UKỌCHẸ 46
Ẹñwu Chi Ki Dukpẹ K’a F’ọla Wa Datẹ Ñwu Jihofa K’a La Che Baptism?
Ẹ f’ọla wẹ datẹ ñwu Jihofa ichẹñwu k’ẹ gbalu ñwu Jihofa ef’adua wẹ kaki ẹ tene d’ọlai wẹ chaka r’ọ, ẹ la ad’ẹñwu ki atene chẹñwu ejodudu ef’ọlai wẹ. (Eli Ekọ D’Ọjọ 40:8) Ubilẹ, ẹ che Baptism. Lefu e-lẹ, ẹ du ña abo duu kaki ẹ f’ọla wẹ datẹ ñwu Jihofa mẹ. Ef’ọla wa datẹ ñwu Jihofa chẹñwu ogbogaga k’onẹ neke che ef’ọlai-wñ. Ẹñwu neke d’ẹ ẹdọ kwanẹ k’ẹ neke tu ẹñwu ogbogaga ki dẹ?
1. Ẹñwu ad’onẹ ẹdọ kwanẹ ku ma neke f’ọlama datẹ ñwu Jihofa?
Ufẹdọ k’a nẹ ñwu Jihofa ajẹñwu wa d’ọla wa datẹ ñwu Jihofa. (1 Jọn 4:10, 19) Baibul kakini: “Uwẹ ki la fẹdọ [Jihofa] Ọjọ-wẹ kp’ẹdọ-wẹ du, kp’onugo-wẹ du, kp’ibe-wẹ du, kp’ugbiti-wẹ du.” (Mark 12:30) A du ña kaki a fẹdọ Jihofa lefu ẹñwu k’a che kpai ẹñwu k’a ka. Dabalu k’ọkọ kp’ọya ki afẹdọ ọlama nyọnyọ an’ọlama, abalẹ gẹ ufẹdọ k’a nẹ ñwu Jihofa ajẹñwu wa k’a f’ọla wa datẹ ñwu k’a la che baptism.
2. Am’ẹnyọ ẹñwu Jihofa adu ñwu abo-wñ ku ma che baptism?
Ichẹñwu k’ẹ che baptism, ẹ n’uyọ, ẹ la amud’ẹnẹ ka efu abo akwọra unyi Jihofa. Ẹ li ufẹdọ Jihofa ọna wewe, ẹ la amẹru Jihofa t’alu ki dẹ abajọ-i le. (Gba Malakai 3:16-18.) Ile omunẹ k’ẹ nẹ che kaki Jihofa ana ch’ata wẹ, ẹ la n’amọmaye efu ọgbọ ilẹ-i ku ma fẹdọ Jihofa ku ma la fẹdọ wẹ onugo. (Gba Mark 10:29, 30.) Ochochi i che kaki i n’amẹñwu ki dukpẹ k’ẹ che tak’ẹ neke che baptism. I dukpẹ k’ẹ kọchẹ lugbo Jihofa, k’ẹ fẹdọ-wñ k’ẹ la n’ukẹdọno ugbo Ọma-wñ. Otitala-wñ che kaki otila i che k’ẹ f’ọla wẹ da tẹ ñwu Jihofa. Ichẹñwu k’ẹ ch’amẹñwu-i, k’ẹ la che baptism, ẹ kwo t’ejọna ejura iñmi ogbegbelẹ. Ọtakada Ọla Ọjọ kakini ẹñwu ki “dọmọ ajadu mẹ fa-i, owñ che baptism.”—1 Pita 3:21.
N’UMA NYỌGBA
Kọchẹ ẹñwu ki chi ki chẹñwu ogbogaga k’ẹ f’ọla wẹ datẹ ñwu Jihofa k’ẹ la che baptism.
3. Otila i che k’ẹnẹnẹnẹ wa ki tu ẹnẹ k’a arẹ
Uchẹ ka efu abo Israẹl igbele neju kaki ma neke na rẹ Jihofa ku ma ñọ na rẹ Beal. Ama, Jihofa kpẹ akachẹ Ẹlaija ru ma todu ki jẹñwu ma ma kaki i jẹ che abalẹ n. Gba 1 Amonu 18:21, ubilẹ mẹ ch’oluka oji ene-i:
Ẹñwu ch’otila ñwu abo Israẹl ku ma che?
Dabu abo Israẹl, otila i che k’awa onugo ki tu ẹnẹ k’a rẹ. Gba Luku 16:13, ubilẹ mẹ ch’oluka oji am’ene-i:
Ẹñwu chi k’a ma neke na rẹ Jihofa kp’ẹnẹ abẹki ẹñwu omunẹ n?
Abu a neke du ña Jihofa kaki owñ ch’ẹnẹ k’a tu k’a rẹ?
4. Yaye oji ufẹdọ ki Jihofa nẹ ñwẹ
Jihofa chẹ d’amẹñwu ele wewe ñwu wa mẹ. Ẹñwu a neke du ñwu Jihofa? G’IFIDIO-i.
