UKỌCHẸ 54
Ẹñwu Ch’ukọlọ “Adu Ki Ch’achubi Ondu-wñ Kpai Anibe”?
Jisọs ch’Oji ujeju abudọ. (Abo Ẹfẹsọs 5:23) Jisọs an’ukọlọ amakọchẹ-wñ le eñini kwefu ojale lefu “adu ki ch’achubi ondu-wñ kpai anibe.” (Gba Matiu 24:45.) Jisọs chi adu lẹ kp’ọla-wñ-i, i la d’uña ñwu ki n’amẹñwu ki neke d’ọda oji-wñ. Ama, otila i che k’adu lẹ ki leb’ọda Jisọs ki la na chẹñwu ñw’amọmaye Kraist ki bọ. Ẹnẹ ch’adu-lẹ? Abu adu-lẹ adejutẹ wa le?
1. Ẹnẹ che “adu ki ch’achubi ondu-wñ kpai anibe”?
Kw’iko igbele, Jihofa cha chi onẹ ka abẹk uchẹ abo ka ki d’uma n’abo-wñ le. (Malakai 2:7; Abo Hibru 1:1) Ubi ki Jisọs kwu, amẹnukpuchẹ kpai abogijo ki dẹ Jerusalẹm chanẹ en’abo Kraist ki bọ le. (Ẹwñ 15:2) Dabalu ki dẹ iko lẹ, eñini onugo uchẹ abogijo ka ku ma dọ Uchẹ Adejutukọlọ e-Amẹnibenu Jihofa an’ukọlọ wa le-i. Ma ad’ujẹñwu afu ñwu wa iko-wñ, ma la añọ nẹ wa le ef’ukọlọ uchẹnyọ ejẹ. Uchẹ abo-i che “adu ki ch’achubi ondu-wñ kpai anibe e-ki [Jisọs] du dago.” (Matiu 24:45a) Ọchaka abo ku ma defu Uchẹ Adejutukọlọ ch’Abo Kraist k’Ọjọ n’afu-wñ chi ma. Abo-i ana jọfẹ kpai Jisọs Kraist ubi k’ọlai ma takpa ọganẹ olu.
2. Ẹñwu ch’ujẹñwu k’adu ki ch’achubi ondu-wñ adu ñwu wa?
Jisọs kakini adu ki ch’achubi ondu-wñ ana “k’ujẹñwu ñwu [amọmaye ma] jẹ iko-wñ.” (Matiu 24:45b) Dabalu k’ujẹñwu ad’ugbiti ọla ñwu wa, abalẹ gẹ ujẹñwu afu ki chẹñwu ki kwefu Ọtakada Ọla Ọjọ ad’ukpahiu ñwu wa k’a neke gwọnyu Jihofa kpaka k’a la neke na ch’ukọlọ ki Jisọs du ñwu wa k’a che. (1 Timoti 4:6) A gba am’ujẹñwu-i lefu am’ujeju abudọ, ujeju kekele kpai am’ujeju lile k’a che. A la añọ gba am’ujẹñwu-i kwefu am’ọtakada ki akanẹreju ẹñwu ki defu Baibul kpai am’ifidio ki ach’atẹko wa k’a m’ẹñwu k’Ọjọ tene k’a la neke gwọnyu Ọjọ kpaka.
N’UMA NYỌGBA
Kọchẹ ile k’a nẹ kwugbo “adu ki ch’achubi ondu-wñ kpai anibe” ki che Uchẹ Adejutukọlọ.
Uchẹ Adejutukọlọ ad’ukọ, ujẹñwu e-afu kpai amẹñwu atẹko omunẹ ñwu Amẹnibenu Jihofa ugbo duu efu ọgbọ ilẹ-i
3. Ma ad’ejutẹ ọna k’ẹñwu adẹ
Uchẹ Adejutukọlọ an’ukọlọ Amẹnibenu Jihofa le ọna ki cheju-wñ alu ki Jisọs anẹ ma le. Jisọs nẹ Abo Kraist igbele onugo le ọna ki ache abajọ-i. G’IFIDIO-i.
Gba 1 Abo Kọrint 14:33, 40, ubilẹ mẹ ch’oluka oji ene-i:
Abu ọgba Baibul-i du ña kaki Jihofa atene k’abo-wñ ki dẹ arọne arọne?
4. Adu ki ch’achubi ondu-wñ adejutẹ ukọlọ uchẹnyọ ejẹ
Ukọlọ uchẹnyọ ejẹ ch’ukọlọ ogbogaga k’Abo Kraist che tule iko igbele. Gba Ẹwñ 8:14, 25, ubilẹ mẹ ch’oluka oji am’ene-i:
Abo deju t’ukọlọ uchẹnyọ ejẹ efu Abo Kraist iko igbele?
