Bụze Inyenrinbụọ Duomú Missionary Fịrị Wẹnịmị

Kụraị 1951 Vienna, Austria Catholic church amúmịnị daụ mọ yin mọ kị ị ziimị. Ịmịnị bụzẹmịnị kị gbaa kpọ, Ọkpọnanaowei emibara pei wẹrịemi duonị ifiebosẹ tẹẹbịbị mịẹmịnị. Ịmịnị esena kụraị baịbị, ị daụ Jehovah iseriotumọ koro Bible tolumọmị; ị yin kpọ tụụ ifie laamị á sụọmọ tolumọmị.

Omịnị Vienna Döbling tịịnmịnị ama ka timi Jehovah karị timimị. Omịnị kẹnị warịbolou bara ka kị fịrịwẹnị timimị. Omịnị kẹnị sụọmọ Bible goo, yetolumọyọ amú, bá angọ paamọ bẹnịị yọama mú fịrị wẹnị timimị. Ine zaụtimi ifiebị, ị daụ olomu tarị akị Jehovah a nanamụ bara kọn ị tolumọmị. Ị daụ ị mọ ine bịnaraụma mọ ụwọụpẹlẹ fịrị wẹnịmụ bara kọn tẹẹbịbị mịẹ timimị. Anịa bịsẹ ifiemị, ụwọụpẹlẹ fịrị wẹnịmụ yọbị ine ịkịọụ ma fa.

BEINMỌ BEINMỌ ỤWỌỤPẸLẸ FỊRỊ

Ịmịnị kụraị 1965, 14 years ka kị timi benibilemị. Mọabịkpọ, egberigbaa kịmịotu pịrịmụ yọmị kụrọ ị pịrịmị. Ịmịnị ifiebosẹ zịnịotu kala awọụama ebi ị dẹịn-emi bá á mọ mó naịn dịsẹmịnị. Ịmịnị benibile a laagha timi, Jehovah karịgha otuama mọ ikie kẹrị wẹrị ifiebosẹ ámọ mó wẹnị gbeleimị. Bịsẹ bara kị gbaa kpọ, ámịnị Jehovah iseriotugha duonị, ifiebosẹ ámọ mọ́ wẹnị gbeleimịnị yọbị ine ye-iroro ịkịọụ ma bụụdọọnmị. Bịsẹyọ dẹịnmọmụ yọmị kụrọ ị pịrịmị. Teekị baratụa ị pịrị ma o?

Bịsẹ ifiemị, kẹnị 16-years baịdẹ Dorothée tịịnmịnị bịnaraụ wo ituma bomị. Amịnị angọtụa warị duo mú warị laa egberi gbaamịnị yọbị ị dịsẹ kụrọmọmị. Ịmịnị dọlọ ánị a okosi, amịnị angọtụa ifiebosẹ egberigbaayọ a bomịnị. Ịmịnị yebị iroromị: ‘Ị daụ mọ yin mọ gesii bọọ emi, anịa Dorothée daụ mọ yin mọ gesii bọọ fa. Amịnị ánị dọọnmịnị yin mọ k’emi kị gbaa kpọ, ifiebosẹ egberigbaayọ a bọmịnị!’ Ánị mịẹdịa yemị ị dinẹmọ wẹrị fịrị wẹnị Jehovah pịrị dịsẹmị. Bịsẹ ifie bụọmị, alagha timi ịmọ Dorothée mọ ụwọụpẹlẹ fịrị wẹnị gbeleimị. Omịnị, bọlọụ ikise ụwọụpẹlẹ fịrị kị wẹnịmị, bịsẹ ifiemị vacation pioneer kị tịịn timimị, tuu ifie laamị omịnị siyain ụwọụpẹlẹ otuama paamị. Dorothée angọtụa egberi gbaamịnị baramị akị gbaamụ bara fa. Amịnị baratụa ị pịrịwẹrị bọlọụ kịmị mọ Bible tolumọmị. Timi kẹnị ifie laabị, ịmịnị warị duo mú warị laa, kịmịotu biin emiyọ, zịnị ụwọụama kọn egberi gbaamụ yọmị ba bụzẹ kagha.

