Ọmyịmyị—Abwụma Ọlẹ kọ kaa Ya Ọngịrị Ha Ọngịnyị
ỌMYỊMYỊ kaa ya ọngịrị ọtụka-ọtụka hahị. Ọ-chụ pwokwita, nanana nyori Olegu Onyobyi tịtọ nyọka ta igu oriri nyahị bala iJihova ayịreji, ọmyịmyị kaa dahị ụbwọ nyọka “tụ ịnmọ ilila-lila nya ịmayẹ inyibyi nya Ohe Onyobyi kịnyaa” hi ịlọhị. (Efe. 6:16) Bwula ọmyịmyị ọlala, ahị ka jẹ́-ẹ bọhụ ẹ-ẹpwụ nya akama ịlẹ kị lụmẹ lala ọgbọdọ. IJisọsị byi angịjụgbẹyị nyamwụ yẹkẹẹ: “Ó-ri ká ọmyịmyị ọlẹpwụ nyanụ á lala ẹjẹ nya okoji ọlẹ kị wụrụ ịmọsịtadị la myị́ lẹ aalẹ, anụ ka la ọngịrị byi ọgbọdọ ọtụka-ọtụka ọlẹ kanụ wẹẹ yẹ, yẹkẹẹ, ‘Ahụ ọgbọdọ ọwẹ, mwụ rụ bwu ẹgẹlẹ, ká kpa ịlọng kele ka ẹga ọlaanyị mẹ!’ aalẹ, ọgbọdọ ọọwa ka mwụ rụ kele ịnyịlẹhị lẹ.” (Mat. 17:20) Chajị nyọlẹ ká ọmyịmyị ka jẹ́-ẹ ju igu oriri nyahị bala iJihova ọngịrị, ọ baba kahị ka tọ ịlọhị ịtọ ẹla ịlẹ: Ịyẹ à tị́ ri ọmyịmyị? Ụgbẹyị oyina ẹla ọlọkịlẹtụ nyahị à tịị bwu gu ọmyịmyị nyahị? Ányị ahị tị́ ka bwu ju ọmyịmyị nyahị ọngịrị? Ahị tị́ ka la ọmyịmyị ẹ-ẹga nya owo?—Rom. 4:3.
ỊYẸ À TỊ́ RI ỌMYỊMYỊ?
Ọmyịmyị á ri ọ-ka myị ọnụ ju ẹla ọlẹ ká ụpwụ ịgọgọ ya kem ka, chajị “alegu inyibyi myị ịnyịnyị yẹkẹẹ, Ohe Oluhye nyị juwa ịnyịlẹhị, du kị dọmwụ kaa juhi nya Ohe Oluhye, juwa hụ́ kpákpakpa.” (Jem. 2:19) Ịyẹ à tị́ ri ọmyịmyị tịng tị mẹ?
Jaabwọ kahị kaa dahịhile nyori ahị ọpyẹpyẹ bala odu ohihi nyị ka ji pyii wẹẹ, ịnyịnyị ahị dahịhile nyori ẹla ọlọnụ nya Ohe Oluhye nyị kaa họ jịra pyii lẹ
Ụpwụ ịgọgọ ya nyori ọmyịmyị nyị la ụpa imiiye. Ọhọhẹ, “ọmyịmyị ọlala ri ọ-jẹ́ myịmyị . . . yẹkẹẹ, ang ịlẹ wuu kahị juwa ya ẹhị rịrị gbe lẹ, ị juwa hahị ịnyịlẹhị lẹ.” (Hib. 11:1a) Kori ká la ọmyịmyị, à ka la ọ-jẹ́ myịmyị nyori, ẹla myị́ ẹla ọlẹ ká iJihova ya nyị ri ịnyịlẹhị, nyị tị ka họ jịra. Ọ-chụ pwokwita, iJihova byi ala Ịsịrẹlụ yẹkẹẹ: ‘Ó ri ká iro ọlẹ kam nwa ta odu ohihi bala ahị ọpyẹpyẹ á bịrị ọlẹ ká odu ohihi bala ahị ọpyẹpyẹ á ka ji ụka nyaa kaka lẹ, ọọwa kẹnẹ-kẹnẹ iro ọlẹ kam nwa ta iDevidi ọnchẹ nyam . . . à ka bịrị lẹlẹ.’ (Jer. 33:20, 21) À juhi nyori, ẹnụ á ka kpehe lụtụrụ bala ọ-rụ byi lobyi pyii ka ẹnẹnẹhẹ lẹ? Kori ká la ịwẹẹ ọdada u-uhye nya ehile ịlẹ kị kaa ju ọmwụ nya odu ohihi bala ahị ọpyẹpyẹ ka, ọ chịla ká ka da ọngọlẹ kọ ya ehile ịịwa yeji ịwẹẹ u-uhye nya ọnụ ọmyịmyị nyamwụ? Ehe!—Ayị. 55:10, 11; Mat. 5:18.
