Jesus Angọtụa Egberigbaa Bara Dimịẹ

1. Te inyenrinbụọ kị Jehovah karịmịnị otubo mọ zịnị karịbụọ otubo mọ mịẹ bẹbẹ paaemi a o?

KẸNỊ ụwọụ nẹ Jehovah karịmịnị otubo mọ zịnị karịbụọ otubo mọ bẹbẹ paaemi ụwọụbị anị ámịnị angọtụaa egberigbaa fịrị wẹnịmịnị yọbị. (Titus 2:14) Zụa ifieama, angọtụa egberigbaa fịrịwẹnịmụ yọbị kụrọ wo pịrị kpọ paaemi. Kaanghaba ị́mịnị kpọ kẹnị itu-kosuowei gbaa bara gbaa kpọ paaemi, “Zụa ifieama, ịmịnị egberigbaayọ amúmụ dịsẹ nanagha.”

2. Zụa ifieama teeki wo angọtụa egberigbaa fịrị wẹnịmịnịyọ mịẹ kụrọmọ wo pịrị a paaemi a o?

² Omịnị Jehovah ogboma zịnị fịrịama wẹnịmịnị yọkị wo mịẹ pọwẹị nana akị egberigbaa fịrị wẹnịmịnị yọ dẹịn-emi bara gbaa kpọ paaemi. Tetuu a o? Omịnị Jehovah ogbomị kaanghaba warị kẹrị fịrịama, vurudu akpotu paadaba baratụa bịnaotubo pịrị bá á kụrọmịnị yọmị kịalị paamịnị arerebo ẹrịmịnị. Omịnị wo bịnaotubo mọ bịsẹ fịrịbọ wẹnị gbelemịnịmị, wo nanamịnị dọọ mọ tarị mọ wọ mịẹ pọwẹịmịnị, bá bịnaotubo wo wẹnịmịnị fịrịbo kpọ tọrụkẹrịyọ mịẹdịamịnị. Anịa omịnị kẹnị ete a tịmị egberi gbaatimi aladẹ kị gbaa kpọ, biingha kịmị kị wo gbaamịnị egberi ma dịsẹnana kpọ paaemi. Anịghakpọ zụaotu benebene pei dọụgha. Omịnị nimi wẹrịemi omịnị kunumọ ereinbo duosụọ dẹịnmịnịmị, kịmịotu wo gbaamịnị egberibo kẹrịakịgha fa. (Matt. 10:22) Teeki baratụa wo pịrịwẹrị angọtụa egberigbaa fịrịwẹnị dẹịnmịnị a o?

3. Luke 13:​6-9 tebara ka kị Jesus angọtụa yọ tọnmọdịa ma o?

³ Jesus kiriogbo ma timi ifiebị angọtụa egberigbaa fịrịwẹnịmị. Bo kẹnị ifie laabị ómịnị angọtụa bọlọụ ifie kpọ dẹịnmị. Omịnị kpọ Jesus egberigbaa fịrịwẹnị yọ duo tolumoye nana a paaemi. (Luke 13:​6-9 goo.) Kịmị fig tịịn gborowẹrị tara kụraị baịdẹ anịa mọkpọ naa beinyaị ẹrịgha bara kị, Jesus kpọ tara kụraị akị egberigbaa Jew otubo pịrị ifiebị ámịnị egberi kẹrịakịgha. Anịa, fig tịịn gboro kịmịbị beinyaị ẹrịgha kpọ mọkpọ angọtụamị, bịsẹ bara kị Jesus kịmịotu ebibara egberi kẹrịakịgha kpọ ómịnị angọtụa egberi gbaamị. Ómịnị kịmịotu adụdụ gbelemọ yọ duonị angọtụa dẹịnmị.

