgbẹyị ọlẹ kọ há gụgụ wuu. Alẹng i-ju ọdahịhile ịwẹ jẹ́ nyori Ohe Oluhye juwa yẹ abwọlẹ kị wẹẹ bwu kpahị ju angịnyị nyamwụ. (1 Pit. 5:2, 3) Kụ irya ju ẹla ọlẹ wẹẹ: Angịnyị nya iJihova wẹẹ gbịgba ha Ohe Oluhye nyịlẹhị okpokpo la okpunyi ẹ-ẹpwụ nya odehe ọlẹ ká òja, ịgba ọgbagba bala ẹla nya upe chị angịnyị ebwo hi awụlẹ. Ẹlẹwẹ chịkpẹẹ myị́ chajị nyọlẹ ká iJihova wẹẹ da angịnyị nyamwụ ụbwọ ịnyị!

12. Ẹlịyẹ angịgbahị à tị́ ka kụ irya ju pyii ụka kị ja kụ ẹhị yẹ kori ká ọngịnyị-ị́ yẹda ịnyịlẹhị lẹ?

¹² IJihova ya ụkụrwọ ọkpọnchị nyọka họ ká ọjịra-jịra ka la cheri-cheri ju angịgbahị ụbwọ. Kori ká ọngịnyị nya ịKịrayịsị ọhẹ-ẹ́ họ ọhọbịrị ọtụka, iJihova tịtọ ká angịgbahị ka cheje kori ká ọngọọwa á ka kịnyaa ẹ-ẹpwụ nya ọjịra-jịra. Datị hi ang ịkịla, ị baba nyọka kụ ẹhị yẹ kori ká ẹla ọlẹ ká ọngọọwa họ á tọọ olujwo ịnyịlẹhị. Ọ ka họ lala o-ri ọ yẹda lẹ myị́, ma ẹla ọọwa wọọ ẹjẹ bwu ọkịlẹtụ ịlẹhị? Ọ ja maga nyịlẹhị-ịlẹhị nyọka ma ẹla ọọwa họ kaka? Kori ko ri aligu ịtịpyọ kị kpọọ ụbwọ ka ju ka ẹpwụ nya ẹla ọọwa, ọ nwụlanọ nyọka chebwo hi angịịwa? Angịgbahị nya ọjịra-jịra ka raabwọ ha iJihova, ị ka kụ ẹhị yẹ ẹla ọọwa yẹẹyẹẹ bala ẹla ọlẹ ká ịBayịbụụ ya u-uhye nyamwụ, ị ka myịymyị-ị̀ kụ ẹhị yẹ abwọlẹ ká ọhọbịrị ọọwa la ọngọlẹ kọ họọ. Ọọwa lẹ, ị ka cheje kori ká ọngọ họ ọhọbịrị ọwẹ-ẹ́ ka kịnyaa ẹ-ẹpwụ nya ọjịra-jịra lẹlẹ. Iiwe-ahuru ịhyẹ, ọ kaa baba pyii nyọka gba ọngọọwa kpehe hi ọjịra-jịra.​—1 Kọr. 5:11-13.

13. Irya ọlányị ahị tị́ ka la myị́ kori kị gba oligu olikeje lee olugbiyegu nyahị ọhẹ kpehe hi ọjịra-jịra?

¹³ Ányị ahị ọdahile nyahị ẹ-ẹga nya angịgbahị nya ọjịra-jịra à tị́ ka bwu la ọmayẹ myị́? Kori ká ọngọlẹ kị gba kpehe hi ọjịra-jịra á ri oligu olikeje lee olugbiyegu nyahị ka, ọ ka chịhị kpẹẹ nyọka myị ọnụ ju eje ọchịchị nya angịgbahị nya ọjịra-jịra ọọwa myị́. Ma ahị ka la irya ọdatị myị́ kori ká ọngọọwa-á ri oligu olikeje nyahị. Ahị ka chuko myị́ nyori angịgbahị nyị́ kụ ẹhị yẹ ẹla ọọwa rige-rige ka, lee o-ku irya myị́ kori ká eje ọchịchị ọọwa-á ri ịnya iJihova. Ịyẹ à tị́ ka dahị ụbwọ nyọka la irya ọnyịịla ẹ-ẹga nya eje ọchịchị ọọwa?

14. Ịyẹ à tị́ ka dahị ụbwọ kori ká angịgbahị á cheje nyọka gba oligu lee olugbiyegu nyahị ọhẹ kpehe hi ọjịra-jịra?

