1 Cronicas

21 Ket ni Satanas timmakder maibusor iti Israel ket ginargarina+ ni David a mangbilang iti Israel. 2 Gapuna ni David kinunana ken Joab+ ken iti papanguluen dagiti umili: “Mapankayo, bilangenyo+ ti Israel manipud Beer-seba+ agingga iti Dan+ ket iyegyo dayta kaniak tapno maammuak ti bilangda.”+ 3 Ngem kinuna ni Joab: “Ni Jehova inayonna koma kadagiti umilina ti maminggasut ti kaaduda.+ Saan aya, O apok nga ari, a kukua ida amin ni apok kas ad-adipen? Apay a tarigagayan ni apok daytoy?+ Apay nga isu rebbeng nga agbalin a pakaigapuan ti pannakabasol iti Israel?”

4 Ti sao ti ari,+ nupay kasta, nagballigi ken Joab, iti kasta rimmuar ni Joab+ ket nagna iti intero nga Israel, a kalpasan dayta isu dimteng idiay Jerusalem.+ 5 Ni Joab intedna ita ken David ti bilang ti pannakaipasalista dagiti umili; ket ti intero nga Israel nagdagup iti maysa a milion sangagasut a ribu a lallaki nga agasut iti kampilan,+ ken ti Juda uppat a gasut ket pitopulo a ribu a lallaki nga agasut iti kampilan. 6 Ket ti Levi+ ken ti Benjamin saanna nga impasalista iti tengngada,+ agsipud ta ti sao ti ari nakarimrimon idi ken Joab.

7 Ita daytoy a banag dakes idi kadagiti mata ti pudno a Dios,+ ket ngarud kinabilna ti Israel. 8 Gapuna ni David kinunana iti pudno a Dios: “Nagbasolak+ iti kasta unay ta inaramidko daytoy a banag. Ket ita, pangngaasim, palabsem ti biddut ti adipenmo;+ ta nagtignayak a simamaag unay.”+ 9 Ket ni Jehova nagsao ken Gad,+ ti managsirmata ni David,+ a kunkunana: 10 “Mapanka, ket masapul nga agsaoka ken David, a kunaem, ‘Daytoy ti kinuna ni Jehova: “Adda tallo a banag nga iturongko maibusor kenka.+ Mangpilika maipaay kenka iti maysa kadakuada, tapno aramidek dayta kenka.”’”+ 11 Iti kasta simrek ni Gad a napan ken David+ ket kinunana kenkuana: “Daytoy ti kinuna ni Jehova, ‘Agpilika, 12 no iti tallo a tawen maadda ti nakaro a bisin;+ wenno iti tallo a bulan maadda ti pannakapunas manipud sanguanan dagiti kalabanmo+ ket ti kampilan dagiti kabusormo kamakamennaka, wenno iti tallo nga aldaw maadda ti kampilan ni Jehova,+ ti mismo nga angol,+ iti daga, a ti anghel ni Jehova ti mangyeg iti pannakadadael+ iti intero a teritoria ti Israel.’ Ket ita kitaem no ania ti isungbatkonto iti Daydiay nangibaon kaniak.” 13 Gapuna ni David kinunana ken Gad: “Makariribuk unay dayta kaniak. Pangngaasim, bay-annak a matnag iti ima ni Jehova,+ ta adu unay ti asina;+ ngem iti ima ti tao saannak a bay-an a matnag.”+

14 Kalpasanna nangipaay ni Jehova iti angol+ iti Israel, iti kasta manipud iti Israel pitopulo a ribu a tattao ti napasag.+ 15 Mainayon pay, ti pudno a Dios nangibaon iti maysa nga anghel idiay Jerusalem tapno dadaelenna dayta;+ ket apaman a rinugianna ti nangdadael, nakita ni Jehova dayta ket nangrugi a pagladingitanna ti didigra;+ ket ngarud kinunana iti anghel a mangdaddadael idi: “Umanayen!+ Ita ibabamon ta imam.” Ket ti anghel ni Jehova sitatakder idi iti asideg ti pagirikan ni Ornan+ a Jebuseo.+

