EGBERITỊBỊ 15
DUMA 30 My Father, My God and Friend
“Ọkpọnanaowei Mọ Naịnmịnị Yọmị Ebi” Wo Pịrịemi!
“Ịmịnị-aba, Ọkpọnanaowei mọ naịnmịnị yọkị ebi ị pịrịemi.”—PS. 73:28.
TOLUMỌ DỌỤMỊNỊ YEBO
Omịnị Jehovah mọ naịnmịnị yọ duobo wo laamịnị arerebo kị tolumọmịnị.
1-2. (a) Ikie-ụbọ mọ naịnmịnị yọbị te yeama kị bolou bọọ sụọemi a o? (b) Bei egberitịbịmị te yeama kị wo mọ kẹrị ẹrẹtei dọụmịnị a?
Ị́ KPỌ ị́mọ mọ́ naịn-emi ikie-ụbọ nana wẹrịemi a? Ị́mịnị teeki mịẹwẹrị ánị maa kịmị bo ikie-otu apaa ma? Ị́mịnị ụ mọ mọ́ tei-gbelei, wó bụụdọọnmịnị yebo nimi, ụ dịsẹ yebo mọ bá wó dịsẹgha yebo mọ nimimịnị. Ómịnị ebi inyenrinbụọama nana wẹrịemi bara ị́mọ dọụ ẹrịmị. Bịsẹye duonị ị́mịnị ụ tarị kụrọmọmị.
2 Kịmị mọ ebi ikie kẹrịmụ yọbị, ifie mọ wẹnị fịrị mọ dọụ wẹrịemi. Bịsẹbara kị Jehovah mọ ebi ikie kẹrịmụ yọ kpọ ifie mọ wẹnị fịrị mọ dọụ wẹrịemi. Bei egberitịbịmị omịnị Jehovah mọ naịnmụ bara mọ bá bịsẹyọ duo wo laamịnị arerebo kị tolumomịnị. Wo wẹrị bọlọụ, wo ebidẹịn Ikie-owei Jehovah mọ naịnmụ yọbị yelaa-emi bara ditụa.
3. Tetuu kị duonị omịnị Jehovah mọ naịnmịnị yọ duobọ wo laamịnị arerebo kẹrị-iroro agbẹị-emi a o? Ye akị tọnmọ gbaa.
3 Tamanaịnyọ fa barabị Jehovah mọ naịnmụ yọbị arereama emi bara wo mọ nimi wẹrịemi. Anịa bịsẹ arerebo wo mọ kẹrị irorodaba wo dịnẹmọ wẹrị Jehovah mọ naịn dẹịnmịnị. (Ps. 63:6-8) Gbaamaba, omịnị ebi fịyaị fị, exercise mịẹ, embafou bá benibou kụrọmọmịnị yọbị ebi wo pịrịemi bara wo mọ nimi wẹrịemi. Mọabịkpọ, biin otuama bei yebo kọn yedimọgha. Anịa, bei yebo mịẹmịnị yọbị yelaa wo angọbo pịrịemi bara wo mọ kẹrị-iroromịni yọkị, wo dịnẹmọ wẹrị ifiebosẹ bei gbaa wẹrịemi yebo mịẹmịnị. Bịsẹbara kị, Jehovah mọ naịnmịnị yọbị ebi wo pịrịemi bara wo mọ nimi wẹrịemi, anịa bịsẹyọ duo wo laamịnị arerebo kẹrị-iroromịnị yọkị wo dịnẹmọ wẹrị pẹlẹgha bara Jehovah mọ naịn dẹịnmịnị.—Ps. 119:27-30.
4. Psalm 73:28 gẹẹ oweibị, teeki gbaa ma o?
4 Psalm 73:28 goo. Psalm 73 gẹẹ oweibị Levite owei, ómịnị Jehovah karịwarị ma mú duma tuunmụ fomuun nanamị. Ómịnị biin kụraị-ama ka kị peibolou nana bara Jehovah karịdẹ. Mọabịkpọ, ómịnị “Ọkpọnanaowei mọ naịn-emi yọbị” ebi ụ pịrịemi bá zịnịotu kpọ pịrịemi bara kọn wó angọ bá zịnịotu ukiemọmị. Jehovah mọ naịnmịnị yọbị te arereama kị emi a o?