Ịmịnị bọlọụ siyain ụwọụpẹlẹ fịrị wẹnị kụraịmị, Heinz tịịnmịnị Austrian emi bịnaowei wo ituma bomị. Ómịnị Canada wó bịnaowei warị amú ifie ka gesii tolumọmị, bịsẹ oweibị Jehovah iseriowei. Heinz bẹbẹ ụwọụpẹlẹ fịrị kị wẹnị timi wo ituma bomị. Ómịnị wo ituma bo ifiesẹ ịmịnị ụ dịsẹ kụrọmọmị. Anịa ómịnị missionary fịrị kị wẹnị dịsẹ-emi, ịmịnị ba missionary fịrị wẹnị dịsẹgha. Anịduonị bọlọụ ifiemị, ịmịnị ụ tarị wẹrịemi bara gbaagha. Timi omịnị zọzọ nimi ebimọbị, ịmọ Heinz mọ zọzọ nana wẹrị, Austria ka mú ụwọụpẹlẹ fịrị wẹnịmị.

MISSIONARY FỊRỊ WẸNỊ DỊSẸ NANAMỊ

Heinz ifiebosẹ ómịnị missionary fịrị wẹnị dịsẹ-emi bara gbaa ị pịrị timimị. Anịa ómịnị ị penimọgha, ómịnị kịmị kụrọmọ biibịbịama akị ị biimị, gbaamaba, “omịnị awọụ kpọ ziigha yọbị, omịnị wo egberigbaa fịrị wẹnị ebimọ bọlọụ dẹịn a paaemi a?” Ine bụze inyenrinbụọ duonị, missionary a paamụ yọmị ị mịẹ malafamị. Gesiibị ịmịnị ụwọụpẹlẹ fịrị wẹnịmịnị, mọabịkpọ missionary fịrị wẹnịmụ yọmị ị mịẹ malafa timimị. Mọabịkpọ, Heinz mọkpọ missionary fịrị gbelemọ egberiama gbaa ị pịrị timimị. Ómịnị ị kụrọmọ wẹrị baratụa zịnịotu pịrịmụ yọkị yelaa ine angọ dimịnị yọ dẹịn-emi bara gbaamị. Wó gbaa egberibo ị kụrọmọmị

Dọlọ dọlọ, ịmịnị kpọ missionary fịrị wẹnị dịsẹmị, omịnị Gilead School amúmụ fun tụamị. Anịa ịmịnị beke fiedị kagha duonị, ịmịnị ine beke fiemịnị bara mịẹ ebịmọ bara branch servant mọ gbaa ị pịrịmị. Ịmịnị tara kụraị kọn beke fie ebimọmụ bara tolumọ ifiemị, tamama bara omịnị Yugoslavian Salzburg, Austria emi itu amúmụ fun wo laamị. Omịnị sọnọma kụraị ka kị bịsẹyọ bọọ timi egberimị, kẹnị kụraị kpọ akị itu dii fịrị wẹnịmị. Serbo-Croatian fiemụ yọbị kụrọ-emi kị gbaa kpọ, omịnị biin Bible tolumọ kịmịama nanamị.

Kụraị 1979 branch office omịnị mú Bulgaria “embafou” bara gbaamị. Bịsẹ ibemị egberigbaa fịrị tịẹmọ wẹrịemi. Anịduonị omịnị wo “embafoumịnị” bolou ma egberi gbaagha. Mọabịkpọ omịnị egberi gbaamụ fun-ama sọwẹị Sofia tịịnmịnị ibe tịbị ama bọọ emi sọnran bịna-ereama pịrịmị. Ịmịnị ye-esiin kụrọmọmị, anịa Jehovah baratụa ị pịrịwẹrị fịrị wẹnịmị. Bịna-erebo ikoli warị a sụọmụ penimọye kị á laa kpọ ámịnị ye-esiingha bá bolouịmbẹlẹ bara fịrị wẹnịmịnị yọmị, ị kụrọmọ wẹrị Jehovah ogbomị kọn ị pịrịdẹ fịrịsẹ wẹnịmịnị bara tọnpẹlẹmị.

