Sei Iroro Yeama Dẹịnmọmụ Baramị

1. Kịmị-awọụbosẹ te bụụdọọnye kị nana wẹrịemi a o?

Ị́ KPỌ Jehovah dịsẹgha ye kẹrị mịẹmụ dịsẹ nana ifie paadẹ a o? Bịsẹ bara aba, iné dadiyemị dụba zịnịotu paamọmịnị dadiyebo dẹịn-emi bara iroro kụmọ. Bible gbaa amọ: “Ị́ laamịnị dadiyemị zịnịotu kpọ paamọmịnị.” (1Cor. 10:13)a Gbaamịnị barasẹ, iné dẹịnmọ dọụmịnị sei iroroyebo, zịnịotu kpọ bịsẹ sei iroroyebo nana wẹrị a dẹịnmọ dọụmịnị. Anịduonị ị́mịnị bẹtịbị fa, anịa Jehovah baratụa ị́ pịrị wẹrịemisẹ, ị́mịnị laa dẹịnmọmịnị.

2. Te dadiyeama kị zụa Christtuuduo-otuama mọ bá ámọ mọ́ Bible tolumọmịnị kịmịama laamịnị a o? (Fotobo kpọ dii.)

² Bible mọkpọ gbaa amọ: “Kịmịsẹ ánị adụdụ ma dịsẹ-emi ye kị á dinẹmọ wẹrị mú dadiye a koro sụọmịnị.” (Jas. 1:14) Kẹnị ụbọ laamịnị dadiyemị zịnị ụbọ ye mọ bẹbẹ paa a paaemi. Gbaamaba, zụa Christtuuduo-otuama naa ámọ mọ́ zọzọ nanagha owei anịghakpọ ere mọ zọzọ anga dadiye kị laamịnị, zịnịotu ba owei mọ owei mọ anịghakpọ ere mọ ere mọ zọzọ anga dadiye kị á laamịnị. Zụaotu ba paatuu foto anịghakpọ vidio ditimi barasindẹ anịa waị bịsẹ fotobo anịghakpọ vidiobo diimụ dịsẹ nana dadiye kị á laamịnị. Zịnịotu ba kụrọ diri bou anịghakpọ wuru bou kẹrị inyenrinbụọ datịẹmọmụ bụụdọọnye kị laamịnị. Bei zụa yeama nẹ Christtuuduo-otuama mọ bá ámọ mó Bible tolumọmịnị kịmịama mọ laamịnị bụụdọọnyeama. Anịduonị, wosẹ fịrịmọpaa-owei Paul iroro bara kị iroro kpọ paaemi, ụ gbaamị: “Ịmịnị ebiye mịẹ dọụmịnị ifiemị, ine angọ boloumị sei ye kị iroromịnị.”—Rom. 7:21.

3. Kịmị ifiebosẹ kẹnị kụrọ sei apaa mịẹ dịsẹmịnị aba, yebị tebara ka kị ụ gbele a paaemi a o?

³ Ị́mịnị ifiebosẹ kẹnị kụrọ sei apaa mịẹ dịsẹmịnị, ị́mịnị ba kụrọnana wẹrị, bịsẹ sei dẹịnmọgha fa bara iroro kpọ paaemi. Ị́mịnị ukiemọye kpọ ba fa, Jehovah iné iroromịnị sei yebo duonị Jehovah ị́ gbein koromọdẹ bara iroro kpọ paaemi. Bịsẹ iroro yebị gesiigha bara nimi! Bei ye ma tuugbaamụ yọbị, beị egberitịbịmị, omịnị maa biibịbị kẹrị ẹrẹteimịnị: (1) Omịnị kụrọ nanagha bá ukiemọye kpọ fa iroro yemị te yọkị duo bomịnị a o? (2) Ị́mịnị tebara ka kị sei mịẹ dịsẹnana iroro yeama dẹịnmọ a paaemi a o?

OMỊNỊ TEEKI IRORO KỊ “SATAN” MỌ DỌỤMỊNỊ A O

4. (a) Tetuu kị duonị Satan omịnị sei iroro yeama datịẹmọmụ kụrọ fa bara iroro kị dọụmịnị a o? (b) Tetuu kị duonị omịnị laa sei iroro yeama datịẹmọmịnị bara nimi wẹrịemi a o?