“ỌKPỌNANAOWEI MỌ NAỊNMỊNỊ YỌBỊ” PỌWẸỊ MỊẸPAAMỌMỊNỊ
5. (a) Tetuu kị duonị Jehovah mọ naịndẹịnmịnị yọbị pọwẹị akị wo pịrịmịnị a? (b) Proverbs 2:6-16 diidaba, Jehovah kịlịkịlị-nimiye bị tebara ka kị baratụa ị́ pịrị bá ị́ kekeremịnị a o.
5 Omịnị Jehovah mọ naịn dẹịndaba, wo nanamụ pọwẹị kpọ dụba dẹịnmịnị. (Ps. 65:4) Biin tuuama kị omịnị mọ nanawẹrị pọwẹịmịnị. Gbaamaba, omịnị Bible tolumọ bá gbaa wẹrịemi yebo dimịẹdaba, wo mịẹ kịlịkịlị dẹịnmịnị. Bịsẹ kịlịkịlịye kị baratụa wo pịrịwẹrị wo mịẹmú kụrọsei mịẹmụ yọ datịẹmọmịnị. (Proverbs 2:6-16 goo.) Anịkịduonị, Bible gbaa amọ: “Pọwẹị kịlịkịlị-nimiye dọụmịnị kịmị bá ye-lelei-pẹlẹmịnị kịmị laa bara gbaamị.”—Prov. 3:13.
6. Tetuu kị duonị psalm fun gẹẹ oweibị ba pọwẹị nanagha bara paa ma o?
6 Gesii bị, Jehovah ikie-otubo kpọ pọwẹịgha ifie-ama paamịnị. Psalm 73 gẹẹ oweibị agbẹịgha iroro yeama nana duonị bá pọwẹịgha bara paamị. Ómịnị boloukọn bá kịmị otu a tọrụdọọnmị, Ọkpọnanaowei karigha bá wó olokobo kpọ kekeregha otubo kị bọlọụbọụmịnị bara ómịnị mọ iroromị. Ómịnị, akpotu mịẹpaamọ bá angọ-serimọmịnị otuama kị pẹrẹ, angọ-kụrọ bá ụyafịgha bara kị iroromị. (Ps. 73:3-7, 12) Psalm fun gẹẹ oweibị bei agbẹịgha yebo irorotimi bo kẹnị ifie laamị, Jehovah karịmịnị yọmị arere fa bara ụ mọ iroromị. Wó bolouịmbẹlẹgha yọ duonị ụ gbaamị: “Gbẹsịmị ịmịnị ine adụdụ mịẹ yalịyalị bá seimịẹgha bara ine barabo surumịnị yọbị afẹn fịrị.”—Ps. 73:13.
7. Wo pọwẹịgha ifiebo omịnị teeki mịẹ agbẹị-emi a o? (Bọlọụ kpọ dii.)
7 Psalm fun gẹẹ oweibị wó agbẹịgha iroromịnị yebo bụọmọ wẹrị ụ mịẹ suusụọgha. Ómịnị yemịẹ bịsẹyọ deimị. Ómịnị “Ọkpọnanaowei yalịyalị yọ duo sụọmị,” bịsẹ yọmị Jehovah wó agbẹịgha iroroye deimị. (Ps. 73:17-19) Jehovah wo ebidẹịn Ikie-oweimị, wo pọwẹịgha ifiebo nimi wẹrịemi. Omịnị tẹẹ ụ pịrị, Bible goo bá itu duo bomịnị tolumọyebo gbaa bara diwẹnịdaba, baratụa wo pịrị wẹrị bolouịmbẹlẹgha ifie-ama inemịnị. Bụụdọọnyeama kị wo mịẹ kpeke-kpekemịnị kpọ, Jehovah wo kụrọmọ bá dọọ adụdụ kọn wo pịrịmịnị.—Ps. 94:19.a
Psalm 73 Levite owei mị “Ọkpọnanaowei yalịyalị karịwarị bọlọụ ma tịẹ-emi” (Gooyọ 7)
“ỌKPỌNANAOWEI MỌ NAỊNMỊNỊ YỌBỊ” WO MỊẸ EBI ỤNDỤ MỌ UKIEMỌYE MỌ NANAMỊNỊ
8. Te zịnị ụwọụama kị Ọkpọnanaowei mọ naịnmịnị yọbị arere mịẹ paamọ wo pịrịmịnị a o?
8 Ọkpọnanaowei mọ naịnmịnị yọbị zịnị maa yelaa arereama emi. Bọlọụ yebị, omịnị Ọkpọnanaowei mọ naịndaba ebi ụndụ nanamịnị. Maamụkaramọ yebị, bei bọlọụ bọọ paamụ yeama gbelemọ yọbị kụrọ ukiemọye kọn wo pịrịdẹ. (Jer. 29:11) Wo wẹrị ebibara bei maa arerebo ditụa.
