Jesus Kụn Ịkịan Bị Te Ka Kị Wo Tolumọ Ma O?

1. Tetuu kị duonị omịnị kụraịbosẹ Christ fịị oge ma mú agbẹị-emi a o?

JEHOVAH wó tọbọụ fịrịmọ bo ịkịankụn yọbị yelaa wo pịrịemi! (2Cor. 9:15) Tuubị Jesus kụn ịkịan kị duonị, ị́mịnị Jehovah mọ ebi ikie-otuama a paamọ fomuun nanadẹ, bá ị́mịnị fagha fagha ụndụ kpọ nana a paadẹ. Anịduonị omịnị tọrụkẹrịyọ akị Jehovah mọ Jesus kụn ịkịan mọ a nana agbẹị-emi! (Rom. 5:8) Jesus baratụa wo pịrịwẹrị ifiebosẹ wó kụn ịkịan didụbamọ bá tọrụkẹrịyọ mịẹdịa dọụmịnị, anịduonị ómịnị wo fịị oge mịẹpaamọ wẹrị wosẹ kụraịbọsẹ kẹnị ifie mịẹ akị wó ukie bara gbaamị.—Luke 22:​19, 20.

2. Bei egberitịbịmị omịnị teeki tolumọ dọụmịnị a o?

² Mị kụraị Nanaowei Buburu Fịyaị Fị Oge teimụ ereinmị, anị Saturday, April 12, 2025. Tamanaịnyọ fagha barabị wosẹ angọ tọlọmọwẹrị mú paamịnị. Omịnị bịsẹ oge teimụ ovuru kọn Jehovah mọ Jesus mọ mịẹ wo pịrịdẹ yebo kẹrị irorodaba, biin arereamaa kị mịẹpaamọ wo pịrịmịnị. Bei egberitịbịmị, parụ-ịkịan mị, Jehovah mọ Jesus mọ gbelemọ yọbị akị wo tolumọ wẹrịemi yebo kị wo mọ kẹrị ẹrẹteimịnị. Barịị egberitịbịmị, baratụa wo pịrịwẹrị parụ-ịkịan duo arerenana bá tọrụkẹrịyọ mịẹdịamụ bara kị wo mọ tolumọmịnị.

PARỤ-ỊKỊAN MỊ JEHOVAH GBELEMỌ YỌBỊ WO TOLUMỌ WẸRỊEMI YEBO

3. Tetuu kị duonị kẹnị ụbọ kị laa sei mọ fịị mọ bara duo wo zụọmịnị a o? (Foto kpọ dii.)

³ Jesus kụn ịkịan mị Jehovah kịrịị ụgụlapẹlẹ inyenrinbụọ nana wẹrịemi bara ka kị wo tolumọmịnị. (Deut. 32:4) Tebara a o? Iroro dii: Adam gbaa-naagha kị duonị, sei mọ fịị mọ wo laamịnị. (Rom. 5:12) Sei mọ fịị mọ bara duo wo zụọmụ yọ duonị, Jehovah wó tọbọụ Jesus fịrịmọ ịkịankụn wo pịrịmị. Anịa tebara kị kẹnị sei mịẹgha kịmị kị fịị wẹrị biin kịmịama zụọbụọmọmịnị a o? Fịrịmọpaaowei Paul gbaamị: “Kẹnị gbaa-naagha owei [Adam] kị duonị biin kịmịama sei bolou duo sụọmịnị, bịsẹ bara kị kẹnị gbaayọnaa owei [Jesus] kị duonị biin kịmịama bo yalịmịnị.” (Rom. 5:19; 1Tim. 2:6) Akị zịnị bara gbaamaba, kẹnị yalịtimi owei gbaa-naagha timi wo mịẹ sei mọ fịị mọ omoniotu a paamị. Anịduonị, kẹnị gbaayọnaa yalị kịmị kị wo mịẹ peree nanamịnị.

4. Tetuu kị duonị Jehovah ịkịan kụngha bara Adam gbaayọ naamịnị awọụbo bụọmọ inyenrintimi bẹseri bẹseri laagha o?

⁴ Jesus kọkọ fịịdẹ kị wo zụọbụọmọ agbẹị-emi a? Tetuu kị duonị Jehovah ịkịan kụngha bara Adam gbaayọnaa awọụbọ bụọmọ inyenrintimi bẹseri bẹseri laagha o? Kịmịotu bịsẹ bara kị ebidẹịn emi bara iroro a paaemi. Anịa Jehovah bịsẹ bara kọn ụgụla pẹlẹgha. Jehovah kịrịị bara ka kị ụgụla pẹlẹmịnị duonị, tọrụ kọn Adam mịẹ kụrọ sei diiwẹrị kọnsiin bara mịẹgha fa.