Omịnị waị Gilead school amúmụ fun tụamị, beị ifiemị ámịnị wo tịịnmị. Omịnị United State mịẹmịnị beke class ka múmụ bara kị tọn wẹrịmị. Anịa November 1981 laabị, Gilead School mị Wiesbaden, Germany branch bọọ paadẹ bara gbaamị.Omịnị Germany bẹlị kọn tolumọmịnị ye ka mú duonị, tolumọ yebo asụọtuu nimi dẹịnmị. Ogbomị wo fịrịmọ tẹ ye ka múmịnị a o?

SỤỤ PAAMỊNỊ AMA TIMI EGBERIGBAA FỊRỊ WẸNỊMỊ

Branch office wo fịrịmọ Kenya ka múmị! Anịa, Kenya branch office gbaa amọ omịnị ámọ mó naịn-emi yọ ka mú bara gbaamị, anị Uganda ibemị. Oia kụraị bụọdẹ ifiemị, Army otu Uganda daabụọ kẹrịakịmị, General Idi Amin, kị tịbị a timimị. Wó daatimi ifiemị, biin kịmịama ómịnị mọ baamị bá biin ogịzị kịmịama ụya fịmị. Kụraị 1979 bị General Idi Amin egiren otubo ụ penimọ wẹrị daa kasị duo ụ kọnsinmị. Ịmịnị sụụmịnị ibe ka mú, egberigbaamụ yọbị malafa-timimị. Anịa Gilead school mị omịnị eti akị Jehovah atụamụ bara kọnwo tolumọdẹ. Omịnị múmụ bara bibirinmị.

Uganda inyenrin mị kụrọ wo pịrịmị. Gbaamaba benii bá network pole kpọ ámọ seimọdẹ duonị, phone akị kịmị tịịnmụ yọ kpọ kụrọmị. . . . Dein laadaba kịmịama sibeye teimịnị. . . . Anịduonị dein laadaba kịmịsẹ warị akị angọ kaịmọmịnị, bá furu kịmịama, warịbo fini sụọbo kụmọ tẹẹbịbị kị mịẹ timimị.” Bụụdọọn yeama kị paamịnị kị gbaa kpọ, bịnaotubo tẹmẹanga bọọ bọlọụ bụọ timimị!

Kụraị 1982, ịmọ Heinz mọ Kampala laamị, anị Uganda ibe tịbị amabị. Omịnị bọlọụ sọnran agọnọ-oweibo, kọn Sam mọ Christina Waiswa mọ ánị sọnran awọụbo mọ bá ánị nia bịnaotu mọ kị sụọmọ inyenrinmị. Bịnaowei Waiswa mọ ụ taa mọ kẹnị ifie ka kị erein ma fịyaị fịmịnị kị gbaa kpọ, ámịnị egeni kẹrịakị inyenrinbụọ nana wẹrịemi. Omịnị Waiswa warị ma timi ifiemị, omịnị biin yeama kị tolumọ akịmị, bịsẹ yebo baratụa wo pịrịwẹrị missionary fịrị wẹnịmị. Gbaamaba omịnị beni koko bara nimimị, beni birisin-daba, bịsẹ biridẹ benibo kị gbaịn wẹrị kọn toilet flush timimị. Kụraị 1983, ịmọ Heinz mọ Kampala wo timimụ dọlọ ebi warị ẹrịmị.

Omịnị bịsẹyọ ma egberigbaa fịrị wẹnị yọbị pọwẹị nanamị. Kẹnị ifie omịnị agọnọweị ovurumị 4,000 dẹịn-emi fun-ama paamọmị! Kịmịbo kị wo angọ a sụọdẹịnmị. Ámịnị Ọkpọnanaowei didụbamọ bá Bible egberi kpọ a dịsẹ nanamị. Ị́mọ Heinz mọ 10 duo mú 15 kịmịama mọ Bible tolumọmị. Omịnị biin yeama akị á duo tolumọ akịmị. Gbaamaba, ámịnị weekbosẹ yetolumọyọ a bomịnị, duo bomịnị yọkị a laa-emi kị gbaa kpọ, ámịnị dẹịnsụọgha, ifiebosẹ ánị korobo dẹrị dẹrị k’emi.

