Jisọs Du Lazarọs Dajikwanẹ

Jisọs n’amonukwu ọlali mẹta ku ma dodo ewo Bẹtani. Amonukwu Jisọs lẹ che Lazarọs kpai amọmaye-wñ onobulẹ meji k’odu-ma kọ Meri kpai Mata. Ọjọ ka, alu ki Jisọs d’agwodaba Jọrdan, Meri kpai Mata kp’uchẹ achigili ka ru Jisọs kakini: ‘Lazarọs ach’ọga nana. Agba lewa ule ule!’ Amaa, Jisọs lot’ugbo-ma ẹrẹrẹ n. I d’ọmọ lẹ ọjọ meji manyu ubi ku ma kpuchẹ ru. Ubi ọjọ meji lẹ, tak i ka ñwu amakọchẹ-wñ kakini: ‘A lo ti Bẹtani ke. Lazarọs alolu, u muda alo k’u nya f’u j’olu kwanẹ.’ Tak amẹnukpuchẹ lẹ kakini: ‘Ichẹñwu ki alolu, bak ọla-wñ agbiti.’ Taki Jisọs ka ñwu ma jali kakini: ‘Lazarọs lekwu mẹ.’

Ẹgba ki Jisọs tanẹ Bẹtani, Lazarọs lekwu mẹ. Ma la mu du ji ọjọ mẹlẹ mẹ. Amonẹ wewe la lew’ugbo Mata kpai Meri ku ma nyu ma ẹdọ todu ọmaye-ma ki kwu. Alu ki Mata gbọ kaki Jisọs lewa mẹ, i ra dufu nya ledo. Oñ Mata ka ñwu Jisọs kakini: “Ondu, i ma ch’uwẹ d’emi ọmaye-mi ma kwu no.” Jisọs ka ñwu Mata kakini: ‘Ọmaye-wẹ adajikwanẹ gẹ. Ẹ che kẹdọn’ọla-i,?’ Mata dohi ñwu kakini: ‘U che kẹdọno kak i adajikwanẹ ẹgba k’amonẹ adajikwanẹ.’ Taki Jisọs ka ñwu kakini: “Omi ch’udajikwanẹ kpai iñmi.”

Ubilẹ, Mata le t’ugbo Meri nya ka ñwu kakini: ‘Jisọs d’emi.’ Oñ Meri ra kwanẹ gbẹrẹ Jisọs, ọwọ amonẹ ki d’ọmọ lẹ la ra t’ọ ubi. Meri kpo danyekwu ẹrẹ Jisọs, i la na rakwu. Tak i ka ñwu Jisọs kakini: ‘Ondu, ẹ ma d’emi, ọmaye-mi ma deju ta!’ Alu ki Jisọs li ọna ki Meri arakwu kp’ẹdọdudu, oñ Jisọs onugo chanẹ erakwu. Alu k’ọwọ amonẹ lẹ li alu ki Jisọs arakwu, ma kakini: ‘Mẹ go alu ki fẹdọ Lazarọs.’ Amaa, uchẹ ka efu-ma ago kakini: ‘Ẹñwu chi ki ma gb’onukwu-wñ tanẹ n?’ Ẹñwu ẹ neju kaki Jisọs ache abajọ-i?

Jisọs le t’aloji lẹ, okwuta lile la chẹ b’alu oji lẹ ma. Oñ Jisọs d’ọda kakini: ‘Mẹ f’okwuta lẹ kẹchẹ kw’ọmọ.’ Taki Mata kakini: ‘Amaa, kw’enyi kẹlẹ ki kwu dẹ! I alu mẹ.’ Amaa, tabalẹ ma k’okwuta lẹ ẹchẹ kw’ọmọ, Jisọs la ch’adua kakini: ‘Ata, na gw’ẹ todu k’ẹ f’ọla-mi gbọ mẹ. U che ma k’ẹ gb’ọla-mi ẹgba duu, amaa u muda akọla dufu gbogbo todu k’abo ku ma d’emi ki ma kaki uwẹ kpẹ mi wa-i.’ Ubilẹ, i d’omu nyatẹ, oñ i kakini: “Lazarọs, dufu wa!” Ẹñwu awuwu ka lewa che: Lazarọs dufu wa kwefu awo okwuta ugbo ku ma du ji, ọkpẹ kpai ukpo la chẹ we ny’ọla-wñ. Taki Jisọs ka ñwu ma kakini: “Mẹ mu tu ki lo.”

Amonẹ wewe ef’abo ku ma li awuwu ki dẹ f’ẹdekono nẹ ugbo Jisọs. Amaa, abo ka le t’ugbo amiFarisi nya ka ñwu ma ẹñwu ki Jisọs che. Akw’iko lẹ t’ọgba, amiFarisi atene ku ma mu Jisọs kpai Lazarọs du kpa. Ẹnẹ ka ef’amẹnukpuchẹ Jisọs mẹgweji [12] lẹ k’ọdu-wñ kọ Judas Iskariọt lubi le t’ugbo amiFarisi, i la t’uma ene kakini: ‘Onu mẹ ara ñwu mi ichẹñwu k’u b’umẹ ch’ọna ku mẹ neke mu Jisọs?’ Taku ma jẹ kaki ma ar’ẹyọ ọkọ ajifa ogwuẹgwa ñwu, oñ Judas chanẹ etene uña ki neke du Jisọs ñwu amiFarisi mu.