9. Jehovah mọ naịnmịnị yọbị tebara ka kị wo mịẹ pọwẹị nana dẹịnmịnị a o?
9 Jehovah mọ naịnmịnị yọbị ebi ụndụ akị wo pịrịmịnị. Biin kịmịama Ọkpọnanaowei inyenrinmịnị bara peigha, kịmịawọụ bei kiri bọọ timi inyenrinmịnị tuu kpọ nimigha, anịduonị bei bọlọụmị kịmịotu ba bei kiri bọọ timi inyenringha fa bara kị zụa kịmịama mọ pei wẹrịemi. Omịnị Bible duo tolumọ ẹrịdẹ baramị, Ọkpọnanaowei inyenrinmịnị “bá ómịnị arere mịẹpaamọ gesii bara akị ụ karịmịnị otubo pịrịmịnị.” (Heb. 11:6) Jehovah omịnị karịmụ bara ka kị wo tẹmẹ wẹrịemi. Anịduonị mị-tịẹkiri kpọ, omịnị wo agọnọ Daụ Jehovah gbaa bara dimịẹmịnị duonị pọwẹị nanamịnị.—Deut. 10:12, 13.
10. Psalm 37:29 gbaa bara didaba, mị bọlọụmị teeki paa eti akị Jehovah a tụa wẹrịemi otubo pịrịmịnị a o?
10 Biin kịmịama bei bọlọụmị gesii ukiemọye fa, anịduonị ámịnị fịrịyọ ámụ, ere nana, awọụ zii bá sịlị gbaịnwẹrị owadaba angọ kekeremụ yọ bẹtịbị kị iroromịnị. Ámịnị Ọkpọnanaowei kọn tụa ánị ụndụbo inyenringha. Anịa, Jehovah karịmịnị otubo ánị ukiemọyesẹ akị Jehovah ka tụa wẹrịemi. (Ps. 25:3-5; 1Tim. 6:17) Omịnị eti akị Ọkpọnanaowei mọ bá wó kikoromọdẹ yebo mọ a tụa wẹrịemi. Omịnị Paradise laadaba biin yeama mịẹmụ ukiemọye nana wẹrịemi, Jehovah karịtimi bẹseri bẹseri laamụ yọ kpọ sụọemi.—Psalm 37:29 goo.
11. Omịnị Ọkpọnanaowei mọ naịnmịnị yọbị, tebara ka kị Jehovah gbele bá wo kpọ gbele-emi a o?
11 Omịnị Ọkpọnanaowei mọ naịnmịnị yobị zịnị biin arereama emi. Gbaamaba, omịnị wo mịẹmịnị seibo a barasindaba, Jehovah wo bụọmọmụ bara kikoromọ wẹrịemi. (Isa. 1:18) Anịduonị, omịnị mịẹbụọmọdẹ sei-ama bụọmọ wẹrị wo mịẹ suusụọ agbẹịgha. (Ps. 32:1-5) Omịnị Jehovah mịẹ pọwẹịmọ daba wo kpọ pọwẹị nanamịnị. (Prov. 23:15) Gesii baramị, omịnị Ọkpọnanaowei mọ naịndaba biin ebiama ẹrịmịnị. Anịa, omịnị teeki mịẹwẹrị Ọkpọnanaowei mọ naịn-timimịnị a o?
ỌKPỌNANAOWEI MỌ “NAỊNTIMIMỤ BARAMỊ”
12. Ị́mịnị teeki mịẹwẹrị bo Ọkpọnanawei mọ naịndẹịndẹ a o?
12 Ị́mịnị benibiledẹ Christtuuduo kịmị ka paaemiaba, ị́mịnị biin yeama kị mịẹwẹrị bo Jehovah ikie-ụbọ a paadẹ. Ị́mịnị Jehovah Ọkpọnanaowei mọ bá wó tọbọụ Christ Jesus gbelemọ gesii tolumọ nimidẹ, iné mịẹdẹ seibo kpọ a barasindẹ, kụrọ peibolou akị Ọkpọnanaowei a tụadẹ, bá iné kụrọyọsẹ mịẹwẹrị Jehovah gbaa bara kị diwẹnịmịnị. Omịnị Ọkpọnanaowei mọ naịndẹịn dọụmịnịsẹ, pẹlẹgha bara bei yebo mịẹ agbẹị-emi.—Col. 2:6.