Kụraị 1985 bá 1986 ovurumị, Uganda ibemị maa ifie sụụ paamị. Kala awọụama alagba sibe wẹrị ụwọụ duo bụọmịnị motorbo pẹlẹ wẹrị saị wẹrịemi yebo dii timi bara wo mọ ẹrịmị. Bịsẹ ifiemị, Jehovah kịlịkịlị nimiye mọ dọọ adụdụ mọ akị wo pịrịwẹrị ebi egberima dịsẹ nana wẹrịemị otu dọụ ẹrịmụ tẹẹbịbị omịnị mọ mịẹmị. Jehovah wo tẹẹbịbị parụmị. Kịmị egberima dịsẹ nanawẹrị peidaba, omịnị wo malafatimi yọ barafamịnị.

Omịnị egberigbaa zịnị ibe duo bo otu pịrị yọ kpọ pọwẹị nanamị. Gbaamaba, omịnị egberigbaa Murat mọ bá Dilbar Ibatullin mọ pịrịmị, ámịnị Tatarstan (Central Russia) kịmịama. Murat dọọnzụọ fịrị kị wẹnịmịnị. Bei maa otubo gesii kẹrịakị bá Jehovah karịtimi mị ifie laadẹ. Tuu ifie laamị, ịmịnị Tatjana Vileyska, Ukraine ibe kị duo bo eremọ gbeleimị, amịnị ifiebosẹ ditụa fịịmụ iroro yeama kị nanamịnị. Tatjana tuu ifie laamị benibilemị, amịnị waị Ukraine amụ́ wẹrị translation fịrị wẹnịmị.a

AYA BỤỤDỌỌN-YEAMA

Kụraị 1991 ịmọ Heinz mọ Austria embafouyọ amú ifiemị, zịnị ete amú egberigbaa fun branch office duo bo wo laamị: Bulgaria ibe ka múmịnị. Eastern Europe fomuun nana ifiemị, Jehovah iseriotu Bulgaria ibe egberigbaa fomuun nanamị. Bọlọụ ifiemị, ibemị egberigbaa fịrị tịẹmọ wẹrịemi duonị, omịnị fun-ama sọwẹị bịnaotubo yarị timimị. Omịnị waị bịsẹ ibe ma mú egberigbaa bara kọn wo fịrịmọdẹ.

Omịnị waị Uganda amú kụmọ bara gbaamị. Wo timi wẹrị yọ kpọ amú wo nana yebo kpọ kọn bá wo múdẹ bara kpọ gbaa bịnaotubo pịrịgha bara, ka Germany Bethel a múwẹrị, motor kọn wẹrị yọụ Bulgaria amúmị. Wo fịrịmọ mú Sofia ibe tịbị ama bọọ 20 egberigbaa otu bẹtịbị k’emi ama ka múmị.

Omịnị Bulgaria bị bụụdọọn-yeama nanamị. Bọlọụ yebị, omịnị bẹlị naagha. Bịsẹ ifiemị Bulgaria bẹlị ma timi wẹrị funbo anị The Truth That Leads to Eternal Life bá My Book of Bible Stories. Omịnị kịmịotu mọ Bible tolumọmụ yọbị kụrọ wo pịrịmị. Bụụdọọn-yeama k’emi kpọ, bei biingha bịnaotubo angọtụa egberigbaa fịrị wẹnị yọbị fịrị mịẹ bọlọụ bụọmị. Karịbụọ otubo, wo bọlọụ bụọmịnị baramị ẹrị ifie kị kụrọ dẹịn bụụndọọye paamị.