Am’ọna ẹñwu Jihofa d’ufẹdọ ña wẹ? Gba Eli Ekọ D’Ọjọ 104:14, 15 kpai 1 Jọn 4:9, 10, ubilẹ mẹ ch’oluka oji am’ene-i:
Ẹñwu ch’amele ki kwugbo Jihofa ki che w’ẹ eju tule?
Ẹñwu am’ele lẹ jẹñwu ẹ ma lugbo Jihofa?
Ichẹñwu k’a gb’ẹñwu ele kwugbo onẹ ki la che w’uwa eju nyọnyọ, a ch’aludu k’a neke che k’a du ñ’ẹnẹ lẹ kaki ach’ugbede-wñ. Gba Ọlọda Eduwa Onukeji 16:17, ubilẹ mẹ ch’oluka oji ene-i:
Ichẹñwu k’ẹ kpibe oji amẹñwu chaka ki Jihofa che ñwẹ, ẹñwu e-lẹ adu wẹ ẹdọ kwanẹ k’ẹ du ñwu Jihofa?
5. Ichẹñwu k’ẹ f’ọla wẹ datẹ ñwu Jihofa, i ad’ẹnyọ ñwẹ
Abo ka kẹdọno kaki ichẹñwu ku ma ch’ẹnẹ uwohi, ku ma n’ukọlọ ọmẹmẹlẹ abẹki ọkọ nana e-lẹ ajẹñwu ma n’ẹdẹbọ. Ama, e-lẹ ch’ochochi? G’IFIDIO-i, ubilẹ mẹ ch’oluka oji am’ene-i.
Dagba k’ẹnẹkẹlẹ ki defu ifidio-i añeju ibọlu erọ nyọnyọ, ẹñwu jẹñwu t’ibọlu erọ nọ?
I f’ọla-wñ da tẹ ñwu Jihofa ich’ibọlu erọ n. Ẹ neju kaki ẹñwu ọmẹmẹlẹ i che-i? Ẹñwu chi k’ẹ kabalẹ?
Taki ẹnukpuchẹ Pọl rida t’Ẹnẹ Kraist, i na che ki n’uña ukọlọ ọmẹmẹlẹ. I kọchẹ ọda amaJu kwefu ọwọ akonẹ ka k’amonẹ ma nyonyọ. Ama, i t’amẹñwu-i chaka nọ t’ubi todu ki neke ch’Ẹne Kraist. Pọl che n’umama efu ẹñwu ki che-i? Gba Abo Filipai 3:8, ubilẹ mẹ ch’oluka oji am’ene-i:
Ẹñwu chi ki Pọl kaki amẹñwu ki che kwobi tak’i rida t’Ẹnẹ Kraist che “ẹñwu ojeta” abẹki ẹñwu iwa?
Ile ẹñwu i nẹ todu ẹñwu ki che-i?
Ẹ neju kaki ọlai wẹ ach’e-ọmẹmẹlẹ ichẹñwu k’ẹ tu k’ẹ rẹ Jihofa? Ẹñwu chi k’ẹ kabalẹ?
Iko ki Pọl rida t’Ẹnẹ Kraist, i jile wewe t’amẹñwu ki tọnọ tanẹ le
ABO KA KAKINI: “U che ma kaki ochochi dẹ, ama u muda mọla ku che baptism ta n.”
Ẹ neju kaki i ch’eju-wñ k’onẹ ki f’ọla-wñ datẹ ñwu Jihofa? Ẹñwu chi k’ẹ kabalẹ?
ẸY’ỌLA UKỌ-I
Ufẹdọ k’a nẹ ñwu Jihofa ajẹñwu wa f’ọla wa datẹ ñwu k’a la che baptism.
Ẹñwu ẹ kọchẹ?
Ẹñwu chi ki dukpẹ k’a fedọ Jihofa kp’ọgbọ ẹdọ wa chaka k’a la r’ọ?
Ọna ẹñwu Jihofa cha d’ẹnyọ ñwu abo-wñ ki che baptism?
Ẹ ñeju k’ẹ f’ọla wẹ datẹ ñwu Jihofa?
KỌCHẸ MANYU
Gẹñwu ki jẹñwu onobulẹ akeli ka kpai ẹnẹkẹlẹ ka ki ar’ibọlu tu ku ma f’ọlama datẹ ñwu Jihofa.
Amagbadufu An’ene Kaki—Ẹñwu Na D’ọlai Mi Che?—Alu K’ọlai Mi Dẹ Kwobi (6:54)
Kọchẹ amẹñwu omunẹ ki neke jẹñwu ẹ f’ọla wẹ datẹ ñwu Jihofa.
“Ẹñwu Chi Ki Dukpẹ K’ẹ F’ọla Wẹ Datẹ Ñwu Jihofa?” (Ọdọgọ Ide, January 15, 2010)
Efu Ifidio eli ki dẹ, g’uyọ k’onẹ anẹ ichẹñwu ki f’ọla-wñ datẹ ñwu Jihofa.
Efu ọhiala “Kw’ọdọ Wewe U Na Kpibe, ‘Ẹñwu Chi K’a D’ilẹ-i?’” gẹñwu ki jẹñwu onobulẹ ka kpibe oji ẹñwu ki dukpẹ ki ch’ogbogaga tule efu ọlai-wñ.