Ọna ẹñwu Pọl kpai Pita lebọ ẹñwu k’amẹnukpuchẹ ki bọ ka?
Uchẹnyọ ejẹ ch’ukọlọ ki ch’ogbogaga tule k’Uchẹ Adejutukọlọ adejut’ọ. G’IFIDIO-i.
Jisọs ka aka-ñọ-ka ọna k’ukọlọ uchẹnyọ ejẹ ch’ogbogaga kade. Gba Mark 13:10, ubilẹ mẹ ch’oluka oji am’ene-i:
Ẹñwu jẹñwu ukọlọ uchẹnyọ ejẹ ch’ogbogaga ñwu Uchẹ Adejutukọlọ?
Ẹñwu chi ki chẹñwu ogbogaga ki “adu ki ch’achubi ondu-wñ kpai anibe” ki na deju t’ukọlọ uchẹnyọ ejẹ efu ọgbọ ilẹ-i?
5. Adu ki ch’achubi ondu-wñ anẹ wa le
Uchẹ Adejutukọlọ anẹ wa le efu ọgbọ ilẹ-i. Abu ma akpibe le ku ma m’ẹñwu ki dukpẹ ku ma ka ñwu wa k’a lebọ? Kọchẹ ọna k’uchẹ adejutukọlọ Abo Kraist igbele ch’abalẹ. Gba Ẹwñ 15:1, 2, ubilẹ mẹ ch’oluka oji am’ene-i:
Ẹñwu n’iñwa wa agbade Abo Kraist igbele?
Abo ch’atẹko Pọl, Barnabas manyu abo ki bọ lugbo ẹñwu ku ma dukpẹ eche?
Gba Ẹwñ 15:12-18, 23-29, ubilẹ mẹ ch’oluka oji ene-i:
Tak uchẹ adejutukọlọ kpoji ọla lẹ, ẹñwu ma kpibe oji-wñ alu ku ma atene ẹñwu ki ch’ibe Ọjọ lugbo ọla lẹ?—G’ọgba 12, 15, kpai 28.
Gba Ẹwñ 15:30, 31 kpai 16:4, 5, ubilẹ mẹ ch’oluka oji am’ene-i:
Ẹñwu Abo Kraist igbele che iko ku ma gbọ ẹñwu k’uchẹ adejutukọlọ ka oji ọla lẹ?
Abu Jihofa d’ẹnyọ ñwu ma le todu ku ma lebọ ẹñwu k’uchẹ adejutukọlọ ka ñwu ma?
Gba 2 Timoti 3:16 kpai Jemis 1:5, ubilẹ mẹ ch’oluka oji am’ene-i:
Ugbo Uchẹ Adejutukọlọ atene ibe kwo ẹgba ku ma akpibe oji ẹñwu ki dukpẹ ku ma che?
ABO KA KAKINI: “Ichẹñwu k’ẹ netiru Uchẹ Adejutukọlọ, ọnẹ ofofo owñ ẹ lebọ.”
Ẹñwu jẹñwu ẹ ma jali kaki Jisọs anẹ Uchẹ Adejutukọlọ le?
ẸY’ỌLA UKỌ-I
Uchẹ Adejutukọlọ che “adu ki ch’achubi ondu-wñ kpai anibe” ki Jisọs chi. Ma ad’ukọ kpai ujẹñwu e-afu ñwu Abo Kraist ochochi ọgbọ ilẹ-i.
Ẹñwu ẹ kọchẹ?
Ẹnẹ chi “adu ki ch’achubi ondu-wñ kpai anibe”?
Abu Uchẹ Adejutukọlọ akwula ñwu wa le?
Ẹ kẹdọno kaki Uchẹ Adejutukọlọ che “adu ki ch’achubi ondu-wñ kpai anibe”?
KỌCHẸ MANYU
G’alu k’Uchẹ Adejutukọlọ ach’ukọlọ ma arọne arọne.
“Abo Che Uchẹ Adejutukọlọ e-Amẹnibenu Jihofa?” (I dẹ jw.org)
Kọchẹ ọna k’Uchẹ Adejutukọlọ ach’alu du ku ma neke che ku ma na d’ujẹñwu e-afu ọmẹmẹlẹ ñwu wa iko t’iko.
A Ch’alu Du K’a Neke Che K’ẹñwu Duu K’a Che Dufu Ki Ch’e-ọgẹcha (17:18)
Abu ukọlọ ki Jisọs du ñwu Uchẹ Adejutukọlọ dẹ eju okoke ma?
Abu am’ujeju abudọ kpai am’ujeju lile k’a che du ña kaki Jihofa anẹ Uchẹ Adejutukọlọ le?