¹⁴ Ahị baba nyọka kpịtịya nyori iJihova à yẹga da kị ka gba ọlọhọbịrị kpehe hi ọjịra-jịra lẹ. Ọọwa tị kaa ju apyobwuna ha ọjịra-jịra bala ọ-dọmwụ ju apyobwuna ha ọngọlẹ kọ họ ọhọbịrị ịnyịnyị myị́. Kori kị ya ẹga da ká ọngọ họ ọhọbịrị ọlẹ kọ myị yẹda ka á kịnyaa ẹ-ẹpwụ nya ọjịra-jịra, ọ ka ya abwẹla ọtịpyọ nyamwụ chị kịla angịkịla myị́. (Gal. 5:9) Myịmyị, ọ́ ka jẹ́ jaabwọ ká ọhọbịrị nyamwụ ọwẹ tịpyọ kaka ba ka myị́, ọ́ tị ka yẹ ang odudu ọlẹ kọ baba nyọka nwụ irya ọkụkụ bala abwẹla nyamwụ họ chajị ká iJihova ka yoo myị ka ịnyịnyị myị́. (Ọngọ. 8:11) Ahị ka jẹ́ myị̀myị̀ nyori ụka ká angịgbahị-ị́ ja kụ ẹhị yẹ kori kị ka gba ọlọhọbịrị kpehe hi ọjịra-jịra, ị́ kaa yẹhị da ụkụrwọ nyaa ọọwa bwee ka. Ị jẹ́ nyori ‘ọ-ọngịnyị ehe ị wẹẹ la eje ha ka ma iJihova ịnyị,’ jaabwọ ká angịleje ịla Isirẹlụ ịlụka onyogo jẹ́ ịnyịnyị.​—2 Ego. 19:6, 7.

JAABWỌ KÁ Ọ-DAHỊHILE IJIHOVA LẸẸLẸẸ WẸẸ NWỤLAHỊ NỌ GBE IJUJU

15. Ịyẹ tị́ du kahị baba nyọka dahịhile ẹla ọmẹjẹ nya iJihova lẹẹlẹẹ gụ olene-ene?

¹⁵ Jaabwọ ká ocheju nya odehe ọlẹ wẹẹ ju chwẹẹ gụ ọọwa, ahị baba nyọka dahịhile ụgbẹyị ọlẹ ká iJihova kaa bwu họ ang gụ abwọlẹ kahị kaa họ ene-ene. Ịyẹ tị́ du? Lụka nya akama ọtụka okpelego, ahị ka ye ẹla ọmẹjẹ ọlẹ kọ ka lahị ujwo la ọ-ka wo etu nyamwụ lee ọ-kpa họ ụkụrwọ myị́. O ri ịnyịlẹhị nyori, iJihova-á ka ya ẹla tahị lịlọmwụ kpụrụrụ ka. Ọ chịkpẹẹ kọ ka kpa angị kpẹhị rịrị ịlẹ kọ chụ mẹ ụgbẹyị jẹ́ẹhị. Ụka ọọwa á ka ri ụka ọlẹ kahị ka la ịwẹẹ ọdada u-uhye nya ẹla ọmẹjẹ ọọwa ka lee o-juwa kụ irya nyori, ‘Ẹla ọmẹjẹ ọlẹ bwu ẹga nya iJihova ịlẹhị lee angị kpịlahị à tị́ wẹẹ mẹ irya nyịlaa jẹ?’ À ka dahịhile iJihova bala ogu nyamwụ lụka ọkpọnchị ọwẹ? Irya ọlẹ ka la lẹẹlẹẹ ẹ-ẹga nya ẹla ọmẹjẹ o-bwu ẹga nya angị kpẹhị rịrị ịlẹ ká Ohe chụ ka dang ụbwọ nyọka ye ọwẹwẹ nya ịtọ ẹla ọwẹ. Kori ka kaa dahịhile ẹla ọlẹ kị wẹẹ mẹjẹ́ẹhị alẹ bala o-ju ihi ahyaahị aalẹ, ọ chịkpẹẹ ka ka họ ịnyị lụka nya akama ọtụka okpelego ịnyịnyị.​—Luk. 16:10.

16. Ányị ahị tị́ ka bwu la ọmayẹ ẹ-ẹga nya ọdahịhile eje ọchịchị nya iJihova ị-ịlahị myị́?

¹⁶ O-ri opyii ịnyịnyị kahị ka kụ irya yẹẹyẹẹ u-uhye nya abwọlẹ kahị ka họ ẹ-ẹga nya eje ọchịchị nya iJihova lụka nya ocheju nya odehe onyobyi ọlẹ. Lẹẹlẹẹ, ahị wẹẹ lahị ọdahile nyori iru nya angịlẹ kị gbịgba ha iJihova lẹka tụ́ alugbiyegu nyahị ka cheje nyọka gbịgba họọ ene ká ocheju ka pweji. Ma lụka nya Amagẹdọn, iJihova ka cheje ohyẹẹkpẹ u-uhye nya ijuju nyaa bwula iJisọsị. (Mat. 25:31-33; 2 Tẹs. 1:7-9) Ọ́ ji ụbwọ nyahị nyọka cheje u-uhye nya ọngọlẹ ká iJihova ka yẹ ahyẹẹrwẹrwa bala ọngọlẹ kọ ka yẹ ahyẹẹrwẹrwa ka lẹ ka. (Mat. 25:34, 41, 46) Ahị ka jẹ́-ẹ dahịhile eje ọchịchị nya iJihova, lee ahị tị́ ka hwabwọ la ọ-gbịgba họọ chajị nyọlẹ kahị myị ọnụ ju eje ọchịchị nyamwụ ka? Ọ la gbagbịla nyori, ahị baba nyọka ju ahị ọdahile nyahị ọngịrị ẹ-ẹga nya iJihova lẹẹlẹẹ chajị kahị ka jẹ́-ẹ dahịhilọọ la ọkịlẹtụ nyahị wuu ị-ịlahị.