Oheeye, ọmyịmyị ri “ọ-jẹ́ myịmyị ọkpangga yẹkẹẹ, ang ịlẹ ká ẹhị nyahị á yẹyẹ lẹka wẹ lẹ, ị juwa hahị ịnyịlẹhị.” Ọmyịmyị ri ang ẹjẹẹ ọlẹ kọ du ká jẹ́ myịmyị nyori ang ịlẹ ká yẹ lẹhị nyang ka, ji ịnyịlẹhị. (Hib. 11:1b.) Ányị ọ tị́ ka bwu lịnyị? Ọhẹka onjwo ochiche ọhẹ tọng wo yẹkẹẹ, ‘Ányị a tị́ bwu jẹ́ nyori ọhụ ji?’ Ányị a tị́ ka wẹ? Nanana nyori á kpẹhị nyang yẹ ọhụ ẹnẹnẹhẹ lẹka, à ka jẹ́-ẹ kpa ang ịlẹ kị mẹjẹ nyori ọhụ ji ịnyịlẹhị, wọọ ịtọ ẹla—ang lala ịhụ ọdada, ang ịlẹ ká igbachịwụ kaa họ, bala ang ịkịla. Kori ká ọnyị ochiche ọọwa á la ọ-jẹ́ myịmyị u-uhye nya ang ẹjẹẹ ịwẹ lẹ, ọ ka myị ọnụ nyori ang ịlẹ kọ yẹ lẹhị ka, nyị ji ịnyịlẹhị lẹlẹ. Ịnyịnyị ọmyịmyị à kaa kpụnịrọ ang ịlẹ kahị jẹ́ myị̀myị̀ lẹ.—Rom. 1:20.
Ọ BABA KÁ ẸLỊLẸHỊ KA HÁAHỊ KA ỌKỊLẸTỤ
Nyọlẹ ká ọmyịmyị kpụnịrọ ẹla ọlẹ ká ọngịnyị jẹ́ myịmyị wẹẹ, ọngịnyị ka “jẹ́ ẹla nya ịlẹhị . . . yẹẹyẹẹ” ene kọ ka la ọmyịmyị myị́. (1 Tim. 2:4) Ọ́ tị ba ọ-ọwẹ ka. ỊPọlụ ọngọmyẹrụ da yẹkẹẹ: “Ọmyịmyị ọlala [kaa bwu] ọkịlẹtụ nyahị.” (Rom. 10:10) Ọngịnyị á ka myị ju ẹla nya ịlẹhị ị-ịwẹ kem ka, ọ ka hwoo nya ang o-ju apyobwuna. Ọọwa kem, à ka gwoo gbịla nyọka la ọmyịmyị, lee ọ-kpa ẹla nya ịlẹhị họ ụkụrwọ lẹ. (Jem. 2:20) Ọngọnyị kọ hu ẹla nya ịlẹhị nya ang o-ju apyobwuna ka, kori kọ dọmwụ yẹ ang ẹjẹẹ wẹwẹ, ọ́ ka ye myị ka, chajị nya ẹla ịlẹ kọ kpa ọ-ọkịlẹtụ ene lee chajị ọ tịtọ nyọka họ ang ọlẹ kọ họ́ọ. (2 Pit. 3:3, 4; Jud. 18) Ịnyị ọ la lụka onyogo lẹ, angịnyị ịlẹ wuu kị yẹ akụrwọ ẹbyẹbyị à la ọmyịmyị ka. (Ọwa. 14:11; Jọn. 12:37) Olegu ịgọgọ kaa ya ọmyịmyị ha angịlẹ ká ẹla nya ịlẹhị há, ká ọnọọkịla tị waa ẹjẹ.—Gal. 5:22; 2 Tẹs. 2:10, 11.