5. Tetuu kị duonị ifiebosẹ Jehovah kịrịị ye kị mịẹmịnị eti wo mọ nana wẹrịemi a o?

⁵ Mọkpọ iroro dii, Jehovah kịrịị ụgụlapẹlẹmụ yọ gbein-koromọ wẹrị parụ-ịkịan mịẹpaamọgha bara Adam zii awọụbosẹ bụọmọ inyenrintimi bẹseri bẹseri laawẹrị a, teeki paamọ timi ma o? Jehovah zụa ifieama kịrịị ụgụla pẹlẹgha bara kịmịama mọ gbaamọ timimị. Gbaamaba, zụa kịmịama tamanaịnyọ nanawẹrị bii kpọ paaemi, Jehovah kikoromọdẹ yebosẹ kọkọ paamịnị? Omịnị tamanaịnyọ nana agbẹịgha. Yebị ụ gbele kụrọmọ kpọ Jehovah kịrịịye kị mịẹmị, ómịnị wó tarị kụrọmọ wẹrịemi tọbọụ kọn ịkịankụn wo pịrịmị. Bịsẹ yọmị mịẹdịa amọ Jehovah ifiebosẹ kịrịịye kị mịẹmịnị.

6. Parụ-ịkịan bị tebara ka kị Jehovah wo tarị wẹrịemi bara mịẹdịa ma o? (1John 4:​9, 10)

⁶ Parụ-ịkịan mị Jehovah kịrịị ụgụla pẹlẹmịnị bara mịẹgaan wẹrịemi, bịsẹ yọ kị bụọmọ kpọ, ómịnị wo tarị wẹrịemi bara kpọ mịẹgaan wẹrịemi. (John 3:16; 1John 4:​9, 10 goo.) Parụ-ịkịan bị mịẹgaan wo pịrịdẹ, Jehovah wosẹ bẹseri bẹseri ụndụ nana, bá wó warị otu a paamọ yọ dọụ wẹrịemi kị duonị Jesus fịrịmọ bo ịkịankụnmị. Adam sei mịẹdẹbị, Jehovah ụ duo wó warị duo serimị. Bịsẹ ye kị duonị, wosẹ zii Jehovah warị ma atụgha. Anịa parụ-ịkịan duonị, Jehovah wo seibo akị wo bụomọmịnị bá bei bọlọụbị peibolou nanawẹrị gbaaye peimịnị otubo wó warị ma sụọmịnị. Jehovah wo seibo akị wo bụọmọdẹ duonị, omịnị laa Jehovah mo bá wo bịnaotubo mọ ebi ikie otuama paamịnị. Jehovah tarị mị kọkọ wosẹ kị laaemi!—Rom. 5:​10, 11.

7. Jesus ụyafị yọmị tebara ka kị Jehovah olomu bara kọn wo tarị wẹrịemi bara mịẹdịa ma o?

⁷ Omịnị ebibara parụ-ikịan mị a sụọtuu nimidaba Jehovah wo tarị wẹrịemi bara wo mọ nimimịnị. Satan oweipii wẹrị gbaa amọ Ọkpọnanaowei odubo kịmị ụya bolou a sụọdaba Jehovah gbein-koromọmịnị. Satan gbaa egberimị ekpe egberi bara mịẹgaanmụ yọ duonị, Jehovah wó tọbọụ bụọmọ ụyafịtimi fịịmị. (Job 2:​1-5; 1Pet. 2:21) Karịbụọ egiren-otubo Jesus gbaseimọ, army-otubo ụ vụrọ, bá ụ kaị baa ifiemị, Jehovah paa yebosẹ ẹrịmị. Jehovah wó tọbọụ mị dọọn naatimi fịị barasẹ ẹrịmị. (Matt. 27:​28-31, 39) Jehovah bei paa yebosẹ tịẹmọmụ kụrọ kpọ nana wẹrịemi. Gbaamaba, kịmịama gbaa amọ: “[Ọkpọnanaowei] kọkọ ị́ tarị wẹrịemi aba Ụ wẹrị bo ị́ zụọ a,” Jehovah Jesus zụọ a paatimimị. (Matt. 27:​42, 43) Anịa, Ọkpọnanaowei ụ zụọ wẹrị a, parụ-ịkịan mị ba paagha fa, omịnị kpọ ukiemọye nanagha bara kị inyenrinmụ timimị. Tarị kị duonị Jehovah wó tọbọụ bụọmọ ụyafịtimi fịịmị.

