Pọl Kpai Timoti

Timoti ch’ọnẹkẹlẹ agbadufu ka ki d’ujeju abudọ ki dẹ Listra. Ata-wñ ch’ẹnẹ Grik, iye-wñ la ch’ẹnẹ Ju. Kw’ẹgba ki Timoti ch’imọtọ oñ iye-wñ k’odu-wñ kọ Yunis kpai oukwọ-wñ k’odu-wñ kọ Lọis chanẹ ekọ Timọti lugbo Jihofa kwo-i.

Ẹgba onukeji ki Pọl lulẹ uchẹnyọ ejẹ laale, oñ i li timoti kak i ch’ẹnẹ ki afẹdo amọmaye, i la ach’aludu ki neke che ki ch’atẹko ma. Taki Pọl ka ñwu Timoti ki t’owñ ubi ef’ulẹ-wñ. Pọl la chanẹ ekọ alu ki neke na takoya uchẹnyọ kpai alu ki neke na kọ amonẹ ẹñwu ki defu ọla Ọjọ nyọnyọ.

Afu ki afọ la na nẹ Pọl kpai Timoti le ugbo duu ku ma lo. Anẹ ọjọ ka, Pọl li anẹ ego alu k’ọnẹkẹlẹ ka ach’ologwu b’ọ ki wa Masẹdonia todu ki wa ch’atẹko ma. Taki Pọl, Timoti, Sailas kpai Luku le t’ọmọ lẹ nya takoya uchẹnyọ, ku ma la ñọ neke k’amujeju abudọ nyanẹ ọmọ.

Ef’ewo Masẹdonia ka ku ma dọ Tẹsalonaika, ojile amonẹ mu rida t’ẹnẹ Kraist ọmọ. Amaa, uchẹ ka ef’amiJu chanẹ ech’ulaka Pọl kpai abo ku ma t’ọ ubi wa. Taku ma f’abo ku ma achegidi ko l’abo Kraist daka, ma la m’uma ko le t’ugbo am’onu ef’ewo lẹ, ma la ñọ na kpogwu kakaini: ‘Abo ki dẹ-i ch’ẹnọla ki ach’agwunyu ọda gọmẹnt Rom.’ Alu ki Pọl kpai Timoti li kaki e-lẹ ad’ọlai ma t’ukwu, taku ma ra kw’ewo lẹ le ti Bẹria odu.

Ẹdọ abo ki di Bẹria chẹ bọ nyọnyọ alu ku ma gb’ọla uchẹnyọ, t’abo Grik kpai amiJu. Ma kẹdọn’ọla lẹ, ma la chanẹ erida t’ẹnẹ Kraist. Amaa, alu k’uchẹ amiJu ka ku ma wa kwi Tẹsẹlonaika chanẹ ech’ihianyi, Pọl kw’ọmọ lẹ le ti Atẹns. Timoti kpai Sailas muda gwugwu Bẹria ad’ugbẹdọ ñwu amọmaye ki d’ọmọ. I gbanẹ n, Pọl kpẹ Timoti dabi ti Tẹsẹlonaika ki nya ch’atẹko amọmaye ki d’ọmọ ku ma neke n’ẹdẹgbo alu k’amonẹ akobọ ma. Ubilẹ, Pọl dabi kpẹ Timọti lo t’amujeju abudọ ojoji ojoji omunẹ ki nya d’ugbẹdọ ñwu ma.

Pọl ka ñwu Timoti kakni: ‘Ma anya doli ẹnẹ duu ki atene ki rẹ Jihofa.’ Timoti onugo dejudo am’ihianyi ojoji ojoji todu ki ar’Ọjọ. Ma kob’ọ, ma la du tef’unyi uga todu ukẹdọno-wñ. Amaa, ẹdọ Timoti chẹ bọ alu ki neke du tejugede ñwu amonẹ kak i gwọnyu Jihofa kpakaa.

Pọl ka ñwu abo Filipai kakini: ‘Na anya akpẹ Timoti ru mẹ. I akọ mẹ alu ku mẹ ale ef’ochochi, i la ñọ kọ mẹ ọna ku mẹ atakoya uchẹnyọ nyọnyọ.’ Pọl che ma kak i neke kẹdọno Timoti. Owñ kpai Timoti ch’onukwu, ma la ch’ukọlọ dama ọdọ wewe.