17. Apyobwuna iyina ahị tị́ ka ye bwu eje ọchịchị nya iJihova lụka ocheju nya odehe ọlẹ?

¹⁷ Kụ irya jaabwọ kọ ka lahị odehe onyeewe ụka kahị ka yẹ ocheju nya eje ọchịchị nya iJihova wẹẹ. Ig̣ba ọgbagba nya ịnịịkịla wuu á ka ji kaka, alọhị ị-họ angịkịla ri lee ala igomenti ịlẹ kị kaa tụ́ angịnyị ba bala ọ-yaa ụhị á ka ji kaka ịnyịnyị. Akama nya ẹdụrụ, okwirichi ọchịchị bala igu ogbugbu á ka jam odehe ọlẹ kaka. Olegu Onyobyi bala alegu inyibyi nyamwụ wuu á ka jẹ́-ẹ họ angịnyị ehe ịngịngịhyẹ kaka ẹ-ẹpwụ nya ẹka ụnọ gbẹgbịlẹ. Ang ịtịpyọ ịlẹ wuu kị jam odehe ọlẹ ọọlajị nya egbeju ọnyọọngịrị nyaa á ka ji kaka ịnyịnyị. (Ọwụ. 20:2, 3) Ọ ka kpụhị ịpyọ yẹẹyẹẹ lụka ọwẹ chajị nyọlẹ kahị dahịhile ụgbẹyị ọlẹ ká iJihova kaa bwu họ ang!

18. Ẹlịyẹ ahị tị́ ka jẹ́ bwu oja nya ala Isirẹlụ ọlụpwụ nya Ọwawa 11:4-6 bala 21:5?

¹⁸ Iwe-ahụrụ ịhyẹ ka ji ọ-ọhịhị olodehe onyeewe ịlẹ kị ka mẹ ahị ọdahile nyahị yẹ myị́ ẹ-ẹga nya ụgbẹyị ọlẹ ká iJihova kaa bwu họ ang? Kụ ẹhị yẹ ọ-chụ pwokwita nya ẹla ọlẹ kọ họ ahyaahị nyọlẹ ká Ohe gba ala Isirẹlụ kpehe bwu Ijipiti kpá wẹẹ. Angịhyẹ nyaa dọmwụ nyọka mwala ya nyọlẹ ká iwo nya ang iriri ịlẹ kị kaa ri ụ-ụwa waa, ịmána ọlẹ ká iJihova ya haa á dọmwụ myaa lẹhị kpongkpong ka. (Wa Ọwawa 11:4-6; 21:5.) Ahị ka la irya ụma ọlịịwẹ myị́ ụka ká akama ọtụka okpelego á chịpwụrụ kpá? Áhị jẹ́ jaabwọ ká ụkụrwọ nyọka họ ká odehe ka la cheri-cheri bala ọ-yọọ da ka ri ịparadayịsị ka la kpangga lẹka. Ọ chịkpẹẹ ká ụkụrwọ ka lụmẹ nyọka họ, ọhịhị-ị́ tị ka chịkpẹẹ ịnyị bwu ọmwụ ọdada ka myị́ ịnyịnyị. Ahị ka mwala ya u-uhye nya ang ịlẹ ká iJihova ka ya hahị ụka ọọwa? Ẹlịlẹhị ri: Kori ká ang ịlẹ ká iJihova wẹẹ họ hahị lẹẹlẹẹ á myịhị lẹhị aalẹ, ịlẹ kọ ka ya hahị lụka ọwẹ ka myịhị lẹhị yẹẹyẹẹ ịnyịnyị.

19. Ahị́ nya ẹla ịkpọnchị iyina a tị́ jẹ́ bwu ang ọjẹ́jẹ ọlẹ?

¹⁹ Ụgbẹyị ọlẹ ká iJihova kaa bwu họ ang à kaa há gụ ụka wuu lẹ. Ahị baba kahị ka la ọ-jẹ́ myị̀myị̀ u-uhye nyọọwa. Ahị myịmyị baba nyọka dahịhile angịlẹ ká iJihova lịlọmwụ dahịhile nyọka họ ẹla nyamwụ. A deeri nya ẹla ọlẹ ká iJihova kpa Ayịsaya ọlọmwụ nyamwụ da ẹnẹnẹhẹ ka: “Anụ ka ye ọngịrị bwula ọ-kụ kem bala ọ-dahịhilem.”​—Ayị. 30:15, NW.