8. Jesus ụyafịtimi fịị yọbị tebara ka kị Jehovah gbele ma o? Tuugbaa. (Foto kpọ dii.)

⁸ Jehovah kị dụbadẹịn Ọkpọnanaowei duonị, dọọn naagha bara omịnị mọ irorokụmọ! Jehovah wó emibara kị diwẹrị wosẹ tẹmẹ wẹrịemi, anịduonị agbẹịgha ye paadaba ụ dọọngha bara wo mọ irorokụmọ. Bible gbaa baramị ye Jehovah “dọọnmị” bá ụ mịẹ “eneni kẹrịmị.” (Ps. 78:​40, 41) Wẹrị, Abraham mọ Isaac mọ paamọ yemị iroro dii a, Jehovah gbaa Abraham pịrị amọ ómịnị wó ziidẹ kẹnị tọbọụ mị akị ịkịankụn ụ pịrị. (Gen. 22:​9-12; Heb. 11:​17-19) Abraham adẹịn akị wó tọbọụ baa dọụtimi ifiemị, yemị ụ dọọn kụrọmọmị. Anịa Jehovah wó tọbọụ bụọmọ wẹrị kịmịama pịrị ụyamọtimi fịị yọmị ụ dọọn akị Abraham dọọn bara kpọ dẹịn wẹrịemi!—Jw.org duosụọdá Imitate Their Faith—Abraham, Part 2 vidio dii.

9. Jehovah nana wẹrịemi olomu tarị gbelemọ yọbị, Romans 8:​32, 38, 39 te ka kị ị́ tolumọ ma o?

⁹ Parụ-ịkịan mị wo mọ kẹrị iroro daba, wo tarị Jehovah dẹịn-emi kịmị fa—wo mọ mọ́ naịndẹịn bịna-ụbọ kpọ laa bịsẹ bara kọn wo tarịgha fa. (Romans 8:​32, 38, 39 goo.) Jehovah tarị bị dụba akị omịnị wo angọbo tarị wẹrịemi bara kpọ dẹịn-emi. Ị́mịnị inyenrintimi bẹseri bẹseri laa dọụmịnị a? Jehovah bịsẹ yọbị dịsẹ nana kụrọmọ emi. Iné seibosẹ kọn ị́ bụọmọmụ yọbị ị́ dịsẹ ma? Jehovah kpọ bịsẹ yọbị ụ dịsẹ kụrọmọ emi. Jehovah wo bara bọọ dọụ wẹrịemi yesẹ, omịnị parụ-ịkịan mị wo tọrụkẹrị-emi bara mịẹdịa, peibolou akị wó atụa bá gbaaye pei. Parụ-ịkịan mị yelaa dịẹpịrịye, Ọkpọnanaowei akị wo tarị wẹrịemi bara kị mịẹdịa wẹrịemi. Jehovah wo tarịemi duonị ayakpọ laadaba, zịnị mịẹ wo pịrịmụ yelaa yeama wo mọ ẹrịmịnị.—Eccl. 3:11.

PARỤ-ỊKỊAN MỊ JESUS GBELEMỌ YỌBỊ WO TOLUMỌ WERIEMI YEBO

10. (a) Jesus á mọ báa dọụtimi ifiemị teeki ụ gbele kụrọmọ ma o? (b) Jesus tebara ka kị Jehovah ẹrẹ mịẹ yalịyalị ma o? (“Jesus Wó Peibolou Kerịkụrọmọ Duonị Jehovah Ẹrẹ Mịẹ Yalịyalịdẹ” ekpedi dii)

¹⁰ Kịmịotu ụ Daụ ẹrẹ gbelemọ yọmị gbaamịnị egberibo Jesus gbele kụrọmọmị. (John 14:31) Jesus kịmịama ụ kọn furu kịmị bara kị baa wẹrị ụ Daụ ẹrẹ gbaseimọmụ yọ kẹrị iroro wẹrị eneni-kẹrịmị. Anịduonị ọ́mịnị tẹẹmị: “Ị́ Daụ, mịẹ ka paaemiaba, mị dadiye mị kọnsiin.” (Matt. 26:39) Jesus akị Jehovah ghọ nana wẹrịemi peibolou kẹrịkụrọmọ timi fịị yọmị, Satan gbaa egberibosẹ ekpe egberiama bara mịẹgaanmị bá Jehovah ẹrẹ kpọ mịẹ yalịyalịdẹ.

