Ị́mịnị Zụa Yeama Nimigha Kpọ Angọ-iyerimọ Inyenrinbụọ Nana

1. Jehovah te kụrọ ka kị wo pịrị ma o, bá tetuu a o?

JEHOVAH, omịnị ebibara ye iroro, ye asụọtuu nimi bá kịlịkịlị-nimiye mịẹdịamọ bara ka kị wo tẹmẹmị. Tetuu kị duonị Jehovah bịse bara kọn wo tẹmẹ ma o? Jehovah dọụ wẹrịemi barasẹ, omịnị ebibara ụ nimi bá kịlịkịlị iroroama tọnpẹlẹdá ụ karị kị dọụmịnị.—Prov. 2:​1-5; Rom. 12:1.

2. (a) Wo angọ gbelemọ yọmị teeki wo mọ ukie agbẹị-emi a o? (Job 37:​23, 24) (Foto kpọ dii.) (b) Omịnị laa yebosẹ nimisiingha fa bara kọn angọ nimi daba te arereama k’emi a o?

² Omịnị yetolumọ nimi kụrọ kị nana wẹrịemi kpọ, laa yebosẹ nimisiingha fa. (Job 37:​23, 24 goo.) Wo wẹrị Job mịẹdịaye kẹrị ẹrẹtei. Jehovah biin biibịbịama kọn ụ biimị, bịsẹ yọmị ómịnị biin yeama nimigha bara mịẹgaan paamọmị. Bịsẹ yọmị Job mịẹ angọ-iyerimọmị bá ụ barịị wẹrị wó ye-iroromịnị bara kpọ deimị. (Job 42:​3-6) Wo kpọ yebosẹ nimisiingha bara nimi angọ pịrị agbẹị-emi. Bịsẹ yọmị baratụa wo pịrịmịnị. Omịnị kọkọ bịsẹ bara kọn ye-irorodaba, baratụa wo pịrị wẹrị Jehovah ebi iroro tọnmụ yeama kọn wo dịamụ eti nanamịnị.—Prov. 2:6.

3. Omịnị bei egberitịbịmị teeki kẹrị ẹrẹteimịnị a o?

³ Mị egberitịbịmị, omịnị zụa nimigha yeama mọ bịsẹ bolou duo wo laa kpọ paaemi bụụdọọnyeama kẹrị ẹrẹteimịnị. Bá bịsẹ yebo nimigha yọmị ebi wo pịrịemi tuu kpọ wo mọ tolumọmịnị. Omịnị bei yebo kẹrị ẹrẹteimịnị ifiebị, Jehovah “yebosẹ nimi wẹrịemi Oweimị” wo nimi agbẹị-emi yebosẹ gbaa wo pịrịmu eti wo mọ nana dẹịnmịnị.—Job 37:16.

OMỊNỊ BEI AKPỌ FAMỌ IFIE NIMIGHA

4. Matthew 24:36 diidaba, omịnị teeki nimigha o?

⁴ Matthew 24:36 goo. Omịnị bei akpọ famọ ifie nimigha. Jesus kpọ kiriogboma timi ifiemị “erein mọ ifie mọ” nimigha.a Tuu ifie laabị, Jesus gbaa wó tuuduo-otubo pịrị amọ, Jehovah bẹtịbị kị zụa yeama mịẹmụ ifie nimi wẹrịemi. (Acts 1:​6, 7) Jehovah bei akpọ famọ erein tọnpẹlẹdẹ, anịa omịnị bịsẹ erein nimimọ kụrọ nanagha.

5. Omịnị bei akpọ famọ erein nimigha yọmị tebara ka kị wo gbele a paaemi a o?

⁵ Jesus gbaa egberibị wo mọ diidaba, omịnị akpọ famọ erein mọ, bá korutimi laamọ ifie kpọ nimigha. Anịduonị omịnị dẹịnsụọ kpọ paaemi, omịnị Jehovah erein korutimi alaa daba bolouịmbẹlẹgha kpọ paaemi. Wo warịbolou otu mọ zịnịotu mọ wo derịmịnị yọ kpọ wo mịẹ dẹịnsụọ kpọ paaemi. (2Pet. 3:​3, 4) Zụa ifieama omịnị iroro kpọ paaemi kaanghaba akpọ famọ ifie nimiwẹrị a, baratụa wo pịrịwẹrị kịmịotu wo dẹrị ba wo ụyamọmịnị yọmị ine a paaemi.