⁴ Dadiye wo laadaba, Satan omịnị ba kụrọnanagha bara iroro kị dọụmịnị. Jesus bei ye nimi wẹrịemi kị duonị tẹẹmụ bara kọn wó tuuduo-oubo tolumọmị: “Wo bụọmọ dadiye a sụọ kụmọ, anịa bolousei owei bara duo wo zụọbụọmọ.” (Matt. 6:13) Satan omịnị dadiye a sụọdaba ba Jehovah dọụbara mịẹgha fa bara gbaamị. (Job 2:​4, 5) Tetuu kị duonị Satan bịsẹ bara gbaa ma o. Satan wó adụdụ ma emi sei iroroye kị bụọmọ ụ mịẹ sei a sụọ duonị, ba peibolou kọn Jehovah a nanagha. Anịduonị, omịnị kpọ bịsẹ bara k’emi bara kị ómịnị mọ iroromịnị, dadiye wo laadaba, omịnị kpọ wó mịẹ bara kị mịẹmụ bara kị ómịnị mọ iroromị. Satan Ọkpọnanaowei yalịyalị Tọbọụ Jesus dadiye a sụọdaba, Jehovah gbein koromọmịnị bara kị iroro wẹrịmị! (Matt. 4:​8, 9) Anịa iroro dii: Omịnị sei mịẹ dadiye wo adụdụ ma sụọdaba, omịnị kọkọ laa datịẹmọmụ kụrọ fa? Benenbene bịsẹ baragha! Omịnị kpọ Paul gbaa bara gbaa a paaemi, ụ gbaamị: “Ye duo mú ye laasẹ, ịmịnị kụrọ akị ị pịrịmịnị Ọkpọnanaowei kị duo kụrọ nanamịnị.”—Phil. 4:13.

5. Omịnị tebara kị mịẹtimi Jehovah omịnị laa sei mịẹ dịsẹnana iroroyebo dẹịnmọ a paaemi eti nana wẹrịemi bara nimi ma o?

⁵ Jehovah, Satan emi bara fa, omịnị laa sei mịẹ dịsẹyọ ḍẹịnmọ a paaemi bara Jehovah mọ nimi wẹrịemi. Wo tebara kị mịẹtimi bịsẹ bara nimi ma o? Tuubị, biin kịmịama ánị peibolou kẹrị kụrọmọ wẹrị opu akpotu duo tẹịmụ bara Jehovah mọ nimi wẹrịemi. Wo wẹrị iroro dii. Jehovah, benenbene ekpegha, ómịnị biingha kịmịama kị ayakpọ ma sụọmịnị bara gbaagha anịa biin kịmịama kị sụọmụ bara kị gbaamị. Bei kịmibo “Anina tọbọụ asịịn kọn ánị angọbo mịẹ yalịdẹ kịmịama.” (Rev. 7:​9, 13, 14) Gaan baramị, Jehovah omịnị laa wo nana wẹrịemi kụrọ kọn sei mịẹ dịsẹnana iroroyebo dẹịnmọ a paaemi bara ómịnị mọ nimi wẹrịemi.

6-7. Omịnị teeki pei kị Satan mọ dọụmịnị a o?

⁶ Satan omịnị kụrọ nanagha bá ukiemọye kpọ fa bara iroro kị dọụmịnị, bá omịnị sei mịẹ iroro yeama nanadaba Jehovah ma wo bụọmọ fagha fagha ụndụ nanagha fa bara kpọ iroro kị dọụmịnị. Tetuu kị duonị Satan bịsẹ bara iroromịnị a o? Satan ukiemọye nanagha, ómịnị fagha fagha ụndụ nanagha fa ụgụla Jehovah mọ pẹlẹ ụ pịrịdẹ. (Gen. 3:15; Rev. 20:10) Tamanaịyọ fa baramị, Satan omịnị kpọ ukiemọye fa bara iroro kị dọụmịnị. Anịa, omịnị ukiemọye nana wẹrịemi. Bible mị Jehovah baratụa wo pịrịmịnị bara gbaa wẹrịemi, ómịnị wo gbein koromọgha fa. Jehovah “kẹnị ụbọ kpọ gbein-gọgọlọ bolou a sụọ dọụgha, omịnị wo mịẹmịnị seibo a barasindá fagha fagha ụndụ nana kị dọụmịnị.”—2Pet. 3:9.