JAABWỌ KÁ IDEVIDI BWU LA ỌMYỊMYỊ
IDevidi juwa ẹ-ẹpwụ nya angịhyẹ ịlẹ ká ọmyịmyị nyaa la ọngịrị yẹẹyẹẹ. (Hib. 11:32, 33) Ma, ọ-ọng myị́ ọng ugbiyegu nya iDevidi à la ọmyịmyị ọlịnyị ka. Ọ-chụ pwokwita, ụka ọhẹ juwa ká Eliyabụ ọnyịnịna ọgbahị nya iDevidi yalibyi tọọ nyọlẹ kọ wụ́ ẹjẹ u-uhye nya ọnụ ọchịchị nya iGolayatị, lẹ ọ́ mẹ ọmyịmyị jẹ kpong-kpong ka. (1 Sam. 17:26-28) Ị́ ma ọngọngọhẹ la ọmyịmyị ka, ọ́ tị chịkpẹẹ nya ọngịnyị ọ-ka ri ugu nya ọmyịmyị bwu ẹga nya adamwụ bala ịnamwụ ka. Lẹ, iDevidi la ọmyịmyị chajị nya igu oriri nyamwụ bala iJihova ịnyị.
Ẹ-ẹpwụ nya ụpwụ nya Eje Ọnyịịla egbeju 27, iDevidi ya jaabwọ kọ bwu la ọmyịmyị ọnyọọngịrị ọlịịwẹ. (Ọgba 1) IDevidi kụ irya kpori-kpori u-uhye nya ẹla ịlẹ kị họ tọọ lụka ọkẹkpẹ bala ang ọlẹ ká iJihova họ aluji nyamwụ. (Ọgba 2, 3) Ịgba ọgbagba nya iJihova myọọ lẹhị yẹẹyẹẹ. (Ọgba 4) IDevidi gbịgba ha Ohe Oluhye bala angịkịla ịlẹ kị myị la Ohe, u-ube ịgọgọ. (Ọgba 6) Ọ ka ẹga nya iJihova bwula abwọ ọrịrị. (Ọgba 7, 8) IDevidi tịtọ ká iJihova ka mẹjọ́ọ ang ọlẹ kọ ka họ. (Ọgba 11) Ọmyịmyị ri ang o-ju apyobwuna ha iDevidi du kọ tọ wo yẹkẹẹ: “Ale m tị́ ka ji kori kam la ọmyịmyị ka?”—Ọgba 13, NW.
JAABWỌ Á KA BWU JU ỌMYỊMYỊ NYANG ỌNGỊRỊ
À ka jẹ́-ẹ la ọmyịmyị lala iDevidi kori ká la irya ọkụkụ bala abwẹla ịlẹ ká ụpwụ nya Eje Ọnyịịla egbeju 27 chabwọ. Nyọlẹ ká ọmyịmyị kaa kpụnịrọ ẹla ọjẹ́jẹ ọkpẹẹkpẹẹ wẹẹ, jaabwọ ká wẹẹ jẹ́ Omyi Ẹla nya Ohe Oluhye bala apwụ ị-da ịBayịbụụ wụlẹ nyahị gụ ọwọwa, ịnyị ọ ka chịkpẹẹ hang nyọka la abwụma nya olegu ịgọgọ nya Ohe ọwẹ ẹẹ. (Eje 1:2, 3) Ụka nya ang ọjẹ́jẹ, áà dọhụ pịlẹ nyọka kụ irya kpori-kpori ju ang ọlẹ ká wẹẹ jẹ́. Irya ọ-kụ kpori-kpori lala ọpyị ọlẹ ká ang ọ-myị ọngịnyị lẹhị kaa bwu kpehe. Chajị nyọlẹ ká ẹla nya iJihova myịng lẹhị, ọ ka háng nyọka mẹ ọmyịmyị nyang jẹ bwula ọgbịgba họọ ọọjịra-jịra bala ọ-ya ẹla u-uhye nya ẹhị ọrịrịị-rịrị nyang ju angịkịla. (Hib. 10:23-25) Ahị kaa mẹ ọmyịmyị jẹ ịnyịnyị ụka kahị ‘juwa raabwọ bala ọ-la ọkịlẹtụ ọ-chị́ pyẹpyẹ kpongkpong ka.’ (Luk. 18:1-8) Lẹ, “raabwọ ha Ohe Oluhye ụka myị́ ụka wuu” bala ọ-dahịhile nyori ọ kpahị jung. (1 Tẹs. 5:17; 1 Pit. 5:7) Ọmyịmyị kaa dahị ụbwọ nyọka họ ang ọnyịịla, ụka kahị tị họ ang ọnyịịla, ọmyịmyị nyahị kaa la ọngịrị gụ ọwọwa.—Jem. 2:22.
