Omịnị Jehovah Tarị Duo Arere Nanamịnị Baramị

1. Omịnị teeki mịẹwẹrị Jehovah mịẹ pọwẹị a paaemi a o?

IRORO DII, ị́mịnị kẹnị ebi bá yelaaemi dịẹpịrịye kọn iné tarị wẹrịemi ụbọ pịrịwẹrị, ụbọmị ye kọn yemịẹgha anịghakpọ kọn kịmị ẹrịgha yọ a sọwẹịdaba, ị́mịnị pọwẹịgha fa! Bịsẹ kpekẹnị bara kị, ụbọmị ye kọn ebibara fịrị wẹnị bá tọrụkẹrịyọ mịẹdịa-daba ị́mịnị pọwẹịmịnị. Teeki wo mọ gbaamịnị a o? Jehovah wó Tọbọụ kọn fịị wo pịrịdẹ. Omịnị bei yelaa dịẹpịrịye mọ bá Jehovah dịnẹmọ wẹrị parụ-ịkịan mịẹpaamọ tarị mọ wo a tọrụkẹrịemi bara mịẹdịa-daba, Jehovah mịẹ pọwẹịmịnị!—John 3:16; Rom. 5:​7, 8.

2. Omịnị bei egberitịbị mị teeki kẹrị ẹrẹtei dọụmịnị a o?

² Kụraịbo bụọmịnị mị, omịnị ba mị yelaa dịẹpịrịye kọn ye dimọgha kpọ paaemi. Bịsẹ bara paadaba omịnị Ọkpọnanaowei dịẹpịrịye kọn kịmị ẹrịgha yọ a sọwẹịdẹ bara kị paadẹ. Bịsẹ bara paa wo mọ dọụgha duonị, omịnị ifiebosẹ Ọkpọnanaoweị mọ Christ mọ mịẹ wo pịrịdẹ yebo kẹrị iroro. Bei egberitịbịmị baratụa wo pịrịwẹrị bịsẹ bara mịẹmịnị. Omịnị bei tịẹkịrị ma parụ-ịkịan duo arere nanamịnị bara mọ bá bei bọlọụ bọọ parụ-ịkịan duo nanamịnị arerebo mo kẹrị ẹrẹteimịnị. Omịnị Memorial ifiemị Jehovah tarị bị, wo a tọrụkẹrịemi bara mịẹdịamụ bara kpọ kẹrị ẹrẹmịnị.

OMỊNỊ BEI TỊẸKỊRỊ BỌỌ ARERE NANAMỊNỊ BARABỊ

3. Teeki kẹnị ụwọụ nẹ omịnị parụ-ịkịan duo arere nanamịnị ụwọụ a o?

³ Omịnị bei tịẹkịrị kpọ Christ kun ịkịan duo arere nanamịnị. Gbaamaba, parụ-ịkịan duonị, Jehovah wo seibo kọn wo bụọmọmịnị. Jehovah wo bụọmọgha fa bara gbaa kpọ paatimi mị. Anịa ómịnị wo bụọmọmụ yọbị dịsẹ-emi. Jehovah kịmị bụọmọ yọbị Psalm fun gẹẹowei a tọrụkẹrị duonị ụ gbaamị: “Ị́mịnị, O Jehovah, ebi bá ifiemọsẹ kịmị bụọmọ dọụmịnị.”—Ps. 86:5; 103:​3, 10-13.

