Adide Unyi Uga F’ochochi Kọchẹ

Ef’ewo Filipai, i n’adu onobulẹ ka k’afu ebili defu-wñ. Ebili dọmọ ad’onobulẹ lẹ chekwu lefu ek’ẹñwu ki anya che ejọgba, e-lẹ la jẹñwu an’ọkọ wa ñwu am’ondu-wñ. Ẹgba ki Pọl kpai Sailas w’efewo Filipai, onobulẹ lẹ na t’uma ubi ugbo du ku ma alo ọjọ wewe. Ebili lẹ jẹñwu onobulẹ lẹ kpogwu kakini: “Abo ki dẹ-i ch’ama adu Ọjọ dẹ.” Taki Pọl ka ñwu ebili lẹ kakini: ‘Efu odu Jisọs, kwefu onobule-i dufu!’ Ebili lẹ la kwefu onobulẹ lẹ dufu.

Ẹdọ am’ondu onobulẹ lẹ mu kpabiẹ nyọnyọ alu ku ma f’u li kaki ma nya n’ọkọ kw’ọla onobulẹ lẹ gẹ n. Ma fi Pọl kpai Sailas mu, ma la f’uma fa le t’ọgba ab’ọda, ma la na kakini: ‘Abokẹlẹ-i leb’ọda n, ma la ad’ihianyi ñwu amonẹ ef’ewo chakaa!’ Am’akajọ lẹ la jẹñwu ma fi Pọl kpai Sailas gwo, ma la mu ma ko rọ jef’unyi uga. Am’adide mu ma ko rọ j’ejefu ugbo ki chẹ chubi tule, ma la m’agba ko nyu ma.

Pọl kpai Sailas na keli jẹnyu ñwu Jehofa, abomunẹ ku ma la jef’unyi uga ọmọ la na neti. Achigili, odu iñaliña, anẹ chanẹ emiejo nana, Oñ unyi uga lẹ chanẹ ega, ugbo duu la chanẹ emiejo. Am’ọna unyi uga lẹ chakaa mu bi, am’agba kpai am’odo ku ma du t’ẹrẹ abo ku ma konyu ef’unyi uga lẹ chaaka mu tu. Adide unyi uga lẹ ra lo t’ejefu unyi uga owñ i f’u li kak am’ọna lẹ chakaa chẹ bi jọ. I neju kakini abo ku ma j’unyi uga lẹ chakaa ra le mẹ, tak i m’ugbada-wñ wọ ki d’ọla-wñ kpa.

Ẹrẹrẹ lẹ, Pọl d’omu nyatẹ kakini: ‘Ẹ kp’ọla wẹ no! Ọchaka wa j’emi!’ Oñ adide unyi uga lẹ ra lo t’ejefu, oñ i kpo banẹ ma ọgba Pọl kpai Sailas. Oñ i t’uma ene kakini: “Ẹñwu i dukpẹ k’u na che taku ma fu mi jadu?” Oñ ma dohi ñwu kakini: ‘Uwẹ kp’abo unyi wẹ dukpẹ ku mẹ m’ẹdọ kono Jisọs.’ Ubilẹ, Pọl kpai Sailas kọ adide lẹ kp’abo unyi-wñ ọla Jihofa, ma la fi baptism che.