4. Omịnị te nia yeama ka kị Jesus mịẹdịaye duo tolumọ akịmịnị a o?

⁴ Mị egberitịbịmị, omịnị Jesus wó kunumọ sondia angọnọweibo, akị angọtụa egberigbaa fịrị wẹnị baramị wo mọ ditụamịnị. (Luke 10:1 bị “After these things” study note dii.) Omịnị Jesus gbaa yebo duo tolumọye nana bá wó gbaa bara dimịẹdaba baratụa wo pịrị angọtụa egberigbaa fịrị wẹnịmịnị. Wo wẹrị niaye kọn Jesus mịẹdịaye duo tolumọ akị, anị: (1) Ómịnị wó ịkịọụsẹ kọn Jehovah dọụyọ mịẹmị, (2) ómịnị wó ịkịọụsẹ kọn Bible bụrụ-egberibo ka tụamị, (3) ómịnị Jehovah ka sẹsẹrẹịmị, bá (4) kịmịotu ụ peimụ ukiemọye ómịnị mọ nanamị.

ỊKỊỌỤSẸ KỌN JEHOVAH DỌỤBARA MỊẸMỊ

5. Jesus tebara ka kị wó ịkịọụsẹ kọn Okpọnanaowei dọụyọ mịẹbara mịẹdịa ma o?

⁵ Jesus angọtụa bara “Daabụọ ebiegberi gbaamị” tuubị anị Ọkpọnanaowei ụ fịrịmọ bo wẹnị fịrịbị. (Luke 4:43) Jesus egberigbaa fịrị ka kị wó ụndụ bọọ bọlọụdámị. Wó fịịmụ ifie kị bo naịndẹ kpọ Jesus “ama duomú ama laa bá gbene duomú gbene laa,” kịmịotu tolumọ timimị. (Luke 13:22) Ómịnị egberigbaa fịrị wẹnịmụ bara akị biin tuuduo-otuama tolumọmị.—Luke 10:1.

6. Egberigbaa fịrịmị tebara ka kị zịnị tẹmẹanga fịrịama mo kẹnịsụọmọ emi a o? (Foto kpọ dii.)

⁶ Wo ifie kpọ Jehovah mọ Jesus mọ omịnị egberigbaa fịrị ka kị bọlọụdá kị dọụ wẹrịemi. (Matt. 24:14; 28:​19, 20) Omịnị Jehovah ogbo bọọ wẹnịmịnị zịnị fịrịbo mọ egberigbaa fịrị mọ kẹnịsụọmọyọ emi. Gbaamaba, omịnị baratụa egberigbaa fịrị pịrị dọụmịnị kị duonị warị kẹrị fịrị mọ bá bethel a tịmị fịrị wẹnịmịnị. Vurudu akpọtu paadaba wo bịnaotubo waị egberigbaa fịrị wẹnị bá tẹmẹanga yeama mịẹmụ yọkị duonị omịnị baratụa á pịrị dẹịnmịnị. Egberigbaa fịrị kị yelaa dẹịn fịrị nẹ Jehovah akị wo pịrị wẹrịemi firi bara wo mọ ukiedaba, bịsẹ yọbị wo dịnẹmọ wẹrị pẹlẹgha bara egberigbaa fịrị wẹnịmịnị. János, Hungary emi itu-kosuowei, gbaamị, “Ịmịnị Jehovah ogbo bọọ wẹnịmịnị fịrịbosẹ yelaa akị egberigbaa fịrị laaemi ye fa bara kọn angọ ukiemọmịnị.”