Kụraị 1994 ibemị emi karịbụọ ẹrẹbosẹ gẹẹtụa wẹrịemi fun mị Jehovah iseriotu ẹrẹ kọnsin bá agbẹịgha bara kọn wo mọ mọ́ inyenrinmị. Zụa bịnaowei-ama kpọ kẹrị kaịmị. News kpọ wo mịẹgha yeama kị gbaamị, Jehovah iseriotu ánị kala awọụbo bẹtịbị baágha anịa ámịnị ámọ mọ́ kẹnị karịbụọ emi otubo kpọ mịẹ ditụa fịịmịnị. Ịmọ Heinz mọ egberi gbaamụ yọmị kụrọ wo pịrịmị. Omịnị wẹnị bụọmịnịmị, kịmịotu gẹa wo pịrịmịnị, police tịịn wo kẹrị, bá yeama kọn wo gbeinmịnị. Wo funbo kpọ ba laa ibe ma sụọgha, warịama gbẹẹwẹrị yetolumọmụ yọ kpọ kụrọmị. Police otubo wo bẹnịị mịẹmịnị kẹnịyọ seimọmị. Ịmọ Heinz mọ naa bị paa kịmị golu inyenrinbụọ ẹrịgha wẹrịmị. Ámịnị Uganda otubo bara daabụọ egberi kẹrị akịgha! Teeki baratụa wo pịrịwẹrị mị bụụdọọnyebo ine ma o?

Ama bọọ emi bịnaotubo kẹnịsụọmọ inyenrin yọbị wo mịẹ pọwẹị nanamị. Ámịnị gesii nimi bá wo kọn á pịrị yebo á mịẹ pọwẹị nanamị. Kịmịsẹ zọzọ mọ naịn bá baratụa zọzọ pịrị. Omịnị kịmịotu tarị bá kọn wo pịrịdẹ fịrịsẹ akị baratụa kịmị pịrịdaba pọwẹị nanamịnị bara tolumọ nimimị.

Ifie bụọmịnịbị, yebo ebi bọlọụ-dẹịnmị. Ibemị kụraị 1998 wo Jehovah ẹrẹ kọn waị fun ma gẹẹ tụamị, bá biin egberi gbaa fun-ama kpọ bụọmọ Bulgaria ibe ma sụọmị. Timi 2004 kụraịmị aya branch ofice kẹrịwẹrị dịẹ Jehovah pịrịmị. Mị ereinmị 57 ituama kị Bulgaria bọọ emi, 2,953 egberi gbaamịnị otuama k’emi. Bụọdẹ egberigbaa kụraịmị, 6,475 kịmịama kị Memorial ma bomị. Bọlọụ ifiemị sọnran bịna-ereama kị Sofia a timimị, mị tịẹkirimị esena itu kị paadẹ! Gesiimị “biingha kịmị . . . bo ogịzị a paadẹ bara wo mọ ẹrịmị.”—Isa. 60:22.

ANGỌ BỤỤDỌỌN-YEAMA INEMỊNỊ

Ine angọmị biin dọọn-yọama nanamị. Kụraịama bụọdẹ, ine tịbị mọ bá angọbolou yeama sọụmịnị bara ámọ gbaamị. Engine akị angọbolou dii wẹrị India amú 12-hour ovuru akị bịsẹ sọụmịnị yebo zụa serimị. Omịnị India branch ka timi angọ ebi wẹrị, waị Bulgaria bo wẹrị egberigbaa fịrị wẹnịmị.

Anịa, Heinz ụ daụ dọọntimi Huntington dọọnmị ụ kpọ laamị. Ómịnị wẹnị, ẹrẹ, bá angọ tarụ tịẹmọ mọ́ yọ kpọ kụrọ ụ pịrịmị. Dọọnmị kụrọmịnịmị, ine bẹtịbị kị baratụa ụ pịrịwẹrị ye mịẹ a paadẹ. Timi kẹnị ifie laamị, ịmịnị ba kụrọ nana wẹrị ụ barịịgha fa iroroye nanamị. Anịa, kẹnị asịyaịpesi Bobi tịịnmịnị bịnaowei ifiebosẹ Heinz kọn tụa egberigbaayọ amúmịnị. Bobi, Heinz ebibara wẹnị bá ẹrẹ kị gbaa kpọ bụzeyọ nanagha, ómịnị ụ kẹrịwẹrị múmịnị. Baratụa pịrịye ị mọ dọụdaba, Bobi ịmịnị mọ tịịn timimị. Ị mọ Heinz mọ mị sei akpọmị tọbọụ ziigha bara tọnpẹlẹ kpọ, Jehovah Bobi kọn tọbọụ bara wo pịrịmị!—Mark 10:​29, 30.