⁷ Omịnị sei mịẹ dịsẹnana iroroyebo dẹịnmọ a paagha bara iroromịnịsẹ, omịnị kọkọ kụrọ nanagha bá ukiemọye fa bara kị paadẹ, Satan ye-iroromịnị bara kị wo kpọ mọ irorodẹ. Anịa Satan iroromịnị yebo wo mọ nimi pẹlẹdaba baratụa wo pịrịwẹrị bịsẹ dadiyebo dẹịnmọ a paaemi.—1Pet. 5:​8, 9.

WO ANGỌ MA EMI SEIBỊ WO GBELE A PAAEMI BARAMỊ

8. Sei mịẹ dịsẹnana iroroyebo bụọmọ kpọ, Bible sei gbaa daba teeki bolou ma sụọemi a o? (Psalm 51:5) (“Tuugbaa Gbaa Wẹrịemi Egberi” ekpedi kpọ dii.)

⁸ Satan bụọmọ dẹmị, zịnị ye kpọ wo mịẹwẹrị kụrọ bá ukiemọye nana wẹrị sei iroro yeama datịẹmọ a paagha fa bara iroro kpọ paaemi. Bịsẹye ba te ye a o? Wo angọ ma emi seibị, bịsẹ seibị wo bọlọụ daụ mọ yin mọ otubo kị duo bo wo laamị.b—Job 14:4; Psalm 51:5 goo.

9-10. (a) Sei tebara ka kị Adam mọ Eve mọ gbele ma o? (Foto kpọ dii.) (b) Sei tebara ka kị wo kpọ gbelemịnị a o?

⁹ Wo wẹrị sei akị Adam mọ Eve mọ gbele bara ditụa. Ámịnị Jehovah dọụgha ye mịẹbị, ámịnị angọ sọwẹịmị. Insight on the Scriptures, Adam mọ Eve mọ mịẹ ye gbelemọ yọbị gbaamị: “Sei á mịẹwẹrị ánị adụdụmị áni a bụụdọọnmị, pọwẹị kpọ nanagha, mala kpọ famị, bá bụzemị.” Gbaamịnị barasẹ Adam mọ Eve mọ kọn kẹnị warị bolou a kaịdẹ bara kị paamị, bịsẹ warị-boloumị mị nia yebo k’emi. Anịduonị ánị múdẹ yọsẹ mị nia yebo ámọ mọ́ emi. Ámịnị ba laa sei duo baịn seri kpọ paagha.

¹⁰ Gesiimị, omịnị Adam mọ Eve mọ timi wẹrị bara fa. Parụbụọmọ ịkịanmị mịẹ Adam mọ Eve mọ pịrịgha, anịa mịẹ akị omịnị kị pịrị wẹrịemi, anịduonị omịnị laa sei duo seri a paaemi bá peree ịkịọụ kpọ nana a paaemi. (1Cor. 6:11) Bịsẹ bara kị gbaa kpọ, wosẹ Adam mọ Eve mọ duo sei nanadẹ. Anịduonị sei wo mịẹwẹrị wo adụdụbo a bụụdọọnyọ nanamịnị, pọwẹịgha, malafamịnị, bá bụzemịnị. Bible gbaa baramị, sei kịmị-awọụbosẹ kẹrị palịmọdẹ. Naa “Adam mọ Eve mọ bara [sei mịẹgha] otubo kpọ kẹrị palịmọdẹ.” (Rom. 5:14) Bịsẹ yọmị kọkọ wo mịẹ bolouịmbẹlẹgha, anịa omịnị sei dẹịnmọmụ kụrọ bá ukiemọye nanagha bara iroro kụmọ. Omịnị laa mị sei iroro yebo dẹịnmọ a paaemi. Tebara o?