6. Tetuu kị duonị omịnị akpọ famọ ẹrẹin nimigha yọmị ebi ma o?

⁶ Jehovah akpọ famọ erein gbaa wo pịrịgha yọmị ebi wo pịrịemi. Bịsẹ yọmị fomuun mịẹpaamọ wo pịrịwẹrị omịnị kọkọ Jehovah tarị bá eti akị wó atụa wẹrịemi bara mịẹdịamịnị. Omịnị akpọ famọ erein ka kị ịkịọụ a tụawẹrị Jehovah karịgha, omịnị ifiebosẹ peibolou akị Jehovah a nana wẹrịemi. Omịnị akpọ famọ erein kẹrị iroromu yọ dii a, omịnị bịsẹ erein bodaba mịẹmụ yebo kị kẹrị iroro agbẹị-emi. Bịsẹ bara wo mọ mịẹdaba, baratụa wo pịrịwẹrị ebibara Jehovah karịmịnị, bá ifiebosẹ wó dọụ yebo kị kẹrị mịẹmịnị.—2Pet. 3:​11, 12.

7. Omịnị teeki nimi wẹrịemi a o?

⁷ Omịnị 1914 duobosẹ kunumọ ereinbo duo sụọdẹ bara nimi wẹrịemi. Jehovah Bible bụrụ-egberịama ka kị bịsẹ kụraị mọ paamịnị yebo mọ gbaa wo pịrịmị. Anịduonị “Jehovah opu ereinbị naịndẹ” bara wo mọ nimi wẹrịemi. Omịnị wo ịkịọụsẹ akị wo nimi wẹrịemi yebo ka tụa wẹrịemi. (Zeph. 1:14) Omịnị Jehovah kọn wo pịrịdẹ fịrị kpọ nimi wẹrịemi, anị “Daabụọ ebiegberi” gbaa akpọyọrẹịsẹ laamụ fịrịmị. (Matt. 24:14) Mị ebiegberimị gbaa akị 240 ibe-ama, bá 1000 dẹịn-emi bẹẹlịama laadẹ. Omịnị akpọ famọ erein mọ, ifie mọ nimidẹ kị mị yelaa fịrị wẹnịmụ bara mịẹgha fa.

JEHOVAH AKỊ ZỤA IFIEAMA YE MỊẸMỤ BARA OMỊNỊ MỌ NIMIGHA

8. “Gesii Ọkpọnanaowei mịẹmịnị yebo” kọn teekị bẹmọ wẹrịemi a o? (Ecclesiastes 11:5)

⁸ Omịnị zụa ifieama “gesii Ọkpọnanaowei mịẹmịnị yebosẹ” nimisiingha. (Ecclesiastes 11:5 goo.) Gbaamịnị barasẹ, Jehovah wó dọụyọ mịẹmụ yọ duonị zụa yeama bụọmọ paa, anịghakpọ kọn zụa yeama mịẹmu bara wo mọ nimigha. Omịnị gbesị Jehovah zụa yeama bụọmọ paamịnị tuu mọ ḅa kọn wo zụọmụ bara kpọ nimigha. (Ps. 37:5) Ere ofuro daba, ánị bịrị bolouma emi tọbọụmị emibaramị wo mọ nimigha, bịsẹ bara kị omịnị laa Jehovah ye mịẹmịnị bara nimisiingha fa. Science-otu kpọ naa mọkpọ bịrị bolouma emi tọbọụ emi bara nimisiingha.

9. Jehovah kọn ye mịẹmịnị bara wo mọ nimisiingha yọmị wo mịẹ te iroro yeama kị nana a paaemi a o ?

⁹ Jehovah kọn baratụa wo pịrịmụ bara wo mọ nimigha yọmị wo mịẹ ebi iroro tọnpẹlẹgha kpọ paaemi. Anịduonị zụa yeama a barasinwẹrị egberigbaa fịrị kọn bọlọụdaamụ yọmị wo dẹịn kpọ paaemi, bá omịnị egberịgbaa otu dọụ kụrọmọ wẹrịemi yọ amú dọụgha kpọ paaemi. Bịsẹ yọ kị bụọmọ kpọ, omịnị Jehovah ogboma zụa fịrịama wẹnị dọụmịnị, anịa fịrịmị naa wo bara laagha, bá wo egberigbaa fịrị kpọ kịmịotu wo pei dọụgha. Wo wẹnị Jehovah pịrịmịnị fịrịbị omịnị bụụdọọn-yeama nanamịnị, bịsẹ bara paa daba wo mịẹ dẹịnsụọ kpọ paaemi.