7. Tetuu kị duonị omịnị ifiebosẹ ebiegberi gbaa kị Jehovah mụ dọụwẹrịemi a o? (1Timothy 2:​3, 4)

⁷ Mịẹ ka paaemiaba, kịmịsẹ ebiegberi kẹrịakị kị Jehovah mọ dọụmịnị. Omịnị Jehovah akị kịmịama dimọ wẹrịemi bara kọn á dimọdaba baratụa wo pịrịwẹrị angọtụa ebiegberi gbaa dẹịnmịnị. (1Timothy 2:​3, 4 goo.) Jehovah omịnị ebibara akị bei ụndụ zụọ fịrị wẹnịmụ bara akị wo tolumọmịnị. Gbaamaba, omịnị Kịmịotu Tarị—Tuuduo-Otu Dọụ Funbị akị kịmịotu mọ ẹrẹtei wẹrị baratụa á pịrịwẹrị bo Jehovah karịmụ ụwọụama akị wo tolumọmịnị. Bei tịẹkiri kị kịmịotu egberi kẹrịakịgha kpọ, ámịnị kẹrịakị dẹkị opu akpotu dụụmụ ifie laa kpọ paaemi. Omịnị bei tịẹkirimị gbaa á pịrịmịnị egberibo kị opu akpotu laadaba baratụa á pịrịwẹrị ebi egberi kẹrịakị a paaemi. Anịduonị wosẹ angọtụa ebiegberi gbaa.

ỊKỊỌỤSẸ KỌN BIBLE BỤRỤ-EGBERIBO A TỤAMỊ

8. Jesus Bible bụrụ-egberibo nimiyọ duonị teekị mịẹ ma o?

⁸ Jesus Bible bụrụ-egberibo paabainmụ bara bọọ sụọtuu nimi wẹrịemi. Ómịnị tara kụraị mọ ikise mọ ka kị egberigbaa fịrị wẹnịmụ bara kpọ nimimị. (Dan. 9:​26, 27) Ómịnị wó fịịmụ ifie mọ bá fịịmụ bara kpọ nimimị. (Luke 18:​31-34) Jesus bịsẹ nimi yebo duonị wó ifie kọn ebibara fịrị wẹnịmị, bá angọtụa ebiegberi gbaatimi tuulaamị.

9. Bible bụrụ-egberibo tebara ka kị wo dịnẹmọ wẹrị ebiegberi gbaamịnị a o?

⁹ Omịnị Bible bụrụ-egberibo a sụọtuu nimi yọkị wo dịnẹmọ wẹrị angọtụa egberi gbaamịnị. Bei akpọmị alaghatimi famụ bara wo mọ nimidẹ. Bei tịẹkiri ma paamịnị yebo mọ kịmịotu inyenrinbụọbo mọ wo mọ didaba, Bible kunumọ ifie ma paamịnị gbaa wẹrịemi yebo kị paamịnị. Bible mị kunumọ ifie laadaba tụbụrụ pẹrẹ mọ taamụ pẹrẹ mọ suumụ bara gbaa wẹrịmị, anịa mị tịẹkirimị Britain mọ America mọ gbelei wẹrị Russia mọ wó anga bọọ emi ibebo mọ suumịnị yọkị bịsẹ bụrụegberi mịẹgaan paamọ wẹrịemi bara wo mọ nimidẹ. (Dan. 11:40) Omịnị mọkpọ Daniel 2:​43-45 ma emi opu agbodigi bụọkirimị America mọ Britain mo kẹnịsụọmọdẹ daakụrọ kị gbaamọ wẹrịemi bara nimidẹ. Bụrụegberi gbaa wẹrịemi bara mị wo mọ didaba, alaghatimi Ọkpọnanaowei daabụọmị bo kịmịawọụ daabụọbosẹ gbein-gọgọlọmịnị bara wo mọ nimidẹ. Mị bụrụ-egberibosẹ baratụa wo pịrịwẹrị ebibara wo emi ifiebo asụọtuu nimi bá izoumọ izoumọ bara kọn ebiegberi gbaa agbẹị-emi bara kpọ nimidẹ.