LA ỌMYỊMYỊ Ẹ-ẸGA NYA IJISỌSỊ
La obyi ọlẹ kọ kam ene ká iJisọsị gbu, ọ byi angịjụgbẹyị nyamwụ yẹkẹẹ: “Anụ myị la Ohe Oluhye la ọkịlẹtụ ookpokpo. Kanụ myị lam ịnyịnyị mẹ.” (Jọn. 14:1) Lẹ, ọ́ ba a-ahị ọ-ka la ọmyịmyị ẹ-ẹga nya iJihova kem ka, ahị baba nyọka la ọmyịmyị ẹ-ẹga nya iJisọsị ịnyịnyị. Ányị ahị tị́ ka bwu la ọmyịmyị ẹ-ẹga nya iJisọsị? Ahị yẹ agbẹyị ịta wẹẹ.
Ịyẹ à tị́ ri etu nyọka la ọmyịmyị ẹ-ẹga nya iJisọsị?
Ọhọhẹ, yẹ āhị nya ọ-ra kpehe lala ang ọlẹ ká Ohe Oluhye ya hang ahụ kpangga. ỊPọlụ ọngọmyẹrụ nya ịKịrayịsị yẹkẹẹ: “Ọhịhị nyam ọlẹ kam lẹẹ hịhị ọdẹhẹ ọlẹ lẹ, m jam lọọ bwula ẹhị ọ-da hile ịKịrayịsị Ọnyẹwẹ nya Ohe Oluhye, ọngọlẹ kam há lụmẹ gbee kọọ hu ịlọmwụ kpa kaka kịla iya chajị nyam.” (Gal. 2:20) Kori ká la ọmyịmyị ẹ-ẹga nya iJisọsị, à ka myị ọnụ nyori āhị nya ọ-ra kpehe ka jẹ́-ẹ dang ahụ kpangga ụbwọ, nyori āhị ọwẹ à du ká Ohe ka jẹ́-ẹ hịnyọhi ịhọbịrị nyang hang lẹ, nyori ọwa à ya ẹhị ọrịrịị-rịrị nya ọhịhị ọmyịmyị-ka hang lẹ, bala o-ri āhị ọwẹ ri ụgbẹyị ọlẹ ká Ohe Oluhye mẹ ọháha nyamwụ jẹ́ng gụgụ wuu. (Rom. 8:32, 38, 39; Efe. 1:7) Ọwẹ ka dang ụbwọ nyọka kpụ ịlọng abyị lee ọ-la irya ọtịpyọ u-uhye nya ịlọng ka.—2 Tẹs. 2:16, 17.
Oheeye, tụ́ ju iJihova chwẹẹ ẹ-ẹpwụ nya abwọ ọrịrị, ọlẹ kọ chịkpẹẹ bwula iya ọkịlaakịla nya iJisọsị. Bwula āhị nya ọ-ra kpehe, ahị ka jẹ́-ẹ raabwọ ha iJihova la o-juhi nya ịngịngịhyẹ ka, “chajị kahị ka bwula ahyẹẹrwẹrwa bala ọnahị nya Ohe Oluhye ye ụbwọ ọdada bwu ẹga nyamwụ lụka ọbaba ha ịlọhị.” (Hib. 4:15, 16; 10:19-22) Ụka kahị la ọmayẹ nyọka họ ọhọbịrị, abwọ ọrịrị kaa juhi ọngịrị nyọka kụrụ.—Luk. 22:40.
