1 Cronicas
22 Idin kinuna ni David: “Daytoy ti balay+ ni Jehova a pudno a Dios, ket daytoy ti altar+ a maipaay iti daton a mapuoran nga agpaay iti Israel.”
2 Kinuna ita ni David nga iyeg a pagkaykaysaen dagiti ganggannaet nga agnanaed+ iti daga ti Israel, ket kalpasanna intudingna ida kas agtiktikap iti bato+ tapno agtikapda iti napagkuadrado a batbato+ maipaay iti panangibangon iti balay ti pudno a Dios. 3 Ket nangisagana ni David iti nakaad-adu unay a landok maipaay a lanlansa kadagiti ridaw ti ruruangan ken maipaay kadagiti pangipit, ken kasta met ti gambang iti kaadu a saanen a matimbang,+ 4 ken kasta met dagiti sedro a kayo+ nga awanan bilang; ta dagiti Sidonio+ ken dagiti taga Tiro+ nangyegda ken David iti nakaad-adu unay a sedro a kayo. 5 Iti kasta kinuna ni David: “Ni Solomon nga anakko agtutubo ken nalami,+ ket ti balay a maibangon maipaay ken Jehova naringbaw iti kinatan-ok+ maipaay iti napintas+ a pakaidumaan kadagiti amin a daga. Agisaganaak koma, ngarud, maipaay kenkuana.” Gapuna nagisagana ni David iti nakaad-adu unay sakbay ti ipapatayna.+
6 Mainayon pay, inayabanna ni Solomon nga anakna tapno bilinenna a mangibangon iti balay a maipaay ken Jehova a Dios ti Israel. 7 Ket ni David kinunana ken Solomon nga anakna: “No maipapan kaniak, nagbalin nga asideg iti pusok+ ti panangbangon iti balay a maipaay iti nagan+ ni Jehova a Diosko. 8 Ngem ti sao ni Jehova dimteng a maibusor kaniak, a kunkunana, ‘Nangibuyatka iti nakaad-adu unay a dara,+ ket nakigubatka iti dadakkel a gubgubat.+ Saankanto a mangibangon iti balay a maipaay iti naganko,+ ta adu a dara ti imbuyatmo iti daga iti sanguanak. 9 Adtoy! Adda anak a lalaki+ a mayanak kenka. Isu agbalinto a natalinaay a lalaki, ket pudno unay nga ipaayakto iti inana manipud kadagiti amin a kabusorna iti intero nga aglikmut;+ ta Solomon+ ti agbalinto a naganna, ket ti talna+ ken kinaulimek itedkonto iti Israel iti kaaldawanna. 10 Isunto ti mangibangon iti balay a maipaay iti naganko,+ ket isu agbalinto a maysa nga anak+ kaniak, ket siak maysa nga ama+ kenkuana. Ket pudno unay nga ipasdekkonto a sititibker ti trono ti kinaarina+ iti Israel agingga iti tiempo a di nakedngan.’
11 “Ita, anakko, adda koma kenka ni Jehova, ket masapul nga agbalinka a naballigi ket ibangonmo ti balay ni Jehova a Diosmo, kas iti sinaona maipapan kenka.+ 12 Isuna laeng ta ikkannaka koma ni Jehova iti sirib ken pannakaawat,+ ket mangted koma kenka iti bilin maipapan iti Israel nga isu ti panangsalimetmet iti linteg ni Jehova a Diosmo.+ 13 Iti kasta agbalinkanto a naballigi+ no annadam nga itungpal dagiti alagaden+ ken dagiti hudisial a pangngeddeng+ nga imbilin ni Jehova+ ken Moises maipapan iti Israel. Bumilegka ken pumigsaka.+ Dika agbuteng+ wenno uray agkullayaw.+ 14 Ket adtoy bayat ti pannakaparigatko+ nangisaganaak maipaay iti balay ni Jehova iti sangagasut a ribu a talento a balitok+ ken maysa a milion a talento a pirak, ket ti gambang+ ken ti landok+ awan ti mabalin a pannakatimbangda agsipud ta immabutda iti kasta a kaadu; ket nangisaganaak iti kaykayo ken batbato, ngem nayonamto dagita. 15 Ket adda kenka ti dakkel a bilang dagiti managaramid iti trabaho, dagiti agtiktikap iti bato ken trabahador iti bato+ ken kayo ken tunggal maysa a nasigo iti tunggal kita ti trabaho.+ 16 Ti balitok, ti pirak ken ti gambang ken ti landok awan ti mabalin a pannakabilangda.+ Tumakderka ken agtignayka,+ ket adda koma kenka ni Jehova.”+
17 Ket imbilin ni David kadagiti amin a prinsipe ti Israel a tulonganda ni Solomon nga anakna: 18 “Saan aya nga adda kadakayo ni Jehova a Diosyo,+ ket saan aya nga impaayannakayo iti inana iti intero nga aglikmut?+ Ta intedna iti imak dagiti agnanaed iti daga, ket ti daga naparukma iti sanguanan ni Jehova+ ken iti sanguanan ti ilina. 19 Ita ipamaysayo ti pusoyo ken ti kararuayo+ nga agimtuod ken Jehova a Diosyo,+ ket tumakderkayo ken bangonenyo ti santuario+ ni Jehova a pudno a Dios,+ tapno ipanyo ti lakasa+ ti tulag ni Jehova ken dagiti nasantuan nga aruaten ti pudno a Dios iti balay a naibangon a maipaay iti nagan+ ni Jehova.”