10. Jehovah mịẹmụ yebosẹ wo mọ nimisiingha yọmị baratụa wo pịrịwẹrị te inyenrinbụọama kị nanamịnị a o?

¹⁰ Omịnị Jehovah ye mịẹmịnị bara nimisiingha yọmị baratụa wo pịrịwẹrị ebi inyenrinbụọama nanamịnị, gbaamaba omịnị mịẹmụ dụụ agbẹị-emi yọ nimi bá angọ-iyerimọ inyenrinbụọ kpọ nanamịnị. Jehovah ye-iroromịnị baramị dụba wo ye-iroromịnị bara dẹiṇ-emi bara kpọ wo mọ nimi angọ pịrịmịnị. (Isa. 55:​8, 9) Baratụa wo pịrịwẹrị beinmọ beinmọ bara Jehovah ka sẹsẹrẹmịnị. Wo wẹnị Jehovah mọ wó ogbo mọ pịrịmịnị fịrịbo ebi paadaba, omịnị tokonibosẹ kọn Jehovah kị pịrịmịnị. (Ps. 127:1; 1Cor. 3:7) Anịa ba wo tọnbara paaghaba, omịnị Jehovah wo mọ mọ́ emi bara ukịẹmịnị. (Isa. 26:12) Omịnị wo mịẹ agbẹị yebo mịẹdaba, Jehovah kpọ wó mịẹ agbẹị yebo mịẹmịnị bara wo mọ nimi wẹrịemi. Bụọdẹ ifiebị Jehovah tamamaa bara ka kị wó kịmịbo barịịmị, anịa ómịnị bịsẹ bara kọn wo barịịgha kpọ, ómịnị ifiebosẹ wo wẹnị agbẹị-emi bara gbaa wo pịrịmu eti wo mọ nana wẹrịemi.—Acts 16:​6-10.

11. Te baratụa wo pịrịmụ yeama kị wo mọ nimi wẹrịemi a o?

¹¹ Jehovah tarị nana, kịlịkịlị bá kịrịị yeama kị mịẹmịnị bara wo mọ nimi wẹrịemị. Anịduonị omịnị mịẹ ụ pịrịmịnị yebo mọ bá mịẹ ụ karịmịnị otubo pịrịmịnị yebo mọ ómịnị mọ didụbamọ wẹrịemi bara wo mọ nimi wẹrịemi. Bịsẹ yọ kị bụọmọ kpọ Jehovah tarịama kọn wó a barasiingha otubo pịrịmụ bara kpọ wo mọ nimi wẹrịemi.—Heb. 11:6.

DEINBAỊ PAAMỌ BARA WO MỌ NIMIGHA

12. James 4:​13, 14, gbaa bara dii daba omịnị teeki nimigha o?

¹² James 4:​13, 14 goo. Gesii gbaamaba, omịnị deinbaị paamọ bara nimigha. Mị akpọmị ifiebosẹ ịkịọụ a tọngha yeama paamịnị. (Eccl. 9:11) Anịduonị omịnị laa undutimi wo mịẹ dọụmịnị yebosẹ mịẹsiingha fa.

13. Omịnị bọlọụ a paamọ ye nimigha yọmị tebara ka kị wo gbele a paaemi a o?

¹³ Ịkịọụ a tọngha yeama paamịnị yọmị, bụụdọọnye mịẹ paamọ wo pịrị a paaemi. Te ụwọụ a o? Omịnị bọlọụ a paamọ ye nimigha yọmị, wo mịẹ malafa bá pọwẹịgha kpọ paaemi. Vurudu paamịnị seiyebo wo mịẹ eneni kẹrị a paaemi. Bịsẹ yọ bụọmọ kpọ wo tọnmịnị irorobo wo tọn bara paagha ifiesẹ, wo mịẹ suusụọ bá bolouịmbẹlẹgha kpọ paaemi.—Prov. 13:12.