4. Jehovah parụ-ịkịan mịẹpaamọ te otuama kị pịrị ma o? (Luke 5:32; 1Timothy 1:15)

⁴ Zụa kịmịama Jehovah á bụọmọ agbẹịgha bara iroromịnị. Kọkọ, wosẹ Jehovah pịrị bụọmọ agbẹịgha. Fịrịmọpaaowei Paul wó angọ gbelemo yọbị gbaamị “fịrịmọpaaowei akị ị tịịn agbẹịgha.” Mọabịkpọ, ómịnị gbaamị: “Ọkpọnanaowei wo laamọ agbẹịgha ebi kọn ị pịrịdẹ kị duonị ịmịnị laa bei fomuun nanamị.” (1Cor. 15:​9, 10) Omịnị wo mịẹ seibo duo boloudei-daba, Jehovah wo bụọmọmịnị. Tetuu a o? Jehovah wo bụọmọ agbẹị-emi kị duonị wo bụọmọmịnị bara fa, anịa ómịnị wo tarị wẹrịemị kị duonị wo bụọmọmịnị. Iné mịẹ sei bị Jehovah ị́ bụọmọ agbẹịgha bara ị́ mọ iroromịnị-aba, ukie Jehovah sei mịẹgha kịmịama duonị parụ-ịkịan mịẹpaamọgha, anịa boloudẹịdẹ sei mịẹ otuama kị duonị parụ-ịkịan mịẹpaamọmị.—Luke 5:32; 1Timothy 1:15 goo.

5. Jehovah wo seibo kọn wo bụọmọ agbẹị-emi bara wo mọ gbaa a paaemi a? Tuugbaa.

⁵ Kẹnị ụbọ kpọ Jehovah karịtimi aladẹ duonị Jehovah wo bụọmọ agbẹị-emi bara iroro kụmọ. Kọkọ, wo peibolou nana wẹrịemi yọbị Jehovah a tọrụkẹrịemi. (Heb. 6:10) Omịnị wẹnị ụ pịrị fịrịama kị duonị Jehovah wó Tọbọụ fịrịmọ bo fịị wo pịrị bara fa. Wo wẹnị fịrịama kị duonị Jehovah wo mịẹ seibo kọn wo bụọmọ agbẹị-emi bara wo mọ irorodaba, Christ kụn ịkịan mị ye a paagha bara kị wo mọ gbaamịnị.—Galatians 2:21 kọn tụa dii.

6. Tetuu kị duonị Paul angọtụa Jehovah fịrị wẹnị ma o?

⁶ Paul Ọkpọnanaowei wó seibo kọn ụ bụọmọ agbẹịgha bara nimimị. Anịa tetuu kị duonị, ómịnị angọtụa Jehovah fịrị wẹnị ma o? Paul Jehovah dieneni mị wó a tọrụkẹrịemi bara mịẹdịamụ yọ kị duonị, angọtụa Jehovah fịrị wẹnịmị. (Eph. 3:7) Omịnị Jehovah dieneni mị nana dọụmịnị kị duonị angọtụa ụ kạrịgha fa, anịa Paul mịẹ baramị, wo kpọ Jehovah dieneni mị wo tọrụkẹrịemi kị duonị, angọtụa Jehovah ụ karịmịnị.

7. Teeki zịnị ụwọụ nẹ omịnị bei tịẹkịrị ma parụ-ịkịan duo arere nanamịnị ụwọụ a o? (Romans 5:1; James 2:23)

⁷ Zịnị ụwọụ nẹ omịnị bei tịẹkiri bọọ parụ-ịkịan duo arere nanamịnị ụwọụmị, anị omịnị Jehovah mọ naịn ebi ikie kẹrịmịnị yọmị.a Bụọdẹ egberitịbị gbaa baramị, wo zii ifiemị, omịnị Ọkpọnanaowei mọ ikieotu a paagha wẹrịmị. Anịa parụ-ịkịan kị duonị, omịnị “Ọkpọnanaowei mọ dọọ” nanadẹ bá ụ mọ mó kpọ bo naịndẹ.—Romans 5:1; James 2:23 goo.