11. Omịnị laa sei iroro yeama dẹịnmọmụ kụrọ nanagha bara irorodaba, teeki wo mọ nimi agbẹị-emi a o, bá tetuu a o? (Romans 6:12)

¹¹ Omịnị laa sei iroro yeama dẹịnmọmụ kụrọ nanagha bara irorodaba, omịnị nimi agbẹị-emi wo angọ bolou ma emi sei kị “ẹrẹmịnị,” omịnị bịsẹ ẹrẹbịbị pei kụmọ. Tetuu a o? Bible gbaa amọ, omịnị sei bụọmọ “tịbịoweitimi wo daa kụmụ”. (Romans 6:12 goo.) Gbaamịnị barasẹ, omịnị sei iroro yeama kị nana kpọ bịsẹ yebo mịẹgha fa kụrọ nana wẹrịemi. (Gal. 5:16) Jehovah kpọ omịnị bịsẹ dadiyebo dẹịnmọ a paaemi eti kọn wo a nana wẹrịemi; anịkị duonị ómịnị gbaa amọ, sei bụọmọ wo dẹịnmọ kụmọ. (Deut. 30:​11-14; Rom. 6:6; 1Thess. 4:3) Gaan baramị omịnị laa sei iroroye dẹịnmọmụ kụrọ nana wẹrịemi.

12. Omịnị sei iroro yeama dẹịnmọmụ ukiemọye fa bara irorodaba tebara kị wo mọ mịẹmịnị a, bá tetuu a o?

¹² Bịsẹ kpekẹnị bara kị, omịnị sei iroro yeama dẹịnmọmụ ukiemọye fa bara irorodaba, omịnị ukie wo angọ bolou ma emi sei kị “ẹrẹmịnị,” omịnị benebene pei kụmọ. Tetuu a o? Bible gbaa baramị, Jehovah wo angọmị emibarasẹ nimi wẹrịemi. (Ps. 103:​13, 14) Ómịnị “wo gbelemọ yebosẹ nimi wẹrịemi” Adam mọ Eve mọ duo bo wo laa seimị wo dinẹmọ nanamịnị sei iroro yebosẹ nimi wẹrịemi. (1John 3:​19, 20) Anịduonị omịnị sei iroro yeama nana wẹrị, bịsẹ sei iroroyebo mịẹgha ifiesẹ, omịnị mọkpọ Jehovah tọrụyọbị yalị-emi. Tetuu kị duonị omịnị bịsẹ bara gbaa a paaemi a o?

13-14. Ị́mịnị sei mịe dịsẹ iroro nanadaba, ị́mịnị sei mịẹdẹ bara kị gbaamịnị a? Tuugbaa.

¹³ Bible sei yeama mịẹmụyọ mọ bá sei iroro yeama nanayọ mọ bẹbẹ paaemi bara gbaa wẹrịemi. (Omịnị laa sei mịẹmụ yọbị datịẹmọ a paaemi) anịa (sei iroro yeama wo ịkịọụ duo sụọmụ yọ datịẹmọ a paagha). Gbaamaba, bọlọụ kụraị sọrọnsi christtuuduo-otubo zụayaị owei mọ owei mọ zọzọ anga inyenrinbụọ nana dẹkị bo Christtuuduo-otu a paamị. Á gbelemọ yọbị Paul gbaamị: “Ánị zaụ kịmịama bịsẹ bara kị timimị.” Bịsẹ gbaa yọbị ámịnị ba owei mọ owei mọ zọzọ anga yọbị benebene ánị ịkịọụ a sụọgha fa kị gbaamịnị a? Bịsẹ baragha, tuubị bịsẹ inyenrinbụọmị kụrọ fa k’emi. Anịa angọ kẹrị inyenrinbụọ nana bá bịsẹ yebo mịẹgha Christtuuduo-kịmịsẹ, Jehovah pịrị kẹrịakị wẹrịemi. Ámịnị wó tọrụyọbị “suru yalịyalị” wẹrịemi kịmịama bara kị paadẹ. (1Cor. 6:​9-11) Wo kpọ bịsẹ bara paa a paaemi.

¹⁴ Sei mịẹ dịsẹ iné angọ ma kụrọ emi kpọ, ị́mịnị laa dẹịnmọ a paaemi. Ị́mịnị laa sei bụọmọ wẹrị iné ịkịọụ ma sụọmụ yọ tịẹmọgha fa, anịa ị́mịnị angọ kẹrị inyenrinbụọ nana wẹrị “[iné] iroromịnị yebo mọ bá iné angọ dọụyọ mọ kẹrị mịẹgha fa.” (Eph. 2:3) Ị́mịnị tebara kị mịẹwẹrị bịsẹ sei iroro yebo dẹịnmọmịnị a o?