10. Te zịnị Bible bụrụ-egberiama kị mọkpọ wo kụrọmọwẹrị ebiegberi gbaamịnị a o?

¹⁰ Bible bụrụ-egberibo wo gbaamụ ebiegberiama nana wẹrịemi. Carrie, Dominican Republic k’emi bịnaraụ gbaamị “Jehovah bei bọlọụ ma kikoromọ wẹrịemi ebi yebo ị mọ kẹrị irorodaba,” ị dịnẹmọ wẹrị gesii gbaa zịnịotu pịrị dọụmị. Amịnị mọkpọ gbaamị: “Kịmịotu fịmịnị ụyabo ịmọ ẹrịmịnịbị bei kikoromọ wẹrịemi yebo ine bẹtịbị gbelegha, kịmịsẹ kị gbele emibara ịmọ dọụ ẹrịmị.” Jehovah kị Bible bọọ emi bụrụ-egberibo gbaa wẹrịemi bara wo mọ nimi yọbị wo kurọmọ wẹrị egberigbaa fịrị wẹnịmịnị. Leila, Hungary emi bịnaraụ, gbaamị: Ịmịnị peigha fa iroromịnị kịmịbọ kpọ “Isaiah 11:​6-9 ị kụrọmọ wẹrị ebiegberi gbaa á pịrịmịnị. Jehovah baratụa kịmị a paabosẹ pịrịwẹrị dei a paaemi bara ịmọ nimi wẹrịemi.” Christopher, Zambia ibe emi bịnaowei, gbaamị: “Mark 13:10 gbaa barabị, ebiegberibị waịsaị kiriogbosẹ laamịnị, ịmịnị kpọ bei bụrụ-egberi paabeinmụ yọbị fịrị nanawẹrị wẹnịṃịnị yobị opu fomuun kị ị laaemi.” Te Bible bụrụ-egberi kị ị́ dịnẹmọwẹrị pẹlẹgha bara ebiegberi gbaamịnị a o?

JEHOVAH BARATỤA-PỊRỊYE KA SẸSẸRẸỊ

11. Tetuu kị duonị Jesus angọtụa egberigbaamụ yọbị Jehovah ka sẹsẹrẹị agbẹị ma o? (Luke 12:​49, 53)

¹¹ Jesus, Jehovah ka sẹsẹrẹị wẹrị angọtụa ebiegberi gbaamị. Jesus ebiegberi gbaatimi ifiemị, ómịnị kịlịkịlị bá didụbamọye nana bara ka kị gbaamị, bá kịmịama ụ gbaamịnị egberibo kẹrịakịgha fa bá penimọye kpọ mịẹpaamọmịnị bara Jesus mọ nimi wẹrịemi. (Luke 12:​49, 53 goo.) Jesus egberigbaamịnị yọ duonị karịbụọ tịbị-otubo biin ifieama ụ bámụ iroro tọnmị. (John 8:59; 10:​31, 39) Anịa Jehovah ụ mọ mọ́ emibara Jesus mọ nimi duonị ómịnị pẹlẹgha bara egberigbaamị. Ụ gbaamị: “Ịmịnị bẹtịbị fa, ị fịrịmọ bo daụ bị ị mọ mọ emi. . . . Ịmịnị ifiebosẹ ụ dọụbara mịẹmịnị duonị ómịnị ị gbeinmọ-koromọgha.”—John 8:​16, 29.

12. Jesus tebara ka kị wó tuuduo-otubo tọlọmọwẹrị penịmọye koru ma o?

¹² Jesus wó tuuduo-otubo Jehovah ka sẹsẹrẹị bara gbaa á pịrịmị. Ómịnị barịị barịị á kụrọmọmị, ámịnị penimọye bolou k’emi kpọ Jehovah baratụa á pịrịmịnị bara gbaa á pịrịmị. (Matt. 10:​18-20; Luke 12:​11, 12) Ámịnị mọkpọ kịlịkịlị timi bara kpọ gbaa á pịrịmị. (Matt. 10:16; Luke 10:3) Bá kịmịotu penimọwẹrị ánị gbaamịnị egberi peikụmọ bara kpọ gbaamị. (Luke 10:​10, 11) ụyamọye bodaba ámịnị bịsẹyọ duo seri zịnị yọ amú bara kpọ gbaa á pịrịmị. (Matt. 10:23) Jesus angọtụa bá eti akị Jehovah atụa wẹrịemi, bịsẹ bara kị gbaa kpọ ómịnị agbẹịgha bara angọ akị akpotu a tụagha.—John 11:​53, 54.