8. Tetuu kị duonị Jehovah tẹẹbịbị mịẹ fomuun kọn wo pịrị yọmị, wo tọrụkẹrị agbẹị-emi a o?

⁸ Omịnị Jehovah mọ naịn-emi duonị, omịnị fomuun nanawẹrị tẹẹ Jehovah yarịmịnị. Jehovah ụ karịmịnị otubo kẹnịyọ a bẹnịwẹrị tẹẹmịnị tẹẹbịbịbo peimịnị, bịsẹ yọ bụọmọ kpọ ómịnị wo kẹnị ụbọ kẹnị ụbọ tẹẹmịnị tẹẹbịbịbo kpọ naamịnị. Tẹẹbịbị baratụa wo pịrịwẹrị wo adụdụbo mịẹ dọọ nanamịnị. Anịa tẹẹbịbị wo mịẹ dọọ nanamịnị yọ bụọmọ kpọ wo mọ Jehovah mọ ikie kpọ mịẹ kụrọmọmịnị. (Ps. 65:2; Jas. 4:8; 1John 5:14) Jesus kiriogboma timi ifiemị, ómịnị ifiebosẹ kị tẹẹtimi mị. Tẹẹbịbị ụ mọ Jehovah mọ ikie mịẹ kụrọmọ dẹịnmịnị bá Jehovah wó tẹẹbịbịbo parụmụ bara Jesus mọ nimiwẹrị kị duonị, ómịnị ifiebosẹ tẹẹtimi mị. (Luke 5:16) Jehovah, Jesus kụn ịkịan duo fomuun mịẹpaamọ wo pịrịwẹrị bo wó ikie otuama paa, bá tẹẹbịbị duo ụ mọ mọ́ ẹrẹmịnị yọbị wo a tọrụkẹrị kamị!

BEI BỌLỌỤ BỌỌ NANAMỤ AREREBO

9. Bei bọlọụmị parụ-ịkịan mị, tebara ka kị arere mịẹpaamọ peibolou nana Jehovah karịmịnị otubo pịrịmịnị a o?

⁹ Peibolou akị Jehovah a tụawẹrị Jehovah karịmịnị otubo, bei bọlọụ bọọ parụ-ịkịan duo te arere kị nanamịnị a o? Ámịnị fagha fagha ụndụ nanamịnị. Kịmịawọụ fịịtimi biin kụraị-ama kị baịdẹ, anịduonị, biin kịmịama mị kikoromọ yebị benebene paagha fa bara kị iroromịnị. Anịa Jehovah wosẹ inyenrintimi bẹseri bẹseri laamụ bara ka kị wo tẹmẹ wẹrịemi. Adam sei mịẹgha wẹrị a, omịnị inyenrintimi bẹseri bẹseri laamụ yọmị kẹnị ụbọ kpọ pei a seighamọ timimị. Bei tịẹkiribị inyenrintimi bẹseri bẹseri laamụ yọbị wo a pei a sei-emi kpọ, Jehovah wó tarịdẹịn Tọbọụ bị akị ịkịan kụn wo pịrịdẹ duonị, omịnị laa inyenrintimi bẹseri bẹseri laamịnị.—Rom. 8:32.

10. Yalịyalị tẹmẹ sẹlẹdẹ otubo mọ bá kọọ anịnabo mọ te ifie kị korumịnị a o?

¹⁰ Fagha fagha ụndụ bọlọụ ka paamịnị kị gbaa kpọ, Omịnị ifiebosẹ bei egberi kẹrị iroro kị Jehovah mọ dọụ wẹrịemi. Yalịyalị tẹmẹ sẹlẹdẹ otubo, Christ sụọmọ wẹrị bei kiriogbo daamụ ifie kị korumịnị. (Rev. 20:6) Kọọ anịnabo bei kiri bọọ dọọn mọ fịị mọ ba fa akpọ a timi inyenrinmụ ifie kị korumịnị. (Rev. 21:​3, 4) Ị́ kpọ bei kiri ma inyenrintimi bẹseri bẹseri laamụ kịmị ikpudu ma sụọemi a? Kiri ka timi inyenrinmịnị duonị ye a paagha bara irorokụmọ! Omịnị kiriogbo ma inyenrinmụ bara ka kị wo tẹmẹ wẹrịemi, anịduonị kiriogbo ma timi inyenrinmụ yọmị wo mịẹ pọwẹị kụrọmọmịnị.

11-12. Paradise laadaba omịnị te tarịama kị korumịnị a o? (Fotobo kpọ dii.)

¹¹ Wẹrị Paradise laadaba paamụ bara kẹrị iroro dii a. Dọọn mọ fịị mọ ba timigha fa. (Isa. 25:8; 33:24) Jehovah iné dọụ wẹrịemi yebosẹ mịẹ ị́ pịrịmịnị. Bịsẹ ifie laadaba teeki kị ị́ mọ tolumọmịnị a o? Ị́mịnị namabo emibara, tịnbo emibara, duma tuunmụ bara anịghakpọ ye-draw fịrị kị tolumọmịnị a? Bịsẹ ifie laadaba, ye-draw, warị-kẹrị, bá fịyaị gboro kịmịama dọụmịnị. Bịsẹ yọ bụọmọ kpọ, yọ tọlọmọ otu, bá fịyaị-tụọ otu, ye-kaị otu, flower gboro otu kpọ dọụmịnị. (Isa. 35:1; 65:21) Inyenrintimi bẹseri bẹseri laamịnị duonị, ị́mịnị bei yebo mịẹmụ fomuun nanamịnị.