DẸỊNMỌMỤ BARAMỊ

15. Omịnị sei iroro yeama dẹịnmọ dọụmịnịsẹ, tetuu kị duonị omịnị wo suusụọ yọbo nimi angọ pịrị agbẹị-emi a o?

¹⁵ Ị́mịnị sei iroro yeama dẹịnmọ dọụmịnịsẹ, pebidá iné suusụọ yọbo nimi angọ pịrị. Bá “agbẹịgha iroro yeama” kọn angọ lẹlẹmọ kụmọ. (Jas. 1:22) Iné suusụọ yọbo dụbagha bara iroro kụmọ, gbaamaba omịnị iroro kpọ paaemi ‘Zịnịotu wuru bou ị dẹịn-emi kị tọn,’ iné suusụọ yọbo kọn kịmịotu a wẹrị kụmọ. Gbaamaba ‘ị taa ị tarị wẹrị a, ịmịnị ba paatuu foto digha mọ kị tọn,’ bịsẹ bara ị́mọ mịedaba dadiye a koro sụọmụ yọbị bụọbụọ dẹịnmịnị. Anịduonị iné adụdụ bolou kpọ gbaateiyọ nana kụmọ. Iné mịẹkiri yọbo kọn angọ a nimi.—Gal. 6:7.

16. Omịnị tebara ka kị kịrịịye mịẹmụ yọ gbinipẹlẹ angọ pịrị a paaemi a o?

¹⁶ Omịnị wo suusụọ yọbo nimi angọ pịrị yọ bụọmọ siindẹmị, omịnị mọkpọ bịsẹ yebo mịẹgha fa bara gbinipẹlẹ angọ pịrị agbẹị-emi. (1Cor. 9:​26, 27; 1Thess. 4:4; 1Pet. 1:​15, 16) Anịduonị omịnị wo suusụọyọ dẹịnmịnị ifiebo nimi. Ereinmị omịnị zụa ifieama suusụọ dẹịn kpọ paaemi. Gbaamaba, wo angọ dẹịn-emi ifie anịghakpọ dein dụbadaba omịnị suusụọ dẹịn a paaemi. Bịsẹyọ bụọmọ kpọ dadiye bo a paaemi bara kẹrị iroro, bá bodaba wo ịkịọụ ma mịẹmụye tọnpẹlẹ. Omịnị angọtọlọmọ dẹkị dadiye bomụ ifie laa agbẹị-emi. Prov. 22:3.

17. Joseph mịẹdịa yemị te ka kị wo tolumọ ma o? (Genesis 39:​7-9) (Fotobo kpọ dii.)

¹⁷ Wo wẹrị Potiphar taama Joseph dadi ifiemị Joseph mịẹ bara kẹrị ẹrẹtei. Ómịnị benenbene amọ mọ́ bụnụgha fa bara mịẹ ifiemị, ómịnị ifie famọgha bara ka kị benebene amọ mọ́ bụnụgha fa bara mịẹpaamọmị. (Genesis 39:​7-9 goo.) Omịnị bịsẹyọ duo teeki tolumọ akị ma o? Joseph zịnị kịmị eremọ bụnụmụ yọbị ebigha bara nimi angọ pịrị dẹkị Potiphar taama ụ dadi ifie laamị. Bịsẹ kpekẹnị bara kị, omịnị kịrịịye kị mịẹmụ bara gbinipẹlẹ dẹkị dadiye bo ifie laa. Bịsẹ bara wo mọ mịẹdaba, dadiye bodẹ ifiesẹ, omịnị ebi iroro tọnmụ yọbị bọụbọụ wo pịrị dẹịnmịnị.