14. Wo nanamịnị powẹịmị teeki duo bomịnị a o? (Foto kpọ dii.)

¹⁴ Omịnị wo laamịnị bụụdọọnyebo inedẹ ifiesẹ, Jehovah tarị wẹrịemi bara kị mịẹdịamịnị. Jehovah wo bụụdọọn yebosẹ duo wo zụọmụ bara Bible mọ gbaa wo pịrịgha, bá ye wo ụndụ paamọ daba, wo biibobara kị duonị paamịnị bara kpọ Bible mọ gbaagha. Wo nanamịnị pọwẹịmị, bọlọụ a paamọ ye nimi yọ dụọ bogha, anịa wó dọụ yọ mịẹmụ yọ kị duo bomịnị bara Jehovah mọ nimi wẹrịemi. (Jer. 10:23) Pebidá wosẹ Jehovah dọụbara ka kị ye mịẹ, bịsẹ bara wo mọ mịẹdaba, wo gbaamịnị barasẹ: “Jehovah bụọmọ wẹrị emiaba omịnị ụndụtimi bei ye mọ, wan ye mọ mịẹmịnị.”—Jas. 4:15.

15. Mị bọlọụmị te yeama kị paamọ bara kị wo mọ nimi wẹrịemi a o?

¹⁵ Omịnị deinbaị paamọ bara nimigha kpọ, Jehovah fagha-fagha ụndụ kọn wo pịrịmụ bara wo mọ nimi wẹrịemi—zụa otu agọnọ ka múmịnị, zụa otu bei kịrị ka timimịnị. Jehovah ekpegha bara kpọ wo mọ nimi wẹrịemi, anịduonị wó gbaadẹ yebosẹ paabeinmịnị, kẹnị ye kpọ laa Jehovah tịẹmọgha fa. (Titus 1:2) Jehovah bẹtịbị kị “bọlọụ a paamọ yeama gbaamịnị bá aladẹ ifiesẹ duo paamọ yeama gbaamịnị owei.” Oruseri ifie kpọ Jehovah bịsẹ bara mịẹmị, bá bei bolọụ kpọ ómịnị bịsẹ bara mịẹmụ bara wo mọ nimi wẹrịemi. (Isa. 46:10) Kẹnị ye kpọ laa Jehovah wo tarị wẹrịemi yọ tịẹmọgha fa. (Rom. 8:​35-39) Ómịnị kụrọ, kịlịkịlị-nimiye bá kụrọmọye kọn wo pịrịwẹrị wo laamịnị bụụdọọn-yebosẹ inemịnị. Kọkọ Jehovah baratụa wọ pịrịmịnị bá tarịama kọn wo pịrịmụ eti wo mọ nana wẹrịemi.—Jer. 17:​7, 8.

OMỊNỊ JEHOVAH KỌN WO NIMI WẸRỊEMI BARAMỊ NIMISIINGHA

16. Psalm 139:​1-6 gbaa bara diidaba, Jehovah tebara ka kị wo nimi wẹrịemi a, bịsẹ yọmị tebara ka kị wo gbele ma o?

¹⁶ Psalm 139:​1-6 goo. Wo Tẹmẹowei Jehovah wo emibarasẹ nimisiin wẹrịemi, wo iroromịnị yebo mọ, bá yebị wo gbele-emi bara kpọ nimisiin wẹrịemi. Jehovah wo gbaamịnị egberibo mọ wo adụdụ ma emi yebo kpọ nimi wẹrịemi. Ómịnị wo mịẹmịnị yebo mọ bá bịsẹ ye mịẹ tuu kpọ nimi wẹrịemi. Ibe-Daaowei David gbaa bara k’emi, Jehovah ifiebosẹ tọrụtụa wo diimịnị bá laa baratụa wo pịrị a paaemi. Ebebu akpọsẹ dụbadẹịn oweimị, agọnọ mọ kiri mọ tẹmeowei mị tọrụtụa wo diimịnị yọmị, wo mịẹ pọwẹịmọ kamị! David gbaamị: “Bei nimiye mị, ine angọ bọụmọmị, ịmịnị laa sụọtuu nimisiingha fa.”—Ps. 139:​6, ftn.