Ọhata, ju iJisọsị ihi. ỊJọn ọngọmyẹrụ yẹkẹẹ: “Ọng myị́ ọng ọlẹ kọ la ọmyịmyị ẹ-ẹga nya Ọnyị nya Ohe Oluhye lẹ aalẹ, ọ la ọhịhị ọmyịmyị-ka lẹ; ọng myị́ ọng ọlẹ kọ tị ju ihi nya Ọnyị nya Ohe Oluhye ka, á ka jẹ́-ẹ yẹ ọhịhị ọmyịmyị-ka ẹ-ẹhị kaka. Ma, agbama nya Ohe Oluhye ka juwa tọọ pyịyọọ.” (Jọn. 3:36, NW ) À yẹ nyori ịJọn chị ọmyịmyị ọlala ebwo hi ihi ojuju ka? Lẹ, kori ká ju ihi nya iJisọsị lẹ aalẹ, à la ọmyịmyị ẹ-ẹga nyamwụ lẹ. À ka ju ihi nya iJisọsị bwula ọ-ba “ehile nya ịKịrayịsị” jẹ. (Gal. 6:2) À ka ju ihi nya iJisọsị ịnyịnyị kori ká kpa ọmẹjẹ ọlẹ kọọ ya hahị bwu ẹga nya “ọnchẹ ọ-chịla o-hu ọkịlẹtụ ha bala ọngọ jẹ́ ẹla” họ ụkụrwọ. (Mat. 24:45) Bwula o-ju ihi nya iJisọsị, ahị ka la ọngịrị nyọka bọhụ ẹ-ẹpwụ nya akama ịlẹ kị nyọọngịrị lala ọhụ ọtụka.—Luk. 6:47, 48.
“ANỤ . . . KPA AWỤLẸ NWA KỊLAHỊ-ỊLAHỊ Ẹ-ẸPWỤ NYA ẸRỤ ỌNYỊỊLA ỌLỊGỌGỌ NYA OHE OLUHYE ỌLẸ KANỤ MYỊ LA”
Ụka ọhẹ, ọlẹng ọhẹ byi iJisọsị gboo yẹkẹẹ: “M myị lang lẹ, Ọngọlahị! Da ọmyịmyị ọlala gbuu-ka nyam ụbwọ mẹ!” (Mak. 9:24) Ọlẹng ọwẹ la ọmyịmyị pwụ ẹgẹhẹ, ma ọ kpa ịlọmwụ keji bala ọ-jẹ́ nyori ọ baba nya ọmyịmyị gụ ọwọwa. Ahị wuu ịnyịnyị ka jẹ́-ẹ ju ọmyịmyị nyahị ọngịrị lẹẹlẹẹ. Jaabwọ kahị yẹ-ẹ̀ wẹ, ahị kaa ju ọmyịmyị nyahị ọngịrị bwula ọ-jẹ́ Omyi Ẹla nya Ohe Oluhye bala ọ-kụ irya jwoo kpori-kpori. Ọọwa ka du ká ẹla nya iJihova ka myịhị lẹhị. Ọmyịmyị nyahị ka la ọngịrị gụ ọọwa kori káahị bala aanahị ịkịla á gbịgba ha iJihova, ya ẹla ju angịkịla chajị nya ẹhị ọrịrịị-rịrị nyahị, bala o-juwa raabwọ ụka myị́ ụka. Kori kahị ju ọmyịmyị nyahị ọngịrị, ahị ka ye ahị ọwawa ọlẹ kọ gụgụ wuu. Omyi Ẹla nya Ohe Oluhye byihi yẹkẹẹ: “Anụ aligu nyam ịlẹ kanụ hám, anụ juwa maga kanụ kpa awụlẹ nwa kịlahị-ịlahị ẹ-ẹpwụ nya ẹrụ ọnyịịla ọlịgọgọ nya Ohe Oluhye ọlẹ kanụ myị la . . . kanụ godayị giri-giri ẹ-ẹpwụ nya ọháha ọlala nya Ohe Oluhye pyịyọọ . . . mẹ.”—Jud. 20, 21.