13. Te tara yeama kị baratụa wo pịrịwẹrị pẹlẹgha bara Jehovah mọ naịn dẹịnmịnị a o?
13 Teeki baratụa wo pịrịwẹrị Jehovah mọ naịn dẹịnmịnị a? (1) Omịnị pẹlẹgha bara Bible goo bá tolumọ angọ pịrị. Bịsẹbara wo mọ mịẹ-dọụmịnịsẹ, Bible gooyọ bẹtịbịgha, anịa olomu bara ka kị tolumọ angọ pịrị. Omịnị Ọkpọnanaowei ye-iroromịnị bara ma suotuu nimi, bá wó dọụ wẹrịemi yebo nimidá akị tụa inyenrin. (Eph. 5:15-17) (2) Jehovah akị wó tarị mịẹ wo dịamịnị biin ụwọụbo kẹrị irorodá wo peiboloubo mịẹkụrọmọ. (3) omịnị pẹlẹgha bara Jehovah dịsẹgha yebo golu bá bịsẹ yebo kẹrị mịẹmịnị otubo mọ kpọ ikie mịẹkụmọ.—Ps. 1:1; 101:3.
14. Omịnị 1Corinthians 10:31 gbaa bara didaba Wo ereinbosẹ mịẹmịnị yebo, tebara ka kị Jehovah mịẹ pọwẹị nanamịnị a o? (Fotobo kpọ dii.)
14 Wo wẹrị 1Corinthians 10:31 goo. Jehovah mịẹ pọwẹị nanamụ yebo mịẹmụ yọbị yelaa-emi. Bịsẹ yebo yetolumọyọ ámụ bá egberigbaayọ amú yọ beṭịbịgha. Jehovah mịẹ pọwẹị nanamịnị yebo wo erein duo mú erein laa inyenrinmịnị bara kpọ sụọemi. Gbaamaba, wo mịẹmịnị yesẹ aritụagha bá wo nana wẹrịemi yebo kọn dịẹpaamọ zịnịotu pịrịmịnị kpọ Jehovah mịẹ pọwẹị nanamịnị. (2Cor. 8:21; 9:7) Jehovah omịnị ụndụ didubamọ kpọ dọụ wẹrịemi. Omịnị agbẹị bara akị wuru bou, fịyaị fị bá wo angọbo kekeredaba, omịnị Jehovah mọ naịn dẹịnmịnị. Omịnị kala ye mịẹ kpọ Jehovah mịẹ pọwẹị nanamịnị, bá ómịnị wo tarị dẹịnmịnị.—Luke 16:10.
Agbẹị bara ka kị ogbo arụ yọụ, exercise mịẹ wo angọbo kekere, ebi fiyaị fị, egeni kẹrịakị, inyenrinbụọ nana wẹrịemisẹ Jehovah mịẹ pọwẹịmọ mịnị (Gooyọ 14)
15. Omịnị tebara ka kị kịmịotu mọ inyenrin kị Jehovah mọ dọụ wẹrịemi a o?
15 Jehovah ebimịẹ kịrịịye mịẹmịnị otubo mọ bá kịrịịye mịẹgha otubosẹ pịrịmịnị. (Matt. 5:45) Omịnị kpọ bịsẹbara kị mịẹ kị Jehovah mọ dọụ wẹrịemi. Gbaamaba, omịnị “kịmị dọọnmụ egberi gbaa kụmọ, kịmị mọ sụụ kụmọ, . . . bá dọọ bara ka kị kịmịsẹ mọ inyenrin.” (Titus 3:2) Bei yebo wo mọ ukie wẹrịemisẹ, omịnị wo mọ mọ́ kẹnị karịbụọ a fa otubo dịsẹmọgha fa. (2Tim. 2:23-25) Omịnị ifiebosẹ ebimịẹ kịmịotu pịrịmịnị yọbị wo mịẹ Jehovah mọ naịn dẹịnmịnị.