11. Jesus tebara ka kị kịmịotu tarị wẹrịemi bara mịẹdịa ma o? (John 13:1)

¹¹ Parụ-ịkịan mị Jesus olumo bara kịmịawọụ tarị wẹrịemi bara kpọ mịẹdịamị, ómịnị wó tuuduo-otubo tarị dẹịn-emi. (Prov. 8:31; John 13:1 goo.) Jesus kiriogbo bọọ bodaba, zụa wẹnịmụ fịrịama kụrọmịnị bara nimi wẹrịemi, gbaamaba ụyafịtimi fịịmụ yọ kpọ emi. Mọabịkpọ, Jesus alaghatimi fịịmịnị bara kọn angọ nimi kpọ, eneni-kẹrị bara akị egberigbaa fịrị wẹnịgha. Anịa, Jesus wó adụdụsẹ akị egberigbaa, kịmịotu tolumọ bá baratụa kịmịotu pịrịmị. Wó fịịmụ erein kpọ, Jesus wó tuuduo-otubo bụọbo sụrụ bá kịmị kụrọmọ egberiama akị á tolumọmị. (John 13:​12-15) Jesus ụ kaị wẹrịemi tịịn ma dọọn naamịnị ifie kpọ ukiemọye akị ụ mọ mọ́ naịn-emi furuowei pịrị, bá John tọrụtụa ụ yinma dii bara kpọ gbaamị. (Luke 23:​42, 43; John 19:​26, 27) Jesus, wó fịị bẹtịbị ka kị wo tarị wẹrịemi bara mịẹdịagha anịa kiriogbo bọọ a timi ifiesẹ ka kị wo tarị wẹrịemi bara mịẹdịamị.

12. Jesus mọkpọ tebara ka kị baratụa wo pịrịmịnị a o?

¹² Christ “kẹnị ifie” kị fịị kpọ, ọ́mịnị mọkpọ biin fịrị kị wẹnị wọ pịrịmịnị. (Rom. 6:10) Te ụwọụ a o? Parụ-ịkịan duo paadẹ ebi yebosẹ wo bara laamụ fịrịbo kị Jesus mọ wẹnịmịnị. Wo wẹrị Jesus wẹnịmịnị fịrịbo dii. Jesus Pẹrẹ sụọdẹ, Tịbị Ịkịankụn-owei a paadẹ bá tịbị a timi itu dimịnị. (1Cor. 15:25; Eph. 5:23; Heb. 2:17) Jesus kị sẹlẹ akịdẹ otubo mọ biin kịmị ekpudu mọ bẹnịmọmịnị, ómịnị bei kụrọ fịrị wẹnịsiin dẹkị opu akpotu kunumọ ifie laamịnị.b (Matt. 25:32; Mark 13:27) Wosẹ laa bei kunumọ ereinbo peibolou nana bara akị Jehovah karịmụ yọ duonị, Jesus tẹmẹanga fịyaịama akị agbẹị ifie wo pịrịmịnị. (Matt. 24:45) Ómịnị Kụraị Kẹnị Ogizị bọọ daamịnị ifie kpọ, ebi yeama mịẹ wọ pịrịmịnị. Jehovah kọkọ wó tọbọụ kọn wo pịrịdẹ!

PẸLẸGHA BARA TOLUMỌ BỌLỌỤ AMÚ

13. Goodẹ yebo kẹrị iroromịnị yọbị tebara ka kị baratụa ị́ pịrịwẹrị, Ọkpọnanaowei mọ Christ mọ ị́ tarị wẹrịemi bara nimimịnị a o?

¹³ Pẹlẹgha bara iné tolumọdẹ yebo akị tụa iroromịnị yọkị baratụa ị́ pịrịwẹrị Jehovah mọ Jesus mọ ị́ tarị wẹrịemi bara nimi ebimọmịnị. Mị kụraịmị Memorial laa dọụmịnị ifie mọ bá bụọdẹ ifie ovuru kọn, Jesus gbelemọ nịa Bible funbo kẹnị anịghakpọ zụa yọama goo a paaemi. Biin yọama akị kẹnị ifie goomụ bara mịẹ kụmọ. Anịa, izougha bara ka kị goo bá Jehovah mọ Jesus mọ tarị agbẹị-emi zịnị tuuama dọụ ẹrị. Yelaadẹịn yemị, iné tolumọdẹ yebo gbaa zịnịotu pịrị.

