UKỌCHẸ 47
Ẹ Chẹ Mọla K’ẹ Che Baptism Mẹ?
Ẹ chẹ kọchẹ amẹñwu wewe lugbo Jihofa kwefu ukọchẹ Baibul wẹ mẹ. I neke che kaki i n’amẹñwu k’ẹ ch’arida-wñ ef’ọlai wẹ todu k’ẹ neke chẹñwu k’ẹ kọchẹ. Tabalẹ, i neke n’ẹñwu ki af’ẹ w’ubi k’ẹ we d’ọla wẹ datẹ ñwu Jihofa k’ẹ la che baptism. Ukọchẹ-i akọla oji amẹñwu ki neke jẹñwu gbiti ñwu onẹ ki che baptism kpai amẹñwu k’ẹ neke che ki we jẹñwu kpọna ny’ẹ eche baptism.
1. Abu i dukpẹ k’uma wẹ ki nana kade tak’ẹ che baptism?
K’ẹ neke che baptism, i dukpẹ k’ẹ lewa tefu “ochochi ema ogbolo.” (1 Timoti 2:4) I muda che kaki ẹ f’ohi am’ene duu ki defu Baibul ma taki ẹ che baptism n. Dagba ki ch’Abo Kraist ki chẹ che baptism kw’ọdọ wewe, ama onugo dọmọ akọchẹ manyu. (Abo Kọlọse 1:9, 10) Ama i dukpẹ k’ẹ kọchẹ amẹñwu ogbogaga ka ki defu Baibul. Ichẹñwu k’ẹ n’ibe meji, abogijo ef’ujeju abudọ neke ch’atẹko wẹ k’ẹ neke ma ichẹñwu k’uma wẹ chẹ b’eche baptism jọ.
2. Ẹñwu ch’amẹñwu ki dukpẹ k’ẹ che tak’ẹ che baptism?
Tak’ẹ neke che baptism, otila i che k’ẹ “ribeda . . . k’ẹ la rida.” (Gba Ẹwñ 3:19.) E-lẹ che kaki ẹ ch’iwọ todu ẹñwu ẹbiẹnẹ duu k’ẹ che kwobi, ẹ la ka ñwu Jihofa ki d’ẹbiẹnẹ wẹ ba ñwẹ. Ẹ ñọ ch’alu du k’ẹ neke che k’ẹ ra b’ẹñwu ẹbiẹnẹ tẹ k’ẹ la chẹñwu ki ajẹñwu ẹdọ Ọjọ ki bọ. Ubilẹ, ẹ chanẹ ew’ujeju abudọ iko duu, ẹ la ñọ na dufu efu uchẹnyọ ejẹ.
3. Ẹñwu chi ki ma dukpẹ k’ẹ jẹñwu okpo echi ki kp’ọna ny’ẹ eche baptism?
Abo ka ach’okpo todu ku ma akpibe kaki ma neke chẹñwu ku ma gbalu ñwu Jihofa n. Ochochi, i n’iko k’ẹ chẹñwu ki ma ch’eju-wñ n, dagba ki ch’abo ọkpakpa ki Baibul kọla lugbo ma, ama onugo che chẹñwu ki ma ch’eju-wñ n. Jihofa neju k’abo ku ma r’ọ ku ma chẹ jọkpa taku ma r’ọ n. (Gba Eli Ekọ D’Ọjọ 103:13, 14.) Ẹdọ Jihofa abọ ichẹñwu k’ẹ chẹñwu du k’ẹ neke che k’ẹ na chẹñwu t’eju-wñ! I ana ch’atẹko wẹ. Jihofa ka ñwu wa kakini i n’ẹñwu du ki “neke ada wa kp’ufẹdọ [owñ] . . . ru n.”—Gba Abo Rom 8:38, 39.
N’UMA NYỌGBA
G’alu k’ekọchẹ manyu lugbo Jihofa kpai ed’atẹko ki kwugbo-wñ chekwu neke jẹñwu ẹ legwu ef’amẹñwu ki neke jẹñwu gbiti ñwẹ k’ẹ che baptism du.
4. Kọchẹ manyu lugbo Jihofa
Amẹñwu i dukpẹ k’ẹ ma lugbo Jihofa tak’ẹ che baptism? I dukpẹ k’ẹ m’ọ nyọnyọ k’ẹ fẹdọ-wñ kẹ la ñeju echẹñwu ki ajẹñwu ẹdọ-wñ bọ. G’IFIDIO-i k’ẹ neke li ọna k’amakọchẹ Baibul efu ọgbọ ilẹ-i ache le. Ubilẹ, mẹ ch’oluka oji ene-i.
Efu ifidio-i, ẹñwu ch’atẹko abo ka ku ma neke mọla baptism eche tanẹ?
Gba Abo Rom 12:2, ubilẹ mẹ ch’oluka oji am’ene-i:
Ẹ n’ibe meji lugbo am’ukọ ki defu Baibul abẹki ichẹñwu k’ukọ Amẹnibenu Jihofa ch’ochochi?