OMỊNỊ MỊẸKIRI KPỌ “ỌKPỌNANAOWEI MỌ NAỊNTIMI”
16. Psalm 73 gẹẹ owei bị kẹnị ifie laabị teeki iroro ma o?
16 Zụa ifieama iné mịẹkiridẹ yebo duonị, Jehovah ba ị́ tarịgha bara ị́mọ iroromịnị a? Wo tolumọ bụọmọdẹ yọmị, bịsẹ paa iroro ye kị Psalm 73 gẹẹ owei kpọ paamọmị. Ụ gbaamị: “Ine bụọbo ba kiri-gbelegha; ememele koro dọụmịnị bara kị paamị.” (Ps. 73:2) Ómịnị mọ kpọ gbaa baramị, ómịnị bo “boloukọn,” “ye-irorogha” bá Jehovah tọrụ yọbị “yenimigha bou-nama bara kị paadẹ.” (Ps. 73:21, 22) Ómịnị mịẹkiridẹ duonị, Jehovah ba ụ tarịgha bá ụ bụọmọgha fa bara kị iroro ma?
17. (a) Psalm fun gẹẹ owei bị suusụọ kpọ, teeki mịẹ ma? (b) Omịnị ụ paamọye duo teeki tolumọ akị a paaemi a o? (Fotobo kpọ dii.)
17 Psalm fun gẹẹ owei bị Jehovah ba ụ tarịgha bara kị iroro kpọ, bịsẹ iroro yebị timi alagha. Ómịnị suusụọ kpọ, ómịnị Jehovah mọ naịntimi agbẹị-emi bara nimimị. Ụ gbaamị: “Ị́mịnị [Jehovah] iné amabara bị kọn ị kẹrị-akịdẹ duonị; ịmịnị ifiebosẹ ị́mọ mó kị timimịnị. Ị́mịnị ị didụbamọ, bá iné egberibo kọn ị kekeremịnị.” (Ps. 73:23, 24) Omịnị kpọ wo mịẹ kiriyebo duonị suusụọ daba Jehovah wo peiboloubo mịẹ kụrọmọ bara tẹẹ. (Ps. 73:26; 94:18) Omịnị kụrọ sei kị mịẹ kpọ sei ma barasiindá waị Jehovah dọụbo, ómịnị wo “bụọmọmịnị” bara nimi. (Ps. 86:5) Omịnị suusụọ kụrọmọmịnị ifiebị, Ọkpọnanaowei mọ naịnmụ yọbị yelaa-emi.—Ps. 103:13, 14.
Omịnị tẹmẹangọ ma suusụọdaba, Jehovah naịndẹịnmụ yeama mịẹ bá ifiebosẹ tẹẹ ụ pịrị bá yetolumọyọ amú (Gooyọ 17)
“ỌKPỌNANAOWEI MỌ NAỊNTIMI” BẸSERI BẸSERI LAA
18. Tetuu kị duonị omịnị Jehovah mọ naịnmụ yọbị dụụ fa o?
18 Jehovah mọ naịnmụyọ mọ bá ụ nimimụyọ mọ dụụ fa. Bible gbaa amọ omịnị laa Jehovah ụwọụbo mọ, bá wó kịlịkịlị-nimiyebo mọ a “sụọtuu nimisingha fa.”—Rom. 11:33.
19. Psalm fun bọọ emi egberibo te ukiemọye ka kị wo pịrị ma o?
19 Psalm 79:13 gbaamị: “Omịnị, iné kịmịama bá iné anịnama, omịnị ị́ kule timi bẹseri bẹseri laamịnị; bá ziitu duo mú ziitu laasẹ omịnị ị́ tokonimịnị.” Ị́mịnị Ọkpọnanaowei mọ naịndẹịn mịnịmị, Ómịnị tarịama kọn ị́ pịrịtimi bẹseri bẹseri laamụ eti nana bá gbaa a paaemi: “Ọkpọnanaowei ine adụdụ bọọ emi opu-okuta bá ine dịẹpịrịye ka paatimi bẹseri bẹseri laamịnị.”—Ps. 73:26.
DUMA 32 Take Sides With Jehovah!
a Malafa, kpeke-kpeke bá bolouịmbẹlẹgha timi aladẹ kịmịama, ebi dọọn-zụọ kịmị baratụa-pịrịye dọụ wẹrịemi. Nimi bọlọụ amú dọụmịnịaba, Lẹwarị fun, No. 1 2023 dii.