14. Psalm 119:97 mọ bá footnote mọ didaba, Ye a tuudọụmị tebara ka kị baratụa wo pịrị parụ-ịkịan mọ bá zịnị tolumọ yeama nimimịnị a o? (Foto kpọ dii.)

¹⁴ Ị́mịnị gesii ma timi biin kụraịama kị baịdẹ kpọ, ị́mịnị Jehovah kịrịị ụgụlapẹlẹ yọ mọ, wó tarị mọ, bá parụ-ịkịan gbelemọ yọmị mọkpọ aya yeama tolumọmịnị, bịsẹ yọmị ị́ mịẹ tamamaa kpọ paaemi. Gbẹsịmị omịnị ifiebosẹ aya yeama tolumọmịnị. Anịa, ị́mịnị laa teeki mịẹmịnị a o? Jehovah Ogbo mịẹpaamọdẹ funbo mọ bá vidiobo mọ akị angọ tolumọ. Sụọtuu nimigha egberi ị́ mọ ẹrịdaba, tuudọụ. Bei tolumọdẹ aya yebo Jehovah, Jesus bá ánị nana wẹrịemi tarị gbelemọ yomị akị ị tolumọ wẹrịemi yebo kẹrị iroro.—Psalm 119:97 goo bá footnote kpọ dii.

15. Tetuu kị duonị omịnị pẹlẹgha bara Bible duo aya yeama tolumọ agbẹị-emi a o?

¹⁵ Ị́mịnị Bible goo bá ye asụọtuu dọụmịnị ifiebị aya yeama kị ị́ mọ ẹrịgha kpọ suusụọ kụmọ. Iné angọ kọn gold dọụmịnị otu tọnmọ dii. Gold dọụmịnị otu etipou inyenrinbụọ nana wẹrịemi, ámịnị biin hour-ama ka kị kiri sou dẹkị kala gold ẹrịmịnị. Anịa, kala gold kị ẹrị kpọ yelaa kụrọmoemi duonị ámịnị angọtụa fịrị wẹnịmịnị. Omịnị Bible bọọ goomịnị yebo ebi gold dẹịn kụrọmọ emi! (Ps. 119:127; Prov. 8:10) Anịduonị etipou bara Bible goo bá aya yeama tolumọ angọ pịrịmụ ifie mịẹpaamọdá pẹlẹgha bara tolumọ bọlọụ amú.—Ps. 1:2.

16. Omịnị tebara ka kị Jehovah mọ Jesus mọ dịmịẹmịnị a o?

¹⁶ Ị́mịnị Bible tolumọdaba, iné tolumọdẹ yebo akị tụa inyenrin. Gbaamaba, Jehovah akị kịmịsẹ tarị wẹrịemi bara dimịẹ. Jesus ụ Daụ ẹrẹ mịẹ yalịyalị bá zịnịotu tarị wẹrịemi yọ kị duonị ụyafịmị, ị́ kpọ ụ dimịẹ. Bá mọkpọ, Jesus egberigbaa bara dimịẹdá ebiegberi gbaa zịnịotu pịrịdá ámịnị kpọ bo Jehovah mịẹ kịmịawọụ pịrịdẹ yebo nimi bá peibolou akị wó a tụa.

17. Omịnị barịị egberitịbịmị teeki tolumọmịnị a o?

¹⁷ Omịnị parụ-ịkịan kẹrị iroro bá tọrụkẹrịyọ mịẹdịa daba, omịnị akị Jehovah mọ wó tọbọụ mọ ghọ nana wẹrịemi tarị bị kụrọdẹịnmịnị, bá ámịnị kpọ wo tarị kụrọmọ dẹịnmịnị. (John 14:21; Jas. 4:8) Anịduonị wo wẹrị Jehovah mịẹpaamọdẹ yebo kọn ebibara parụ-ịkịan tolumọ nịmị. Barịị egberitịbịmị omịnị Jesus kụn ịkịan duo nanadẹ arerebo mọ bá Jehovah tarị mị tọrụkẹrịyọ mịẹdịamịnị bara kị tolumọminị.