Ichẹñwu ki dabalẹ, ẹñwu ẹ neke che?
5. Ja k’ẹ legwu ef’amẹñwu ki neke kpọna ny’ẹ eche baptism du
Ichẹñwu k’a tu k’a f’ọla wa datẹ ñwu Jihofa k’a la che baptism, a na dejudo am’akanya wewe. K’a g’ujiwe, g’IFIDIO-i, ubilẹ mẹ ch’oluka oji am’ene-i.
Efu ifidio-i, am’akanya ẹñwu Narangerel dejudo alu ki tene ki rẹ Jihofa?
Abu ufẹdọ ki nẹ ñwu Jihofa ch’atẹko-wñ ki neke legwu ef’amakanya lẹ du?
Gba Ita Ita 29:25 kpai 2 Timoti 1:7, ubilẹ mẹ ch’oluka oji ene-i:
Ẹñwu ad’ugbẹdọ ñwu wa k’a neke legwu ef’amẹñwu ki atene ki kpọna nyu wa du?
6. Kẹdọno atẹko ki kw’ugbo Jihofa
Jihofa ach’atẹko wẹ k’ẹ neke chẹñwu ki ajẹñwu ẹdọ-wñ bọ. G’IFIDIO-i, ubilẹ mẹ ch’oluka oji am’ene-i.
Efu ifidio-i, ẹñwu chi k’akọchẹ Baibul lẹ ma tene che baptism n?
Ẹñwu i kọchẹ ki jẹñwu ukẹdọno ki nẹ ñwu Jihofa ki lonyanẹ?
Gba Aizaya 41:10, 13, ubilẹ mẹ ch’oluka oji ene-i:
Ẹñwu neke jẹñwu ẹ n’ukẹdọno kaki ẹ neke ch’amẹñwu k’ẹ gbalu iko k’ẹ d’ọla wẹ datẹ ñwu Ọjọ?
7. Du ña kaki ufẹdọ k’Ọjọ nẹ ñwẹ che w’ẹ eju
Alu k’ẹ na kpibe oji ufẹdọ ki Jihofa nẹ ñwẹ, abalẹ ẹñwu ki che ñwẹ ana w’ẹ eju, e-lẹ ajẹñwu ki d’ẹ ẹdọ kaki ẹ tene r’ọ ogbegbelẹ. Gba Eli Ekọ D’Ọjọ 40:5, ubilẹ mẹ ch’oluka oji ene-i:
Ẹñwu chẹñwu ki w’ẹ eju tule kwefu am’ẹnyọ ki kwugbo Jihofa?
Akachẹ Jẹrẹmaya fẹdọ Jihofa kpai ọla-wñ nyọnyọ, i che w’ọ eju nyọnyọ alu ki arẹ Jihofa. I kakini: “Ọla wẹ lẹ la mud uyọ ñwu mi i la r’umi ẹdọ nana, todu ma dọ odu-wẹ m’umi, O Jihofa Ọjọ.” (Jẹrẹmaya 15:16) Dohi am’ene-i:
Ẹñwu chi ki ch’ojima ọkpu k’a ch’ẹnẹ ka efu Amẹnibenu Jihofa?
Ẹ tene k’ẹ che baptism k’ẹ mud’ẹnẹ ka efu Amẹnibenu Jihofa?
I n’ẹñwu ki ajẹñwu gbiti ñwẹ k’ẹ ch’abalẹ?
Ẹñwu ẹ neju kaki i dukpẹ k’ẹ che k’ẹ neke che baptism?
ABO KA KAKINI: “U neju kaki u neke ch’amẹñwu du ku na gbalu kaki na che tak’u che baptism n.”
Ọna ki dẹ ọla wẹ dẹ-i?
ẸY’ỌLA UKỌ-I
Lefu atẹko ki kwugbo Jihofa, ẹ neke legwu ef’amẹñwu ki atene ki kpọna ny’ẹ eche baptism du.
Ẹñwu ẹ kọchẹ?
Abu i dukpẹ k’uma wẹ ki nana kade tak’ẹ che baptism?
Ẹñwu ch’amarida ki dukpẹ k’ẹ che tak’ẹ che baptism?
Ẹñwu chi ki ma dukpẹ k’ẹ jẹñwu okpo echi ki kpọna ny’ẹ eche baptism n?
KỌCHẸ MANYU
Kọchẹ ẹñwu ki dukpẹ ki d’ẹ ẹdọ kwanẹ k’ẹ che baptism.
Kọchẹ alu k’ẹ neke legwu ef’amẹñwu ki neke kpọna ny’ẹ eche baptism du.
G’alu k’ẹnẹkẹlẹ ka legwu ef’amihianyi-wñ du ki neke che baptism.
Ẹnẹkẹlẹ ka k’odu-wñ kọ Ataa le ki kọ che baptism. G’ẹñwu ki ch’atẹko-wñ ki neke chẹñwu ogbogaga ki dẹ.