16 Idi intangad ni David dagiti matana, nakitana ti anghel ni Jehova+ a sitatakder iti baet ti daga ken ti langlangit a siiiggem iti naasut a kampilanna+ a nayunnat a naipaturong iti Jerusalem; ket ni David ken dagiti lallakay, a naabbongan iti tinakpil,+ dagus nga inruknoyda dagiti rupada.+ 17 Ket kinuna ni David iti pudno a Dios: “Saan aya a siak idi ti nagkuna a mabilang dagiti umili, ket saan aya a siak ti nagbasol ken di pagduaduaan a nakaaramid iti dakes?+ No maipapan kadagitoy a karnero,+ ania ti naaramidda? O Jehova a Diosko, ta imam, pangngaasim, agdisso koma kaniak ken iti balay ni amak; ngem saan nga iti ilim,+ maipaay iti pannaplit.”

18 Ket ti anghel ni Jehova, iti biangna, kinunana ken Gad+ a sawenna ken David a rebbeng a sumang-at ni David tapno mangipatakder iti maysa nga altar ken Jehova iti pagirikan ni Ornan a Jebuseo.+ 19 Gapuna simmang-at ni David gapu iti sao ni Gad a sinaona iti nagan ni Jehova.+ 20 Kabayatanna, timmaliaw ni Ornan+ ket nakitana ti anghel; ket aglemlemmeng idi ti uppat nga annakna a kaduana. Ita ni Ornan agir-irik idin iti trigo. 21 Gapuna dimteng ni David agingga ken Ornan. Idi a kimmita ni Ornan ket nakitana ni David,+ dagus a rimmuar manipud iti pagirikan ket nagruknoy ken David a ti rupana dumanon iti daga. 22 Idin ni David kinunana ken Ornan: “Itedmo kaniak ti disso ti pagirikan, tapno mangibangonak iti dayta iti altar ken Jehova. Itedmo dayta kaniak maipaay iti kuarta+ nga apag-isu,+ iti kasta ti pannaplit+ mapagsardeng kadagiti umili.” 23 Ngem ni Ornan kinunana ken David: “Alaem dayta kas kukuam,+ ket ni apok nga ari aramidenna koma no ania ti naimbag kadagiti bukodna a mata. Kitaem, itedko ti bakbaka+ maipaay iti datdaton a mapuoran ken ti pagirik+ a pasagad maipaay iti kayo+ ken ti trigo kas daton a bukbukel. Ti isuamin itedko.”+

24 Nupay kasta, ni Ari David kinunana ken Ornan: “Saan, no di ket di bumurong a gatangek maipaay iti kuarta nga apag-isu,+ agsipud ta saankonto nga awiten ti kukuam nga ipan ken Jehova tapno mangidatonak kadagiti mapuoran a sakripisio nga awan bayadna.” 25 Gapuna ni David nangted ken Ornan maipaay iti disso kadagiti siklo a balitok nga agdagsen iti innem a gasut.+ 26 Kalpasanna nangbangon sadiay ni David iti altar+ ken Jehova ket nangidaton kadagiti mapuoran a sakripisio ken kadagiti sakripisio a pakikaykaysa, ket immawag ken Jehova,+ a simmungbat ita kenkuana babaen ti apuy+ manipud iti langlangit iti rabaw ti altar ti daton a mapuoran. 27 Mainayon pay, ni Jehova binilinna ti anghel,+ nga iti kasta insublina ti kampilanna iti kalubanna. 28 Iti dayta a tiempo, idi nakita ni David nga isu sinungbatan ni Jehova idiay pagirikan ni Ornan a Jebuseo, intuloyna ti agisakripisio sadiay.+ 29 Ngem ti tabernakulo ni Jehova nga inaramid ni Moises idiay let-ang ken ti altar ti daton a mapuoran addada idi iti dayta a tiempo iti nangato a disso idiay Gabaon.+ 30 Ket saan a nakapan ni David iti sanguanan dayta tapno umuman iti Dios, ta isu napagkullayaw+ gapu iti kampilan ti anghel ni Jehova.