“IFIEBOSẸ INÉ ANGO SỌNỊ DII”

18. Ị́mịnị tebara ka kị agbẹịgha iroro yeama dẹịnmọ a paaemi a o? (2Corinthians 13:5)

¹⁸ Ị́mịnị sei iroro yeama dẹịnmọ dọụmịnịsẹ, “ifiebosẹ iné angọ sọnị dii”. (2Corinthians 13:5 goo.) Ị́mịnị ifiebosẹ iné iroromịnị yebo mọ iné mịẹmịnị yebo mọ sọnị dii wẹrị dei agbẹị-emi yọ ẹrịdaba dei. Gbaamaba, ị́mịnị dadiye dẹịnmọdẹ ifiesẹ, ị́mịnị laa angọ bii a paaemi: ‘Ịmịnị bei dadiye dẹịnmọmị, ifie akị ma?’ Ifie akị bara ị́mọ dọụ ẹrịdaba, angọ suumọ kụmọ. Ania, mịẹ agbẹịye mịẹ. Mị biibịbịbo kọn angọ bii: ‘Ịmịnị agbẹịgha iroro yeama kọn ine ịkịọụ duo kọnsiinmịnị ifie mịẹ zaụmọ a paaemi a? Ịmịnị kọn angọ mịẹ ganaganamịnị yebo dadiye dẹịnmọmụ yọ mịẹ kụrọmọ ị pịrịmịnị a? Ịmịnị agbẹịgha yeama ẹrịdaba ifie famọgha bara ine tọrụbo waị zịnị yọ diimịnị a? Jehovah mị olokobo tụa ị pịrị yọmị kụrọ ị pịrị-emi kpọ, ine ebi kị duonị tụa wẹrịemi bara ịmọ nimi wẹrịemi?’—Ps. 101:3.

19. Wo tọn angọ pịrịmịnị irorobo zaụ-emi kị gbaa kpọ, tebara ka kị omịnị sei iroro yeama datịẹmọmụ yọ mịẹ kụrọmọ wo pịrị a paaemi a o?

¹⁹ Ị́mịnị gbaatẹị inyenrinbụọ nana kụmọ. Bible gbaa amọ: “Adụdụmị kịmị lẹlẹmọ zịnị yesẹ dẹịn-emi bá kẹrị tịẹmọmụ yọ kpọ kụrọ-emi.” (Jer. 17:9) Jesus gbaa amọ “bolousei iroroyebo” adụdụ kị duo paa bomịnị. (Matt. 15:19) Gbaamaba, paatuu foto anighakpọ vidio diigha timi zụa ifie laadẹ kịmị, bo kịmị mịẹ agbẹịgha zọzọ anga iroro yeama nanamịnị yeama didaba, iroro kpọ paaemi, mị paatuu fotogha duonị diimụ yọbị “seigha.” Bịsẹ ụbọmị mọkpọ iroro a paaemi, ‘Ịmịnị bịsẹ yebo mịẹghasẹ a kẹrị iroromịnị yọbị seigha.’ Bịsẹ bara paadaba, ụbọ adụdụ kị ụ lẹlẹmọ wẹrị “bọlọụ wẹrịmọ wó angọ dọụ yeama mịẹmụ iroro tọnmịnị.” (Rom. 13:14) Teeki baratụa ị́ pịrịwẹrị bịsẹ bara mịẹgha fa o? Agbẹịgha iroroama wo mọ tọndaba, kala yaị kị tọn kpọ wo mịẹ wẹrị opu sei iroroama tọn wẹrị sei mịẹ a paaemi.c Anịduonị, bịsẹ a paa “sei iroroyebosẹ” datịẹmọ bá gbaatẹị inyenrinbụọ kpọ nana kụmọ.

20. Mị bọlọụmị teeki timi wo korumịnị a, anịa mị tịẹkirimị teeki baratụa wo pịrịmịnị a o?

²⁰ Wo tolumọdẹ baramị, Jehovah kụrọ kọn wo pịrịwẹrị dadiyeama dẹịnmọmịnị. Bịsẹyọ kị bụọmọ kpọ, Jehovah dieneni duonị, omịnị ayakpọ ma fagha fagha ụndụ nanamụ ukiemọye nanadẹ. Bịsẹ ifie laadaba, sei iroro yeama bá wo ịkịọụ mọ adụdụ mọ a sụọgha fa, omịnị peree kị timi Jehovah karịmịnị! Wo timi bịsẹ ifie korumịnịmị, omịnị laa sei iroro yeama dẹịnmọmụ kụrọ mọ ukiemọye mọ nana wẹrịemi. Wo angọtụamịnị yọmị Jehovah tarịama kọn wo pịrịwẹrị, laa dẹịnmọmịnị!