13. Tetuu kị duonị Jehovah baratụa ị́ pịrịmụ eti ị́ mọ nana ma o?

¹³ Penimọye bolou kpọ omịnị angọtụa ebiegberi gbaamịnị yọbị Jehovah baratụa-pịrịye dọụ wẹrịemi. (Rev. 12:17) Tetuu kị duonị Jehovah kọkọ baratụa wo pịrịmụ eti wo mọ nana ma o? Wo wẹrị Jesus John chapter 17 bọọ mịẹ tẹẹbịbị ditụa. Jehovah tọrụtụa wó tuuduo-otubo dii bara Jesus mọ tẹẹmị. Jehovah bịsẹ tẹẹbịbị naamị. Acts fun bị ómịnị baratụa fịrịmọpaa otubo pịrịwẹrị penimọye kị emi kpọ angọtụa egberigbaa bara kọn á kụrọmọmị. Bịsẹ tẹẹbịbịmị, Jehovah tọrụtụa peibolou akị fịrịmọpaa-otubo gbaamịnị egberibo a tụamịnị kịmịbo kpọ dibara Jesus mọ tẹẹmị, ị́ kpọ sụọemi. Jehovah mọkpọ Jesus tẹẹbịbị parụmịnị; Ómịnị baratụa fịrịmọpaa-otubo pịrị bara kị baratụa ị́ kpọ pịrịmịnị.—John 17:​11, 15, 20.

14. Omịnị tebara ka kị ifiebosẹ angọtụa ebiegberi gbaamụ bara nimi ma o? (Foto kpọ dii.)

¹⁴ Mị kunumọ ereinbo angọtụa ebiegberi gbaamụ yọmị kụrọ bọlọụ dẹịnmịnị kpọ omịnị baratụa-pịrịye nanamịnị. (Luke 21:​12-15) Wo kpọ Jesus mọ wó tuuduo-otubo mọ bara ebiegberi kị gbaa kịmịotu pịrịmịnị, ámịnị pei bá peigha kpọ omịnị á mọ mọ́ bẹbẹkpụngha fa. Kịmịotu wo fịrị kị tịẹmọ kpọ wo bịnaotubo Jehovah nimiye ka sẹsẹrẹị emi duonị angọtụa ebiegberi gbaamịnị. Jehovah kụrọ akị bọlọụ kụraị sọnransii Christtuuduo-otubo pịrị baramị, bei tịẹkiri kpọ ómịnị kụrọ akị wo pịrịwẹrị ụ dọụbara beinmọ beinmọ bara kọn egberi gbaamịnị. (2Tim. 4:17)Ị́ kpọ Jehovah ka sẹsẹrẹ-emisẹ Jehovah baratụa ị́ pịrịwẹrị pẹlẹgha bara angọtụa ebiegberi gbaamịnị.