¹² Waị fịịdẹ otubo tịịn seribo daba omịnị bolouịmbẹlẹ kụrọmọmịnị! (Acts 24:15) Jehovah tẹmẹdẹ biin yebo tolumọ nimimụ yọ kpọ kẹrị iroro. (Ps. 104:24; Isa. 11:9) Ebidẹịn yesẹ, ị́mịnị ba sei mịẹgha bara ka kị Jehovah karịmịnị! Anịa Ị́mịnị bei “tịẹkiri angọmịẹ ganaganamụ yọ” kị duonị bei bọlọụ bọọ emi tarịbo gbein-koromọ agbẹị-emi a o? (Heb. 11:25) Benebene! Bei tarịbo dụba akị wo bei tịẹkiri bọọ barasindẹ yebosẹ dẹịn-emi. Ukie, Paradise ukiemọyebị ifiemọsẹ bọlọụ ka emibara fa, kẹnịbaị laadaba paamịnị. Jehovah wo tarị wẹrịemi duonị, wó tọbọụ kọn ịkịankụn wo pịrịgha wẹrị a, bei yebosẹ paagha mọ timi mị!

JEHOVAH TARI BỊ INÉ TỌRỤKẸRỊEMI BARA MỊẸDỊA

13. Omịnị tebara ka kị Jehovah tarị bị wo tọrụkẹrị-emi bara mịẹdịa a paaemi a o? (2Corinthians 6:1)

¹³ Omịnị tebara ka kị Jehovah wó tọbọụ bị akị ịkịankụn wo pịrị yọbị wọ tọrụkẹrị-emi bara mịẹdịa a paaemi a o? Wosẹ Jehovah fịrị kọn wo ụndụ ma bọlọụdaa. (Matt. 6:33) Jesus fịị wo pịrịmị, “anịduonị inyenrinmịnị kịmịsẹ ba angọ dọụbara inyenringha fa, anịa fịịwẹrị fịịyọ duo seribo owei dọụbara kị inyenrinmịnị.” (2Cor. 5:15) Wo laamọ agbẹịgha ebi Jehovah mọ kọn wo pịrịdẹ, anịduonị omịnị ụ kẹrị kụrọmọmịnị.— 2Corinthians 6:1 goo.

14. Omịnị tebara ka kị peibolou kọn Jehovah gbaamịnị egberibo a tụa wẹrịemi bara mịẹdịamịnị a o?

¹⁴ Omịnị peibolou akị Jehovah gbaamịnị egberibo a tuamịnịyọ kpọ tọrụkẹrịyọ kị mịẹdịamịnị. Tebara a o? Omịnị sukulu anịghakpọ wẹnịmụ fịrị gbelemọ iroro tọnmịnịaba, omịnị Jehovah dọụ wẹrịemi bara kẹrị iroromịnị. (1Cor. 10:31; 2Cor. 5:7) Omịnị wo peibolou kọn tụamọ fịrị wẹnị-daba, ebi yeama bolou duo paamịnị—wo peibolou mọ bá wo mọ Jehovah mọ ikie kpọ kụrọdẹịnmịnị. Wo nana wẹrịemi ukiemọye kpọ kụrọ bọlọụdẹịnmịnị.—Rom. 5:​3-5; Jas. 2:​21, 22.