17. Tetuu kị duonị Jehovah ebibara wo nimi wẹrịemi yomị wo pei-asei kpọ paaemi a o?

¹⁷ Zụa kịmịama kaanghaba ánị duopaa yọ anịghakpọ a paamọdẹ yebo duonị Jehovah laa á tarịgha fa bara iroromịnị. Zụa ifieama wo mịẹbụọmọdẹ sei yebo duonị Jehovah benebene wo mọ naịngha fa bara wo mọ iroro kpọ paaemi. David kpọ zụa ifieama bịsẹ bara iroromị. (Ps. 38:​18, 21) Bịsẹ yọ bụọmọ kpọ, angọtụa Jehovah dọụyọ mịẹ dọụmịnị kịmị, zụa ifieama iroro kpọ paaemi, ‘ịmịnị bei yebo a barasiinmụ yọbị kụrọemi, anịa Jehovah kọkọ ị́ nimi wẹrịemiaba, tetuu kị duonị ịmịnị bei yebo a barasiin bara gbaa ma o?’

18. Jehovah wo nimi akị omịnị wo angọ nimi wẹrịemi bara dẹịn-emi bara wo mọ peidaba, te arereama kị wo laamịnị a o? (Foto kpọ dii.)

¹⁸ Jehovah wo nimi akị omịnị wo angọ nimi wẹrịemi bara dẹịn-emi, bá wo angọ bọọ emi ebi inyenrinbụọbo kpọ Jehovah mọ nimi wẹrịemi bara wo mọ tolumọ nimi a paaemi. Jehovah wo mịẹkiri yọbo mọ wo angọtụa wo dọụyọ mịẹmịnị bara kpọ ẹrịmịnị, ómịnị kọkọ wo tariemi. (Rom. 7:15) Jehovah, omịnị laa ụ karị a paaemi bara ka kị wo diimịnị. Bịsẹ bara wo mọ nimi yọmị wo peibolou mịẹ kụrọmọ bá baratụa wo pịrịwẹrị pọwẹịtimi ụ karịmịnị.

19. Jehovah gbelemọ yọmị omịnị teeki nimi wẹrịemi a o?

¹⁹ Tamanaịnyọ kpọ fa baramị, Jehovah tarị nana wẹrịemi bara wo mọ nimi wẹrịemi. (1John 4:8) Jehovah olokobosẹ wo ebi kị duonị tụa wẹrịemi bara wo mọ nimi wẹrịemi. Omịnị fagha fagha ụndụ nana kị Jehovah mọ dọụmịnị bara kpọ wo mọ nimi wẹrịemi, anịkị duonị ómịnị parụbụọmọ ịkịan mịẹpaamọ wo pịrịmị. Jehovah parụbụọmọ ịkịan mịepaamọ wo pịrị yọmị eti kọn wọ pịrị wẹrịemi, omịnị yalịgha kpọ laa Jehovah dọụbara mịẹ a paaemi bara wo mọ nimi wẹrịemi. (Rom. 7:​24, 25) “Ọkpọnanaowei dụba wo adudubosẹ dẹịn-emi bá yebosẹ nimi wẹrịemi.” (1John 3:​19, 20) Bịsẹ yọ kị bụọmọ kpọ, Jehovah wo paamọmịnị yebosẹ ẹrịmịnị, omịnị laa ụ karịmụ eti kpọ Jehovah mọ nana wẹrịemi.

20. Teeki baratụa wo pịrịwẹrị kpeke-kpeke inyenrinbụọ dẹịnmọmịnị a o?

²⁰ Jehovah wo nimi agbẹị yebosẹ gbaa wo pịrịmụ eti wo mọ nana daba, baratụa wo pịrịwẹrị wo nimi deigha yeama duonị kpeke-kpekegha fa, bá omịnị wo ịkịọụsẹ kọn yelaadeịn yebo ka tụamịnị. Bịsẹ bara wo mọ mịẹdaba, omịnị eti akị “Jehovah yebosẹ nimi wẹrịemi owei” ka tụa wẹrịemi bara kị mịẹdịamịnị. (Job 36:4) Mị tịẹkirimị omịnị ebibara zụa yeama nimigha kị gbaa kpọ, ayakpọ laadaba Jehovah aya yeama kọn wo tolumọmịnị, bá omịnị Jehovah emibara kpọ nimi dẹịnmịnị.—Eccl. 3:11.