OMỊNỊ KỊMỊOTU EGBERI PEIMỤ UKIEMỌYE NANA

15. Teeki Jesus kịmịotu ebiegberi peimụ eti nana wẹrịemi bara mịẹgaan ma o?

¹⁵ Jesus kịmịama egberi peimụ ukiemọye nanamị. Anịdounị ómịnị pọwẹị pọwẹị kị timi egberigbaa fịrị wẹnịmị. Gbaamaba, 30 C.E. bo kunumọ dọụtimi ifiemị, biin kịmịama ebiegberi kẹrịakịmịnị bara Jesus mọ ẹrịmị, anịduonị ómịnị á kọn sou laadẹ kiri kị tọnmọmị. (John 4:35) Kẹnị kụraị bụọdẹmị, ómịnị gbaa wó tuuduo-otubo pịrịmị: “kiri sou fịrịmị dụba-emi.” (Matt. 9:​37, 38) Tuu ifie laamị ómịnị mọkpọ gbaamị: “kiri sou fịrịmị dụba-emi . . . Anịdounị tịbịowei tẹẹdá zịnị fịrịwẹnị otuama fịrịmọ bo kiri sou fịrịwẹnị.” (Luke 10:2) Jesus kịmịama ebiegberi peimụ eti nanamị, ámịnị kọkọ egberi kẹrịakị ifiemị ómịnị bolouịmbẹlẹmị.—Luke 10:21.

16. Jesus tọnmọdịa yebo tebara ka kị baratụa wo tuuduo-otubo pịrị ma o? (Luke 13:​18-21) (Foto kpọ dii.)

¹⁶ Jesus wó tuuduo-otubo kịmịotu egberi peimụ ukiemọye nana bara akị á kụrọmọmị, bịsẹ yekị baratụa á pịrịwẹrị angọtụa egberi gbaamịnị. Wo wẹrị Jesus maa tọnmọdịa yeama ditụa. (Luke 13:​18-21 goo.) Jesus mustard grain sọụ dụbamịnị bara ka kị Daabụọ egberi kpọ kịmị laa wó tịẹmọgha fa bara waịsaị kiriogbosẹ laamịnị bara gbaamị. Bá leaven tọnmọdịaye kpọ kọn Daabụọ egberimị waịsaị kiriogbosẹ laa bá wo tịẹkiri tọrụ ẹrịgha deiyọama kpọ mịẹpaamọmụ bara gbaamị. Jesus wó tuuduo-otubo gbaamịnị egberibo baratụa biin kịmịama pịrịmịnị bara akị á kụrọmọmị.

17. Tetuuama kị wo mọ nanawẹrị pẹlẹgha bara ebiegberi gbaamịnị a o?

¹⁷ Egberigbaa fịrịmị akpọyọrẹịmị baratụa biin kịmịama pịrịmịnị bara wo mọ ẹrịmịnị yọmị wo dịnẹmọ wẹrị angọtụa egberi gbaamịnị. Kụraịbosẹ, egberi bọọ dịsẹnana biin kịmịama wo sụọmọ Memorial oge tei bá wo mọ Bible tolumọmịnị. Biin kịmịama benibile wẹrị wo sụọmọ egberigbaa fịrị wẹnịmịnị. Mọkpọ bo wo sụọmọ ebiegberi gbaamụ kịmịbiri wo mọ nimigha, anịa Jehovah biin kịmị ikpudu kị bẹnịmọmịnị bara wo mọ nimi wẹrịemi, bịsẹ kịmịbọ opu akpotu duo tẹịmịnị bara wo mọ nimi wẹrịemi. (Rev. 7:​9, 14) Jehovah biin kịmịama ebiegberi kẹrịakịmụ eti nana wẹrịemi, anịduonị wosẹ ebi tuu kị nanawẹrị pẹlẹgha bara ebiegberi gbaamịnị.

18. Kịmịotu tebara ka kị wo nimi kị omịnị mọ dọụmịnị a o?

¹⁸ Jesus tuuduo-otubo angọtụa egberi gbaamịnị bara kịmịotu mọ nimi wẹrịemi. Fịrịmọpaa otubo yesingha bara egberi gbaamịnị bara kịmịotu mọ ẹrịmị, “ámịnị kọkọ Jesus mọ timi bara kịmịotu mọ nimimị.” (Acts 4:13) Omịnị kpọ yesingha bara akị egberi gbaadaba, omịnị Jesus kị dimịẹmịnị bara kịmịotu mọ nimimịnị.