15. Memorial ifiemị omịnị tebara ka kị wo tọrụkẹrịyọ mịẹdịa a paaemi a o?

¹⁵ Jehovah tarị bị wo a tọrụkẹrị-emi bara mịẹdịamụ ụwọụ mọkpọ emi. Anị Memorial ifie kọn parụ-ịkịan mị wo a tọrụkẹrị-emi bara mịẹ Jehovah dịamịnị yọbị. Memorial ma múmịnị yọkị bụọmọ kpọ, omịnị kịmịotu kpọ tịịn Memorial bọọ bomịnị. (1Tim. 2:4) Memorial bọọ mịẹmịnị yebo gbaa iné tịịn otubo pịrị. Jw.org bọọ Jesus Tetuu Kị Duonị Fịị Ma O? bá Jesus Fịị Bị Kẹrị Ukịẹ vidiobo kọn á dịa. Itu-kosuotubo egberigbaayọ mọ yetolumọyọ a múghatimi aladẹ otubo tịịnmịnị. Jehovah fadẹ anịnabo, zụayaị waị boloudei wẹrị ụ dọụ bodaba agọnọ mọ kiri mọ pọwẹịmịnị bara kẹrị iroro! (Luke 15:​4-7) Memorial erein laadaba, wo nimi wẹrịemi kịmịbo bẹtịbị dii kule kụmọ, anịa ebibara aya otubo mọ bá naa boghatimi aladẹ otubo kpọ kule. Omịnị á mịẹ zuzu timi!—Rom. 12:13.

16. Tetuu kị duonị omịnị Memorial ifie ma angọtụa egberigbaa kụrọmọdẹịn agbẹị-emi a o?

¹⁶ Memorial ifie laadaba ị́mịnị iné egberigbaa fịrị wẹnị bọlọụdẹịn a paaemi a? Omịnị bịsẹ bara mịẹdaba Ọkpọnanaowei mọ Christ mọ mịẹ yebị wo a tọrụkẹrị-emi bara kị mịẹdịamịnị. Omịnị Jehovah fịrị ma angọtụa dẹịnmịnị mị, Jehovah baratụa wo pịrị dẹịndaba, wo kọn Jehovah a nana wẹrịemi eti kpọ kụrọdẹịnmịnị. (1Cor. 3:9) Ị́mịnị mọkpọ Memorial Bible gọọ yebị kọn Examining the Scriptures Daily bọọ goo anịghakpọ egberigbaa fịrịwẹnị fun bọọ tụa wẹrịemi yaịbo goo. Ị́mịnị bẹtịbị Bible goo angọ pịrịmịnị ifiemị, bịsẹ Bible yọbo kọn tụa goo a paaemi.

17. Teeki Jehovah mịẹ pọwẹịmọmịnị a o? (“Jehovah Tarị Bị Wo Tọrụkẹrị-emi bara Mịẹdịamu Ụwọụama” ekpedi kpọ dii.)

¹⁷ Kaanghaba, iné emi tịẹkiribị ị́ bụọmọ wẹrị laa bei egberitịbị bọọ gbaadẹ yebosẹ mịẹsingha kpọ paaemi. Ukie, Jehovah iné wẹnịmịnị fịrịbo kọn zịnị otu wẹnịmịnị fịrịbo tọnmọgha; ómịnị iné adụdụ bị ẹrị wẹrịemi. Ị́mịnị iné adụdụsẹ kọn bei yelaa parụ-ịkịan ma tọrụkẹrịyọ mịẹdịamịnị yọbị ụ mịẹ pọwẹịmọmịnị.—1Sam. 16:7; Mark 12:​41-44.

18. Tetuu kị duonị omịnị tọrụkẹrịyọ mịẹ Jehovah mọ bá Jesus Christ mọ dịamịnị a o?

¹⁸ Parụ-ịkịan kị duonị Jehovah wo mịẹ seibo akị wo bụọmọ a paadẹ, Jehovah mọ kpọ laa ikie kẹrị a paadẹ, bá inyenrintimi bẹseri bẹseri laamụ ụkiemọye kpọ nanadẹ. Pebidá ifiebosẹ Jehovah kọn wo a nana wẹrịemi tarị bị tọrụkẹrịyọ mịẹdịa, bịsẹ tarị kị Jehovah dịnẹmọ wẹrị bei ebi yebo mịẹ wo pịrịdẹ. (1John 4:19) Omịnị tọrụkẹrịyọ mịẹ Jesus kpọ dịa, Jesus wo tarị kụrọmọ wẹrịemi kị duonị fịị wo pịrịmị!—John 15:13.