Cancer dọọn kpọ Heinz kẹrịmị. Ị mịẹ bolou-ịmbẹlẹmọgha yọmị, ine tarị wẹrịemi yeimị 2015 kụraị ka fịịmị. Heinz fịịmị ịmịnị ba kekere ụbọ fa bara kị iroromị; Ómịnị kọkọ fịịdẹ bara peimụ yọmị kụrọ ị pịrịmị. Inẹ adụdụmị, ómịnị mọkpọ inyenrinmịnị! (Luke 20:38) Ịmịnị ifiebosẹ ụ kọn ị tolumọ ebi egberibo ukiemịnị. Omịnị peibolou nana bara biin kụraị kọn egberigbaa fịrị wẹnị yọbị ị mịẹ pọwẹịmọmị.

JEHOVAH BARATỤA-PỊRỊYEBỊ INE TỌRỤKẸRỊMỊ

Ị laamịnị dadiyebosẹ Jehovah baratụa ị pịrịmịnị. Jehovah mọkpọ baratụa ị pịrịwẹrị bụzeyọ dẹịnmọ bá kịmịotu tarịemi missionary fịrị wẹnị ụbọ ka paamị. (2Tim. 1:7) Ịmọ ine tuuraụ mọ, beinmọ beinmọ ụwọụpẹlẹ fịrị wẹnịmịnị yọbị Jehovah ị mọ kulemị. Bei ereinmị, ine bịnaraụma mọ a yei mọ Serbian Europe anga-emi ete ka timi egberigbaa fịrị wẹnịmịnị. Jehovah ị daụ tẹẹbịbịbị parụmị!

Ịmịnị Bible tolumọ nimi yọbị dọọ adụdụ akị ị pịrịmị. Jesus mịẹ barabị. Ịmịnị kpọ kụrọ ifieama ine “adụdụ” duo tẹẹbịbị mịẹmịnị. (Luke 22:44) Nadezhda, Sofia bọọ ine ituma bọọ emi bịnaotubo akị ị tarị bá ebi mịẹ ị dịamịnị yọbị, ine tẹẹbịbịbo kị parụmịnị bara ị mọ nimimị. Ámịnị ifiebosẹ ị tịịn á sụọmọ teimịnị yọmị ị mịẹ pọwẹị nanamịnị.

Ịmịnị ifiebosẹ fịị duo waị seribo ukiemọye bị kẹrị iroromịnị. Ị daụ mọ yin ánị warị bọlọụ ma tịẹ-emi, ámịnị bọlọụ zọzọ nana ifiemị ebi-emi bara kị ebi-emi. Ine bịnaraụma fịyaị tụọmịnị. Heinz wó ayeyan bọlọụ ma tịẹ-emi. Bei paa yebo iroromịnị yọbị baratụa ị pịrịwẹrị, agbẹịgha iroro yeama dẹịnmọ wẹrị Jehovah mịe ị pịrịdẹ yebo a tọrụkẹrịyọ mịẹdịamịnị.

Ine ụndụ bọọ a paadẹ yebo ukie wẹrị bọlọụ ma paamụ yebo iroromịnị yọbị, ịmịnị ine adụdụsẹ akị David Psalm 27:​13, 14: bọọ gbaa egberi ma tụa wẹrịemi “Jehovah ebi bara ịmọ kọn bei akpọ ma ẹrịmụ peibolou ịmọ nanagha wẹrị a, te yọkị ị ma timimụ timi ma o? Ukiemọye akị Jehovah a nana; bolou kụrọdá ye-esin kụmọ. Iin, Ukiemọye akị Jehovah a nana.”